Okuhapopi Nokuheiviko Katyinthyilika Okulongesa Vakuetu

MO 1910 ovo tate vatunda ko Tbilisi, mo Georgia, availukila ko Canadá. Avakakala mongalandya imwe onthutu popepi no Pelly, mo Saskatchewan, koutakelo wo Canadá. Natyitwa mo 1928 iya tuatyitwa 6 mahi ame ndyinkhelo. Tate wankhia etyi kuakamba onohanyi epandu opo ndyityitwe iya me ankhi etyi nkhele ankho ndyimututu. Etyi pakala katutu, omphange yange Lucy ankho una omanima 17 nae ankhi. Titiyu yetu Nick ngae ututekula.

Nthiki imwe puetyi ndyimona, ombunga yange aimono etyi nakuata komutyila wonkhambe yetu. Avawele owoma avasoko okuti hamwe mainthyane, avandyihana opo ndyiiyeke. Mahi, ame aneheveleuka, mokonda hityiivite tyina vandyihana. Mahi onkhambe ayahanthyane. Okuhimbikila onthiki oyo, ombunga yange aimbuka okuti ndyimpholo.

Omapanga ombunga yange avati otyiwa ndyipakwe mosikola muna ovana vakuetu onompholo. Titiyu yange anthuala kosikola yo nompholo ko Saskatoon, mo Saskatchewan. Osikola oyo ankho ikala kokule neumbo lietu, iya mokonda ankho ndyina vala omanima etano, ankho ndyina owoma. Ankho ndyikatalelapo vala ombunga yange po nofelia. Konyima, andyityivili okupopia elaka lio nompholo, pahe ankho ndyinyana novana vakuetu.

OKULILONGESA OTYILI TYO MBIMBILIYA

Mo 1939 omphange yange anepwa na Bill Danylchuck iya ame nomphange yange Frances atutekulwa navo. Mombunga yetu, ovo vatetekela okulilongesa Ombimbiliya Nonombangi mba Jeova. Tyina ndyikahi monofelia, valinga atyiho vevila opo vandongese etyi vekahi nokulilongesa Mombimbiliya. Mahi ankho katyapepukile okutomphola nonthue, mokonda ankho kavetyivili okupopia elaka lio nompholo. Mahi nongotyo ankho vaimbuka okuti ame ndyihole ovipuka ndyikahi nokulilongesa konthele ya Jeova. Naimbuka okuti etyi valinga tyelikuata netyi Ombimbiliya ipopia, ngotyo andyiende navo movilinga viokuivisa. Pakala katutu andyihande okumbatisalwa, iya mu 5 ya Tungonkhe yo 1941 andyimbatisalwa na Bill metangi liovivela lieyuliswa omaande apolwa monyombo. Ankho atenda unene!

Mo 1946 puetyi ndyili monofelia, atueende kotyonge ko Cleveland, mo Ohio, ko Amelika. Onthiki yotete, onomphange mbange ankho vanthyonekela ovipuka vikahi nokupopiwa. Mahi monthiki ya vali, andyihambukwa etyi nakapumphama potyikundyi tyo nompholo vekahi nokupitiyilwa otyonge. Pahe ankho ndyipondola okunoñgonoka nawa-nawa etyi tyikahi nokupopiwa momalongomona!

OKULONGESA OTYILI

Pomuvo opo, Ovilwa Viavali Viouye Auho ankho viamanuhuka, iya ovanthu ankho vahanda okulekesa okuti ovakuatyili kotyilongo tyavo. Mahi etyi ame natunda kotyonge andyikondoka kosikola, ankho natokola okukala omukuatyili ku Jeova. Tupu andyiyekepo okufenda epandela nokuimba o ino, nokuhinangela ovipito vio motyilongo. Tupu andyiyekepo okuenda kokapela nomapanga ange. Ovanthu vo kosikola avanumana, avehimbika okundeva nokupopia omatutu konthele yange opo ndyipilulule omalusoke ange. Vana ndyilongeswa navo, avaimbuka ovitateka ndyina iya mokonda yotyo, andyikala no nomphitilo ononyingi mbo kuveavela oumbangi. Vamwe puaava tulongeswa navo, okukutikinyamo Larry Androsoff, na Norman Dittrick na Emil Schneider, avetavela otyili iya nkhele vekahi nokuumbila Jeova.

Tyina ankho ndyikatalelapo epundaumbo limwe, apeho ankho ndyilinga ononkhono ononene mbokuavela oumbangi ko nompholo. Mongeleka, mepundaumbo lio Montreal naile pomphangu imwe peliongiyila onompholo. Ame andyiavela oumbangi Eddie Tager, omukuendye ankho ulinga onthele yotyikundyi tyimwe tyo nongangala. Alo ankhia ankho ukahi mawaneno lielaka lio nompholo mo Laval ko Quebeke. Tupu andyivasi omukuendye umwe utiwa Juan Ardanez. Ngo vanthu voko Bereia vokohale, nae walingile omaovololo opo atale inkha etyi ekahi nokulongeswa tyikahi umwe Mombimbiliya. (Atos 17:10, 11) Nae etavela otyili, akala omukulu wewaneno ko Ottawa, mo Ontario, alo ankhia.

Mo 1950 andyiilukila ko Vancouver. Namphila ndyityihole tyokuivisa ko nompholo, mahi ame nalumwe mandyilimbwi etyi naivisa komukai umwe wiivako utiwa Chris Spicer, navasa metapalo. Etavela omukanda nemuavela iya ankho uhanda ndyilivase nomulume wae, Gary. Andyiende peumbo liae, atutomphola ehimbwe, ame ankho ndyihoneka pomukanda ngwe atange tupu anthyonekela. Apalambe omanima amwe otyo tuhelimono vali, mahi monthiki imwe atulivasi motyonge ko Toronto, mo Ontario. Gary ambatisalwa monthiki oyo. Ongeleka oyo yandongesa okuti tuesukisa okutualako okuivisa, mokonda onthue katutyii olie povanthu tuivisa metavela otyili

Konyima, andyikondoka ko Saskatoon. Andyivasiko omukai umwe wandyita opo ndyilongese Ombimbiliya ovana vae vevali ovakainthu omapaha vahapopi tupu veheiviko, vatiwa o Jean na Joan Rothenberger. Ankho valongeswa kosikola yo nompholo oku ame nalongesilwe. Apakala vala katutu, ovakainthu ovo vevali navo ankho valongesa vakuavo kosikola ovipuka ankho vekahi nokulongeswa. Mokonda yotyo, ovanthu vetano puava ankho valongeswa navo avakala Onombangi mba Jeova. Umwe puvo o Eunise Colin. Enima liahulilila nalongeswa kosikola yo nompholo opo namona Eunise. Pomuvo opo, wamphele olepusatu amphulu inkha nahanda okukala epanga liae. Konyima, akala omunthu wakolela vali unene momuenyo wange. Akala omukai wange!

Etyi me ya Eunise aimbuka okuti ukahi nokulilongesa Ombimbiliya apopila omutumini wo kosikola opo ailike Eunise okulilongesa Ombimbiliya. Namphila omutumini wo kosikola ayumbilehi omikanda viae, nongotyo Eunise watuaileko nekolelo mu Jeova. Puetyi ankho ahanda okumbatisalwa, ovo tate yae avemutolela okuti: “Mokonda mokala Ombangi ya Jeova una okutunda meumbo!” Etyi atuula omanima 17, Eunise atundu meumbo iya akakala meumbo lio Nombangi mba Jeova. Atualako okulilongesa, konyima ambatisalwa. Atulinepe mo 1960 iya ovo tate yae aveheya potyipito tyetu. Mahi mokueenda kwo manima avakala nonthilo nonthue mokonda yonkhalelo tutekula ovana vetu.

JEOVA WANKHUATESILEKO

Mokonda ame no mukai wange katupopi tupu katuiviko, ankho tuna otyitateka tyokulongesa ovana vetu epandu-vali veivako. Mahi onthue ankho tuna onthumbi yokuti vei elaka lio nompholo, ngotyo ankho tupondola okupopia navo nokuvelongesa otyili. Ovakuatate no nomphange mewaneno ankho vetukuatesako unene. Mongeleka, he umwe etuhonekela opo etupopile okuti omona wetu ankho ukahi nokupopia ovipuka viasila Mondyuo yo Maliongiyo. Otyo atyituavela omphitilo yokumuviyula. Ovana vetu vekuana,​—James na Jerry na Nicholas na Steven​—ovakulu wewaneno iya vaumbila Jeova nekolelo kumwe nombunga yavo. Tupu, Nicholas no mukai wae, Debora, vakuatesako okupitiya elaka lio nompholo mo mbetele yoko Grã-Bretanha, Steven no mukai wae, Shannan, tupu navo vapitiya elaka lio nompholo ko Estados Unidos.

Etyi kuakamba vala katutu opo tutuukise omanima 40 otyinepo, omukai wange Eunise aipawa nouvela utiwa cancer. Namphila ankho ena ovitateka ovio, ekolelo liae metutilo liatuaileko tyapama. Ndyikevelela onthiki matukelivasa vali.

Mu Hitandyila yo 2012, andyitoko andyiteke olupati. Andyiimbuka okuti nesukisa okukuatesiwako, mokonda yotyo andyiilukila keumbo lio mona wange. Pehepano tukahi mewaneno litiwa Calgary lielaka lio nompholo, omu ndyitualako okuundapa ngo mukulu wewaneno. Etyi otyikando tyotete ndyikahi mewaneno lio nompholo! Ngotyo oñgeni netyivila okupameka oupanga wange na Jeova omanima aeho nakala mewaneno lio Ingelesi? Jeova wankhuatesako. Wafuisilepo omulao wae wokutekula onosona. (Salmo 10:14) Ame ndyipandula unene ovanthu ankho vahoneka pomukanda etyi tyikahi nokupopiwa mewaneno, naava velilongesa elaka lio nompholo navana vapitiya.

Ovikando vimwe ankho pena ovipuka nahanoñgonoka ine ankho ndyilitehelela okuti petupu omunthu utyivila okukuatesako onompholo. Ovikando vimwe ankho ndyinumana andyisoko okuyekako, mahi andyisoko konondaka Petulu apopila Jesus mbati: “Tatekulu okulie matwii nako? Ove una onondaka mbomuenyo uhapu.” (João 6:​66-68) Ngetyi Ovakuatate ovanyingi no nomphange onompholo velilongesa otyili kohale ankho vesukisa okupwa-elundo, naame nelilongesa okupwa-elundo. Ame nelilongesa okuyumba onthumbi mu Jeova no meongano liae, iya otyo tyandyetela ouwa. Pehepano melaka lio nompholo muna omikanda ominyingi, iya ndyina ehambu lio kuenda komaliongiyo no vionge vilingilwa Melaka lio Nompholo lioko Amelika. Tyotyili, ame ndyina ehambu liokuumbila Jeova, Huku yetu omunene.