Okuti Ankho Utyii-Ale?

Omokonda yatyi Jesus aihanene ovalume valandesila ovinyama mondyuo ya Huku ko Jerusalei okuti “ovimphulu”?

MO Evandyeliu ya Mateus tutangamo okuti: “Jesus anyingila mondyuo ya Huku, ataata-mo ovalandesi novalandi, apinaununa onomesa mbovakumani vonombongo novipundi via vana ankho valandesila-mo onopomba. Iya evepopila okuti: ‘Tyahonekwa okuti: “Ondyuo yange maikaihanwa okuti ondyuo yomalikuambelo” mahi onwe mukahi nokuilinga eleva liovimphulu.’”​—Mateus 21:12, 13.

Ehipululo lilekesa nawa okuti ovalume valandesila mondyuo ya Huku ankho vena otyituwa tyokuteneka ovipuka. Mongeleka, onopomba ankho ovinyama vipondola okulandwa novanthu vahepa opo valinge ovilikutila. Mahi, ova Judeu vokohale vahonekele okuti motyita tyotete konyima ya Kristu onopomba onombali ankho mbulanda ombongo ike yotyivela (denário de ouro.) Omunthu ankho una okuundapa ononthiki 25 opo akale nombongo oyo. Onopomba ankho mbatena iya ovanthu vahepa ankho kaveivili okuilanda. (Levítico 1:14; 5:7; 12:6-8) Omulongesi umwe utiwa Simeão Gamaliel wanumanene unene konthele yotyo atepulula ovilikutila ova Judeu ankho vahanda okulinga. Liwa-liwa, ombongo ankho ilanda onopomba aitepuluka.

Ngetyi tuetyimona, ovanthu ankho valandesila mondyuo ya Huku ankho vaovola okumonena-mo. Otyo Jesus eveihanena okuti “ovimphulu.”