Sesusi Usukukisa Ondywo ya Huku

Pondyovo yenima 30 Pomuvo wa Kilisitu, Sesusi aende noko Selusalei. Mepunda-umbo ankho muna ovanthu ovanyingi veya ko Pasikwa. Povipito ovio, ovanthu valinga ovilikutila viovinyama mondywo ya Huku. Tyiti umwe ava vaetelela ovinyama, ava veya vala okulanda mo Selusalei.

Etyi Sesusi ehika mondywo ya Huku, uvasa ovanthu vamwe valandesila-mo ovinyama. Vekahi nokulingila ovitanda mondywo yokufendela Siovaa! Oityi Sesusi alingile? Akwata epanda atahe-mo onongi nonopomba nonongombe mondywo ya Huku. Akunyuna onomesa mbovalandesi, onombongo mbavo ambutokela pohi. Sesusi apopila ovalume vokulandesa onopomba okuti: ‘Polei-po ovipuka vienyi! Ondywo ya Tate yange ha yokulingila ovitanda!’

Ovanthu ankho veli mondywo ya Huku avahuvu unene neetyi Sesusi alinga. Ovalongwa vae avahinangela eulo lipopia Mesiya liati: ‘Okuta ombili ondywo yove matyindi.’

Menima 33 Pomuvo wa Kilisitu, Sesusi ataata vali ovanthu valandesila mondywo ya Huku. Ankho wahanda ovanthu aveho vakale nonthilo nondywo ya Tate yae.