Okuti Jeova Otyiholamo Tyove?

1. Mokonda youkuankhali, oñgeni ovaumbili ovanyingi va Huku velitehelela?

APOSTOLU Paulu wahoneka okuti: “Ame ndyipongo!” (Romanos 7:24) Hono, ovafendi ovanyingi va Huku navo velitehelela nga Paulu. Omokonda yatyi? Omokonda namphila tuhanda okuhambukiswa Jeova, atuho tuapiñgana onkhali iya tupengesa. Ngotyo, pamwe tupondola okukala tyasoya tyina tupengesa. Ovakristau vamwe valingile onkhali onene velitehelela okuti Jeova nalumwe meveevela.

2. (a) Oñgeni o Salmos 34:22, ilekesa okuti ovanthu va Huku kavesukisile okulivela onombei? (b) Oityi matulilongesa monthele ei? (Tala okakasa kati: “Etyi Tulilongesila-ko ine Otyilekeso Tyovipuka Mavikamoneka Komutwe?”)

² Ombimbiliya itupopila okuti inkha Jeova ukala otyiholamo tyetu, kamatulivele onombei. (Tanga Salmos 34:22.) Ngotyo, oityi tyihangununa okuholama mu Jeova? Oityi tuesukisa okulinga inkha tuhanda Jeova akale nokankhenda nonthue iya etuevela? Opo tuvase omakumbululo omapulo oo, matulilongesa konthele yomapunda-umbo okuholama ankho avasiwa mo Isilayeli yo kohale. Epongiyo olio ankho lilinga onthele yomphango Yovitumino, mahi omphango oyoyapwa mo Pendekoste yenima 33. Ovitumino ovio viatunda ku Jeova. Ngotyo, epongiyo liomapunda-umbo okuholama litulongesa oñgeni Jeova atala onkhali, nauna walinga onkhali iya nauna welivela. Tete, matutale omokonda yatyi mo Isilayeli ankho muna omapunda-umbo okuholama iya oñgeni ovipuka ankho vilingwa.

“HOLOVONEI OMAPUNDA-UMBO OKUHOLAMA”

3. Oityi ova Isilayeli ankho vena okulinga omunthu wokuaipaa mukuavo?

³ Jeova ankho usukalala unene tyina omunthu amaipawa. Moluotyo, inkha omunthu umwe ankho wiipawa, ombunga yae nayo ankho iipa una wokuaipaa mukuavo. (Números 35:19) Una wokuaipaa mukuavo ankho una okufeta omuenyo wae mokonda waipaa omunthu wehena etyi alinga. Otyitumino otyo tyakuatesileko okusukukisa Otyilongo Tyalaelwe o ova Isilayeli. Jeova wevepopila okuti: “Muahasilisei otyilongo mukahi,” mokunengula ohonde, tyihangununa okuipaa omunthu.—Números 35:33, 34.

4. Inkha omunthu waipaa mukuavo motyiponyo, oityi ankho tyina okulingwa?

⁴ Mahi, inkha omunthu waipaa mukuavo motyiponyo? Namphila ahalingilile tyawina, no ngotyo waipaa omunthu uhena etyi alinga iya uvelwa onombei mokonda yotyo. (Gênesis 9:5) Tyina otyo tyamamoneka-po, Jeova wevepopila okuti vena okukala nokankhenda nae. Omuipai ankho una okuhatekela mepunda-umbo liokuholama opo ahavasiwe nombunga ya una aipaa. Putyina amanyingila mepunda-umbo olio, ngotyo ankho wavasa ondyakulilo. Mahi, ankho una okukala-ko alo omunene nakwa amankhi.—Números 35:15, 28.

5. Oñgeni epongiyo liomapunda-umbo okuholama litukuatesako okunoñgonoka vali nawa Jeova?

⁵ Epongiyo liomapunda-umbo okuholama lialingwa na Jeova, kalialingilwe novanthu. Jeova watumine Josue okuti: “Popila ova Isilayeli ‘veliholovonene omapunda-umbo okuholama.’” Omapunda-umbo oo ankho “akolela” unene ku Jeova. (Josué 20:1, 2, 7, 8) Jeova wapopia okuti omapunda-umbo akola. Ngotyo, epongiyo olio litukuatesako okulilongesila vali unene konthele ya Jeova. Mongeleka, otyo tyikuatesako okunoñgonoka okankhenda ka Jeova. Tupu tyitulongesa okuti tuna okutilila mu Jeova.

UNA “OKUPOPILA OVAKULU ETYI TYAENDAPO”

6, 7. (a) Popia oityi ankho ovakulu vena okulinga pokukoyesa omunthu waipaa mukuavo motyiponyo. (Tala olutalatu pefo pahimbikila onthele.) (b) Omokonda yatyi ankho onondunge omunthu waipaa mukuavo okukapopia novakulu?

⁶ Inkha omu Isilayeli waipaa mukuavo motyiponyo, ankho una okuhatekela kepunda-umbo liokuholama iya tyina amehiki kombundi “apopi etyi tyaendapo” kovakulu vomepunda-umbo olio. Iya ovakulu ankho vena okumutambula nawa. (Josué 20:4) Tyina pamalambe omuvo umwe, vena okumutuma opo akoyeswe novakulu vomepunda-umbo omu alingila onkhali. (Tanga Números 35:24, 25.) Inkha ovakulu ovo vaimbuka okuti waipaa mukuavo motyiponyo, ankho vena okumutuma akondoke vali kepunda-umbo liokuholama.

⁷ Omokonda yatyi omunthu waipaa mukuavo ankho esukisila okuketyipopila ovakulu? Ankho o pala tyikuateseko ova Isilayeli okutualako tyasukuka nokukuatesako omunthu waipaa mukuavo motyiponyo okupola ouwa kokankhenda ka Jeova. Omunongo umwe wapopia okuti inkha kapopila ovakulu etyi tyaendapo, omunthu oo ankho upondola okuipawa. Inkha omunthu oo wiipawa, oe muene uvelwa onombei mokonda ketavelele otyitumino tya Huku. Omunthu wokuaipaa mukuavo motyiponyo, ankho una okuita ekuateso nokutavela tyina akuatesuako opo akale nomuenyo. Inkha kaende kepunda-umbo liokuholama, ombunga yomunthu aipaa, ankho vapondola okumuipaa.

8, 9. Omokonda yatyi Omukristau wokualinga onkhali onene una okupopia novakulu vewaneno?

⁸ Hono, opo Omukristau walinga onkhali akale vali noupanga omuwa na Jeova, una okupopia novakulu vewaneno opo vemukuateseko. Omokonda yatyi otyo tyakolela unene? Tete, omokonda o Jeova waavela ovakulu vewaneno otyilinga tyokukoyesa omunthu walinga onkhali. (Tiago 5:14-16) Vali, ovakulu vewaneno vakuatesako omunthu walinga onkhali okupandwa vali na Jeova nokulityilika okuwana vali onkhali alingile. (Gálatas 6:1; Hebreus 12:11) Tatu, ovakulu vewaneno vapewa otyilinga otyo iya valongeswa nawa okukuatesako vana valinga onkhali monkhalelo yaviuka opo vehelivele onombei. Jeova wihana ovakulu ovo okuti “omphangu yokuholama ombila.” (Isaías 32:1, 2; okatoi) Epongiyo olio, onkhalelo imwe ongwa ya Huku yokulekesa okankhenda kae kuonthue.

⁹ Ovaumbili ovanyingi va Jeova vaimbuka ouwa utundilila kokupopia novakulu vewaneno nokukuatesiuako navo. Mongeleka omukuatate umwe utiwa Daniele walingile onkhali mahi ehetyipopila ovakulu vewaneno. Daniele wati: “Etyi palamba omuvo omunyingi andyisoko okuti ankho petupu vali etyi ovakulu vewaneno vapondola okulinga pala okunkhuatesako.” Ankho una owoma yokuti nthiki imwe pena omunthu upondola okutyiiva iya alo umwe ankho uhimbika omalikuambelo ae nokuita otyiponyo ku Jeova. Konyima aiti ekuateso kovakulu vewaneno. Wapopia okuti: “Tyotyili, ankho ndyina owoma wokupopia novakulu vewaneno, mahi pahe ndyilitehelela ngoti napolwa omulemo omunene ankho natyinda.” Daniele pahe upopia nawa na Jeova nokuna omutima wasukuka iya pahe omukuatesiko vovakulu vewaneno.

“UNA OKUHATEKELA MEPUNDA-UMBO LIOKUHOLAMA”

10. Omunthu waipaa mukuavo motyiponyo, oityi ankho ena okulinga opo aevelwe?

¹⁰ Omunthu waipaa mukuavo motyiponyo, ankho una okuhatekela kepunda-umbo liokuholama opo aevelwe. (Tanga Josué 20:4.) Omuenyo wae ankho utei kokuhatekela kepunda-umbo iya ankho una okukalako alo omunene-nakwa amankhi. Ankho una okusapo ovilinga viae neumbo liae. Ankho una okulinga ngotyo mokonda yokuaipaa mukuavo.a (Tala onondaka pokatoi.) (Números 35:25) Okulinga ngotyo ankho tyimuetela ouwa. Inkha omuipai ankho ñgeno utunda vala mepunda-umbo liokuholama tyina ahanda, ngotyo ankho ukahi nokulekesa okuti kesukile nonkhali alinga iya otyo ankho tyipondola okupaka omuenyo wae motyiponga.

11. Oñgeni Omukristau welivela apondola okulekesa okuti wapandula okankhenda ka Huku?

¹¹ Hono, omunthu wokualinga onkhali onene wesukisa okulinga ovipuka vimwe opo Huku emuevele. Wesukisa okuyekapo onkhali alinga. Otyo tyakutikinya okulityilika ovipuka aviho vipondola okumulingisa okulinga vali onkhali. Apostolu Paulu wapopia oityi omunthu wokuelivela esukisa okulinga. Wati: “Talei vala, okunumaneswa mokonda yonthilo na Huku, tyemukuatesako unene okupiluluka, nokutoya, nokukala nonthilo, notyiivaluko, nombili iya nokuviukisa oviponyo vienyi!” (2 Coríntios 7:10, 11) Inkha tulinga atyiho tuvila opo tuyekepo okulinga onkhali, matulekesa ku Jeova okuti onthue tuasukalala unene nonkhali tualinga iya tuanoñgonoka okuti tuesukisa okulinga ononkhono pala Huku akale nokankhenda nonthue.

12. Oityi Omukristau esukisa okuyekapo opo Jeova atualeko okumulingila okankhenda?

¹² Oityi Omukristau esukisa okuyekapo opo Jeova atualeko okumulekesa okankhenda? Wesukisa okuyekapo alo umwe ovipuka ehole inkha vipondola okumulingisa onkhali. (Mateus 18:8, 9) Mongeleka, inkha omapanga ove ekuhongiliya okulinga ovipuka vinumanesa Jeova, okuti moyekepo okueenda navo? Inkha una otyitateka konthele yokunwa, okuti molityilika ovipuka vipondola okukulingisa okunwa unene? Inkha otyitateka tyove omahando omavi, okuti molityilika ovitalukiso ngetyi onosinema no internete novipuka ovikuavo vipondola okukukalesa nomalusoke omavi? Hinangela okuti okulinga ononkhono mbokutavela ovitumino via Jeova tyituetela ouwa. Petupu otyipuka tyiihama vali unene tyipona okulitehelela okuti Jeova wetuyekapo. Iya petupu otyipuka tyihambukiswa vali unene tyipona okutehelela “ohole yahapu Jeova ena nonthue.”—Isaías 54:7, 8.

“MAAKALA OTYIHOLAMO TYENYI”

13. Hangununa omokonda yatyi omunthu wokuaipaa mukuavo motyiponyo ankho apondola okulitehelela nawa iya nokukala nehambu mepunda-umbo liokuholama.

¹³ Tyina omunthu wokuaipa mukuavo motyiponyo amanyingila mepunda-umbo liokuholama, opo ngotyo wahupa umwe. Konthele yomapunda-umbo oo, Jeova wapopia okuti: “Maakala otyiholamo tyenyi.” (Josué 20:2, 3) Jeova ankho kahande omunthu akoyeswe ovikando ovinyingi mokonda yotyipuka tyike vala alinga iya alo umwe ombunga yomunthu waipawa kaipondola okunyingila mepunda-umbo opo vemuipae. Putyina wokuaipaa mukuavo motyiponyo amanyingila mepunda-umbo pahe ngotyo ankho ukahi nokuyakulilwa na Jeova. Omunthu oo ankho kekahi mokaleya mokonda upondola okuundapa, nokukuatesako vakuavo iya nokuumbila Jeova nombembwa. Ankho upondola okukala nehambu!

14. Onthumbi patyi Omukristau welivela apondola okukala nayo?

¹⁴ Ovaumbili vamwe va Huku vokualingile onkhali avelivele, na hono velivela onombei. Vamwe velitehelela okuti Jeova nalumwe meveevela mokonda yovipuka valingile. Inkha noove ulitehelela ngotyo, kala nonthumbi yokuti Jeova waevela ononkhali ambuho walinga. Kuesukisile okulivela onombei. Otyo tyamonekele na Daniele wapopia konthyimbi. Etyi ovakulu vewaneno vemuviyula nokumukuatesako, akala vali nomutima wasukuka iya elitehelela nawa. Wati: “Ame hesukisile vali okulivela onombei. Tyina ulivela Jeova ukuevela. Jeova wapopia okuti ukuata ononkhali mbove embuyumbuhi kokule noove, ove nalumwe mombumono vali.” Tyina omunthu wokuaipaa mukuavo motyiponyo amanyingila mepunda-umbo liokuholama, kapondola vali okutila owoma wombunga yomunthu aipaa. Tyelifwa notyo, tyina Jeova amaevela ononkhali mbetu, katuesukisile vali okukala nowoma wokuti Jeova metukoyesa vali mokonda yononkhali tualingile.—Tanga Salmo 103:8-12.

15, 16. Oñgeni okunoñgonoka okuti Jesus wankhia opo etuyovole iya Omunene-nakwa wavilapo tyipameka onthumbi yetu mokankhenda ka Huku?

¹⁵ Tyotyili, onthue tuna vali omahunga omanyingi pala okuyumba onthumbi mokankhenda ka Jeova tyipona ova Isilayeli kohale. Etyi Paulu elitehelela okuti “epongo” mokonda yoviponyo ankho alinga, wati: “Ndyipandula Huku, menyina lia Jesus Kristu Tatekulu yetu!” (Romanos 7:25) Oityi ankho Paulu ahanda okupopia? Namphila Paulu alingile ononkhali puetyi ankho ahafende Huku iya nokulwa neyembelo lioukuankhali, mahi ankho una onthumbi yokuti Jeova wemuevele mokonda yotyilikutila tya Jesus. Mokonda Jesus wankhia, onthue tupondola okukala nomutima wasukuka iya otyo tyitukalesa nawa. (Hebreus 9:13, 14) Mokonda Omunene-nakwa wavilapo, Jesus “utyivila okuyovola aveho vana vekahi nokufuena ku Huku pokati kae, mokonda ukahiko pala okuveitilako.” (Hebreus 7:24, 25) Kohale, omunene-nakwa ankho una otyilinga tyokukuatesako ova Isilayeli okukala nonthumbi yokuti Jeova wevela ononkhali mbavo. Mokonda Jesus Omunene-nakwa wavilapo, onthue tuna vali onthumbi yokuti “makala nokankhenda nonthue, nokuvasa okankhenda tuahatokalele opo tuvatelwe momuvo tuesukisa.”—Hebreus 4:15, 16.

¹⁶ Opo Jeova akale otyiholamo tyetu, tuesukisa okukala nekolelo motyilikutila tya Jesus. Wahasoke vala okuti ofeto yeyovo ikuatesako ovanthu aveho, mahi kala nonthumbi yokuti noove upondola okupolako ouwa. (Gálatas 2:20, 21) Kala nonthumbi yokuti mokonda yofeto yeyovo, Jeova mekuevela ononkhali mbove. Kala nonthumbi yokuti mokonda yofeto yeyovo mokakala nomuenyo wahapu. Otyilikutila tya Jesus otyiawa Jeova ekuavela!

17. Omokonda yatyi ove uhanda okuholama mu Jeova?

¹⁷ Omapunda-umbo okuholama etukuatesako okunoñgonoka okankhenda ka Jeova. Epongiyo olio lia Huku litulongesa okuti omuenyo otyipuka tyikola. Tupu litulekesa oñgeni ovakulu vewaneno vapondola okutukuatesako, oityi tyihangununa okulivela nomutima auho iya oñgeni Jeova etuevela. Okuti Jeova otyiholamo tyove? Petupu vali apa tupondola okuholama! (Salmos 91:1, 2) Monthele mailandulako, matulilongesa oñgeni omapunda-umbo okuholama apondola okutukuatesako okuhetekela Jeova, ongeleka yavilapo youviuki nokankhenda.