Undapa na Jeova Ononthiki Ambuho

1. Omononkhalelo patyi tupondola okuundapela kumwe na Jeova?

ETYI Jeova atunga ovanthu, ankho uhanda vaundapele kumwe nae. Namphila ovanthu hono ovakuankhali, mahi ovakuatyili vapondola okuundapela kumwe na Jeova ononthiki ambuho. Mongeleka, onthue “tuundapela kumwe na Huku” tyina tuivisa onondaka onongwa Mbouhamba na tyina tulinga ovalongwa. (1 Coríntios 3:5-9) Okuholovonwa no Mukulami wouye auho opo tuundapele kumwe nae, elao limwe enene! Mahi no ngotyo, okuivisa hayoko vala onkhalelo yokuundapela kumwe na Jeova. Monthele ei matulilongesa oñgeni tuundapela kumwe nae tyina tukuatesako ombunga yetu, novakuatate mewaneno, nokutambula nawa ovaenda, na tyina tukuatesako ovilinga vieongano vikahi nokulingwa mouye auho, nokuundapa vali unene movilinga vya Jeova.—Colossenses 3:23.

2. Omokonda yatyi tuhapondola okulieleka na vakuetu?

² Putyina tulilongesa onthele ei, tuna okuhinangela okuti atuho tuelikalela. Eti lietu, nekongoko, nonkhalelo yomuenyo iya nounongo wetu vielikalela unene. Ngotyo, uhaeleke etyi upondola okulingila Jeova netyi vakuenyi vapondola okulinga. Apostolu Paulu wati: “Kese umwe atale ovipi ovilinga viae, iya ngotyo makala nehunga liokuhambukwa konthele yae muene, hakulieleka na mukuavo.”—Gálatas 6:4.

KUATESAKO OMBUNGA YOVE NOVAKUATATE MEWANENO

3. Omokonda yatyi tupondola okupopia okuti una utekula ombunga yae ukahi nokuundapela kumwe na Huku?

³ Jeova uhanda tutekule ombunga yetu. Mongeleka, ove una okuundapa opo utekule ombunga yove. Pamwe ovo ina yovana vena okukala meumbo opo vayunge ovana vavo ovatutu. Tyina ovo tate yetu vehetyivili vali okuundapa opo velitekule, onthue tuna okuvekuatesako. Ovio ovipuka viakolela unene. Ombimbiliya yati: “Inkha umwe katekula ombunga yae, haunene vo meumbo liae, ukahi nokuanya ekolelo iya wapona una uhena ekolelo.” (1 Timóteo 5:8) Inkha una ombunga, hamwe kutyivili okuundapa movilinga vya Jeova monkhalelo ankho uhanda. Mahi uhasoye! Jeova uhambukwa unene tyina utekula ombunga yove.—1 Coríntios 10:31.

4. Oñgeni ovohe vapondola okupaka Ouhamba pomphangu yo tete, iya oityi tyimoneka-po tyina vetyilinga?

⁴ Ovohe Ovakristau vapondola okuundapela kumwe na Jeova, tyina vakuatesako ovana vavo okuovola ovilinga meongano. Ovohe ovanyingi ongotyo vehole okulinga. Tyina valinga ngotyo, ovana vavo vatokola okuumbila Jeova movilinga viomuvo auho, namphila pamwe vena okukaundapa kokule nombunga. Vamwe onomisionaliu, ovakuavo ovakokoli-ndyila kuna kuesukisa ovaivisi iya ovakuavo vaundapa mo Mbetele. Tyotyili, tyina ovana veli kokule nombunga, ovohe kavakala vali omuvo omunyingi navo ngetyi ankho vahanda. Mahi no ngotyo, veveavela ondundo yokutualako okuundapa oku vekahi. Omokonda yatyi? Omokonda vahambukwa unene tyina ovana vavo vapaka ovilinga vya Jeova pomphangu yo tete momuenyo wavo. (3 João 4) Ovohe ovanyingi velitehelela nga Ana, wapopile okuti “waundika” Jeova omona wae Samuele. Velitehelela okuti elao limwe enene okuundapela kumwe na Jeova monkhalelo oyo.—1 Samuel 1:28.

5. Oñgeni upondola okukuatesako ovakuatate no nomphange mewaneno liove? (Tala olutalatu pefo pahimbikila onthele.)

⁵ Inkha utupu ovilinga vina okulingwa nondyanga mombunga, okuti upondola okukuatesako ovakuatate no nomphange vavela, vakulupa ine vena ovitateka ovikuavo? Okuti upondola okukuatesako vana vevetekula? Ovola vana vesukisa okukuatesuako mewaneno liove. Mongeleka, hamwe muna omphange ukahi nokutekula ovohe vakulupa. Okuti upondola okukala omuvo umwe no tate yae opo nae alinge ovipuka ovikuavo? Tupu, upondola okukuatesako omukuatate umwe okumutuala komaliongiyo, nokukemulandesa-ko ovipuka viae, ine okumuhindikila tyina akatalelapo umwe uvela kosipitali. Tyina ulinga ngotyo, hamwe ukahi nokuundapeswa na Jeova opo akumbulule elikuambelo liomukuatate oo.—Tanga 1 Coríntios 10:24.

TAMBULA NAWA OVAENDA

6. Oñgeni tupondola okutambula nawa ovaenda?

⁶ Vana vaundapela kumwe na Huku veiwe okuti vatambula nawa ovaenda. Mo Mbimbiliya, ondaka yo Gregu “okutambula ovaenda” ihangununa okukala “nokankhenda no nongendi.” (Hebreus 13:2, okatoi) Mondaka ya Huku, tuvasamo onongeleka mbutulongesa oñgeni tupondola okutambula nawa ovaenda. (Gênesis 18:1-5) Apeho tyina tuna omphitilo yokukuatesako vakuetu, tuna okutyilinga, tyilinge “vana tufenda navo” na vana vehe vakuatate vetu.—Gálatas 6:10.

7. Ouwa patyi utundililako tyina ove utambula vana vekahi movilinga viomuvo auho?

⁷ Okuti upondola okuundapela kumwe na Jeova mokuavela ovakuatate veli movilinga viomuvo auho omphangu apa vapondola okukala? (Tanga 3 João 5, 8.) Tyina tulinga ngotyo, atuho tupolako ouwa. Ombimbiliya ityipopia okuti “okulipameka pokati.” (Romanos 1:11, 12) Tala ongeleka ya Olaf. Etyi ankho omukuendye, omutalelipo umwe womawaneno wahanepele watalelapo ewaneno liavo iya ankho wesukisa ondyuo apa ena okukala, mahi ankho petupu omukuatate weliava opo emukuateseko. Olaf akaita ko tate yae, ankho vehe Nombangi mba Jeova inkha tyitavela omutalelipo womawaneno akale meumbo liavo. Avetavela iya avapopila Olaf okuti inkha ongotyo, Olaf ankho una okulala kotyipundi (cadeirão). Olaf alala umwe kotyipundi, mahi kelivelele. Wapopia okuti osimanu oyo yemuhambukisilwe unene! Kese nthiki ankho vapindukapo liwa iya vapopia ovipuka ovinyingi tyina valia komuhuka. Omutalelipo womawaneno emupameka unene iya Olaf atokola okuumbila Jeova movilinga viomuvo auho. Momanima 40, Olaf wakala omisionaliu movilongo ovinyingi.

8. Omokonda yatyi tuna okukala notyali alo umwe tyina ovanthu vahapandula? Popia ongeleka.

⁸ Tupondola okulekesa okuti tuna okankhenda novanthu tuhei mononkhalelo ononyingi, alo umwe natyina vehe tupandula. Mongeleka, omphange umwe woko Espanha welilongesile Ombimbiliya na Yesica, omukai umwe ankho watunda ko Equador. Nthiki imwe etyi ankho vekahi nokulilongesa, Yesika ahimbika okulila. Iya omphange oo, emupulu omokonda yatyi alilila. Yesica akumbulula okuti pu etyi eheneye ko Espanha, ankho wahepa unene. Alo umwe nthiki imwe ankho utupu okulia opo aavele omona wae, ankho una vala omaande. Iya etyi ankho ekahi nokulela omona wae, elikuambela. Konyima yotyo Onombangi mba Jeova avekemutalelapo iya avemuavela omukanda. Mahi anumana unene, atandaula omukanda oo iya evepopila okuti: “Etyi okulia muhanda ndyiavele omona wange?” Onomphange ovo avahetekela okumuungumanesa, mahi Yesica ehetavela. Konyima avakapola osesu yeyula okulia aveipake pombundi yondyuo yae. Pahe ankho ukahi nokulila mokonda waimbuka okuti waanyene etyi Huku akumbulula elikuambelo liae. Yesica atokola okuumbila Jeova. Tala ouwa watundililako mokonda yotyali!—Eclesiastes 11:1, 6.

OKULIAVA MOVILINGA VIEONGANO LYA JEOVA

9, 10. (a) Onomphitilo patyi mbokuliava ova Isilayeli vakalele nambo? (b) Oñgeni ovakuatate vapondola okukuatesako ewaneno hono?

⁹ Kohale, ova Isilayeli vakalele no nomphitilo ononyingi mbokuliava. (Êxodo 36:2; 1 Crônicas 29:5; Neemias 11:2) Hono, nove una onomphitilo ononyingi mbokuliava, opo uundapese omuvo wove, novipuka una, nounongo wove opo ukuateseko ovakuatate no nomphange. Inkha ulinga ngotyo, mokala nehambu iya Jeova mekuyambe.

¹⁰ Ondaka ya Huku yavela ondundo ovakuatate mewaneno opo vaundape na Jeova mokukala ovakulu vewaneno novakuatesiko vavo. (1 Timóteo 3:1, 8, 9; 1 Pedro 5:2, 3) Ovakuatate valinga ngotyo vahanda okukuatesako vakuavo muetyi vesukisa, nokuvekuatesako okupameka oupanga wavo na Jeova. (Atos 6:1-4) Okuti ovakulu vewaneno vekuitile-ale opo uvekuateseko mononkhalelo mbumwe, ngetyi otyilinga tyokuviukisa omikanda, no telitoliu, nokupangiya ovipuka viateka ine otyilinga otyikuavo? Ovakuatate vetavelele okulinga ngotyo, vapopia okuti vahambukilwe unene.

11. Oñgeni omphange umwe wapola ouwa mokuundapa movilinga viokutunga?

¹¹ Vana veliava opo vaundape movilinga viokutunga vakala nomapanga omanyingi. Omphange umwe utiwa o Margie waundapa movilinga viokutunga Onondyuo Mbomaliongiyo omanima 18. Movilinga ovio ankho ulinga oupanga novahikuena avasa iya uvelongesa ovipuka ovinyingi. Wapopia okuti okuundapa movilinga viokutunga omphitilo ongwa yokulipameka pokati. (Romanos 1:12) Tyina Margie alambela movitateka, omapanga akalele nao movilinga viokutunga, emupameka. Okuti nthiki imwe weliavele opo uundape movilinga viokutunga? Upondola okuundapa movilinga ovio namphila pena ovipuka uhevili okulinga uhevili okulinga.

12. Oñgeni upondola okukuatesako ovakuatate vamonekelwa noviponga?

¹² Tupu, tupondola okuundapa na Jeova tyina tukuatesako ovakuatate vamonekelwa noviponga. Mongeleka, tupondola okuava onombongo. (João 13:34, 35; Atos 11:27-30) Onkhalelo onkhuavo okusukula, nokupangiya ovipuka viateka tyina pamamoneka oviponga. Omphange umwe woko Polonia utiwa o Gabriela, eumbo liae liahanyukile nombila. Mahi wapandulile unene etyi ovakuatate vomawaneno omakuavo veya okumukuatesako. Wapopia okuti tyina ahinangela otyitateka otyo, kesuku unene novityuma viae, mahi usoka vali kovipuka apewa. Wati: “Ovipuka nalambela viankhalesa nonthumbi yokuti okulinga onthele yovanthu vaumbila Jeova, elao limwe enene, tupu ondyivi-ndyivi yehambu liotyotyili.” Ovakuatate ovanyingi vakuateswako monkhalelo oyo, navo otyo vehole okupopia. Tupu, vana vaundapa na Jeova opo vakuateseko ovakuatate ovo, vakala nehambu.—Tanga Atos 20:35; 2 Coríntios 9:6, 7.

13. Oñgeni tupameka ohole yetu na Jeova tyina tuliava? Popia ongeleka.

¹³ Omphange umwe utiwa Stephanie novaivisi ovakuavo vo motyilongo tyae, vaundapele na Jeova etyi vakuatesako ovakuatate vatilile ovita ko Estados Unidos. Vakuatesako ovakuatate ovo okuvasa onondyuo omu ankho vapondola okukala, noku ankho vapondola okuvasa ovityuma. Wati: “Vapandulile iya vahambukilwe unene nonkhalelo ovakuatate vevekuatesako. Okutala ovipuka ovio tyetuavela ondundo. Ovakuatate ovo ankho vasoka okuti onthue tuevekuatesako unene, mahi tyotyili ovo vetukuatesako vali unene. Ovipuka tuamona, ngetyi ohole, newaneko, nonthumbi ovakuatate ovo vena mu Jeova, viayawisa ohole tuna na Jeova. Iya otyo tyetulunda okupandula atyiho eongano likahi nokutuavela.”

UUNDAPA VALI UNENE MOVILINGA VYA JEOVA

14, 15. (a) Otyituwa patyi omuuli Isaia alekesile? (b) Oñgeni ovaumbili va Jeova vapondola okuhetekela Isaia?

¹⁴ Okuti uhanda okuundapa vali unene movilinga vya Jeova? Okuti wafuapo opo ukaundape kuna kuesukisa vali ovaivisi? Tyotyili, opo tuumbile tukale notyali katuesukisile okuilukila kokule. Mahi pena ovakuatate no nomphange vekahi nokutyilinga. Ovakuatate ovo vekahi ngomuuli Isaia. Etyi Jeova apula okuti: “Olie mandyitumu iya olie maende menyina lietu?” Isaia ati: “Ame uno! Nthume!” (Isaías 6:8) Okuti wafuapo opo ukuateseko eongano lya Jeova? Oñgeni upondola okutyilinga?

¹⁵ Konthele yovilinga viokuivisa nokulinga ovalongwa, Jesus wati: “Ovilinga viokuteya ovinene, mahi ovaundapi kavehi. Moluotyo, itei ku Hekulu yepia opo atume ovaundapi movilinga viae viokuteya.” (Mateus 9:37, 38) Okuti upondola okukakala omukokoli-ndyila kuna kuesukisa vali ovaivisi? Okuti upondola okukuatesako mukuenyi opo etyilinge? Ovakuatate ovanyingi no nomphange, velitehelela okuti onkhalelo yavilapo yokulekesa ohole vena na Huku, no munthele yavo okukaivisa kuna kuesukisa vali ovaivisi. Okuti upondola okusoka kononkhalelo ononkhuavo mbokuundapa vali movilinga vya Jeova? Inkha ulinga ngotyo, mokala nehambu.

16, 17. Ombupi ononkhalelo mbumwe ove upondola okuundapa vali unene movilinga vya Jeova?

¹⁶ Okuti wafuapo opo ukaundape mo Mbetele ine okukuatesako ovilinga viokutunga, tyilinge moundapa omuvo umwe, ngetyi osimanu ike ine onombali? Eongano lya Jeova liesukisa ovanthu veliava opo vaundape kese apa pesukisa ine opo valinge kese tyipuka eongano liveita, alo umwe inkha otyilinga vapewa nalumwe vetyilingile. Jeova upanda aveho vayekepo ovipuka vehole opo vakaundape kuna kuesukisa.—Salmo 110:3.

¹⁷ Okuti uhanda okulongeswa nawa opo uundapele vali nawa Jeova? Hamwe upondola okulihonekesa opo weende Kosikola Yovaivisi Vouhamba wa Huku. Osikola oyo ilongesa ovakuatate no nomphange vapama motyili iya vekahi-ale movilinga viomuvo auho opo vaundapeswe vali nawa neongano lya Jeova. Vana velihonekesa opo vende mosikola oyo, vena okukala tyafuapo opo vakaundape kese apa vatumwa. Okuti ove wafuapo opo uundapele Jeova monkhalelo oyo?—1 Coríntios 9:23.

18. Ouwa patyi utundilila kokuundapa na Jeova ononthiki ambuho?

¹⁸ Mokonda tuvanthu va Jeova, tuna otyali, tuvanthu ovawa, tuna okankhenda iya tuna ohole. Ononthiki ambuho onthue tusuka na vakuetu. Iya otyo tyituetela ehambu liotyotyili, nombembwa. (Gálatas 5:22, 23) Katyesukisile oñgeni omuenyo wove ukahi, mokala nehambu inkha ukala notyali nga Jeova iya otualako okuundapa nae.—Provérbios 3:9, 10.