Mouye Auho Outokotwe Uli Nokulinga Omunene — Oityi Ombimbiliya Ipopia?

Mohanyi ya Julho yo 2022, movilongo ovinyingi mouye auho mwapopiwa okuti outokotwe uli nokulinga omunene:

Ovipuka ovio aviho vilekesa-tyi? Okuti apa katutu kombanda yeheke kamakukala vali natyike tyina omwenyo? Oityi Ombimbiliya yapopia?

Okuti tyapopiwa-le Mombimbiliya okuti outokotwe ukalinga omunene ngootyo?

Yoo. Tyoutokotwe okulinga omunene mouye auho tyili umwe vala nokweenda ngeetyi Ombimbiliya yatile umwe otyo matyimoneka mononthiki mbuno. Sesusi wetyipopile-ale okuti matumono “ovipuka vitilisa owoma,” “ovipuka twehenemone, viteketesa.” (Luka 21:11; Ombimbiliya Good News Translation) Mokonda youtokotwe uli nokulinga omunene mouye auho ovanthu vatila owoma, vati hamwe ovipuka ovanthu veli nokulinga mavihanye-ko umwe ohi.

Okuti kombanda yeheke kamakukala vali natyike tyina omwenyo?

Au. Huku watunga ohi ilinge umwe vala eumbo liovanthu apeho. (Salmo 115:16; Eclesiastes 1:4) Huku kamayeke-ale ovanthu vahanye-ko ohi, mahi ngwe ‘makahanya-ko vana vahanya ohi,’ ngeetyi mwene apopile. — Eholololo 11:18.

Tala onotesitu onombali mbupopia ovipuka ovikwavo Huku apopile:

• Huku kamayeke-ale ohi ikale umwe vala oluhandya lwehena ovanthu, mahi ngwe makaviukaisa nawa apa ovanthu vanyona-nyona.

• Huku makaviukisa ohi aikehiwa nawa, aikayova nawa.

Opo unoñgonoke vali omokonda yatyi tutila tyomphepo ili nokutokota tyili nokweenda umwe vala ngeetyi Ombimbiliya yapopia-le, tanga onthele yati, “Matukala Ñgeni Omphepo Youye Ina Nokupiluluka — Oityi Ombimbiliya Ipopia.”

Opo unoñgonoke vali etyi Ombimbiliya yapopia tyayemba kokuviukisa omphepo youye aikala nawa, tala onthele yati, “Olie Mayovola Ohi?”