Okwahali Ohitu — Oityi Ombimbiliya Ipopia?

Mouye muna ovanthu ovanyingi vesuka notyipuka otyo tyokwahali ohitu.

• “Okwahali ohitu, ondongeso imwe yovanthu velipola ovikulia vimwe — tyina vetyivila velipola umwe atyiho-atyiho — haunene tyiyemba kokwiipaa nokulinga onya ovinyama, okuvilia, nokuvipola ombandwa pala okuvala, nokulinga ovipuka ovikwavo.” — A Sociedade Vegana (O vokwahali ohitu).

Tyehekulinga vala okankhenda ovinyama, vamwe velipaka motyipuka otyo mokonda yokwaamena ovipuka viatungwa, nekongoko liovanthu, vamwe omokonda yokapela kavo.

• “Namphila ovanyingi mwene vetyilinga umwe kokwahanda kwavo, mahi tyokwahali ohitu pahe tyalinga otyiso tyovanyingi, ngatyina wonondunge otyo ena okulinga, pahe tyina nokulinga tyovanthu ovanyingi mouye auho.” — Acadêmico Britânico.

Okuti otyiso tyokwahali ohitu, otyo matyiviukisa eheke komutwe wandyila? Oityi Ombimbiliya ipopia?

Omutungi wesuka novanthu novinyama

Ombimbiliya yapopia okuti Siovaa Huku a omutungi wetu, ovanthu wevelinga ovanene vali kovinyama, evepe ovinyama vikale okulia kwavo. (Ehimbikilo 1:27, 28) Tyimoneka nawa okuti Huku utavela ovanthu, ovinyama vevilinge okulia kwavo. (Ehimbikilo 9:3) Mahi kahambukwa tyina atala ovinyama vilingwa onya. — Omihe 12:10.

Ngetyi Ombimbiliya ipopia, okulia ohitu tyitei mwene ko munthu na munthu. b Okwahali ohitu hatyoko tyitukalesa ovanthu vekahi nawa komaiho a Huku. (1 Ova Kolindu 8:8) Nawike upopia omapita ou mwene wasoka okulia ohitu. — Ova Loma 14:3.

Mwene oityi matyiviukisa ovipuka?

Ombimbiliya ilekesa okuti ovipuka tukoya okulia, havioko maviviukisa ouye. Omwii wovitateka utuka konopulitiku, novanthu vehena onondunge, nouye uhole vala onombongo, ya ovio, ovipuka viahaviukiswa-le na munthu. Ombimbiliya yati:

• “Tyeliooma katyoomononwa.” — Omupopi 1:15.

Omutungi wetu oe mamaneko ovitateka tunavio hono. Ombimbiliya ityihololola okuti oe metyilingi otyo.

• “Nkhati ñgaa, eulu epe nohi omphe; eli eulu ekulu lialamba-le, nohi onkhulu yalamba-le, nelunga kaliko vali.” — Eholololo 21:1.

Huku makapolako ovatumini aveho va pano pohi, vatiwa “eulu ekulu,” apingiya-po “eulu epe,”Ouhamba wae. Ouhamba oo mauya okupolako ‘ohi onkhulu,’ ovanthu onomphwililiki, ya aupingiya-po ‘ohi omphe’ ovanthu vahula koutumini wae.

O mouhamba wa Huku vala ovanthu maveketyivila okukala nawa novinyama. — Isaiya 11:6-9.