Omokonda Yatyi Onombangi mba Siovaa Vahapakelwa Ohonde?

Ovipuka vimwe viahaviukile ovanthu vasoka

Omatutu: Onombangi mba Siovaa kavanu ovihemba, no konosipitali vala kavaiko-ale.

Otyili: Onthwe tulinga umwe atyiho opo tuhakulwe. Tyina twavela twovola umwe onondotolo mbokutyivila okuhakula, nokutanda tyahapake ohonde. Tupandula etyi vokwatanga vavasa ovihemba ovinyingi vihakula umwe. Mokonda onombangi kavapakwa ohonde etyi vokuvehakula vehole okuvehakula natyo, otyo ñgoo vehole okuhakula ovanthu ovanyingi. Movilongo ovinyingi tyina ovanthu vehenepakwe ohonde tete nkhele vapopilwa omauvela atuka kokupakwa ohonde, mwene pahe ngavo vakoya ine mavetavela okupakwa ohonde. Omauvela amwe atuka kokupakwa ohonde oyaa: Omauvela eliyambuliswa nohonde, nolutu okukala tyehena ononkhono mbokuliyakulila komauvela, nomunthu okuhakala nekongoko likahi nawa.

Omatutu: Onombangi mba Siovaa vetavela okuti eyumba-nthumbi lihakula.

Otyili: Onthwe katukevela okuhakulwa komahuviso, mokonda yonthumbi tuna.

Omatutu: Okutavela okupakwa ohonde tyimana onombongo.

Otyili: Okupakwa ohonde katyimane-ale onombongo.a

Omatutu: Onombangi ovanyingi, okuti umwe novana, omanima atyo aeho vekahi nokunkhia unene mokonda yokwahapakwa ohonde.

Otyili: Otyo hatyiliko. Onondotolo mbapelala-pelala-le ovanthu vena ouvela wakala unene omapita, vamwe vapelala-le omutima, naapa pahonyaina omankhima, nokupaka omunthu omutima omukwavo, nonoso, novipuka ovikwavo vali, mahi ou vapelala avehemupake ohonde.b Ovavei vana vahapakwa ohonde, okuti umwe novana, vaveluka umwe, ya pamwe vaveluka vali liwa tyipona vana vokupakwa ohonde.c Naina katyitavela vala okuti omunthu okwahapakwa ohonde ngootyo mankhi pahe una okupakwa ohonde opo ahupe.

Omokonda yatyi Onombangi mba Siovaa vahapakelwa ohonde?

Valinga ngootyo mokonda yongeleya yavo, kavasoko vala kokuhakulwa. M’Ombimbiliya tyilinge o Otestamendu Onkhulu tyilinge o Otestamendu Omphe, ovakilisitau vatumwa veliyunge kohonde. (Ehimbikilo 9:4; Levitiku 17:10; Epalukununo 12:23; Ovilinga 15:28, 29) Ku Huku, ohonde omwenyo. (Levitiku 17:14) Naina onthwe tulityilika ohonde movipuka aviho, katulityilika-yo vala mokonda tutavela ku Huku, mahi omokonda tuna onthilo nae Hekulu yomwenyo.

Etyi ovanthu ankho vasoka tyapiluluka

Kohale ankho onondotolo tyina vatala omunthu wahapakwa ohonde ongatyina ehena onondunge, omwipai. Mahi pahe pehepano hatyoko vali vasoka. Menima lyo 2004, omukanda umwe wapopia etyi vokuhakula vapopia, wati: “Ovihemba vina nokuhakulwa n’Onombangi mba Siovaa, apa kapii pahe ovio umwe vala matuhakaula navio ovanthu.”d Omukanda umwe utiwa Heart, Lung and Circulation mo 2010 wati: “Tyokutanda omunthu ahapakwa ohonde, ñgeno katyikala vala ty’Onombangi mba Siovaa, ñgeno ovanthu aveho vatandwa tyahapakwa ohonde.”

Onondotolo ononyingi, vapaka vala nawa ohonde yomunthu vena nokutanda, opo haa vehemupake ohonde onkhwavo. Otyo tyina umwe nokulingwa nokovilongo viokwahamonene unene, mahi ava vokuna nokwiita okuhakulwa ngootyo ha Nombangi-ko mba Siovaa.