Oityi Ombimbiliya Ipopia Tyayemba Kokukala Notyali?
Ekumbululo lyo Mbimbiliya
Ombimbiliya yati otyiwa okukala notyali, mahi atuave umwe etyi tyatunda komutima. Tyina tuavela mukuetu otyipuka tyimwe, tyiti umwe ngwe uhambukwa, no onthwe muene tukala nawa. (Provérbios 11:25; Luka 6:38) Sesusi watile “okuava tyihambukiswa vali tyipona okupewa.” — Ovilinga 20:35.
Onalupi okukala notyali tyihambukiswa Huku?
Huku uhambukwa tyina tuavela mukuetu otyipuka, mahi atyitundu umwe komutima. Ombimbiliya yati: ‘Kese munthu alinge ngetyi asoka momutima wae, ahalingi tyaoñgoñga hamwe tyakuluminyua, mokonda Huku uhole una waava nehambu.’ — 2 Ova Kolindu 9:7, okatoi.
Ine tuahanda Huku etavele ovilinga tumulingila, tuna okulinga ovanthu votyali. (Tiaku 1:27) Tyina tumona ñgaa mukuetu wesukisa okukuatesuako, atumuavela tyimwe tumukuateseko, ngotyo tuli nokuundapela kumwe na Huku. Tyina tukuatesako vakuetu, Huku wati ongatyina tuemuundika vala. (Provérbios 19:17) Ombimbiliya yati muene haa Huku metukondolela-tyo. — Luka 14:12-14.
Onalupi okukala notyali tyinumanesa Huku?
Tyina tuavela vakuetu tyimwe mahi naina tuna etyi tuahanda, ngetyi:
Tuhanda vala ovanthu vatie tuna otyali. — Mateusi 6:2.
Tuhanda-vo vakuetu navo vetuavela tyimwe. — Luka 14:12-14.
Tuhanda tukapewe omwenyo na Huku. — Salmo 49:6, 7.
Tyina etyi tuavela omunthu, makalinga natyo otyipuka Huku eyele. Katyaviukile okuavela omunthu ombongo, mahi otyo tutyii umwe okuti makayumba nambo omawela amonene-mo, hamwe makanwa unene, hamwe makalanda nambo omakaya. (1 Ova Kolindu 6:9, 10; 2 Ova Kolindu 7:1) Tupu tyapenga okuavela ombongo omunthu wananga, wahahande okuundapa. — 2 Ova Tesalonika 3:10.
Tyina tukuatesako vakuetu vo kondye, mahi vo meumbo lietu atuehesuku navo. Ombimbiliya ipopia okuti omulume una okutekula vo meumbo liae. (1 Timotiu 5:8) Ine omukulu wo meumbo ukuatesako umwe ovanthu, mahi otyo vo meumbo liavo vehena okulia, novipuka ovikwavo vesukisa, opo Huku nae kahambukwa. Pononthiki mba Sesusi, ovanthu vamwe ankho kavakuatesako ovo tate yavo vakulupa mokonda ankho vati ovipuka vena-vyo ‘maveviavela Huku.’ Sesusi evepopila umwe okuti otyipuka otyo ankho valinga tyapenga, Huku ketyihande. — Maluku 7:9-13.