Okuovola Otyiawa Otyiwa Vali

Okuovola otyipuka otyiwa matyihumbwa katyapepukile. Tupu otyiawa otyiwa tyitei ku una metyipewa. Otyipuka tyimwe omunthu mapande, omukuavo upondola okuhetyipande.

Mongeleka, omukuendye ine omuhikuena kwe otyiawa otyiwa o otelelefone omphe. Iya omukulu upondola okupanda vali unene otyipuka apondola okuhinangaila, ngetyi olutalatu luombunga yae. Kovilongo vimwe, ovakuendye novahikuena novakulu vetyihole vali tyokupewa onombongo, mokonda vapondola okulanda kese tyipuka vahanda.

Namphila katyapepukile, mahi no ngotyo ovanthu ovanyingi valinga ononkhono mbokuovola otyiawa mavaavela omunthu vehole. Ha apeho otyiawa ngotyo utyivasa. Mahi noñgonoka okuti, pena ovipuka vimwe vipondola okukuatesako. Matutale ovipuka vikuana vipondola okukalesa nehambu una matambula otyiawa tyatyo.

Etyi ahanda. Omulume umwe woko Belfast, Kokulio Kuekumbi ko Irlanda, wati omota apewa puetyi ankho ena omanima 10 ine 11, otyo, otyiawa otyiwa vali apewa. Mokonda yatyi? Ngwe wati: “Omokonda otyo ankho otyipuka nahanda.” Onkhalelo omulume oo elitehelela tyilekesa nawa okuti, omunthu upanda vala otyipuka inkha otyo muene ankho ahanda. Ngotyo, una okusoka komunthu ove uhanda okuavela otyiawa. Ovola okunoñgonoka etyi mapande, mokonda opo omunthu etyipande tyitei kuetyi ahanda. Mongeleka, ovo tate-mbwale vetyihole vali tyokukala nombunga yavo mokonda tyipondola vahanda okulimonapo no vana vavo, novatekula vavo. Ngotyo tyina ombunga yovola okukala no vo tate-mbwale vapondola okutyipanda vali tyipona okupewa otyiawa otyikuavo.

Otyipuka tyesukisa tete, okunoñgonoka etyi omunthu ahanda nokumutehelela nawa. Ombimbiliya itupopila okuti tuna “okukanyauka okutehelela, nokulipulukwa okupopia.” (Tiago 1:19) Tyina utomphola nomapanga ove ine ombunga, tehelela nawa ovipuka vehole nevi veyele. Ngotyo motyivili okuveavela otyiawa matyivehambukiswa.

Etyi omunthu muavela esukisa. Omunthu una upewa upondola okupandula, namphila okapuka wemupa okatutu. Mahi oñgeni upondola okunoñgonoka etyi omunthu ekusuka natyo?

Ngoti otyipuka tyapepuka vali okupula etyi omunthu esuka natyo, ine etyi ahanda. Mahi pala ovanthu ovanyingi vetyihole tyokuaava, okulinga ngotyo hatyiwako. Tupu, ovanthu vamwe vapopia umwe etyi vahanda, netyi vahahande, mahi ha apeho vapopia ovipuka aviho vesukisa.

Ngotyo, tala nawa iya tyina mutomphola tala nawa onkhalelo ekahi. Lipula okuti: Omukuendye ine omuhikuena? Omukulu? Kenenepe ine kenenepue? Wanepwa ine velihenga? Omuhepe? Kaundapa? Wataatwa movilinga? Okulinga ngotyo moavela otyiawa tyelikuata netyi yomunthu esukisa. Mokonda inkha kulingi ngotyo momuavela otyipuka enale.

Opo unoñgonoke etyi omunthu oo esuka natyo, kapule kovanthu vena otyitateka tyelifua no tyae. Vapondola okukupopila etyi haunene esuka vali natyo. Nenoñgonoko olio, ove upondola okumuavela ine okumukuatesako muetyi ehenepewe.

Omuvo. Ombimbiliya ipopia okuti: “Ondaka yapopiwa momuvo watyo, ipameka unene!” (Provérbios 15:23) Onondaka ombu mbulekesa okuti onondaka mbetu momuvo waviuka mbupondola okupameka. Otyo tyelifwa netyi tupondola okulinga. Ngetyi onondaka mbetu momuvo waviuka mbupondola okupameka omunthu, notyipuka tuava momuvo waviuka tyipondola okukuatesako omunthu okukala nehambu.

Ñgeno epanga liove malinepe. Omukuendye umwe ine omufikuena mamane okulongeswa kosikola. Ovalinepi vamwe mavamono okalukembe. Ombu onongeleka mbumwe mbulekesa omuvo ovanthu vapondola okupewa oviawa. Vamwe vahoneka ovipuka mavaave mokueenda kuomuvo, opo apongiye oviawa mahande okuava mokueenda kuenima. Ngotyo vapondola okulipongiya vali nawa opo vaave otyiawa tyelikuata nomuvo watyo.a

Mahi, ove kuesukisile okulityilika okuava oviawa momivo viakolela. Ehambu liokuava kalitei o momuvo patyi ove upondola okuava. Ondaka imwe yaviuka ipameka. Mahi tyesukisa okulunguka. Mongeleka, inkha omulume umwe mahande okuavela omukai umwe tyimwe, omukai watyo upondola okusoka okuti ngwe wesuka nae. Otyo otyili, mokonda kese tyiawa pena etyi tyilekesa iya tyipondola okunoñgonokwa mononkhalelo mbelikalaila. Otyo tyilekesa nawa omokonda yatyi tyesukisila okutala nawa kuetyi omunthu wokuava ahanda.

Ehunga lio kuava. Ngetyi onongeleka mbulekesa, otyiwa tete okunoñgonoka omokonda yatyi moave otyiawa. Tupu, tyina nkhele uheneave, otyiwa okusoka konthele yomokonda yatyi moave. Vamwe vaava umwe nomutima auho iya ovakuavo vaava mokonda velitehelela okuti, vena okuava mokonda yonthiki yakolela. Nkhele vamwe vaava mokonda navo vahanda okupewa.

Oityi upondola okulinga opo ukale nonthumbi yokuti ukahi umwe nokuava nomutima wove auho? Ombimbiliya yati: “Aviho mulinga vilingei nohole.” (1 Coríntios 16:14) Inkha tyina waava ulundua nohole yotyotyili iya nesuko, navana waavela mavetyitambula nehambu iya ove mokala nehambu limwe enene litundilila kokuava. Tyina waava nomutima wove auho, tupu matyihambukiswa Tate yetu keulu. Apostolu Paulu wapandulile Ovakristau vomo Korintu, etyi vakuatesileko ovakuatate vo mo Judeia. Paulu wevepopila okuti: “Huku uhole una waava nehambu.”—2 Coríntios 9:7.

Okuendela monondonga tuapopia tyipondola okukukuatesako okuavela vakuenyi ovipuka vipondola okuvehambukiswa. Onondonga ombu no nonkhuavo, omo Jeova aendela etyi etuavele otyiawa otyinene vali kuaviho. Tukukonga opo utange otyipi otyiawa otyo otyinene vali, monthele mailandulako.