Selemiya
26 Etyi Seoyakii alinga pahe ohamba, Seoyakii+ omona wa Sosiya ohamba yo Sundaa, ku Siovaa akutundu ondaka ei: 2 “Etyi otyo tyapopia Siovaa wati: ‘Talama pepata liondywo ya Siovaa, popila* ovanthu aveho vakala momapunda-umbo o Sundaa, ava veya okufendela* mondywo ya Siovaa. Vepopila ovipuka aviho nekutuma, wahapole-ko ondaka naike. 3 Hamwe vatehelela, vayeke-po onondyila mbavo onombi, ame andyilikondola* aneheveetela vali ononkhumbi nahandele okuveetela mokonda yovipuka valinga ovivi.+ 4 Vepopila uti: “Etyi otyo tyapopia Siovaa wati: ‘Ine onwe kamunthavela kamulandula otyitumino tyange* napaka komutwe wenyi, 5 amwehetavela onondaka mbovaundapi vange, ovauli, ava ndyikalela vala okumutuma,* mahi otyo onwe mwehevetehelela,+ 6 eumbo eli mandyililingi ngo Silo,+ epunda-umbo eli malilingi liokuhetekelwa movihuna vitumbukila ovanthu vovilongo aviho kombanda yohi.’”’”+
7 Tyati novanakwa, novauli, novanthu aveho, vetyiiva etyi Selemiya apopia onondaka ombo mondywo ya Siovaa.+ 8 Etyi Selemiya amana okupopia atyiho Siovaa emutuma kovanthu aveho, atyiti novanakwa, novauli, novanthu aveho, avemukwata avemuti: “Ove hono monkhi. 9 Oityi wapopila menyina lya Siovaa, oti: ‘Ondywo ei maikakala ngo Silo, epunda-umbo eli malikahanywa-po alisala tyahakalwa vali?’” Ovanthu aveho avaumbilila Selemiya, avemupake pokati mondywo ya Siovaa.
10 Etyi ovakwatesiko vohamba yo Sundaa veiva onondaka ombo, keumbo* liohamba avatundu-ko avaende no kondywo ya Siovaa, avapumphama pombundi yepito epe liondywo ya Siovaa.+ 11 Ava ovanakwa, novauli, avapopila ovakwatesiko vohamba, novanthu aveho avati: “Omulume ou aipawe,+ wapopia okuti epunda-umbo eli malimono ovihuna, noonwe mwene mwetyiiva momakutwi enyi.”+
12 Selemiya apopila ovakwatesiko aveho vohamba novanthu aveho eveti: “O Siovaa wanthuma ndyipopile eumbo lino, nepunda-umbo lino, onondaka ambuho mweiva.+ 13 Viukisei onondyila mbenyi, nonontheto mbenyi, tavelei ondaka ya Siovaa Huku yenyi, Siovaa melikondola* ahaeta vali ovihuna emupopila.+ 14 Ame ndyili peke lienyi. Ndingei etyi mamundingi mwene tyaviuka komaiho enyi. 15 Mahi noñgonokei okuti ine mundyipaa mamulieetela, okwipaa omunthu wehena etyi alinga, noonwe nepunda-umbo liatyo novanthu vatyo vakala-mo mamulietela mokonda tyotyili o Siovaa wanthuma ndyipopie onondaka ombu ambuho, komutwe wenyi.”
16 Ovakwatesiko vohamba, novanthu aveho, avapopila ovanakwa, novauli avati: “Omulume ou kapondola okwipawa, mokonda wetupopila menyina lya Siovaa Huku yetu.”
17 Tyihe-otyo vala, vamwe povakulu votyilongo, avakatuka avapopila ovanthu aveho veliongiya avati: 18 “Mikeya+ wo ko Molesete, omuuli wo pononthiki mba Isekiya,+ ohamba yo Sundaa, wapopilile ovanthu aveho vo Sundaa ati: ‘Siovaa womambamba ovita wati:
19 “Okuti Isekiya ohamba yo Sundaa, novanthu aveho vo mo Sundaa, vemwiipaele? Hae* apa utila Siovaa, ulifefa aiti okankhenda ku* Siovaa, Siovaa elikondola* eheveetela vali ovihuna apangele?+ Mwene haa matulietela ovihuna.*
20 “Kwali omulume umwe tupu upopia menyina lya Siovaa: o Uliyasi omona wa Semaiya wo ko Kiliyate-Seyalii,+ upopia onondaka ngo mba Selemiya, waulile watile nepunda-umbo eli malihanywa-ko notyilongo tyatyo etyi matyihanywa-po. 21 Ohamba Seoyakii,+ nomafwalali ae aeho, novakwatesiko vae aveho, etyi veiva onondaka mbae, ohamba aipange okumwiipaa.+ Etyi Uliyasi etyiiva atili owoma, ataula no ko Isitu. 22 Ohamba Seoyakii, atumu Elenataa+ omona wa Akimbole, novalume ovakwavo ko Isitu. 23 Avakapola Uliyasi ko Isitu, avemutwala kohamba Seoyakii, ei pahe yemwipaa nomutunga,+ olutu lwae ekelupaka pelangalo liovanthu aveho.”
24 Mahi Aikau,+ omona wa Safaa,+ akwatesako Selemiya, ahapakulwe pomavoko ovanthu vemwiipae.+