Selemiya
28 Menima liatyo olio, etyi Sendekiya+ alinga pahe ohamba yo Sundaa, mohanyi ya tano yenima lya kwana, omuuli Hananiya omona wa Asuli, wo ko Simbeau,+ amphopila umwe momaiho ovanakwa, momaiho ovanthu aveho mondywo ya Siovaa onondaka ombu, ati: 2 “Etyi otyo tyapopia Siovaa womambamba ovita, Huku yo Isilayeli wati: ‘Mandyikateya okanga yohamba yo Mbambilonia.+ 3 Momanima evali,* mandyikondola pohika apa ovityuma aviho vyo mondywo ya Siovaa, evi Nambukondonosole ohamba yo Mbambilonia atyindile, evitwala ko Mbambilonia.’”+ 4 “‘Mandyikondola kuno Sekoniya+ omona wa Seoyakii,+ Sekoniya ohamba yo Sundaa, aveho vapolwa ko Sundaa, avatwalwa koukonde ko Mbambilonia,’+ o Siovaa wetyipopia, ‘mokonda mandyikateya okanga yohamba yo Mbambilonia.’”
5 Omuuli Selemiya akumbululila umwe omuuli Hananiya komutwe wovanakwa momaiho ovanthu aveho vetai-po mondywo ya Siovaa. 6 Omuuli Selemiya ati: “Otyo yatyo!* Siovaa alinge ngootyo! Siovaa alinge umwe onondaka ombo ove wapopia, apole ko Mbambilonia ovityuma vyo mondywo ya Siovaa novanthu vatyo aveho veli koukonde, eveeta pano! 7 Mahi tehelela-vo ondaka mandyipopila momakutwi ove, no ovanthu aveho: 8 Ovauli vatetekela kwaame no kwoove, vatile makuya ovita, novihuna, nomukihi* maweendela ovilongo ovinyingi, nomauhamba omanene. 9 Ine omuuli umwe uti makuya ombembwa, ondaka yomuuli oo ailingi yotyili, tyinoñgonokwa umwe okuti omuuli oo watumwa umwe na Siovaa.”
10 Etyi apopia ngootyo, omuuli Hananiya apolo okanga pekohi liomuuli Selemiya, eiteye.+ 11 Hananiya apopila umwe povanthu aveho ati: “Etyi otyo tyapopia Siovaa wati: ‘Ongootyo mandyikateya okanga ya Nambukondonosole ohamba yo Mbambilonia, mandyiipolo pekohi liovanthu aveho vovilongo momanima evali.’”+ Omuuli Selemiya aende.
12 Etyi omuuli Hananiya apola okanga pekohi liomuuli Selemiya eiteye, ondaka ya Siovaa ayeendela Selemiya aiti: 13 “Enda kapopile Hananiya uti: ‘Etyi otyo tyapopia Siovaa wati: “Ove wateya okanga yotyimuti,+ mahi puyo mopingiya-po okanga yotyivela.” 14 Siovaa womambamba ovita, Huku yova Isilayeli, wati: “Mandyikapaka okanga yotyivela pekohi liovanthu aveho vovilongo vaundapele Nambukondonosole ohamba yo Mbambilonia, ngoe vakaundapela.+ Mandyimwavela umwe novinyama vyo mofika.”’”+
15 Pahe, omuuli Selemiya apopila omuuli Hananiya+ ati: “Tehelela-vo mbaa Hananiya! Siovaa kekutumine, mahi no ngootyo ove walingisisa ovanthu ava vayumbe onthumbi momatutu ove.+ 16 Etyi otyo tyapopia Siovaa wati: ‘Tala! Mandyikupolo kombanda yohi. Enima lino ove monkhi, mokonda wahongailiya ovanthu okutyitukilapo Siovaa.’”+
17 Mohanyi ya pandu-vali yenima liatyo olio, omuuli Hananiya ankhi umwe.