Selemiya
46 Ei oyo ondaka Siovaa apopila omuuli Selemiya ipopia ovanthu vovilongo.+ 2 Pokwapopia o Isitu,+ wapopia ovita vya Falaoo Neku+ ohamba yo Isitu, wali pondongi yo Eufalate ko Kalekemisi, etyi alwiswa na Nambukondonosole* ohamba yo Mbambilonia atili-ko, menima lya kwana Seoyakii eli kovipundi, Seoyakii+ omona wa Sosiya, ohamba yo Sundaa, wati:
3 “Kwatei onondyakulilo* mbenyi, ononthutu nononene,
Endei kovilwa.
4 Pakei omitumba kononkhambe, amuvelama, onwe vokweendela kononkhambe,
Valei ovikoko,* amumaneka na mulwe.
Lipikei omaonga, amuvale ovikutu vionondyakulilo.
5 ‘Elo tyina ndyivetala vatila owoma, oityi vatilila owoma?
Veli nokulihaha, ovita viavo viamiangaulwa.
Veli nokukahomboka vapaalala, ovita viavo nii kavileuka.
Kononthele mbatyo ambuho kutilisa owoma,’ o Siovaa wetyipopia.
6 ‘Vokuhateka kavetyivili okukahomboka, nii ovakwa-vita vetupu apa vahupila.
Kombanda kondongi yo Eufalate,
Oko velipundukila, vatoka.’+
7 Olie una uli nokulondeka motyiinduka* ulinga ngondongi yo Nilu,
Ulinga ngonondongi mbomaande elityinda-tyinda?
8 O Isitu iya ilondeka uti ondongi yo Nilu,+
Ilondeka ngonondongi mbomaande elityinda-tyinda,
Otyo iti: ‘Mandyiinduka, keheke andyihikiko.
Mandyihanye-ko epunda-umbo, novanthu vatyo vakala-mo.’
9 Indukei, onwe nonkhambe;
Hatekei ngatyina mwahaluka, onwe matemba!
Ovita viende no komutwe:
Ovo Kuse, na Pute, vakwatelela kondyakulilo,+
10 “Onthiki ei oya Tatekulu Ohamba Onene, Siovaa womambamba ovita, onthiki yonyengo yokutyepesako onondyale mbae. Omutunga mauli, maukuta, maukelipola ohunga nohonde yavo, mokonda Tatekulu Ohamba Onene Siovaa womambamba ovita, walinga otyilikutila* kotyilongo tyo kombanda, popepi nondongi yo Eufalate.+
11 Enda ko Sileyande kapole ombasamu,+
Ove mona omukainthu wo Isitu wehei mulume.
Viapeseka ovihemba viove aviho waovola kavihakula,
Utupu etyi tyikuhakula.+
12 Ovanthu vovilongo, velwiiva olukundo+ lwove,
Onkhu yove yahahana eheke aliho.
Mokonda ovakwa-vita velifondoka movakwa-vita vakwavo,
Aveho vatokela pohi.”
13 Ei ondaka Siovaa apopila omuuli Selemiya ipopia Nambukondonosole* ohamba yo Mbambilonia, meya okulwisa otyilongo tyo Isitu,+ yati:
14 “Tyipopiei ko Isitu, ketyitolei ko Mingindole.+
Tyipopiei ko Nofe,* no ko Tafene.+
Popiei muti: ‘Onganei, manekei,
Omutunga mauli-po atyiho tyili ponthele yove.
15 Oityi ovakwa-vita vokwapama vaipaelwa?
Kavakalele tyitai,
Mokonda Siovaa wevetokesa.
16 Ovanyingi velifondoka, vatoka.
Velipopila na vakwavo vati:
“Katukei! Tukondokei ko vetu, kotyilongo tyetu,
Mokonda omutunga watokota.”’
17 Oko, oko vapopila vati:
‘Falaoo ohamba yo Isitu uviela vala utupu etyi alinga,
18 ‘Ndyitukaila umwe omwenyo wange,’ wetyipopia Ohamba, wenyina litiwa o Siovaa, womambamba ovita,
‘Ohamba yo Isitu maiya,* mailingi ngo Tambole+ ili pokati konomphunda,
Ngo Kalumelu,+ ili kelunga.
19 Kuta omapunda ove wende koupika,
Ove mona omukainthu ukala ko Isitu.
20 O Isitu o ngonthane ongwa ondema,
Mahi onome mambuyeendela mambutundu kombanda.
21 Novakwa-vita vatyo vavondoka* uti onondume-tane,
Mahi navo velihaha, avakahomboka aveho.
22 ‘Okuviela kwayo uti onyoka ityoomoka,
Mokonda maveyeendela nononkhono, nononkhava,
Ngovalume vatyoka omiti.*
23 Otyiteta tyayo maveketyikokola-po,’ o Siovaa wetyipopia, ‘namphila tyina utyitala ngoti tyavinda.*
Mokonda ovanyingi vali kovimphunia-mphunia; kavevilwa okuvalulwa.
24 Omona omukainthu wo Isitu makakunda.
Makapakulwa kovanthu vo kombanda.’+
25 “Siovaa womambamba ovita Huku ya Isilayeli wati: ‘Ame ndyili nokutala nawa Amoo+ wo ko Noo,*+ na Falaoo, no Isitu, nono huku mbatyo,+ nonohamba mbatyo — otyo umwe, Falaoo novanthu aveho vapamena mwe.’+
26 “‘Mandyivepakula kovanthu vesuka-le nokuvepola omwenyo,* ku Nambukondonosole* ohamba yo Mbambilonia,+ no kovaundapi vayo. Mahi haa, otyilongo* otyo matyikakala vali novanthu ngo kohale,’ o Siovaa wetyipopia.+
27 ‘Mahi ove, wahatile owoma, muundapi wange Sakoo,
Ove wahapaalale, Isilayeli.+
Mokonda ame mandyikuyovola kotyilongo tyo kokule;
Sakoo makakondoka, makakala nomapole, akatula omutima,
Nawike vali mekevehonga.+
28 Wahatile owoma, muundapi wange Sakoo,’ o Siovaa wetyipopia, ‘mokonda ame ndyina ove.