Elisambete Una Okalukembe

Palamba-le omanima 400 tundee apa ovimato vyo Selusalei viatungwa, omunakwa umwe utiwa o Sakaliya nomukai wae Elisambete, ankho vakala popepi no Selusalei. Velinepa-le kohale, mahi ankho vetupu ovana. Nthiki imwe etyi Sakaliya anyingila mondywo ya Huku akaava otyilikutila, oandyu Ngambiliyeli aiya. Sakaliya atili unene owoma, mahi oandyu Ngambiliyeli aimupopila okuti: ‘Wahatile owoma. Ame neya okukupopila otyipuka tyimwe otyiwa, natumwa na Siovaa. Omukai wove Elisambete makala nomona, muluka okuti o Swau. Siovaa wakoya Swau alinge otyilinga tyimwe otyinene.’ Sakaliya apulu okuti: ‘Otyo wapopia otyili umwe? Ame nomukai wange twakulupa-le unene, katukala vali nomona.’ Oandyu aiti: ‘Ame natumwa na Huku opo ndyikupopile onondaka ombu. Mahi mokonda kwetavelele etyi napopia mokala otyihita-mulungu, kumapopi atee omona atyitwa.’

Sakaliya akala ehimbwe mondywo ya Huku, asete-mo. Ovanthu ankho veli nokumukevela pondye, etyi alupuka avemupulu oityi asetela. Mahi Sakaliya okupopia ketyivili, uyulaika vala. Ovanthu avetyimono okuti mokati omo una etyi amona, una etyi apopilwa na Huku.

Etyi pakala, Elisambete akala omulemi, akutula omona. Omapanga ae nombunga yae aveya okutala olukembe. Ankho vahambukwa unene. Elisambete apopi okuti: ‘Enyina liae o Swau.’ Ovanthu avati: ‘Povenyi petupu ou utiwa o Swau. Muluka tate yae Sakaliya.’ Mahi Sakaliya ahoneka pokavai okuti: ‘Enyina liae o Swau.’ Vakati ñgaa Sakaliya upopia! Ovanthu aveho mo Sundeya aveivi ovipuka ovio, avehimbika okulipula okuti: ‘Tyina omona ou amekulu makala omunthu patyi?’

Sakaliya eyulwa nomphepo ikola, apopi okuti: ‘Siovaa ankhimanekwe. Wapopilile Ambalayau okuti matumu Mesiya opo etuyovole. Swau makala omuuli, aikula ondyila ya Mesiya.’

Maliya ombunga ya Elisambete nae wamwene otyipuka tyimwe tyemuhuvisile. Otyipuka patyi? Matutyinoñgonoka melongeso malilandula-ko.