Omona Womuhepe Watutiliswa

Omanima ombila yahalokele, Siovaa apopila Iliya okuti: ‘Enda ko Salefaa. Omuhepe umwe ukala-ko mekekwaavela okulia.’ Etyi ehika kotyilongo otyo, Iliya amono omuhepe umwe wahepa unene utiava ononkhwii. Iliya emwiiti omaande. Tyina akapola omaande, Iliya emupopila vali okuti: ‘Etelela-vo ombolo.’ Mahi omuhepe emupopila okuti: ‘Ame ndyitupu ombolo. Ndyina vala okahinde nokamulela kehehi pala ame nomona wange.’ Iliya emupopila okuti: ‘Ine undingila-po ombolo, Siovaa wati ohinde momulindi kamaipu-mo, omulela mokamulindi kamakatongoloka-mo, atee ombila iya.’

Omuhepe aende keumbo liae, alingila ombolo omuuli wa Siovaa. Ngeetyi Siovaa apopile, omuhepe nomona wae vakalele nokulia omanima aeho ombila yahalokele. Omulela wae nohinde kaviapwile-mo.

Apamoneka otyipuka tyimwe otyivi. Omona womuhepe avele unene, anyimi. Omuhepe aiti Iliya emukwateseko. Iliya aumphula-po omona, emutwala keulu liondywo. Alangeka omona koula, ehimbika okulikwambela okuti: ‘Siovaa mbambavo omona ou akale vali nomwenyo.’ Ine Siovaa watutilisilile omona oo ñgeno tyahuvisile unene ovanthu. Utyii omokonda yatyi? Omokonda pomuvo opo petupu omunthu wetyinkhile akala vali nomwenyo. Ngwe omuhepe oo nomona wae ha va Isilayeli.

Mahi omona akala vali nomwenyo! Iliya apopila omuhepe okuti: ‘Tala! Omona wove una omwenyo.’ Omuhepe ahambukwa unene, apopila Iliya okuti: ‘Ove tyili-tyili umunthu wa Huku. Ame ndyityii okuti ove upopia vala etyi Siovaa ekutuma.’