Swau Wiikula Ondyila

Swau, omona wa Sakaliya na Elisambete, etyi ekula akala omuuli. Siovaa wakoyele Swau alongese ovanthu okuti Mesiya ukahi nokuya. Swau ankho kalongesila monondywo mbokufendela nomomapunda-umbo, ankho ulongesila vala moluhandya. Ovanthu ankho vatunda mo Selusalei nomo Sundaa opo valongeswe na Swau. Swau wevelongesile okuti opo vahambukiswe Huku, vesukisa okuyeka-po okulinga ovipuka Huku eyele. Ovanthu ovanyingi etyi vatehelela Swau, avelivele ononkhali mbavo, Swau evembatisalela Mondongi yo Solondau.

Swau ankho hamuhona. Ankho uvala oseta yekamelu, tupu ankho ulia ovimphunia-mphunia nowiki. Ovanthu ovanyingi vahandele okunoñgonoka Swau. Ova Faliseu nova Sanduseu avaende vekemutale. Swau evepopila okuti: ‘Livelei amupiluluka. Mwahasokei okuti muvanene vali mokonda mutiwa muvana va Ambalayau. Otyo katyilekesa okuti muvana va Huku.’

Ovanyingi ankho veya ku Swau otyo vemupula okuti: ‘Oityi twesukisa okulinga tuhambukiswe Huku?’ Swau apopila ova Sundaa okuti: ‘Inkha muna ovikutu vivali, tyimwe tyaavelei una wehena.’ Ove utyii omokonda yatyi apopilile ngootyo? Wahandele ovalongwa vae vanoñgonoke okuti opo vahambukiswe Huku, vesukisa okukala nolwembia novanthu.

Swau apopila ovatanthi velilimu okuti: ‘Mwahavakei, mwahakembei nawike.’ Apopila ovakwa-vita okuti: ‘Mwahapombei tyomunthu nawike, mwahatendeleyei nawike.’

Ovanakwa no vomuhoko wa Levii aveya ku Swau avemupulu okuti: ‘Ovelie? Ovanthu aveho vahanda okukunoñgonoka.’ Swau eveti: ‘Ame wokulongesa ovanthu etyi tyayemba ku Siovaa, ame wokwapopilwe na Isaiya.’

Ovanthu ankho vetyihole tyina Swau evelongesa. Ovanyingi ankho velipula ine Swau oe o Mesiya. Mahi evepopila okuti: ‘Una uya omunene vali kwaame. Ame atee umwe hipondola okukutulula ononkhaku mbae. Ame ndyimbatisala nomeva, mahi ou meiya mambatisala ovanthu nomphepo ikola.’