Omona Ankho Ukevelelwa!

Ambalayau na Sala okutuka apa velinepa pena-le omanima omanyingi. Vasile-po eumbo liavo likahi nawa ko Uli, avaende avakakala momakaka. Mahi Sala kanumanene, mokonda ankho una onthumbi mu Siovaa.

Sala ankho uhanda unene okukala novana, pahe apopila Ambalayau okuti: ‘Kalale-vo nomupika wange Angale. Hamwe ndyimonena mwe ovana.’ Etyi pakala, Angale akala nomona. Alukwa okuti o Isimayeli.

Etyi palamba omanima omanyingi, pweetyi pahe Ambalayau ena omanima 99, Sala ankho una omanima 89, avatambula ovaenda vetatu. Ambalayau evekongo vakaombe-po momwombelo womuti, eveavela okulia. Okuti ovaenda ovo uvei ovalie? Onoandyu! Avapopila Ambalayau okuti: ‘Enima eli liya pononthiki nga mbuno, Sala makala nomona omukwendye.’ Sala ankho ukahi mekaka, etyiivi etyi vapopia. Ehimbika okuliyolela, ati: ‘Pahe ame nakulupa-le ñgaa mandyikala umwe nomona?’

Enima lialandulako, Sala akala nomona, ngeetyi oandyu ya Siovaa yapopia. Ambalayau emuluku okuti o Isake, tyihangununa okuti: “Wandyolele.”

Etyi Isake atuukisa omanima etano, Sala etyimono okuti Isimayeli ukahi nokumuleva. Sala ankho uhanda okuyakulila omona wae, aende ku Ambalayau emupopila ataate Angale na Isimayeli. Ambalayau ankho kahandele okutyilinga. Mahi Siovaa apopila Ambalayau okuti: ‘Tavela etyi tyapopia Sala. Ame mandyitekula Isimayeli. Mahi etyi nekupopila matyifwiswapo na Isake.’