Sombe Olie?

Motyilongo tyo Usi, ankho mukala omulume umwe ufenda Siovaa. Enyina liae o Sombe. Wali omuhona, wakalele novana ovanyingi. Wali omunthu una okankhenda, ukwatesako ovahepi, novahepe, nononthyiwe. Mahi okuti mokonda Sombe ulinga evi viaviuka kakalele vali novitateka?

Sombe ankho ketyii okuti Satanasi Eliapu wahandele okumulingisisa ayeke-po okufenda Siovaa. Siovaa apopila Satanasi okuti: ‘Omunthu wange Sombe wemumona? Kombanda yohi nawike vali ukahi ngae. Ngwe unthavela, ulinga evi viaviuka.’ Satanasi ati: ‘Sombe ukutavela vala mokonda ove umwamena, umwaavela ovipuka oviwa. Wemwaavela onofika novipako. Mupola ovipuka aviho utale inkha kamekuyeke-po.’ Siovaa apopi okuti: ‘Mulinga etyi wahanda. Mahi wehemwiipae.’ Omokonda yatyi Siovaa ayekelele Sombe alolwe na Satanasi? Mokonda ankho utyii okuti Sombe kamemuyeke-po.

Satanasi alingi Sombe ovipuka ovinyingi ovivi. Tete wavakesile onongombe mbae nomambulu. Konyima keulu akutundu otupia atwiipaa onongi mba Sombe. Avakesa vali omakamelu ae. Ovanthita va Sombe avaipawa. Pahe Satanasi alingi otyipuka tyimwe tyalemenene unene Sombe. Ovana vae ankho vekahi motyipito, avatokelwa nondywo avankhi. Otyo atyiihama unene Sombe, mahi no ngootyo ahayeke-po okufenda Siovaa.

Satanasi amonesa vali Sombe ononkhumbi, atumbisa ovinthimba molutu lwae aluho. Sombe epwila movinthimba vimwiihamene unene. Ankho ketyii omokonda yatyi ovipuka ovio vimonekela. Mahi no ngootyo Sombe ahayeke-po okukala epanga lya Siovaa. Huku amono ovipuka ovio aviho, ahambukwa unene na Sombe.

Satanasi ahindila ovalume vetatu opo vakapopie omapita Sombe. Avemupopila okuti: ‘Hamwe ove walinga onkhali oiholeka. Otyo Huku ekahi nokukumonesila ononkhumbi.’ Sombe ati: ‘Ame halingile natyike tyapenga.’ Sombe ahimbika okusoka okuti o Siovaa ukahi nokumumonesa ononkhumbi, apopi okuti katyaviukile Huku andinge ngootyo.

Omukwendye umwe utiwa o Eliyuu, ankho ukahi vala nokutehelela etompho. Etyi vamana, apopi okuti: ‘Atyiho mwapopia katyaviukile. Siovaa kekahi ngoonthwe. Kalingi etyi tyapenga. Utala ovipuka aviho, ukwatesako ovanthu movitateka viavo.’

Konyima Siovaa apopila Sombe, okuti: ‘Opi ankho ukahi etyi natunga eulu nohi? Omokonda yatyi usokela okuti ame nekwetela ovitateka ovio? Ove wapopia vala, mahi kutyii oityi tyaeta ovipuka ovio.’ Sombe etyimono umwe okuti wapengesa, apopi okuti: ‘Ame napengesa. Ankho ndyikwiiva-iva vala, mahi pahe ndyikwii umwe nawa. Utupu etyi tyikupona. Otyiponyo mokonda yeetyi napopia’.

Etyi ovitateka viapwa, Siovaa ahakula Sombe, emwavela ovipuka vilamba pweevi ali navio. Sombe wakaleleko vali ehimbwe nehambu. Mokonda Sombe wetavelele Siovaa naapa umwe amonesilwe ononkhumbi, Siovaa emwaavela ovipuka ovinyingi oviwa. Okuti noove mohetekela Sombe, okakatela mu Siovaa namphila una ovitateka?