Oñgeni Huku Atala Ovikunwa?

OMUPAKEKO WETU, utuhandela otyiwa oe ketuilika okunwa tyapola pokati.a Oe wavela ovanthu “ovinyu na vahambukwe, nomulela opo vahambukwe, nombolo ivepameke.” (Salmo 104:15, Nova Tradução na Linguagem de Hoje) Motyikando tyimwe, Jesus Kristu wayawisile kehambu liotyipito tyo kasamendo etyi apilula omaande alinge “ovinyu ongwa.”—João 2:3-10, A Bíblia de Jerusalém.

Tyimoneka nawa okuti Omupakeko wetu utyii oñgeni ovikunwa vikalesa olutu luetu nowongo. Nombimbiliya Tate yetu keulu ‘utulongesa etyi tyakolela,’ nokutulondola opo tulityilike okunwa unene. (Isaías 48:17) Tala omalondolo aa akolela:

“Tupu muhakoluei no vinyu, ituala kovivi.” (Efésios 5:18) “Ononkholwa . . . kavakapiñgana ouhamba wa Huku.” (1 Coríntios 6:9-11, A Bíblia de Jerusalém.) Ondaka ya Huku iilika “okunwa unene, nokulalelela movipito novipuka vali ovikuavo.”—Gálatas 5:19-21, Byington.

Pahe tutalei oviponga vimwe vituka kokunwa unene.

Oviponga Vituka Kokunwa Unene

Namphila ovinyu ipondola okulinga nawa, mahi ina ovipuka vipilula owongo nokusoyesa olutu. Okunwa unene tyipondola okueta ovitateka ovinene:

Okunwa unene tyinyona onondunge, ‘ohakala vali nounongo wokusoka nawa.’ (Provérbios 23:33,The Bible in Today’s English Version) Allen, ankho unwa wapopiwa monthele yokonyima wati: “okunwa unene katyivelesa vala olutu mahi tyivelesa omutima. Ove kusoko koluihamo ukahi nokuetela vakuenyi.”

Okunwa unene tupu tyipondola okutupola olukundo. Ovihonekwa vitulondola okuti: “Oundalelapo novinyu, novinyu ihoholola ovio vipola omunthu onondunge.” (Oséias 4:11) Oñgeni ngotyo? Tyina tuamanu unene, omalusoke nomahando tuyele, mokonda omavi tuhimbika okuvitala ngatyina otyipuka otyiwa—atuhelityilika. Etokolo lietu liokulinga otyiwa lipondola okusoya. Okunwa unene tyipondola okutupola omalusoke etu ana omawa atutokela movivi.

John, ankho vatañguna nomukai wae aende tyanumana no kombale. Oe etyi anuapo oukopo umue opo atule onyengo, omukai umue eya no ponthele yae. Etyi anwa vali onokopo mbumue John akaya nomukai oo alingi oumbalehi. Konyima John elivele unene mokonda yokualinga otyipuka otyo. John wati hinesoke okulinga otyipuka ngotyo, napolwa olukundo novinyu.

Okunwa unene tyipondola okutuetela okuhayungu nawa omupopio wetu novituwa. Ombimbiliya yapula okuti: “Olie uliyava omuihamo? Olie una ovipute tyihena etyi alinga? Ovovana vakala popepi novinyo vokuovola ovikunwa viahonyaikwa.” (Provérbios 23:29, 30, João Ferreira de Almeida) Okunwa unene “ulitehelela ngatyina ukahi pokati kelunga, nokuaeva ombungo, nokulihakahaka ngatyina ukahi kombapolo.” (Provérbios 23:34, Nova Tradução na Linguagem de Hoje) Omunthu unwa unene upondola okupindukapo “tyeihamenwa nokuavetwa, mahi ketyihinangela oñgeni tyaenda.”—Provérbios 23:35, Nova Versão Internacional.

Okunwa unene tyipondola okunyona ekongoko. “Konthyulilo [ovinyu] inumata ngonyoka ina oulio nge tungalutu.” (Provérbios 23:32, A Nova Tradução na Linguagem de Hoje) Onondotolo vetavela ounongo wapopiwa mu proverbio oyo onkhulu. Okunwa unene tyipondola okueta omauvela omanyingi okasele okuvela ehuli, no momapunga, nokutepulula ohonde, nomauvela molutu, nomutima wahaundapa nawa—Ngotyo tuapopia po vala vimwe. Alo umwe tyina omunthu atualako nokunwa unene tyimutuala kokuvela unene ine okunkhia. Otyitateka otyinene vali tyitunda kokunwa onondotolo kambetyipopile.

Otyiponga otyinene-nene. Namphila omunthu hankholwa, mahi okunwa tyihelitete otyiponga otyinene mopaspilitu. Ombimbiliya ipopia nokuayandyuluka nawa okuti: “Tatiei, ya vana vapindukapo mombimba avakaovola ovikunwa vikoleswa, vana vatakelelwa alo kongulohi iya avelitokotesa novinyu!” Omokonda yatyi? Isaia wahangununa nawa ovitateka vitunda kokunwa tyihelitete okuti: “Povipito viavo pakala ovihumba no noñgoma no nonkhuino, no vinyu; mahi kavatale kehando lia Jeova nokovilinga alinga nomaoko ae.”—Isaías 5:11, 12.

Ondaka ya Huku itulondola “tuhakale pokati kononkholwa.” (Provérbios 23:20) Ovakai ovakulu valondolwa opo vahakale “ovapika vovinyu onyingi.” (Tito 2:3) Omokonda yatyi? Katutu-katutu​—pamwe tyihetyi​—omunthu uhimbika okunwa unene. Pamwe, onkholwa “ilipula okuti: ‘Kakutyilatyi opo ndyikanwe vali katutu?’” (Provérbios 23:35 Nova Versão Internacional) Ononkholwa vehika kotyiponga otyinene tyokuhanda okupindukila okunwa, mokonda yokualele tyakolwa.

Ombimbiliya ilondola vana vaovola “unene ovinyu, no movipito, nokulilolela pokunwa . . . okuti mavakapulwa na una makakoyesa vana vena omuenyo no vokuankhia.” (1 Pedro 4:3, 5) Konthele yononthiki mbuno mbepuiya tukahi Jesus walondola okuti: “Liyungei nawa opo omitima vienyi vihakale nelelele liokulia unene, nokunwa unene, no kusukalala novipuka viomuenyo, iya onthiki [ya Jeova] aimuhupula ngeliva.”—Lucas 21:34, 35.

Mahi oñgeni una unwa tyapola pokati apondola ‘okulityilika okunwa unene’?

[Onondaka Poutoi]

[Ehangununo liolutalatu pefo 4]

Okunwa unene tyipondola okututuala kovitateka ovinene