Sesusi Ukahi Konthele Yelunga Lyo Ngalileya

Motyinthiki tyahulililako, Sesusi wakalele nono apositolu mbae, evepopila okuti: “Tyina namapindulwa-po kononkhia, mandyipiti komutwe wenyi okuenda ko Ngalileya.” (Mateusi 26:32; 28:7, 10) Pahe ovalanduli vae ovanyingi ngako vaya nako, mahi oityi ankho vakalinga ko Ngalileya?

Nthiki imwe Petulu apopila vakuavo, ono apositolu epandu okuti: “Ame mandyikafwa ombisi.” Navo avati: “No onthue tuenda no ove.” (Suau 21:3) Avaende, avafu otyinthiki atyiho, mahi avahakuate ombisi naike. Tyina kutya, Sesusi evemonekela konthele yelunga, mahi avehemuimbuka. Sesusi eveihana ati: “Vana vange, mutupu natyike tyokulia?” Avakumbulula okuti: “Au!” Sesusi evepopila okuti: “Yumbei owanda kokulio kuowato mamuvasi ombisi.” (Suau 21:5, 6) Avayumbu owanda, avakuate ombisi onyingi avehetyivili okuinana-mo.

Suau apopila Petulu okuti: “O Tatekulu!” (Suau 21:7) Liwa-liwa, Petulu avale ovikutu viae vyo kombanda mokonda ankho kevivalele. Ahombokela momaande, ayoo onometulu 90 alo koluhimba. Vakuavo avemulandula nowato, otyo vanana owanda weyula ombisi.

Etyi vehika koluhimba, avamono “otupia nombisi ili komakala no nombolo.” Sesusi ati: “Etei-po imwe pombisi muakuata pahetyino.” Petulu anane owanda, ankho muna onombisi 153 ononene! Sesusi evepopila okuti: “Endyuei mulie.” Nawike povalongwa wahetekelele vali okumupula okuti: “Ovelie?” mokonda ankho vetyii okuti o Sesusi. (Suau 21:10-12) Otyo tyikando tya tatu Sesusi amonekela ovalongwa vae vekahi mphangu ike.

Sesusi eveavela ombolo nombisi opo valie. Konyima, tyafuile atale kombisi, apulu Petulu okuti: “Simau mona wa Suau, okuti ove unthyole vali tyipona ei?” Okuti Petulu ankho mapande vali otyilinga tyae tyokufwa tyipona otyilinga Sesusi memutumu? Petulu akumbulula okuti: “Enga Tatekulu, ove utyii okuti ame ndyikuhole unene.” Moluotyo, Sesusi emupopila okuti: “Lisa onongi mbange.” — Suau 21:15.

Sesusi emupulu vali okuti: “Simau mona wa Suau, unthyole?” Mokutala, Petulu ankho ketyii omokonda yatyi apulilwa ngotyo, emukumbulula okuti: “Enga, Tatekulu, ove utyii okuti ame ndyikuhole unene.” Sesusi emupopila vali okuti: “Nthita onondyona mbange.” — Suau 21:16.

Otyikando tya tatu, Sesusi apulu okuti: “Simau mona wa Suau, unthyole?” Pahe Petulu tyafuile ankho ukahi nokusoka okuti Sesusi kayumbile onthumbi oukuatyili wae. Petulu apopi vali okuti: “Tatekulu, ove wii ovipuka aviho, utyii nawa okuti ame ndyikuhole.” Sesusi apopi vali oityi Petulu ankho ena okulinga, ati: “Lisa onondyona mbange.” (Suau 21:17) Vana vena otyilinga tyokuhongolela ovanthu va Huku vesukisa okutekula nawa vana veya motyunda tya Huku.

Sesusi wakutilwe, aipawa mokonda ankho walinga otyilinga Huku emutuma. Pahe apopila Petulu okuti, nae makala novitateka ngovio. Sesusi ati: “Tyina ankho nkhele umukuendye, uhole okuvala ovikutu oende no ku uhanda. Mahi tyina wamakulupa, motandaveka omavoko ove mukuenyi ekuvaleka iya ekutuala no ku uhahande.” Emuavela ondundo, ati: “Tualako okundandula.” — Suau 21:18, 19.

Petulu atale ku apositolu Suau, apulu Sesusi okuti: “Tatekulu iya oityi matyimoneka nou?” Oityi ankho matyimoneka na apositolu Suau, una Sesusi ankho ehole unene? Sesusi emukumbulula okuti: “Inkha ame ndyihanda akale-ko alo ndyikondoka, ove wesuka natyo?” (Suau 21:21-23) Petulu ankho wesukisa okulandula Sesusi, ahasuku netyi vakuavo mavalingi. Mahi, Sesusi walekesa okuti Suau ankho makala-ko vali omuvo omunyingi tyipona ono apositolu ononkhuavo, tupu ankho mamono memonekelo Ohamba Sesusi ukahi nokuya.

Tyotyili, Sesusi walinga ovipuka ovinyingi mahi ha aviho viahonekwa monombuingwa.