ELONGESO 02
Ombimbiliya Ipopia Okuti Ovipuka Mavikakala Nawa
Ovanthu aveho mouye vena ovitateka vivepola ononkhono, vivekalesa notyiho, viveihama komutima. Okuti nthiki imwe wakalele-ale notyitateka atyikukalesa ngotyo? Tyipondola pehepano ñgana, wanumana mokonda uvela; okuti hatyo, hamwe wasoya mokonda wasiwapo. Pahe hamwe uhole okulipopila ñgaa: ‘Ñgaa ouye watyo ou, otyo vala maukala-kala ñgaa?’ Otyipuka otyo uhole okulipopila, Ombimbiliya ityikumbulula umwe nawa.
1. Oityi Ombimbiliya ipopia tyiuungumanesa omutima?
Ombimbiliya ipopia oityi mouye mueyulila ovitateka ñgaa. Mahi tupu ipopia okuti ovitateka ovio apa katutu mavipuko. Tala vala etyi Huku apopia, wati: ‘Ndyihanda okukemuavela oviwa komutwe wandyila.’ Tyina wiiva onondaka ombo, ukala ñgeni? (Tanga Jeremias 29:11, 12.) Okusoka okuti komutwe wandyila matukamona oviwa, tyipondola okutukuatesako atukoleleya ovitateka vietu, naapa vietuihama, mahi atuhambukwa. Tupu matuyumbu-ko onthumbi yokuti komutwe wandyila, matukahambukwa ononthiki mbatyo ambuho.
2. Ovipuka patyi Ombimbiliya yapopia okuti kamaviende-ko ehimbwe?
Ombimbiliya ipopia okuti komutwe wandyila “ononkhia kamambukakala-ko vali, nii okuliyava, nii okulila nii omaluihamo kavikakala-ko vali.” (Tanga Eholololo 21:4.) Ovanthu hono, vamona emone mokonda vahepa, valingwa onya, vavela, vasiwapo no vavo. Apa kapii ovipuka ovio aviho, Ombimbiliya yapopia okuti kamavikakala-ko vali. Nkhele yapopia okuti ovanthu mavakakala mouye umwe omupe pano pohi, avahankhia-nkhia vali.
3. Oityi una okulinga uyumbe onthumbi mu etyi Ombimbiliya yapopia?
Ovanthu ovanyingi vakevelela okuti hamwe kumbi ouye ou maukala nawa. Mahi ine uvepula ankho tyili-tyili ouye ou maukala umwe nawa, kavetyii. Etyi Ombimbiliya ipopia tyiyumbwa onthumbi. Mahi pahe, oñgeni no ove motyimono okuti tyili tyiyumbwa onthumbi? Una ‘okuovolola nawa Movihonekwa.’ (Ovilinga 17:11) Okulilongesa nawa Ombimbiliya, otyo matyikukuatesako, otale ine etyi yapopia okuti matyiya komutwe wandyila tyitavela umwe okutyiyumba onthumbi.
KUHANDE OKUNOÑGONOKA VALI?
Noñgonoka ovipuka vimwe Ombimbiliya yapopia okuti mavikakala nawa komutwe wandyila. Tupu otala oñgeni okusoka koviwa ovio tyili nokukuatesako ovanthu ovanyingi hono.
4. Ombimbiliya ipopia okuti matukakala nomwenyo omuwa, atuahakankhia-nkhia vali
Onondaka ombu mbuli pombuelo, mbupopia oñgeni ovanthu mavakakala komutwe wandyila. Ombu-pi wahumba-po vali? Oityi wembuhumbila?
Tangei ono tesitu mbuli pombuelo, mahi tyina mumbutanga, otyo mutomphola konthele yomapulo aa:
Tyina usoka, oñgeni onondaka mbo tesitu ei mbupondola okukukuatesako? Okuti una omunthu umwe wahinangela, hamwe ombunga yove oo epanga liove, upondola okutangela otesitu ei?
Soka ñgeno uli mouye umwe mwati umwe
NAWIKE . . . |
OMU AVEHO . . . |
|---|---|
|
|
|
|
|
|
|
|
|
|
5. Etyi Ombimbiliya yapopia tyipondola okukukuatesako, ohatale ouye ngetyi uutala
Ovanthu ovanyingi tyina vatala ovitateka viouye uno, vehole okusoya. Nkhele vamwe tyiveihama unene avanumana. Otyo vamwe vatutumbila nokuhanda okumanako ovitateka aviho. Oviwa Ombimbiliya yapopia okuti maviya komutwe wandyila, viya-le nokukuatesako ovanthu ovanyingi. Talei OVIDIU, amutomphola konthele yomapulo aa:
Ngetyi tuamona movidiu, oityi ankho Rafika ahahande?
Otyipuka ankho tyinumanesa Rafika, na hono nkhele oko tyikahi. Mahi oñgeni Ombimbiliya yemukuatesako?
Tyina tuyumba onthumbi movipuka oviwa Ombimbiliya yapopia okuti matukevimona komutwe wandyila, ngatukala-kala ñgoo novitateka, kamatunumana, kamatusoyo. Tangei Provérbios 17:22 Nova Loma 12:12, amutomphola konthele yomapulo aa:
Tyina usoka, okutavela ku etyi Ombimbiliya yapopia okuti ouye maupiluluka aukala nawa, okuti tyipondola okukukuatesako? Oityi wakumbululila ngotyo?
OVANTHU VAMWE VATI: “Otyipuka ouye ukahi, ame hitavela okuti nthiki imwe maukala nawa, aukala umwe ngetyi Ombimbiliya yapopia.”
Omokonda yatyi ove muene una okuovolela opo utale ankho etyi Ombimbiliya yapopia otyili ine hatyili-ko?
ETYI WELILONGESA
Wanoñgonoka okuti Ombimbiliya ipopia okuti komutwe wandyila, matukakala nawa. Okusoka kotyipuka otyo, tyitukuatesako okuahasoyo tyina tuna ovitateka.
Okupitulula
Omokonda yatyi ovanthu vesukisila okunoñgonoka etyi Huku mekevelingila komutwe wandyila?
Oviwa patyi Ombimbiliya yapopia okuti matukevimona komutwe wandyila?
Oñgeni okusoka kovipuka ovio tyipondola okukukuatesako?
KUHANDE OKUOVOLA VALI?
Tanga omukanda ou wapopiwa pombuelo, utale oñgeni okusoka koviwa matukamona tyitukuatesako tyina tuna ovitateka.
“Opi Movasi Oviwa Mavikupameka Omutima?” (Pahukei!, 22 ya Abril yo 2004)
Nyingila mo internete mo jw.org, utale oñgeni okusoka koviwa viapopiwa mo Mbimbiliya, tyitukuatesako okukoleleya tyina tupangela vala okuvela.
“Okuti Ombimbiliya Ipondola Okukukuatesako Tyina Una Ouvela Wahaveluka?” (Mo jw.org)
Tala ovidiu ei, mahi tyina wiitala, otyo usoka koviwa ove, nombunga yove, mamukamona mouye omupe.
Jukka Sylgren ankho kahande okutala ovanthu valingwa onya. Ankho omunthu una wokuti tyina amona tyimwe tyapenga, uhanda okutyiviukisa poola yatyo opo. Mahi etyi amona mo Mbimbiliya okuti ovivi mavikapwa, etyiyekepo.
“Pahe Hitutumba Vali Ndyimane-ko Ovitateka Viouye” (onthele Yomutala Womulavi)