Undapesa Nounongo “Omutunga Wospilitu”
“Tavelei . . . omutunga wospilitu, ondaka ya Huku.”—EFÉSIOS 6:17.
1, 2. Oityi tuesukisa okulinga opo tukale vali novaivisi Vouhamba?
ETYI amana okutala esuko ovanthu vena mospilitu, Jesus apopila ovalongwa vae okuti: “Ovilinga viokuteya ovinene, mahi ovaundapi kavehi. Moluotyo, itei ku Muene wovilinga opo atume ovaundapi kovilinga viae viokuteya.” Jesus kapopile vala. Etyi amana okupopia onondaka ombo, “Aihana ovalongwa vae ekwi na vevali” evetumu opo ‘vakateye’ ine vakaivise. (Mateus 9:35-38; 10:1, 5) Konyima, Jesus “alekesa ovakuavo omakwi epandu-vali evetumu, vevali–vevali” opo navo vakaivise.—Lucas 10:1, 2.
2 Hono tupu kuesukisa ovaisi Vouhamba wa Huku. Mouye auho Ovanthu vakalele Pehinangelo lia Tatekulu menima lio 2009 vena 18.168.323 Otyo tyilekesa okuti ovanthu vena 10. 000.000 valipo ha nombangi ko mba Jeova. Epia liayela pala okuteyua. (João 4:34, 35) Moluotyo, nonthue tuesukisa okulikuambela okuita vali ovaundapi. Mahi oñgeni matulingi ngetyi tuaita? Tupondola okulinga ngotyo mokuundapa vali unene nombili movilinga viokuivisa nokulinga ovalongwa.—Mateus 28:19, 20; Marcos 13:10.
3. Oñgeni ononkhono mba Huku mbutuvatela opo tukale vali ovanongo pokuivisa?
3 Onthele yokuatetekela yapopia oñgeni ononkhono mba Huku mbuvatela “okupopia ondaka ya Huku tyihena owoma.” (Atos 4:31) Ospilitu oyo, tupu ipondola okutuvatela opo tukale nounongo wokuivisa. Onkhalelo imwe yokukala nounongo movilinga viokuivisa okuundapesa nawa otyiti Jeova Huku etuavela—Ondaka yae Ombimbiliya. Oyo yahonekwa kononkhono mba Huku. (2 Timóteo 3:16) Onondaka mbayo mbafuiminwa na Huku. Moluotyo, okuhangununa otyili Tyovihonekwa nounongo pokuivisa tyesukisa ombatelo yospilitu sandu. Tyina nkhele tuhenelilongese oñgeni tupondola okutyilinga, tutalei oñgeni Ondaka ya Huku ina epondolo.
‘Ondaka ya Huku Ina Epondolo’
4. Epiluluko patyi ondaka ya Huku Ombimbiliya ipondola okulinga movanthu?
4 Ondaka ya Huku ina epondolo unene! (Hebreus 4:12) Ondaka ya Huku Ombimbiliya yatwa vali tyipona omutunga utiula enkhipa alo momusa. Otyili Tyovihonekwa tyihika komutima wovanthu nokunyingila momalusoke ae, nokulekesa oñgeni omunthu atuwa. Otyili otyo tyina epondolo, tyipondola okuvatela omunthu okulinga epiluluko liesukisa. (Tanga Colossenses 3:10.) Tyotyili, Ondaka ya Huku ipilulula omienyo!
5. Omonkhalelo patyi Ombimbiliya ituhongolela iya ouwa patyi utundililako?
5 Tupu, Ombimbiliya omukanda una ounongo wahaelekwa. Una onondaka mbupondola okukuatesako ovanthu oñgeni vapondola okukala mouye uno wepuiya. Ondaka ya Huku imimikila onomphai mbetu hono nomo nondyila mbetu komutwe. (Salmo 119:105) Ondaka ya Huku itukuatesako unene tyina tuvahiwa novitateka na tyina tulinga omatokolo konthele yokuholovona omapanga, novitalukiso, novilinga, nomuvalo, novikuavo vali. (Salmo 37:25; Provérbios 13:20; João 15:14; 1 Timóteo 2:9) Okuundapesa ovitumino vivahiwa mondaka ya Huku vitukuatesako okukala noupanga omuwa na vakuetu. (Mateus 7:12; Filipenses 2:3, 4) Inkha ondyila yetu ikala tyamimikilwa nawa matukala ovanongo okulinga omatokolo aviuka. (1 Timóteo 6:9) Ovihonekwa tupu vitupopila ehando lia Huku komutwe wa ndyila, nokutuvatela okutyinda omuenyo welikuata nehando olio. (Mateus 6:33; 1 João 2:17, 18) Otyili ou omuenyo umue omuwa omunthu avasa inkha uyeka ovitumino via Huku vihongolele omuenyo wae!
6. Oñgeni epondolo lio Mbimbiliya litukuatesako movilwa vietu mopamphepo?
6 Soka, tupu, epondolo Ombimbiliya ina pala ovilwa vietu viopaspilitu. Paulu waihana Ondaka Huku okuti “omutunga wospilitu.” (Tanga Efésios 6:12, 17.) Okuundapesa nawa Ombimbiliya tyiyovola ovanthu moupika wa Satanasi. Oo, omutunga umue uhupisa omuenyo tyipona okuhanyauna. Hatyiwa tulinge ononkhono mbokuundapesa nounongo?
Yundapesa Nawa-nawa
7. Omokonda yatyi tyakolela okulilongesa okuundapesa nawa “omutunga wopaspilitu”?
7 Efualali lityivila vala okulwa nawa inkha liundapesa nokulilongesa nawa-nawa outa walio. Otyo tyelifwa nokuundapesa “omutunga wospilitu” movilwa vietu vio paspilitu. Paulu wahoneka okuti: “Linga ononkhono opo ulipakule ku Huku tyapandwa, omuundapi uhena etyi tyimuetesa ohonyi, uundapesa nawa ondaka yotyili.”—2 Timóteo 2:15.
8, 9. Oityi tyitukuatesako okunoñgonoka nawa etyi Ombimbiliya yapopia? Aava ongeleka.
8 Oityi tyipondola okutukuatesako ‘okuundapesa nawa-nawa onondaka mbotyili’ movilinga vietu viokuivisa? Tyina nkhele tuhene popile vakuetu etyi Ombimbiliya yapopia, tuesukisa okuinoñgonoka nawa. Moluotyo, tyesukisa tunoñgonoke nawa onondaka mbo konyima no mbo komutwe. Ngetyi tyapopia omukanda umue: “Onondaka mbo konyima no mbo komutwe ine onondaka mbatetekela nombu mbesaililwa, mbuyandyulukisa vali nawa onondaka tukahi nokutanga.”
9 Opo tunoñgonoke nawa onthele imwe Yovihonekwa, tyesukisa okunoñgonoka nawa onondaka onokhuavo. Onondaka mba Paulu mu Gálatas 5:13 mbutyilekesa nawa. Oe wati: “Onue muaihanwa pala eyovo, vakuatate; mahi muhaundapesei eyovo olio ngatyina limuhongolela movipuka viopahitu, anthi, mokonda yohole, undapei ngovapika kese umue namukuavo.” Eyovo patyi Paulu apopia apa? Okuti ankho ukahi nokupopia okuyovoka konkhali no nonkhia, ine okuyovoka komalongeso omatutu ine okovipuka ovikuavo? Onondaka mbo konyima no mbo komutwe, mbulekesa okuti Paulu ankho ukahi nokupopia okuti ‘wetuyovola konkhano ombi Yovitumino.’ (Gálatas 3:13, 19-24; 4:1-5) Ankho ukahi nokupopia eyovo lituka kokulandula Kristu. Vana vapanda okuyovolwa koupika vena ohole kese umue na mukuavo. Kavakala nokulipopia omapita nokutañguna.—Gálatas 5:15.
10. Opo tunoñgonoke nawa ehangununo lio Vihonekwa, oityi tuesukisa okulinga iya oñgeni tupondola okutyilinga?
10 Opo tunoñgonoke nawa ovihonekwa, tupondola okulilongesa o versikulu yokomutwe no yokonyima, ngo kunoñgonoka olie wahoneka omukanda Wombimbiliya tukahi nokutanga, no onalupi wahonekwa, novitateka vali navio pokuhoneka. Otyo tupu tyitukuatesako okunoñgonoka omokonda yatyi wahonekelwa, nonkhalelo yovanthu vahoneka, novituwa viavo, novituwa vionongeleya pononthiki mbavo.a
11. Omokonda yatyi tuesukisa okulunguka tyina tuhangununa ovihonekwa?
11 “Okuundapesa nawa ondaka yotyili” tyapona vali okuhangununa nawa-nawa Ovihonekwa. Tuna okulunguka opo tuhaundapese Ombimbiliya pala okutilisa owoma ovanthu. Namphila tuundapesa Ovihonekwa opo tuamene otyili, ngetyi tyalingile Jesus etyi ankho alolwa Neliapu, Ombimbiliya kaipondola okuundapeswa pala okuhonga vakuetu. (Deuteronômio 6:16; 8:3; 10:20; Mateus 4:4, 7, 10) Tupondola okutehelela elondolo lio apostolu Petulu liati: “Mahi, humbei Kristu Tatekulu momitima vienyi, okukala apeho tyafuapo pala okukumbulula kese umwe umupula ehunga liekevelelo lienyi. Anthi, tyilingei nomutima wapoleya nehumbilo enene.”—1 Pedro 3:15.
12, 13. ‘Ovipuka patyi viatuituilwa kononkhono’ otyili Tyondaka ya Huku tyipondola okuhanyapo? Ava ongeleka.
12 Inkha tuundapesa nawa, oityi tupondola okulinga Nondaka ya Huku? (Tanga 2 Coríntios 10:4, 5.) Otyili Tyovihonekwa tyipondola okuhanya “ovipuka viatuituilwa no nonkhono,” ovipuka ovio, omalongeso omatutu, novituwa ovivi, nomalongeso ounongo wovanthu ovakuankhali. Tupondola okuundapesa Ombimbiliya okunyima omalusoke ehelikuatele “nenoñgonoko lia Huku.” Omalongeso Ombimbiliya apondola okuundapeswa pala okuvatela vakuetu opo vakale nomalusoke elikuata notyili.
13 Tala ongeleka yomukai umwe womanima 93 ukala ko India. Etyi omututu ankho walongesua okuti omunthu una ohande yauna wankhia imuamena. Etyi ehimbika okulilongesa Ombimbiliya nomona wae ukala kondye yotyilongo ankho umuhonekela omikanda, liwa-liwa etavela okulilongesa konthele ya Jeova nomilao viae. Anthi, mokonda ankho wapamena unene melongeso liokuti omunthu una ohande yauna wankhia imuamena, etyi omona wae emuhonekela konthele yonkhalelo yovanthu vokuankhia ehetavela. Oe wati: “Ame hanoñgonokele otyili Tyovihonekwa viove. Onongeleya ambuho mbulongesa okuti momunthu muna etyi tyahankhi. Ame ndyitavela kelongeso liokuti, tyina omunthu ankhia, molutu luae mutunda ohande imwe, ikatyitwa molutu olukuavo ovikando 8. 400.000. Okuti otyo otyili umwe? Okuti onongeleya ononyingi mbapengesa?” Okuti “omutunga wospilitu” upondola okuhanya omatavelo oo atuituilwa kononkhono? Etyi atala etyi tyipopia Ovihonekwa, konyima yo nosimano mbumwe ahoneka okuti: “ Ame pahe ndyikahi nokunoñgonoka otyili konthele yo vokuankhia. Otyo tyampha ehambu enene liokunoñgonoka okuti petutilo matukelivasa no vetu vokuankhia. Ndyina ekevelo liokuti apa katutu ouhamba wa Huku mauya.”
Yundapesa Nondundo
14. Ondundo ihangununa etyi?
14 Okuundapesa Ombimbiliya nounongo movilinga viokuivisa hakutanga vala onotestu. Tuhetekela Paulu ankho upopia ‘nondundo’. (Tanga Atos 19:8, 9; 28:23.) ‘Ondundo’ tyihangununa ‘okukengelela omunthu.’ Okuavela ‘ondundo’ okupopila omunthu ‘okuyumba onthumbi motyipuka [tyimwe].’ Tyina tulunda omunthu opo etavele etyi Ombimbiliya ilongesa, tumukuatesako okuyumba onthumbi muetyi ilongesa. Opo tulinge ngotyo, tuesukisa okuvatela ovanthu okutavela etyi tupopia. Tupondola okulinga ngotyo mononkhalelo ombu mambulandulako.
15. Oñgeni upondola okutangela ovanthu Ombimbiliya monkhalelo, vakala nonthilo nayo?
15 Popia Ondaka ya Huku monkhalelo ovanthu vakala nonthilo nayo. Tyina ukuatesako omunthu novihonekwa, umupopila esilivilo liokuiwa omalusoke a Huku konthele yotyo. Tyina wamalingi epulo omunthu akumbulula, ove pahe upondola okupopia okuti, ‘tutale etyi Huku asoka okonthele yotyo.’ Ine okupula okuti, ‘Oityi Huku apopia konthele yotyo? Okulinga ngotyo tyina utanga otestu tyitoneka vali okulekesa okuti Ombimbiliya oya Huku nokukuatesako una ututehelela okukala nonthilo nayo. Tupu tyitukuatesako haunene tyina tuavela oumbangi ku vana vetavela Huku mahi kavei nawa oityi Ombimbiliya ilongesa.—Salmo 19:7-10.
16. Oityi tyikukuatesako okuhangununa nawa ovihonekwa?
16 Uhatange vala onotestu; anthi mbuhangununa. Paulu ankho wetyiliya ‘okuhangununa nokulekesa movihonekwa’ ovipuka ekahi nokulongesa. (Atos 17:3) Otestu pamwe ipopia ovipuka ovinyingi, mahi ove wesukisa okupopia vala etyi tyelikuata netyi mukahi nokulilongesa. Otyo upondola okutyilinga mokutanga vali onthele oyo ine okupula opo ukuateseko omulongwa okukoneka onthele oyo. Ngotyo, hangununa onthele oyo yovihonekwa. Okulinga ngotyo, tukuatesako ovateheleli vetu okutala oñgeni vapondola okuundapesa ovihonekwa momuenyo wavo.
17. Oñgeni tuna okutomphola novanthu konthele Yovihonekwa monkhalelo yava ondundo?
17 Sokolola navo konthele Yovihonekwa monkhalelo yava ondundo. Noukuatyili nonkhalelo yaviuka, Paulu ‘wasokololele nawa novanthu konthele Yovihonekwa.’ (Atos 17:2, 4) Nga Paulu, linga ononkhono mbokuhika komitima viovateheleli vove. ‘Nanena kondye’ etyi tyikahi momutima mokulinga omapulo ayemba komahando ae. (Provérbios 20:5) Lityilika omutomba. Popia onondaka mbayandyuluka nokuaviuka. Wesukisa okupopia etyi ovanthu vei nawa. Onondaka mbove mbukale mbo tyotyili, mbapolua Mondaka ya Huku. Tupondola okutanga vala otestu ike, atuihangununa nawa nokuava ongeleka tyipona okutanga okuhatekesa onotestu onombali ine ononthatu. Okupopia otyili tupu tyiyawisa ‘komilungu viove onondaka mbuhika komutima.’ (Provérbios 16:23) Pamwe, tyesukisa okuovolola onondaka nokuyawisa kounongo wove. Omukai una womanima 93 wapopiwa pombanda, ankho wesukisa okunoñgonoka omokonda yatyi elongeso liokuti ohande kainkhi (ine ospilitu) liakakela. Okunoñgonoka opi kuatuka elongeso olio nomokonda yatyi liayandyanena monongeleya ononyingi mouye otyo tyemuvatela okutavela etyi Ombimbiliya ilongesa konthele yotyo.b
Tualako Okuyundapesa Nounongo
18, 19. Omokonda yatyi tuna okutualako okuundapesa nounongo “omutunga wospilitu”?
18 Ombimbiliya yati “onkhalelo youye uno, ikahi nokupiluluka.” Ovanthu onondingavivi vavilapo okulinga ovivi. (1 Coríntios 7:31; 2 Timóteo 3:13) Otyiwa tutualeko okuhanyapo “ovipuka viatuituilwa no nonkhono,” mokuundapesa “omutunga wospilitu Ondaka ya Huku.”
19 Tyituhambukiswa unene okuna Ondaka ya Huku, Ombimbiliya, nokuundapesa onondaka mbayo mbuna epondolo liokutukula omalongeso omatutu nokukuatesako vana vena omitima omiwa! Kutupu ovipuka viatuituilwa kononkhono vihevilwa nondaka oyo. Ngotyo, tulingei ononkhono ononene mbokuundapesa nounongo “omutunga wospilitu”, Ondaka ya Huku, tuapewa opo tuiivise movilinga Viouhamba.
[Onondaka Poutoi]
a Opo tunoñgonoke vali nawa Ombimbiliya tuna omikanda “Toda a Escritura É Inspirada por Deus e Proveitosa,” Estudo Perspicaz das Escrituras, no nonthele “Ondaka ya Jeova Ina Omuenyo” mo Mutala Womulavi.
b Tala ombruchula Que Acontece Conosco Quando Morremos? pomafo 5-16.
Oityi Ove Welilongesa?
• Oñgeni Ondaka ya Huku ina epondolo?
• Oñgeni tupondola ‘okuundapesa nawa-nawa onondaka mbo tyili’?
• Oityi Ombimbiliya ivila okulinga “ovipuka viatuituilwa no nonkhono”?
• Oñgeni tupondola okukala vali nounongo movilinga viokuivisa?
[Ehangununo liolutalatu pefo 21]
Oñgeni Tuundapesa Ondaka ya Huku Nondundo
[Ehangununo liolutalatu pefo 21]
▪ Popia Ombimbiliya monkhalelo iiyetesa nonthilo
▪ Hangununa Ovihonekwa
▪ Sokolola navo monkhalelo yava ondundo
[Ehangununo liolutalatu pefo 20]
Lilongesa okuundapesa nawa “omutunga wospilitu”