Huku Una Enyina?
Omakumbululo Ovanthu Vehole Okuava:
▪ “Enyina liae o Tatekulu.”
▪ “Oe utupu enyina.”
Oityi Jesus apopile?
▪ “Likuambelei okuti: ‘Tate yetu keulu, enyina liove linkhimanekwe.’” (Mateus 6:9) Jesus ankho utavela okuti Huku una enyina.
▪ “Ame nevenoñgonokesa enyina liove, iya mandyitualako okulinoñgonokesa, opo ohole ei una naame, nayo ikale muvo iya naame ndyikale navo.” (João 17:26) Jesus wanoñgonokesile enyina lia Huku.
▪ “Onwe nalumue mamukamona-mona vali alo muti: ‘Omupandwa oyouna weya menyina lia Jeova.’” (Lucas 13:35; Salmo 118:26) Jesus waundapesile enyina lia Huku.
HUKU oe muene wetutolela enyina liae. Oe utupopila okuti: “Ame, ame Jeova. Eli olio enyina liange.”a (Isaías 42:8) Mo Hebraiku enyina Huku oe muene eliluka, mo Inglês liiwe okuti o Jeova. Hamue tyipondola okukuhuvisa okunoñgonoka okuti, enyina olio liakolela melaka lio Hebreu, ankho limoneka ovikando ovinyingi mo Nombimbiliya mbo kohale. Tyotyili, enyina olio limoneka vali unene tyipona kese enyina ekuavo likahi Mombimbiliya.
Vamue tyina vapulwa, “Enyina lia Huku olipi,” vakumbulula okuti “o Tatekulu.” Tyotyili, ekumbululo olio kaliaviukile, tyikahi ngatyina wapulua “olie waholovonua pala okutumina?,” iya ove okumbulula okuti “omuholovonwa.” Okukumbulula vala okuti o “Tatekulu” ine “omuholovonua,” katyaviukile, mokonda oo hamanyinako.
Omokonda yatyi Huku etupopila enyina liae? Oe wetyilinga opo tumuiwe nawa. Mongeleka, omunthu upondola okuihanwa okuti Tatekulu, Muhona, Tate, ine Me mukulukai na Tate mbuale, tyitei vala onkhalelo omu ovanthu vaihana. Omanyina oo enkhimano alekesa otyipuka tyimue konthele yae. Mahi, enyina liomunthu lituhinangelesa atyiho twii konthele yae. Tupu, omanyina Tatekulu, Wepondolo aliho, Nomutungi, etukuatesako okusoka kovipuka ovinyingi Huku alinga. Mahi, enyina liae Jeova, lituhinangelesa ovipuka aviho twii konthele yae. Oñgeni upondola okunoñgonoka nawa Huku tyina wehei enyina liae?
Tyakolela hakunoñgonoka vala enyina liae, mahi, tupu tuna okuundapesa enyina olio. Mokonda yatyi? Mokonda Ombimbiliya itutolela okuti: “Aveho vaivisa enyina lia Jeova mavakahupa.”—Romanos 10:13; Joel 2:32.
[Onondaka Pokatoi]
a Opo unoñgonoke vali nawa ehangununo lienyina lia Huku, nomokonda yatyi mo Nombimbiliya mbumue muhena enyina olio, upondola okutala pomafo 195-197 omukanda Oityi Ombimbiliya Tyili Ilongesa?, walingua no Nombangi mba Jeova.
[Onondaka Mbavilapo pefo 6]
Omunthu upondola okuihanwa okuti Tatekulu, Muhona, Tate, ine Me mukulukai na Tate mbuale, tyitei vala onkhalelo omu ovanthu vaihana. Mahi, enyina liae, lituhinangelesa ovipuka aviho twii konthele yae