Okuti Huku Wesuka Naame?
Omakumbululo Ovanthu Vehole Okuava:
▪ “Huku omunene unene pala okusuka novitateka viange.”
▪ “Ame hitavela okuti Huku wesuka naame.”
Oityi Jesus apopile?
▪ “Oviila vitano kavilandwa no nopalata onombali mbuhena esilivilo enene?
Mahi, natyike tyalimbwa na Huku. Anthi, alo umue onohuki mbo komitwe vienyi ambuho mbavalulwa. Moluotyo, muhakalei nowoma, onue muakolela vali tyipona oviila ovinyingi.” (Lucas 12:6, 7) Tyotyili, Jesus walongesile okuti Huku wesuka nonthue.
▪ “Muhakalei tyasukalala unene amupopi okuti: ‘Oityi matuli?’ ine, ‘Oityi matunu?’ ine, ‘Oityi matuvale?’ Mokonda ovanthu vomouye vekahi nokuovola ovipuka ovio, iya Tate yenyi keulu utyii okuti muesukisa ovipuka ovio aviho.” (Mateus 6:31, 32) Jesus ankho utyii okuti Huku wii omasuka-suka etu.
OMBIMBILIYA ipopia nokuayandyuluka okuti Huku wesuka nonthue. (Salmo 55:22; 1 Pedro 5:7) Inkha Huku wesuka nonthue, omokonda yatyi tukahi nokupita mononkhumbi ononyingi hono? Inkha Huku oluembia, nokuna epondolo enene, omokonda yatyi ahamanenako ononkhumbi?
Ekumbululo liakutikinya otyili tyimue tyiheiwe novanthu ovanyingi, tyokuti, Satanasi Eliapu oe ukahi nokutumina ouye uno wovivi. Etyi Satanasi alola Jesus, wemuavelele omauhamba aeho omouye, apopi okuti: “Mandyikuavela outumini ou auho, nenkhimano liao, mokonda nevipewa iya ndyiviavela ou nahanda.”—Lucas 4:5-7.
Olie waavela Satanasi outumini wouye? Andau na Eva valekesile okuti vaholovona outumini wa Satanasi etyi vehetavelele ovitumino via Huku. Tunde opo, nokuapwa elundo, Jeova Huku ukahi nokuava omuvo pala okulekesa okuti outumini wa Satanasi kausilivila. Jeova kakuluminya ovanthu vemufende, mahi, wetuikulila ondyila opo tukondoke kwe.—Romanos 5:10.
Mokonda Huku wasuka nonthue, oe walinga epongiyo opo Jesus etuyovole koutumini wa Satanasi. Apa katutu, Jesus “makahanyaunako Eliapu wokuna epondolo liokuetako ononkhia.” (Hebreus 2:14) Okulinga ngotyo, “mahanyaunako ovilinga vie Liapu.”—1 João 3:8.
Oohi maikakala omphangu yombembwa. Pomuvo watyo oo, Huku “makasekuna ononkhuka momaiho [ovanthu]. Ononkhia, okulila, no nongembia kamavikakalako vali. Mokonda ovipuka ovio aviho mavikalamba.”—Revelação 21:4, 5.a
[Onondaka Pokatoi]
a Opo unoñgonoke vali nawa omokonda yatyi Huku ayekelako ononkhumbi, tala okapitulu 11 komukanda Oityi Ombimbiliya Tyili Ilongesa? Walingua no Nombangi mba Jeova.
[Onondaka Mbavilapo pefo 8]
Oohi maikakala omphangu yombembwa