Omapulo Akumbululwa
◼ Oñgeni tuna okuvala tyina tukatalelapo o Mbetele ine onondyuo ononkhuavo mbuundapeswa pala ovilinga via Jeova?
Mouye auho, Onondyuo Mbomaliongiyo, no Nondyuo mbo Sembeleya, no nondyuo mbo Mbetele, onomphangu mbakolela mbapakulwa pala ovilinga via Jeova. Onondyuo ombo mbatungwa nawa, nokuakohokwa, nokuehiwa nawa, moluotyo mbatokala okuhumbwa. Onondyuo ombo mbelikalela unene nombu tuluete mouye wa Satanasi. Vana vakatalelapo onondyuo mbuundapeswa pala ovilinga via Jeova vena okulekesa okuti Onombangi mba Jeova, iya tupu valinga ehando liae.
Mokonda tuvakristau, ‘mononkhalelo ambuho tulekesei okuti tuvaumbili va Huku,’ momuenyo wetu auho nomonkhalelo yetu yokuvala nokulifiwisa. (2 Cor. 6:3, 4) Tupu tuesukisa okukala novituwa oviwa. Omuvalo wetu nonkhalelo yokulifiwisa, ilekese apeho okuti tuvaumbili va Jeova Huku. Haunene tyina tukatalelapo ombala yoko Nova York, nono Mbetele ononkhuavo mbuvasiwa mouye auho.
konthele yokuvala nokulifiwisa, omukanda Organizados para Fazer a Vontade de Jeová, upopia okuti, putyina tuenda movilinga viokuivisa, no komaliongiyo, tuesukisa okulikoha nawa, nokuvala omuvalo waviuka nokuasukuka, nokulifiwisa nondunge. Iya pefo 138, palagrafu 3, upopia okuti: “Hinangela okuti enyina Mbetele lihangununa okuti ‘Ondyuo ya Huku.’ Moluotyo, onkhalelo yetu yokuvala, nokulifiwisa, nontheto yetu, viesukisa okukala ngatyina tuenda Kondyuo Yomaliongiyo pala okukafenda Huku.” Ovaivisi Wouhamba wa Huku vakatalelapo o Mbetele, na vana vaya konomphangu mbukahi vali kokule, vena okulandula otyitumino otyo. Ngotyo, omuenda malekesa olupandu nonthilo ku Huku.—Sal. 29:2.
Omuvalo wetu una okulekesa okuti ‘tuvaumbili va Huku.’ (1 Tim. 2:10) Onkhalelo yetu ongwa yokuvala nokulifiwisa, ipondola okuvatela vakuetu okutala nonthilo efendelo liotyotyili lia Jeova. Mahi, tuhole okutala tyina ovakuatate vamue no nomphange vaya okukatalelapo o Mbetele no nomphangu onokhuavo mbuundapeswa pala ovilinga via Jeova, vavala ovikutu vikundisa vihatavela nokutala. Ovikutu viatyo ovio, kaviaviukile pala Ovakristau. Konthele yomuvalo, no kononthele ononkhuavo mbomuenyo wetu Woukristau, tuhanda okutualako okulandula ovitumino viavilapo via Huku vituyapula kovanthu vomouye, okulinga ovipuka aviho pala enkhimano lia Huku.—Rom. 12:2; 1 Cor. 10:31.
Putyina ukatalelapo ombala ko Nova York ine onofiliale ononkhuavo, lipula okuti: ‘Okuti omuvalo wange nonkhalelo yokulifiwisa, ulekesa onondunge, noukohokwe, nonthilo yomphangu mandyikatalelapo? Okuti omuvalo wange ulekesa okuti ndyihumba Huku ndyikahi nokufenda? Okuti omuvalo wange utalula vakuetu ine okuveetela olukundo?’ Omuvalo wetu nonkhalelo yokulifiwisa, apeho ‘ifiwise elongeso Liomuyovoli wetu, Huku, movipuka aviho’!—Tito 2:10.