Omapia Ayela Pala Okuteya
1. Ovilinga patyi viakolela vikahi nokuenda nokomutue?
1 Etyi amana okuava oumbangi komukai umwe omu Samalitana, Jesus watolela ovalongwa vae okuti: “Yelulei omaiho enyi amutale omapia, ayela pala okuteya.” (João 4:35, 36) Okuteya muakutikinya vana vetavela ondaka ya Huku, iya Jesus wapopile okuti ovilinga ovio mavilingwa ouye auho. Komphangu yae kuna keulu, Jesus utualako nokuvatela ovilinga viokuteya. (Mat. 28:19, 20) Oityi tyilekesa okuti ovilinga evi vitualako nokuliyawisa putyina vienda no konthyulilo?
2. Oityi tyilekesa okuti ovilinga viokuteya ouye auho vikahi nokuenda nokomutue?
2 Ovilinga Viokuteya Vikahi Nokulingwa Ouye Auho: Mokueenda kuenima lio 2009, mouye auho kueliyawisa ovaivisi ovanyingi. Kovilongo oku ankho ovilinga viokuivisa viailikwa tupu kueliyawisa ovaivisi ovanyingi. Omuvalu wovanthu valongeswa Ombimbiliya kese hanyi walamba po 7.619.000, omuvalu umwe omunene tyipona ovaivisi, iya ulamba pomuvalu wovanthu velilongesa Ombimbiliya menima liokualamba. Putyina ovilinga viokuivisa vikahi nokuliyawisa liwa movilongo ovinyingi, onomisionaliu ononyingi vekahi nokulongeswa ko Gileade. Movilongo ovinyingi, ovanthu vapopia omalaka omakuavo tupu vekahi nokutavela otyili. Ngoti Jeova ukahi nokulumbanesa ovilinga konthyulilo yovilinga viokuteya. (Isa. 60:22) Okuti ove una olusoke luaviuka konthele “yotelitoliu” yove?
3. Oityi vamwe vapopia konthele yovilinga viavo viokuteya monotelitoliu mbavo?
3 Ovilinga Viokuteya Potyilongo Tyove: Vamwe vapondola okupopia okuti: “Motelitoliu yange ovanthu vetavela kavehi.” Otyili okuti monotelitoliu mbumwe ovanthu vetavela vali tyipona ononkhuavo ine pahetyino ovo vekahi nokutavela vali otyili tyipona kohale. Ngotyo, Onombangi mbumwe vasoka okuti ovilinga viokuivisa monotelitoliu mbavo viehika konthyulilo. Moluotyo, vaundapa vala katutu opo vavase vana vahupapo. Tyotyili ongotyo umwe?
4. Olusoke patyi luaviuka tuesukisa okukala nalo konthele yovilinga vietu viokuivisa, iya omokonda yatyi?
4 Tunde konthyimbi alo konthyulilo, okuteya omuwo umwe wovilinga ovinyingi. Tala ondyanga monondaka ombu mba Jesus: “Ovilinga viokuteya ovinene, mahi ovaundapi kavehi. Moluotyo, itei ku Muene wovilinga opo atume ovaundapi kovilinga viae viokuteya.” (Mat. 9:37, 38) Jeova, Omuene wovilinga viokuteya, oe utyii onalupi iya opi ovilia mavikulu. (João 6:44; 1 Cor. 3:6-8) Otyilinga tyetu otyipi? Ombimbiliya ikumbulula okuti: “Kuna ombuto yove komuhuka, okuoko kuove kuhapululukue alo kokangulohi.” (Ecl. 11:4-6) Tyotyili, tyina ovilinga viokuteya vikahi nokuhika konthyulilo hamuvo wokuyeka okuoko kuetu kupululukuepo!
5. Omokonda yatyi tuesukisa okutualako nokuivisa nombili motelitoliu omu ovanthu vehetavela?
5 Tualako Novilinga Viokuteya: Inkha otelitoliu yetu yaundapuale unene iya ovanthu kavekahi nokutavela, tuna ehunga eewa pala okuundapa nombili nondyanga. (2 Tim. 4:2) Ovitateka ovinyingi mouye, vikahi nokutuala ovanthu okupilulula ovituwa viavo nokusoka vali unene konthele yovipuka mavikapita komutwe wandyila. Putyina ovakuendye vakala ovakulu, vapondola okukala nesuko liokuvasa epamo nombembwa momutima. Okutualako novilinga vietu tyipondola okuhuvisa ovanthu ovakuavo. Iya vana vehetavelele nkhele vapondola okutavela. Alo umwe vana vaanya tyawina onondaka tuivisa vesukisa okulondolwa. —Eze. 2:4, 5; 3:19.
6. Inkha otelitoliu yetu yepuiya, oityi matyituvatela okutualako nombili?
6 Inkha otelitoliu yetu yepuiya, oityi matyituvatela okutualako nombili? Hamwe, tupondola okuyawisa vali ovilinga vietu viokuivisa umbo na umbo nononkhalelo ononkhuavo mbovilinga viokuivisa, ngetyi okuivisa ponopalasa ine okuaava oumbangi motelefone. Ine tupondola okupilulula onkhalelo yetu yokupopia opo tutyivile okuhimbika etompho limwe eewa. Tupondola okupilulula o programa yetu opo tuundape movilinga viokuivisa kokangulohi ine momivo omikuavo tyina ovanthu vekahi vali peumbo. Hamwe tupondola okulilongesa elaka epe opo tutyivile okupopia vali novanthu onondaka onongwa Mbouhamba. Tupondola okuyawisa vali ovilinga vietu viokuivisa pokukala ovakokoli-ndyila. Ine tupondola okuenda kuna kuesukisa vali ovaundapi pala okuteya. Inkha tukala notyituwa tyaviuka konthele yovilinga viokuteya, matulingi ononkhono opo tuundape nombili movilinga ovio viakolela.
7. Alo pi matutualako novilinga viokuteya?
7 Ovalimi vetupu omuvo omunyingi pala okuteya ovilia, moluotyo ovo kamavaundapa nokulipulukwa ine katutu-katutu alo ovilinga vipwa. Tupu, ovilinga viokuteya mopaspilitu viesukisa ondyanga. Alo pi matutualako novilinga viokuteya? Mokueenda “kuonthyulilo youye uno” iya alo “onthyulilo iya.” (Mat. 24:14; 28:20) Nga Jesus Omuivisi omunene wa Jeova, nonthue tuhanda okuundapa vali unene movilinga tuapewa, tyipona ponthyimbi. (João 4:34; 17:4) Moluotyo, tutualeiko okuundapa movilinga viokuivisa nombili, nehambu, notyituwa tyaviuka alo konthyulilo. (Mat. 24:13) Ovilinga viokuteya kavinepwe!
[Olutalatu pefo 2]
Tunde konthyimbi alo konthyulilo, okuteya omuwo umwe wovilinga ovinyingi