Okuti Upondola Okukaivisa Kongulohi?
1. Ngetyi tyapopia omukanda umwe, onalupi apostolu Paulu ankho ehimbika okuivisa umbo na umbo?
1 Ngetyi tyapopia omukanda Daily Life in Bible Times (Omuenyo Wanthiki-Nanthiki Kohale), Apostolu Paulu ankho wivisa umbo-na-umbo “okuhimbikila ko 16 ola alo kokangulohi.” Hono katwii atyiho konthele yovilinga via Paulu, mahi tutyii okuti ankho wafapo opo “alinge ovipuka aviho mokonda yonondaka onongwa.” (1 Cor. 9:19-23) Otyo tyilekesa okuti ankho ulinga ononkhono mbokuenda umbo na umbo momuvo apondola okupopia novanthu ovanyingi.
2. Omokonda yatyi kongulohi omuwo omuwa wokuivisa?
2 Movilongo ovinyingi ovaivisi haunene vaivisa umbo na umbo komuhuka mokueenda kuosimano. Anthi, potyilongo tyove oupi omuvo omuwa wokuivisa? Omukokoli-ndyila umwe wahoneka konthele yopotyilongo tyae, okuti: “Ovanthu komutenya kavavasiwa meumbo. Mahi ovanyingi vakala meumbo kongulohi.” Okuivisa kongulohi tyipondola okutuavela onomphitilo onongwa mbokulongesa ovalume onondaka onongwa. Kongulohi ovanthu vapululukwa nawa nokuhanda okutomphola. Inkha tyitavela, ovakulu vewaneno vapondola okuonganeka omaliongiyo ovilinga viokuivisa kongulohi.
3. Oñgeni tupondola okupunga nawa tyina tuivisa kongulohi?
3 Punga Nawa: Tyina ukaivisa kongulohi tyesukisa okupunga nawa. Mongeleka, inkha omunthu uhanda okupopia nae ukahi nokulia, otyiwa umupopile okuti ha ndyiya nawa. Inkha kuanthikovela, kala pana hekulu yeumbo apondola okukumona, olitumbula liwa nokupopia etyi waendela. Moluotyo, otyiwa okuundapa vevali-vevali ine ovanyingi, nokukala momatapalo muna ovimimi, ohakala awike. Wahakale alo kunthikovela unene otumphulula ovanthu. (2 Cor. 6:3) Inkha potyilongo tyina kuanthikovela ovanthu vatila owoma, hahe vali okuivasa kokawiwi.—Prov. 22:3.
4. Okuivisa kongulohi tyieta ouwa patyi?
4 Ononkhano Onongwa: Ovilinga viokuivisa vihambukiswa vali tyina tupopia novanthu ovanyingi. Tyina tuvasa ovanthu ovanyingi, tyituavela onomphitilo mbokukuatesako vakuetu “vayovolwe iya avakala nenoñgonoko liafuapo konthele yotyili.” (1 Tim. 2:3, 4) Okuti upondola okupilulula onkhalelo yove yokuivisa opo ukaivise kongulohi?