Undapesa Onovidiu Mbetu Pokulongesa Ovana
1. Onthele yatiwa ovana mo site yetu yalingilwa tyi?
1 O site yetu jw.org, yalingwa pala okuhambukiswa ovanthu vomati aeho. Mo site ponthele yati “ovana” (enda pomalongeso Ombimbiliya > Ovana) ikuatesako ovana okukala noupanga novohe na Jeova. (Deu. 6:6, 7) Oñgeni moundapesa onthele oyo pokulongesa ovana?
2. Oñgeni upondola okuholovona ononthele mbata meti liovana vove tyina ulongesa?
2 Pilaulula Onkhalelo Yokulongesa: Kese mona welikalela. (1 Cor. 13:11) Moluotyo, oñgeni upondola okuholovona ononthele mbata meti liovana vove tyina ulongesa? Lipula okuti: ‘Oityi ovana vange mavesuku vali natyo? Alo pi vetyivila okunoñgonoka? Omuvo ulifuepi mavatualako okutehelela?’ Novana vena omanima etatu ine vahetukako vali, vapondola okulilongesa omahipululo avahiwa pana pati “Omalongeso Ange Ombimbiliya”. Onombunga ononkhuavo mbuhambukilwa okulilongesa omahipululo Ombimbiliya avahiwa pana pati “Longesa Ovana Vove.” Tupu tala onondonga mbumwe mbulandulako.
3. Oñgeni ovohe vapondola okuundapesa nawa omahipululo novilinga vivahiwa pana pati “Ononthele Efendelo Liombunga”?
3 Ononthele Mbokulilongesa Mefendelo Liombunga: Ononthele ombo mbukuatesako ononkhalamutwe mbombunga okulongesa ovana vavo. Opo unoñgonoke oñgeni tyiundapeswa omahipululo novilinga manga pana pati okupolamo nokutanga “Ehongolelo Liovohe” pukese nthele. Undapesa omalutalatu anthindwa ine alombwa opo ulongese ovana vove. Kuatesako omona wove okumanuhuka okunthinda. Ovilinga aviho pukese nthele vipopia omahipululo Ombimbiliya ine omalongeso, ngotyo ovana vomati aeho vapondola okunthinda ine okupopia tyina mulinga efendelo liombunga.
4. OItyi upondola okuvasa pana pati “Kala Epanga lia Jeova”?
4 Kala Epanga Lia Jeova: Onovidiu, noviimbo, novilinga monthele oyo yo site vikuatesako ovohe okupapeya Ondaka ya Huku movana vavo ovatutu. (Deu. 31:12) Kese ovidiu ikahimo ina onondonga mbakolela. Kese evi valinga vikahimo vialingwa nesuko olio liakolela. Tyina ovana vaimba apeho, tyivekuatesako okuhinangela evi velilongesa, oviimbo Viouhamba noviimbo ovikuavo vialingilwa ovana vikahi nokupakuamo.
5. Omokonda yatyi ovohe vapondola okuita ku Jeova evekuateseko okulongesa otyili ovana vavo?
5 Vohe, Jeova uhanda mulongese nawa ovana venyi. Ngotyo ita ku Jeova opo ekukuateseko tyina ulongesa otyili ovana vove. (Juí. 13:8) Nombatelo ya Jeova, molongesa ovana vove avakala “onondunge pala eyovo, mokonda yekolelo mu Kristu Jesus.”—2 Tim. 3:15; Pro. 4:1-4.