Ombupi Onondaka Onongwa Konthele Yonongeleya?

1. Okuti Onongeleya Ambuho Onongwa?

Monongeleya ambuho muna ovanthu ovakuatyili. Okunoñgonoka okuti Huku wovola ovanthu ovo nokuesuka navo, onondaka onongwa. Mahi, onongeleya mbukahi nokuundapeswa pala okulinga ovivi. (2 Coríntios 4:3, 4; 11:13-15) Ngetyi tyikahi nokupopiwa motelevisau no nolaliu, onongeleya mbumwe mbelipaka kumwe no makongombanda, no mokuipaa, no movita, nokulala novana. Otyo tyinumanesa unene ovaumbili votyotyili va Huku!​—Tanga Mateus 24:3-5, 11, 12.

Putyina ongeleya yotyotyili inkhimaneka Huku, onongeleya mbomatutu mbunumanesa Huku. Mbulongesa omalusoke ehekahi mo Mbimbiliya, kumwe nomalongeso omatutu konthele ya Huku no yovanthu vokuankhia. Mahi Jeova uhanda ovanthu vanoñgonoke otyili konthele yae.​—Tanga Ezequiel 18:4; 1 Timóteo 2:3-5.

2. Ombupi onondaka onongwa konthele yonongeleya?

Huku kakembwa nonongeleya mbupopia okuti vemuhole, mahi tyotyili vehole ouye wa Satanasi. (Tiago 4:4) Ondaka ya Huku iihana onongeleya ambuho mbomatutu okuti “Ombambilonia Onene.” Ombambilonia ankho epundaumbo ekulu, muahimbikila onongeleya mbomatutu, konyima Yombila onene kononthiki mba Noe. Apa katutu, Huku makanyimako onongeleya mbukahi nokukemba ovanthu nokuvemonesa ononkhumbi.​—Tanga Revelação [Apocalipse] 17:1, 2, 5, 16, 17; 18:8.

Kuna vali onondaka onongwa. Jeova kalimbwa ovanthu ovakuatyili vayandyana monongeleya mbomatutu ouye auho. Oe ukahi nokuongiya ovanthu ovo, mokuvelongesa otyili.​—Tanga Miquéias 4:2, 5.

3. Oityi ovanthu ovakuatyili vesukisa okulinga?

Jeova wasuka novanthu vehole otyili novipuka oviwa. Oe uvelondola opo vatunde monongeleya mbomatutu. Ovanthu vehole Huku, vahanda okulinga omapiluluko opo vemuhambukiswe.​—Tanga Revelação 18:4.

Pomuvo wo Vakristau votete, etyi ovanthu ovakuatyili veiva onondaka onongwa ankho mbupopiwa no noapostolu, avetavela nehambu. Valongeswa onkhalelo omphe yomuenyo itunda ku Jeova, onkhalelo yomuenyo wehambu, wokuna esilivilo nekevelelo. Ovanthu ovo, vaava ongeleka ongwa pala onthue hono, mokonda vetavela onondaka onongwa, mokupaka Jeova tete momienyo viavo.​—Tanga 1 Tessalonicenses 1:8, 9; 2:13.

Jeova uyakula ovanthu vana vatunda monongeleya mbomatutu, aveya mombunga yovafendi vae. Inkha utavela okukongwa na Jeova, mokala epanga liae, nokupewa ombunga omphe yokuna oluembia yovafendi va Jeova, nomuenyo uhapu.​—Tanga Marcos 10:29, 30; 2 Coríntios 6:17, 18.

4. Oñgeni Huku makaetela ehambu ovilongo aviho?

Okunoñgonoka okuti ekoyeso lionongeleya mbomatutu maliya, onondaka onongwa. Otyo, matyikayovola ouye auho mononkhumbi. Nalumwe onongeleya mbomatutu mambukakemba vali ovanthu nokuveyapaula. Aveho mavakakalako mavakawanekua mefendelo lia Huku wike vala wotyotyili.​—Tanga Revelação 18:20, 21; 21:3, 4.