OSAPI YO KONDYE | OKUTI TYINA OMUNTHU AMANKHI—UPONDOLA OKUKALA VALI NOMUENYO?
Tyina Omunthu Amankhi, Oityi Tyimoneka-po?
“Ame ankho ndyisoka okuti kuna onomphangu ononthatu omunthu apondola okuenda tyina amankhi: wenda keulu, ine omo ifelunu, ine omo pulukatoliu. Ankho ndyityii okuti hindalawa unene opo ndyende keulu, tupu hindingavivi-ko unene pala okuenda mo ifelunu. Ankho hanoñgonokele nawa oityi o pulukatoliu. Ondaka oyo hineimone mo Mbimbiliya. Ankho ndyiiva vala kovanthu.”—Lionel.
“Ame nalongeswa okuti ovanthu aveho vaya keulu tyina vamankhi, mahi ankho hityitavelale nawa. Ankho ndyisoka okuti tyina omunthu amankhi tyapwa umwe.”—Fernando.
Nthiki imwe welipulile okuti: ‘Oityi tyili-tyili tyimoneka-po tyina omunthu amankhi? Okuti vetu vokuankhia vena oku veli nokumona ononkhumbi? Okuti nthiki imwe matukevemona vali? Oñgeni matukala nonthumbi yokuti matukevemona vali?’ Mbambavo tala etyi Ovihonekwa tyili-tyili vilongesa. Tete, tutale oityi Ombimbiliya ipopia konthele yononkhia. Konyima, atulilongesa ekevelelo patyi Ondaka ya Huku Ombimbiliya yaava.
Vokuankhia vekahi ñgeni?
EKUMBULULO LIOMBIMBILIYA: “Ovanthu vokuna omuenyo vetyii okuti mavankhi, mahi vokuankhia, kavei vali natyike, vetupu vali ofeto, mokonda kavasoko vali natyike. Atyiho omaoko ove apondola okulinga, tyilinga nononkhono mbove ambuho. Mokonda Ondyembo, omphangu moende mutupu ovilinga, nokusoka, nenoñgonoko, nounongo.”a—Eclesiastes 9:5, 10.
Kondyembo, okoku ovanthu vaya tyina vamankhi. Ondyembo, hamphangu imoneka, otyilekeso, ine onkhalelo ovanthu vakala yokuhei natyike, nokuhevili okulinga natyike. Oityi Jobe omulume wekolelo, ankho asoka konthele Yondyembo? Omalumono a Jobe aeho apesekele, ovana vae avankhi monthiki ike vala, iya konyima akala novinthimba ovivi olutu aluho. Jobe aiti ku Huku okuti: “Inkha tyitavela, ñgeno wanthyoleka vala Mondyembo [“moifelunu,” Catholic Douay Version].” (Jó 1:13-19; 2:7; 14:13) Tyimoneka nawa okuti Jobe, ankho kasoko okuti Ondyembo oifelunu yotupia, omu ononkhumbi mbae mambukavila-po. Ankho utavela okuti ondyembo omphangu yokupululukwa.
Kuna vali onkhalelo onkhuavo yokunoñgonoka oñgeni vokuankhia vakala. Tupondola okulilongesa omahipululo ekahi Movihonekwa, ovanthu etyinana vatutilisilwe.—Tala okakasa kati: “Ovanthu Etyinana Vatutilisilwe Vapopiwa mo Mbimbiliya.”
Povanthu ovo etyinana, nawike wapopile okuti wali pomphangu ongwa ine yononkhumbi. Inkha ovanthu ovo vaile komphangu onkhuavo etyi vankhia, okuti ñgeno kavetyipopilile vakuavo? Okuti etyi ñgeno vapopile katyahonekelwe mo Mbimbiliya, opo ovanthu aveho vetyimonoñgonoke? Movihonekwa, kamuahonekelwe natyike tyipopia konthele yotyo. Ovanthu ovo etyinana, ankho vetupu natyike pala okupopia. Omokonda yatyi? Omokonda ankho kavei natyike, ngatyina omunthu elele molumphoki olunene. Ombimbiliya, pamwe yeeleka otumphoki nononkhia. Mongeleka, omulume wekolelo David na Estevau, “velele mononkhia.”—Atos 7:60; 13:36.
Okuti vokuankhia nthiki imwe tupondola okuvemona vali? Okuti vapondola okupinduka-po?
a Mombimbiliya Tradução do Novo Mundo das Escrituras Sagradas, ondaka “Ondyembo” yatunda mondaka yo Hebreu “Sheol” nondaka yo Gregu “Hades.” Ono Mbimbiliya mbumwe mbupitiya ondaka oyo okuti “oifelunu.” Mahi, Movihonekwa mutupu olusoke luoifelunu yotupia, pala okumonesa ononkhumbi vokuankhia.