Josia Ankho Una Omapanga Omawa

Usoka okuti okulinga etyi tyaviuka tyipuiya?— Ovanthu ovanyingi otyo vasoka. Ombimbiliya itupopila konthele yomukuendye umwe ankho utiwa o Josia okuti tyemupuiyile unene okulinga etyi tyaviuka. Mahi ankho una omapanga omawa emukuatesileko. Tulilongese konthele ya Josia nomapanga ae.

Tate ya Josia ankho utiwa o Amom, ohamba yo Judaa. Amom ankho omukalavi unene iya ankho ufenda ovilolo. Etyi tate ya Josia ankhia, Josia akala ohamba yo Judaa. Mahi ankho una vala omanima etyinana! Usoka okuti wakalele omukalavi nga he?— Au, kakalele omukalavi!

Namphila ankho omututu unene, Josia ankho uhanda okutavela ku Jeova. Moluotyo, walingile vala oupanga navana ankho vehole Jeova. Iya omapanga oo aemukuatesako okulinga etyi tyaviuka. Omapanga amwe a Josia ankho ovalie?

Umwe pomapanga ae ankho o Sofonia. Sofonia ankho omuuli walondolele ovanthu mo Judaa okuti inkha vatualako nokufenda ovilolo mavakala novitateka. Josia watehelelele Sofonia afende Jeova, ahafende ovilolo.

Epanga ekuavo lia Josia ankho o Jeremia. Ankho omakula iya vekulila kumwe mokonda omaumbo avo ankho elikalela popepi. Ankho omapanga omanene, iya etyi Josia ankhia Jeremia ahoneka otyiimbo tyimwe otyiwa mokonda ankho wemuivaluka. Jeremia na Josia velikuatesileko okulinga etyi tyaviuka, nokutavela ku Jeova.

Oityi ulilongesila kongeleka ya Josia?— Namphila Josia ankho omututu, ankho uhanda okulinga etyi tyaviuka. Ankho utyii okuti una okukala epanga liavana vehole Jeova. Noove linga oupanga novanthu vehole Jeova, vana vapondola okukukuatesako okulinga etyi tyaviuka!