Omikanda Viokulilongesa Omukanda Wovilinga Omuenyo Wetu Woukilisitau
4-10 YA FEVEREIRO
OLUMONO LUKAHI MONDAKA YA HUKU | KOVA LOMA 1-3
“Tualako Okulongesa Omutima Wove”
(Loma 2:14, 15) Tyetyi namphila ovanthu veheva Sundeu kavei ovitumino vya Huku, mahi valinga etyi vipopia. Otyo tyilekesa okuti vena ovitumino momitima viavo. 15 Ovanthu ovo valekesa okuti ovitumino vikahi momalusoke avo. Iya omitima viavo vivenoñgonokesa inkha ovipuka valinga viaviuka ine viapenga.
Oñgeni Motualako Okukala Mohole ya Huku? pefo 18 § 6
Omutima Omuwa komaiho a Huku
6 Alo umwe ovanthu vehei Siovaa vetyii okuti kuna ovipuka viaviuka nevi viapenga. Ombimbiliya yati: “Omitima viavo vivenoñgonokesa inkha ovipuka valinga viaviuka ine viapenga.” (Loma 2:14, 15) Mongeleka, ovanthu ovanyingi vetyii okuti okuipaa, nokuvaka tyapenga. Namphila otyo kavetyiimbuka, mahi ovanthu ovo vatehelela omutima wavo ine ounongo vapewa na Siovaa wokupunga otyiwa notyivi. Tupu, navo vekahi nokulandula onondonga Siovaa etuavela opo mbutukuateseko okulinga omatokolo omawa.
(Loma 2:15) Ovanthu ovo valekesa okuti ovitumino vikahi momalusoke avo. Iya omitima viavo vivenoñgonokesa inkha ovipuka valinga viaviuka ine viapenga.
Oñgeni Motualako Okukala Mohole ya Huku? Pomafo 19-20 §§ 8-9
Omutima Omuwa komaiho a Huku
8 Ovanthu vamwe vasoka okuti okutavela omutima, tyihangununa okulandula omahando avo. Vasoka okuti vapondola okulinga etyi vahanda mokonda velitehelela nawa konthele yotyo. Mahi tuna omahando oukuankhali iya apondola okutunyona. Mokonda omahando etu ena ononkhono ononene, apondola okuhindila omutima wetu. Ombimbiliya yati: “Omutima omukengeleli unene upona kese tyipuka, nokuhena ekevelelo. Olie upondola okuunoñgonoka?” (Jer. 17:9) Ngotyo, tupondola okuhimbika okusoka otyipuka tyimwe tyahaviukile, ngatyina tyaviuka. Mongeleka, etyi Paulu ehenekale Omukilisitau ankho umonesa ononkhumbi ovaumbili va Siovaa iya ankho una onthumbi yokuti etyi alinga tyaviuka. Ankho usoka okuti una omutima wasukuka. Mahi konyima apopi okuti: “Una unthala nawa, o Siovaa.” (1 Kol. 4:4; Ovil. 23:1; 2 Tim. 1:3) Etyi Paulu anoñgonoka oñgeni Siovaa elitehelela konthele yetyi ankho alinga, aimbuka okuti wesukisa okupiluluka. Tyayandyuluka nawa okuti, tyina tuhenelinge otyipuka tyimwe, tuna okulipula okuti: ‘Oityi Siovaa ahanda ndyilinge?’
9 Tyina uhole omunthu umwe, kuhande okulinga otyipuka natyike tyimunumanesa. Mokonda tuhole Siovaa, katuhande okulinga natyike tyipondola okumunumanesa. Owoma tuna wokunumanesa Siovaa una okuliyawisa. Ongeleka ya Neemia itukuatesako okutyinoñgonoka. Waanyene okuundapesa outumini wae opo akale omuhona. Omokonda yatyi? Wapopia okuti omokonda ankho una “onthilo na Huku.” (Nee. 5:15) Neemia ankho kahande okulinga natyike tyipondola okunumanesa Siovaa. Nga Neemia, nonthue tuna owoma wokunumanesa Siovaa mokulinga ovipuka viapenga. Tupondola okunoñgonoka etyi tyihambukiswa Siovaa tyina tutanga Ombimbiliya. — Tala Okatoi 6 Konthyulilo Yomukanda.
Ovola Olumono Lwa Huku
(Loma 3:4) Au! Mahi Huku akale omukuatyili, namphila ovanthu aveho ononkhembi, ngetyi tyahonekwa okuti: “Onondaka mbove mambulekesa okuti umuviuki iya tyina vekuhunga otyipuka tyimwe, ove molekesa okuti vapengesa.”
Omutala Womulavi 01/06/2008 pefo 12 § 5
Ononthele Mbavilapo Mbomukanda Kova Loma 3:4
Putyina onondaka mbovanthu mbehelikuate netyi Huku apopia Mondaka yae, onthue “tuyeka vetyinoñgonoke okuti Huku omukuatyili” mokuyumba onthumbi Mombimbiliya, nokulinga etyi Huku ahanda. Tyina tuundapa nombili movilinga viokuivisa Ouhamba wa Huku nokulinga ovalongwa, tukuatesako ovanthu okunoñgonoka okuti Huku upopia otyili.
(Loma 3:24, 25) iya okuihanwa okuti ovaviuki otyali vapewa mokonda yokankhenda kae okanene, menyina liotyilikutila tyeyovo tyafetwa na Kilisitu Sesusi. 25 Huku wemuaava ngatyina otyiawa opo tukale vali noupanga na Huku mokonda yekolelo mohonde yae. Huku walinga ngotyo opo alekese okuti omuviuki, mokonda ankho ukahi nokuevela ononkhali mbalingwa kohale, putyina ankho alekesa oumphua-lundo.
Omutala Womulavi 01/06/2008 pefo 11 § 6
Ononthele Mbavilapo Mbomukanda Kova Loma 3:24, 25
Oñgeni “otyilikutila tyeyovo tya Kilisitu Sesusi” tyipata “ononkhali mbalingwa” puetyi nkhele eheneave otyilikutila otyo? Eulo liotete konthele ya Mesiya, liahonekwa mu Gênesis 3:15, iya liafuisuapo menima 33 P.K. puetyi Sesusi aipaelwa momuti wemone. (Gal. 3:13, 16) Mahi, puetyi Siovaa apopia eulo liotyilikutila tyeyovo, ngotyo komaiho ae ankho eyovo liafetuale. Mokonda natyike tyipondola okutyilika Huku okufuisapo etyi ahanda. Menyina liotyilikutila ankho Sesusi Kilisitu meya okuaava, Siovaa ankho maevela ononkhali mbovana va Andau, vokuna ekolelo momulao oo. Tupu, otyilikutila tyeyovo tyaikula ondyila pala etutilo lya vana vankhia puetyi nkhele otyilikutila otyo tyihenelingwe. — Ovilinga 24:15.
Okutanga Ombimbiliya
(Loma 1:1-17) Ame Paulu, omupika wa Kilisitu Sesusi waihanwa opo akale o apositolu, aholovonwa opo aivise onondaka onongwa mba Huku, 2 mbuna alaele kohale menyina liovauli vae Movihonekwa vikola, 3 konthele Yomona wae, una watunda mombuto ya Daviti, kokuatyitwa, 4 mahi kepondolo liononkhono mba Huku, Omona apinduluapo kononkhia iya otyo atyilekesa okuti oe ankho Omona wa Huku. Omona oo, o Tatekulu yetu Sesusi Kilisitu. 5 Menyina liae tuatambula okankhenda ka Huku notyilinga tyou apositolu opo ovanthu vomalongo aeho vetavele kwe mokonda yekolelo menyina liae, 6 pokati komalongo no onwe muaihanwa opo muhule ku Sesusi Kilisitu — 7 ku onwe amuho ononthyolwe mba Huku mukahi mo Loma, muaihanwa opo mukale ovasukuki: Kalei nokankhenda ka Huku nombembwa itunda ku Huku Tate yetu, no ku Tatekulu Sesusi Kilisitu. 8 Tete, ndyipandula ku Huku yange menyina lya Sesusi Kilisitu konthele yenyi amuho, mokonda ekolelo lienyi likahi nokupopiwa ouye auho. 9 Mokonda ame ndyiumbila Huku nomutima auho, okuivisa onondaka onongwa konthele Yomona wae. Iya oe upondola okuava oumbangi konthele yange, wokuti tyina ndyilikuambela apeho ndyimuiitila-ko, 10 ndyiita okuti inkha tyitavela opo ndyiye okumutalelapo, inkha otyo Huku ahanda. 11 Mokonda, ame nahanda unene okumumona, opo ndyimukuateseko okupameka oupanga wenyi na Huku, na mukale tyapama mekolelo. 12 Ine, opo tulipameke pokati, nekolelo lietu, tyilinge lienyi tyilinge liange. 13 Vakuatate, ame nahanda munoñgonoke okuti ovikando ovinyingi, nahandele okuya oko opo ovilinga viange tupu viaave ovinyango pokati kenyi, ngetyi ndyikahi nokulinga pokati kovanthu vomalongo. 14 Ndyina ongele nova Geleku na vana veheva Geleku, no vokualongeswa na vana vahalongesilwe; 15 ngotyo, nalunda nokuivisa onondaka onongwa ku onwe mukala mo Loma. 16 Mokonda, ame onondaka onongwa kambunkhundisa. Tyetyi ombo epondolo lya Huku pala eyovo lya aveho vena ekolelo, tete ova Sundeu konyima ova Geleku. 17 Tyetyi vokuna ekolelo veete okuti Huku uhololola ouviuki wae nonondaka onongwa, iya otyo tyipameka ekolelo liavo, ngetyi tyahonekwa okuti: “Mahi omuviuki makakala nomuenyo mokonda yekolelo.”
11-17 YA FEVEREIRO
OLUMONO LUKAHI MONDAKA YA HUKU | KOVA LOMA 4-6
“Huku Walekesa Okuti Una Oluembia no Onthue”
(Loma 5:8) Mahi Huku walekesa okuti una oluembia no onthue, puetyi ayeka Kilisitu etunkhile, etyi ankho nkhele tuvakuankhali.
(Loma 5:12) Mokonda yomunthu wike vala, onkhali yanyingila mouye iya onkhali yaeta ononkhia, ngotyo ononkhia ambuliyandyana movanthu aveho, mokonda aveho valinga onkhali — .
Omutala Womulavi 01/06/2011 pefo 20 § 5
Huku Walekesa Okuti Una Oluembia no Onthue
5 Paulu wahimbika okupopia konthele oyo okuti: “Mokonda yomunthu wike vala onkhali yanyingila mouye, iya onkhali yaeta ononkhia. Moluotyo ononkhia mbeliyandyana kovanthu vatyo aveho, mokonda aveho valinga onkhali.” (Loma 5:12) Otyo tupondola okutyinoñgonoka nawa mokonda Huku watuma okuhoneka oñgeni omuenyo wovanthu wahimbika. Siovaa watunga ovanthu vevali, Andau na Eva. Omutungi utupu onkhali iya ngotyo novanthu votete ankho vetupu onkhali. Huku weveavelele otyitumino, evepopila okuti inkha kavetyitavela mavankhi. (Gên. 2:17) Mahi, valingila tyawina okuaanya otyitumino tyapepuka Huku evepele, avehetavela Komuavi Wovitumino, Ohamba. — Deut. 32:4, 5.
(Loma 5:13, 14) Mokonda onkhali ankho ikahi-ale mouye tyina kuhenekale Ovitumino, mahi ankho nawike uhungwa okuti walinga onkhali tyina pehena ovitumino. 14 Mahi ononkhia mbatumina aveho ngohamba tunde pomuvo wa Andau alo pomuvo wa Moisesi, alo umwe vana vahalingile onkhali yelifwa no ya Andau. Andau ankho ukahi nga una ankho meya.
Omutala Womulavi 01/06/2011 pefo 20 § 6
Huku Walekesa Okuti Una Oluembia no Onthue
6 Andau wahimbika vala okukala novana etyi alinga onkhali, ngotyo, wevetambulisa onkhali nononkhumbi mbutundililako. Ovana ovo, kavalingile natyike tyapenga ku Huku nga Andau. Moluotyo, kavavelwa onombei. (Gên. 2:17) Mahi, ovana va Andau vapiñgana onkhali. Ngotyo, aluho Huku aavela ovitumino ova Isilayeli, omokonda ankho ovakuankhali-ale iya otyo tyilekesa nawa okuti ankho onkhali itumina pokati kavo. (Tanga Loma 5:13, 14.) Ononkhumbi mbutundilila konkhali mbupondola okuelekwa nomauvela elitambuliswa iya ovana aveepiñgana kovohe. Namphila ovana vamwe mombunga vapiñgana omauvela oo kovohe, mahi vamwe mombunga oyo vapondola okuhepiñgana. Mahi, onkhali ha ngotyo-ko. Onthue atuho tuapiñgana onkhali ya Andau, moluotyo, atuho tunkhia. Okuti otyitateka otyinene ngotyo tyipondola okutetululwa?
(Loma 5:18) Ngotyo, ngetyi ovanthu vatyo aveho vahitiswa mokonda yonkhali yomunthu wike vala, tupu ovanthu vatyo aveho mavaihanwa okuti ovaviuki mokonda yotyipuka tyike tyaviuka tyalingwa.
(Loma 5:21) Omokonda yatyi? Opo ngetyi onkhali yatumina ngohamba kumwe nononkhia, tupu nokankhenda okanene makatumina ngohamba mokonda youviuki utuala komuenyo uhapu menyina lya Sesusi Kilisitu Tatekulu yetu.
Omutala Womulavi 01/06/2011 pefo 21 §§ 9-10
Huku Walekesa Okuti Una Oluembia no Onthue
9 Onondaka “okuihanwa okuti ovaviuki” mbuhangununa tyi? Omupitiyi umwe wo Mbimbiliya, wahoneka okuti: “Onondaka ombo, mbulekesa etyi pamwe ombonge yokukoyesa ihole okulinga. Mbulekesa onkhalelo omunthu apiluluka komaiho a Huku, ha komaiho ae muene . . . Onondaka ombo, mbueleka Huku nomukoyesi waamena una walinga ovivi waetua mombonge yae. Mahi, Huku weevela omunthu oo iya emutale ngatyina omuviuki.”
10 Oñgeni “Omukoyesi wohi aiho,” maevela ononkhali mbovanthu avakala ovaviuki? (Gên. 18:25) Moluembia lwae, Huku watuma Omona wae wongunga pano pohi. Sesusi wafuisapo nawa ehando lya Tate yae, namphila amonesilwe ononkhumbi, nokupenyua, nokuvetwa. Sesusi watuaileko nekolelo alo umwe aipaelwa momuti wemone. (Heb. 2:10) Mokuava omuenyo wae uhena onkhali, Sesusi waava ofeto ipondola okuyovola ovana va Andau konkhali no kononkhia. — Mat. 20:28; Loma 5:6-8.
Ovola Olumono Lwa Huku
(Loma 6:3-5) Ine kamutyii okuti atuho onthue vokuambatisalwa mu Kilisitu Sesusi, tupu tuambatisalwa mononkhia mbae? 4 Ngotyo, tuahihilwa nae mokonda yombatisimu yetu mononkhia mbae, opo ngetyi Kilisitu apindulwa-po mononkhia kepondolo enene lya Tate, opo no onthue tukale nomuenyo omupe. 5 Inkha onthue tunkhia ngae tupu matukatutiliswa ngae iya mononkhalelo ombo tuahonya kumwe nae.
Omutala Womulavi 01/06/2008 pefo 11 § 7
Ononthele Mbavilapo Mbomukanda Kova Loma 6:3-5
Oityi tyihangununa okumbatisalwa mu Kilisitu Sesusi no mononkhia mbae? Tyina Siovaa alembula ovalongwa va Kilisitu nononkhono mbae, ovalongwa ovo vahonyekwa na Kilisitu. Ngotyo, vakala onthele yewaneno liihanwa okuti olutu lwa Kilisitu iya omutwe watyo o Kilisitu. (1 Kol. 12:12, 13, 27; Kolo. 1:18) Otyo, otyo tyihangununa okumbatisalwa mu Kilisitu Sesusi. Tupu, Ovakilisitau ovalembulwa vambatisalwa mononkhia [mba Kilisitu], tyilekesa okuti Ovakilisitau ovo, valinga unene ononkhono opo vahambukiswe Huku, mahi vetupu ekevelelo liomuenyo uhapu pano pohi. Namphila Ovakilisitau ovo, vapita mononkhia ngo mba Sesusi, mahi ononkhia mbavo kambuyovola. Ombatisimu yavo mononkhia mba Kilisitu, maivituka vala tyina vamankhi avatutiliswa nomuenyo wo keulu.
(Loma 6:7) Mokonda una wamankhi wayovolua kononkhali mbae.
Omutala Womulavi 01/06/2014 pefo 11 § 1
Ekevelelo Patyi Ovakuaukulu Vange Vena?
Okuti tyina vana vehevaviuki vamatutiliswa mavakakoyeswa mokonda yovipuka valingile kohale? Au. Loma 6:7 yati: “Mokonda una wamankhi wayovolua kononkhali mbae.” Vana vankhia vehevaviuki, vafeta ononkhali mbavo. Ngotyo, mavakakoyeswa movipuka mavakalinga konyima yetutilo liavo, ha movipuka vina valingile puetyi vehenenkhie. Oñgeni otyo matyivekuatesako?
Okutanga Ombimbiliya
(Loma 4:1-15) Ngotyo, oityi Ambalaiau omukuaukulu wetu kohitu, amona-po? 2 Mongeleka, inkha Ambalaiau waihanenwe okuti omuviuki mokonda yovilinga, ñgeno wakala nehunga liokulipanda, mahi ha komaiho a Huku. 3 Oityi ovihonekwa vipopia? “Ambalaiau wakalele nekolelo mu Siovaa, moluotyo atalwa okuti omuviuki.” 4 Tyina omunthu uundapa afetwa, katyivalulwa ngatyina alingilwa okankhenda, mahi omokonda omunthu oo watokala okufetwa. 5 Mahi, tyina omunthu akala nekolelo mu Huku, ahayumbu onthumbi movipuka alinga, Huku umutala okuti omuviuki mokonda yekolelo liae. O Huku upondola okutala ovanthu onondingavivi okuti ovaviuki. 6 Tupu Daviti wapopia ehambu liomunthu Huku atala okuti omuviuki, tyihetei kovilinga viae, etyi ati: 7 “Vena ehambu ovo vana vaevelwa ovipuka ovivi valinga iya ononkhali mbavo mbahikwa; 8 una ehambu omunthu una Siovaa ahahinangela vali onkhali yae.” 9 Okuti vakala nehambu olio, ovo vana vala vokuapita ekuendye ine novanthu vahapitile ekuendye? Mokonda onthue tuti: “Huku watalele Ambalaiau okuti omuviuki mokonda yekolelo liae.” 10 Ngotyo, onalupi atalwa okuti omuviuki? O puetyi apita-le ekuendye, ine o puetyi ehenepite ekuendye? O puetyi nkhele ehenepite ekuendye. 11 Huku emupopila opo apitiswe ekuendye. Otyo ankho enyingilikilo liokulekesa okuti omuviuki mokonda yekolelo ankho ena puetyi nkhele ehenepite ekuendye. Moluotyo, akala he ya aveho vokuna ekolelo putyina nkhele vehenepite ekuendye iya Huku atale ovanthu ovo okuti ovaviuki. 12 Tupu Ambalaiau o he yo vokuapita ekuendye. Ha he vala yo vokuapita ekuendye, mahi no ya vana vokuna ekolelo ngo liae. Tate yetu Ambalaiau wali nekolelo puetyi nkhele ehenepite ekuendye. 13 Mokonda Ambalaiau ine ombuto yae, kavalaelwe okuti oe makapiñgana ouye omupe mokonda yovitumino, mahi omokonda youviuki watuka kekolelo. 14 Tyetyi inkha vana vayumba onthumbi movitumino onomphinga, opo ekolelo kalisilivila iya omulao wanyimua-po. 15 Tyotyili, ovitumino vieta onyengo ya Huku, mahi apa pehena ovitumino petupu otyiponyo natyike.
18-24 YA FEVEREIRO
OLUMONO LUKAHI MONDAKA YA HUKU | KOVA LOMA 7-8
“Okuti Ukahi ‘Nokukevela Nehambu’?”
(Loma 8:19) Mokonda ovitungwa aviho vikahi nokukevela nehambu okuholololwa kuovana va Huku.
Omutala Womulavi 01/07/2012 pefo 16 § 17
Yeka Siovaa Ekutuale Keyovo Liotyotyili
17 Paulu wahoneka konthele yeyovo Siovaa maavela ovanthu vae pano pohi. Wati: “Ovitungwa aviho vikahi nokukevela nehambu okuholololwa kuovana va Huku.” Ayawisako okuti: “Tupu maviyovoka moupika wolutu luokuvola avikala neyovo liovana va Huku.” (Loma 8:19-21) “Ovitungwa,” ovanthu vena ekevelelo liokukala pano pohi, vana mavakapola ouwa “kehololoko” liovana va Huku valembulwa nospilitu. Ehololoko olio malihimbika tyina ovalembulwa keulu vamakuatesako Kilisitu okuipaa onondingavivi ambuho, avatuala “otyinyingi tyovanthu” mouye omupe. — Ehol. 7:9, 14.
(Loma 8:20) Tyetyi ovitungwa viakaleswa tyihena esilivilo, ha kehando liavio muene, mahi okehando lya Huku weviyeka vikale tyihena esilivilo, mahi aave ekevelelo
Omutala Womulavi 01/03/2012 pefo 23 § 11
Tuhambukwei Nekevelelo Lietu
11 Siovaa waavela ovanthu ekevelelo etyi alaa okuti “ombuto” yalaelwe maituyovola “konyoka yokonthuko” Satanasi Eliapu. (Ehol. 12:9; Gên. 3:15) “Ombuto” oyo, tete o Sesusi Kilisitu. (Gal. 3:16) Nononkhia mbae netutilo, Sesusi waavela ovanthu ekevelelo liapama liokuyovolwa konkhali no kononkhia. Okufuisuapo kuekevelelo olio kuelikuata “nehololoko liovana va Huku.” Ovalembulwa, onthele yavali “yombuto.” “Mavaholololwa” tyina vamakala na Kilisitu pokuhanyako ouye wovivi wa Satanasi. (Ehol. 2:26, 27) Otyo matyikaetela eyovo onongi ononkhuavo, vana mavatundu mononkhumbi ononene. — Ehol. 7:9, 10, 14.
(Loma 8:21) liokuti ovitungwa viatyo muene tupu maviyovoke moupika wolutu luokuvola avikala neyovo liovana va Huku.
Omutala Womulavi 01/03/2012 pefo 23 § 12
Tuhambukwei Nekevelelo Lietu
12 Ovanthu mavakakala neyovo limwe enene mokueenda Kuovityita Ekwi Vioutumini wa Kilisitu! Pomuvo opo, “ovana va Huku” ‘mavaholololwa’ tyina vamakala ovanakwa kumwe na Kilisitu, nokukuatesako ovanthu okupola ouwa kotyilikutila tyeyovo tya Sesusi. Ovanthu mavakatuminwa Nouhamba wo keulu, mavakayovoka konkhali no kononkhia. Ovanthu ovataveli, katutu-katutu, “mavakayovoka moupika wolutu luokuvola.” Inkha vatualako okuyumba onthumbi mu Siovaa mokueenda kuomanima Ovityita Ekwi, no movitateka viahulililako mavikeya konthyulilo Yovityita Ekwi, omanyina avo maakahonekwa “mombuingwa yomuenyo.” Mavakanyingila ‘meyovo liovana va Huku.’ (Ehol. 20:7, 8, 11, 12) Tyotyili, olio ekevelelo lihuvisa unene!
Ovola Olumono Lwa Huku
(Loma 8:6) Mokonda okusoka komahando olutu tyieta ononkhia, mahi okusoka kovipuka vya Huku tyieta omuenyo nombembwa;
Omutala Womulavi 12/2016 pomafo 10-14
‘Okusoka Kovipuka vyo Paspilitu Tyihangununa Omuenyo Nombembwa’
Omonkhalelo patyi omunthu “usoka komahando olutu” elikalela nou “usoka kovipuka vya Huku?” (Loma 8:6)
Omunthu usoka komahando olutu, uhanda vala okufuisapo omahando ae muene. Omuvo watyo auho, upopia vala omahando olutu. Omunthu wokusoka kovipuka vya Huku ulinga vala ovilinga vya Huku, iya omunthu oo uhongolelwa nononkhono mba Huku. Okusoka komahando olutu tyituala kononkhia mahi okusoka kovilinga vya Huku tyituala komuenyo nombembwa.
(Loma 8:26, 27) Okuyawisako, ononkhono mba Huku mbutukuatesako momuvo tuasoya. Pamwe tupondola okukala tyihetyii etyi matulikuambela. Momuvo oo, namphila tuhena onondaka matupopi, kononkhono mba Huku omalusoke etu maanoñgonokwa. 27 Huku utala momitima viovanthu, wii etyi tyihangununa onondaka mbutuka kononkhono mbae. Mokonda ononkhono mba Huku mbuita etyi tyelikuata nehando lya Huku iya otyo tyikuatesako ovasukuki.
Omutala Womulavi 01/11/2009 pefo 14 § 20
Oityi Omalikuambelo Ove Alekesa Konthele Yove?
20 Pamwe, tyipondola katutyii etyi matupopi momalikuambelo etu. ‘Pamwe tupondola okukala tyihena onondaka matupopi tyina tulambela movitateka.’ Apostolu Paulu wahoneka okuti: “Kononkhono mba Huku omalusoke etu maanoñgonokwa.” (Loma 8:26, 27) Siovaa watuma omalikuambelo omanyingi ahonekwe Mombimbiliya. Huku utavela omalikuambelo oo ngatyina oetu iya eekumbulula. Huku utwii nawa, tupu wii etyi ospilitu yae yapopia menyina liavana vahoneka Ombimbiliya. Siovaa ukumbulula omalikuambelo etu tyina ospilitu “ituitilako.” Tyina tulilongesa apeho Ondaka ya Huku matunoñgonoka nawa etyi matuiti atuhapopi vala omalusoke etu.
Okutanga Ombimbiliya
(Loma 7:13-25) Ngotyo, okuti otyiwa tyandyetela ononkhia? Au! Mahi onkhali yetyilinga, opo imoneke nawa mokundyetela ononkhia mokonda yetyi tyaviuka, opo onkhali mokonda yotyitumino ikale vali ombi. 14 Mokonda tutyii okuti Ovitumino ovia Huku, mahi ame ndyihitu, nalandeswa konkhali. 15 Mokonda etyi ame ndyilinga hityinoñgonoka. Tyetyi hilingi etyi nahanda, mahi ndyilinga etyi ndyiyele. 16 Ngotyo, inkha ndyilinga etyi nahahande, ndyitavela okuti Ovitumino vikahi nawa. 17 Ngotyo hameko ndyilinga ovipuka ovio, mahi onkhali ikahi molutu luange. 18 Mokonda ame ndyityii okuti mu ame, mohitu yange, mutupu natyike otyiwa; tyetyi ndyina ehando liokulinga etyi tyaviuka, mahi hityivili okutyilinga. 19 Mokonda hilingi otyiwa nahanda, mahi otyivi ndyiyele otyo ndyilinga. 20 Ngotyo, inkha hilingi etyi nahanda, muaina hame-ko ndyikahi nokutyilinga, mahi onkhali ikahi mu ame. 21 Mu ame muna otyitumino etyi: Tyina nahanda okulinga etyi tyaviuka, mu ame muna etyi tyapenga. 22 Tyotyili ame momutima wange ndyihole ovitumino vya Huku, 23 mahi ndyiete molutu luange otyitumino otyikuavo tyiluisa otyitumino tyomolusoke luange, tyinthuala ngomupika motyitumino tyonkhali ikahi molutu luange. 24 Pahe ndyimunthu patyi! Olie mandyovola kolutu olu lunthuala kononkhia? 25 Ndyipandula Huku menyina lya Sesusi Kilisitu Tatekulu yetu! Ngotyo, nolusoke luange ndyimupika wovitumino vya Huku, mahi nolutu luange ndyimupika wotyitumino tyonkhali.
25 YA FEVEREIRO ALO 3 YA MARÇO
OLUMONO LUKAHI MONDAKA YA HUKU | KOVA LOMA 9-11
“Onthengele-popia Yomundyambi”
(Loma 11:16) Tupu, inkha onthele imwe yenthapi liovinyango viotete yasukuka, opo enthapi liatyo aliho liasukuka; iya inkha omwii wasukuka, opo novimpha viatyo viasukuka.
Omutala Womulavi 01/05/2011 pefo 25 § 13
‘Ounongo wa Huku Waya Kohi Unene Ngatyi!’
13 Apostolu Paulu waeleka vana mavakalinga onthele mombuto ya Ambalaiau ngatyina ovimpha viomuti womundyambi. (Loma 11:21) Omuti oo womundyambi wokuatuikua, ulekesa okufuisuapo kuehando lya Huku konthele yomphango alingile na Ambalaiau. Omwii womuti oo ukola o Siovaa una maavela omuenyo o Isilayeli yae. (Isa. 10:20; Loma 11:16) Ehina o Sesusi, omunthu wakolela mombuto ya Ambalaiau. Ovimpha, ‘ovo vana’ valinga onthele yavali yombuto ya Ambalaiau.
(Loma 11:17) Mahi, ovimpha vimwe viomundyambi viatetwa-ko iya ove namphila uwomundyambi wohika, watuikua komundyambi oo pokati kovimpha viesala-ko, pahe upola ouwa komulela womwii womundyambi,
(Loma 11:20, 21) Otyo otyili! Mokonda yokuhena ekolelo, viatetwa-ko, mahi ove utai mokonda yekolelo. Uhelimphande, mahi kala nonthilo. 21 Mokonda inkha Huku wateta ovimpha viomundyambi watyo muene, tupu no ove upondola okukuteta-ko.
Omutala Womulavi 01/05/2011 pefo 26 § 15
‘Ounongo wa Huku Waya Kohi Unene Ngatyi!’
15 Oityi Siovaa alinga opo afuisepo ehando liae? Paulu wahangununa okuti mapolo ovimpha komundyambi wofika, evituiki komundyambi watuikua, opo vipinge puvina viatetuako. (Tanga Loma 11:17, 18.) Ngotyo, Ovakilisitau ovalembulwa vokuatunda momalongo, nga vana vewaneno lyo ko Loma, ankho ongatyina vatuikwa komundyambi oo. Moluotyo, valinga onthele yombuto ya Ambalaiau. Potete, ankho vali ngovimpha viomundyambi wofika, ankho kavapondola okunyingila momphango oyo yavilapo. Mahi, Siovaa waikula ondyila opo vakale o Isilayeli yae. — Loma 2:28, 29.
(Loma 11:25, 26) Mokonda vakuatate, nahanda munoñgonoke etyi Huku aholeka, opo muhakale ovanongo komaiho enyi muene: Ova Isilayeli vamwe vakala tyatena omitima alo munyingila ombalulo aiho yovanthu veheva Sundeu. 26 Iya monkhalelo oyo o Isilayeli aiho maiyovolwa. Ngetyi tyahonekwa okuti: “Omuyovoli matundu ko Siau iya mapolo pu Sakoo ovituwa vioundingavivi.
Omutala Womulavi 01/05/2011 pefo 27 § 19
‘Ounongo wa Huku Waya Kohi Unene Ngatyi!’
19 Tyotyili, ehando lya Siovaa konthele yo ‘Isilayeli yae,’ likahi nokufuisuapo monkhalelo ihuvisa. (Gal. 6:16) Ngetyi Paulu apopia, o “Isilayeli aiho maikayovolwa.” (Loma 11:26) Momuvo Siovaa anaka, o “Isilayeli aiho,” mavakakala onohamba novanakwa keulu. Natyike tyipondola okutyilika Siovaa okufuisapo ehando liae!
Ovola Olumono Lwa Huku
(Loma 9:21-23) Oityi? Okuti nonthata ike vala, omuhongi wonombiya kapondola okuhonga nayo onombiya onombali, ombiya ike yundapeswa nawa nonkhuavo yundapeswa omapita? 22 Iya inkha Huku uhanda okulekesa onyengo yae, opo anoñgonokese epondolo liae, nokukoleleya noumphua-lundo omunene, okuti onombiya mbonyengo mbalingwa pala ehanyauno? 23 Iya inkha otyo wetyilinga opo anoñgonokese omunkhima wae omunene kovanthu vatokala okutambula okankhenda kae, vekahi ngonombiya mbapongiyua-le kohale pala omunkhima,
Omutala Womulavi 01/06/2013 pefo 24 § 5
Yeka Onondonga Mba Siovaa Mbukuviukise
5 Mahi, tyikala ñgeni inkha ovanthu kavetavela okuviukiswa Nomuhongi Omunene? Iya oñgeni aundapesa epondolo liae? Soka oñgeni matyikala inkha ombiya kaikala ngetyi omuhongi ankho ahanda. Omuhongi upondola okuihanya alingi ombiya onkhuavo ine wiyumbahi! Tupu, tyina ombiya yahatundu nawa, pamwe omuhongi oe weheihongele nawa. Mahi, Siovaa apeho uviukisa nawa ovanthu vae. (Deu. 32:4) Tyina omunthu ehetavela Siovaa emuviukise, apeho omunthu oe una otyitateka. Siovaa upilulula onkhalelo ahongolela ovanthu iya otyo tyitei inkha vetavela tyina eveviukisa. Vana vetavela, vapolako ouwa omunene. Mongeleka, Ovakilisitau ovalembulwa, vahongwa opo vakale ‘onombiya onongwa.’ Mahi, vana vehetavela Huku, vekahi “ngonombiya mbonyengo, mbahongwa pala okuhanyuako.” — Loma 9:19-23
(Loma 10:2) Mokonda ame ndyiava oumbangi wokuti vena ombili na Huku, mahi ha nenoñgonoko liaviuka.
Estudo Perspicaz volume 1 pefo 517 § 5
Onkhi
Okulinga Otyipuka Nombili Tyihena Enoñgonoko Liotyotyili. Omunthu upondola okukala nombili notyipuka tyimwe mahi nongotyo anumanesa Huku. Otyo tyamonekele nova Sundeu vamwe vo potyita tyotete. Ankho vahanda ñgeno ouviuki utuka kovipuka valinga mahi vielikuata Novitumino Viapelwe Moisesi. Mahi, Paulu walekesa okuti ombili yavo ankho kayaviukile mokonda ankho vetupu enoñgonoko liotyotyili. Ngotyo, avehetyivili okuvasa ouviuki wotyotyili utuka ku Huku. Ankho vena okuimbuka ovivi viavo, avakondoka ku Huku, pokati ka Kilisitu opo vakale ovaviuki avaevelwa ononkhali mbavo. (Loma 10:1-10) Saulu woko Tarsu nae ankho o umwe puvo, ankho una ombili onene novituwa vilingwa mo Sundaa iya alo umwe ‘amonesa ononkhumbi omawaneno nokuehanya.’ Ankho weendela movitumino, iya ankho ulinga “atyiho ovitumino vipopia okuti tyaviuka.” (Gal. 1:13, 14; Fil. 3:6) Ngotyo ombili novituwa viotyilongo tyae ankho kayaviukile. Ankho una omutima omukuatyili iya mokonda yotyo Siovaa akala nokankhenda nae pokati ka Kilisitu etyi emueta mefendelo liotyotyili.—1 Tim. 1:12, 13.
Okutanga Ombimbiliya
(Loma 10:1-15) Vakuatate, etyi ame ndyihanda momutima wange, nokulivondela ku Huku pala-vo, eyovo liavo. 2 Mokonda ame ndyiava oumbangi wokuti vena ombili na Huku, mahi ha nenoñgonoko liaviuka. 3 Tyetyi, mokonda kavei ouviuki wa Huku, mahi vaovola okulinga ouviuki wavo muene, kavetavelele kouviuki wa Huku. 4 Mokonda Kilisitu oe onthyulilo Yovitumino, opo kese munthu ukala nekolelo atalwe okuti omuviuki. 5 Mokonda Moisesi wapopia okuti: “Kese munthu ulinga ovipuka ovio makakala nomuenyo.” 6 Mahi konthele youviuki utuka kekolelo, ondaka ya Huku ipopia okuti: “Uhapopie momutima wove okuti: ‘Olie malondo keulu?’ opo akatulule-ko Kilisitu, 7 ine ‘Olie malauka metoto liaya kohi?’ opo akapindule-mo Kilisitu po vokuankhia.” 8 Mahi oityi Ovihonekwa vipopia? Vipopia okuti: “Ondaka ikahi popepi no ove, momulungu wove no momutima wove muene”; “ondaka” yekolelo, oyei onthue tukahi nokuivisa. 9 Mokonda inkha upopila ovanthu nomulungu wove okuti Sesusi o Tatekulu iya momutima wove okala nekolelo liokuti Huku wemupindula-po kononkhia, mokayovolwa. 10 Tyetyi omunthu una okukala nekolelo momutima wae opo akale omuviuki iya opo ayovolwe una okupopia onondaka ombo nomulungu wae. 11 Mokonda ovihonekwa vipopia okuti: “Nawike ukala nekolelo mwe mekelivela.” 12 Mokonda kutupu okapungulula pokati komu Sundeu nomu Geleku. Kuna vala Tatekulu wike utumina ovanthu vatyo aveho, una ukuatesako otyali aveho vemuita ekuateso. 13 Mokonda “kese munthu wiita ku Siovaa aundapesa enyina liae makayovolwa.” 14 Mahi, oñgeni mavemuiti ekuateso, tyina vehena ekolelo mwe? Oñgeni mavakala nekolelo mwe, tyina vehenemuive? Oñgeni mavemuivi tyina pehena nawike wivisa? 15 Oñgeni mavaivisa inkha kavatuminwe? Ngetyi tyahonekwa okuti: “Onomphai mba vana vaivisa onondaka onongwa mbovipuka oviwa, onongwa unene ngatyi!”