Omikanda Viokulilongesa Omukanda Wovilinga Omuenyo Wetu Woukilisitau
7-13 YA OUTUBRO
OLUMONO LUKAHI MONDAKA YA HUKU | TIAKU 3-5
“Kala Nounongo wo Keulu”
(Tiaku 3:17)Mahi ounongo wo keulu tete wasukuka, nokuna ombembwa, nokuapola pokati, wafuapo pala okutavela, weyula okankhenda novinyango oviwa, uhena okapungulula, uhena omaandambeyo.
Achegue-se a Jeová pomafo 221-222 §§ 9-10
Okuti Ukahi Nokuendela ‘Mounongo wo Keulu’?
“Tete wasukuka.” Okukala tyasukuka tyihangununa okukala omusukuki, hakombanda vala mahi tupu nokohi, komutima. Ombimbiliya ipopia okuti ounongo welikuata kumwe nomutima, mahi ounongo kaupondola okunyingila momutima muna omalusoke omavi. (Provérbios 2:10; Mateusi 15:19, 20) Mokonda tuvakuankhali onthue katupondola okukala nomutima wasukuka monkhalelo yavilapo, mahi tuna apa tuaoyela. Omutima wasukuka upondola okutukuatesako ‘okuyala ovipuka ovivi atulingi etyi tyaviuka.’ (Salmo 37:27; Provérbios 3:7) Ove kutavela okuti mounongo wo keulu tyaviuka okutumbula tete okusukuka? Mokonda inkha katukala tyasukuka movituwa no moupanga wetu na Huku, kamatutyivili okukala novituwa ovikuavo viounongo wo keulu.
“Nokuna ombembwa.” Ounongo wo keulu utulunda okukala nombembwa, onthele imwe yotyinyango tyononkhono mba Huku. (Ova Galata 5:22) Tulinga ononkhono ononene opo tuhateye-po ombembwa iwaneka ovanthu va Siovaa. (Ova Efesu 4:3) Tupu tuovola okukala nombembwa tyina tuna ovitateka na vakuetu. Omokonda yatyi tyesukisila? Ombimbiliya yati: “Tualeiko . . . nokukala nombembwa; iya Huku woluembia nombembwa makala no onwe.” (2 Ova Kolindu 13:11) Ngotyo Huku yombembwa makala no onthue inkha tutualako okukala nombembwa. Onkhalelo tutekula ovakuatate vetu, ipondola okunyona ine okupameka oupanga wetu na Siovaa. Oñgeni tupondola okukala nombembwa? Tala ongeleka.
(Tiaku 3:17)Mahi ounongo wo keulu tete wasukuka, nokuna ombembwa, nokuapola pokati, wafuapo pala okutavela, weyula okankhenda novinyango oviwa, uhena okapungulula, uhena omaandambeyo.
Achegue-se a Jeová pomafo 223- 224 § 12
Okuti Ukahi Nokuendela ‘Mounongo wo Keulu’?
“Nokuapola pokati.” Oityi tyihangununa okupola pokati? Ngetyi tyipopia ovanongo vamwe, tyipuiya unene okupitiya ondaka yo Geleku “okupola pokati” yapopiwa mu Tiaku 3:17. Ovapitiyi vamwe vapitiya ondaka oyo okuti “okankhenda,” “okukoleleya” “okunoñgonoka” omunthu. Mahi Ombimbiliya ihangununa ondaka oyo okuti “okuneñgena omutima ine okutavela okunkhinkhilinyua.” Oñgeni tupondola okulekesa momuenyo wetu okuti tuapola pokati?
Achegue-se a Jeová pomafo 224-225 §§ 14-15
Okuti Ukahi Nokuendela ‘Mounongo wo Keulu’?
“Wafuapo pala okutavela.” Ondaka yo Geleku yapitiyua “wafuapo pala okutavela” kaivasiwa vali ponthele naike Yovihonekwa vyo Geleku. Ngetyi tyapopia omunongo umwe ondaka oyo “yuundapeswa pokulongesa omafualali.” Ilekesa okukala omunthu “wapepuka” iya “utavela.” Una utuminwa nounongo wo keulu utavela liwa-liwa etyi Ombimbiliya ipopia. Omunthu oo kalingi etokolo limwe iya pahe ahongiliyua novipuka ovikuavo. Mahi omunthu utuminwa nounongo wa Huku utavela okulinga omapiluluko tyina umwe amemulekesa etyi Ombimbiliya ipopia ine tyina omunthu umwe emupopila okuti etyi asoka katyaviukile. Okuti no ove ongotyo ukahi?
“Weyula Okankhenda Novinyango Oviwa”
“Weyula okankhenda novinyango oviwa.” Okankhenda onthele imwe younongo wo keulu yesukisa unene iya ipopiwa okuti “weyula okankhenda novinyango oviwa.” Tala okuti “okankhenda” kapopiwa kumwe “novinyango oviwa.” Tyaviuka okutyipopila kumwe, mokonda mo Mbimbiliya, okankhenda ovikando ovinyingi kalekesa okusuka na vakuetu. Okankhenda ketukuatesako okulingila vakuetu ovipuka oviwa. Omukanda umwe wapopia okuti okankhenda “okuihamenwa mokonda yatyimwe mukuenyi ekahi nokulambela iya olingi atyiho opo umukuateseko.” Ounongo wo keulu kaulingi onya, tupu utupu vala enoñgonoko. Mahi ounongo wo keulu una omapole, una ohole, una okankhenda, una esuko. Oñgeni matulekesa okuti tuna okankhenda nokueyula ovinyango oviwa?
(Tiaku 3:17) Mahi ounongo wo keulu tete wasukuka, nokuna ombembwa, nokuapola pokati, wafuapo pala okutavela, weyula okankhenda novinyango oviwa, uhena okapungulula, uhena omaandambeyo.
Achegue-se a Jeová pomafo 226-227 §§ 18-19
Okuti Ukahi Nokuendela ‘Mounongo wo Keulu’?
“Uhena okapungulula.” Ounongo wo keulu utuavela ononkhono opo tuhakale nokapungulula novivala ovikuavo, nokuhelimphande mokonda yotyilongo tyetu. Inkha tuhongolelwa nounongo wo keulu, matulikuatehila opo tuyeke-po ovipuka ovivi nokulinga okapungulula. (Tiaku 2:9) Onthue katulekesa okuti ovanthu vamwe ovanene vali ku vakuavo mokonda vatanga unene, vena omalumono, ine mokonda yovilinga viavo mewaneno; tupu katupenye ovakuatate vetu namphila vahepa unene. Inkha Siovaa wakala nohole navo, tupu no onthue tuna okukala nohole navo.
“Uhena omaandambeyo.” Ondaka yo Geleku “omaandambeyo” ipondola okulekesa “una ulinga otyilekeso.” Kohale, ova Geleku vana ankho valinga omalekeso, ankho velipaka ovipuka vimwe motyipala. Ngotyo, ondaka yo Geleku “omaandambeyo” yuundapeswa pala omunthu wemphinia ulikembesa. Tutyii okuti ounongo wo keulu “uhena omaandambeyo” uhongiliya onkhalelo tutekula ovakuatate vetu no ñgeni tulitehelela tyina tuna-vo.
Ovola Olumono Lwa Huku
(Tiaku 4:5) Ine onwe musoka okuti ovihonekwa vitupu ehunga etyi viati: “Mokonda yeyembelo lionkhi, tuna otyituwa tyokuhanda ovipuka vielikalela”?
Omutala Womulavi 15/11/2008 pefo 11 § 6
Ononthele Mbavilapo mbo Mukanda wa Tiaku no wa 1 Petulu
4:5 — Ovihonekwa patyi Tiaku apopia moversikulu ei? Tiaku katumbulile oversikulu patyi. Mahi onondaka ombo mbatunda ku Huku, mbupopia olusoke luvasiwa mu Gênesis 6:5; 8:21, Provérbios 21:10, no Ova Galata 5:17.
(Tiaku 4:11,12) Vakuatate, yekei-po okulipopia omapita na vakuenyi. Una upopia omapita omukuatate ine ukoyesa omukuatate wae, ukahi nokupopia omapita ovitumino nokukoyesa ovitumino. Pahe inkha ove ukoyesa ovitumino, opo ove kulingi etyi ovitumino vipopia mahi umukoyesi. 12 Kuna vala Omuavi wike Wovitumino, Omukoyesi, una utyivila okuyovola nokuhanyauna. Mahi ove, ovelie opo ukoyese mukuenyi?
A Sentinela 15/11/1997 pomafo 20-21 § 8
Ekolelo Litukalesa Noumphua-lundo, Tupu Nokulikuambela
Okupopia omapita omukuatate wove onkhali. (Tiaku 4:11, 12) Mahi vamwe, vakoyesa ovakuatate vavo mokonda vahanda okulipaka pombanda iya vakuavo avevepake pombuelo. (Salmo 50:20; Provérbios 3:29) Ondaka yo Geleku yapitiyua “upopia omapita omukuatate” ilekesa oukalavi, okutendeleya mukuenyi. Otyo tyilekesa okukoyesa onya omukuatate wove. Omonkhalelo patyi ‘okupopia omapita ovitumino okukoyesa ovitumino’? Ovahoneki vovihonekwa no va faliseu ankho ‘vapakele ponthele ovitumino vya Huku’ iya avakoyesa nounongo wavo muene. (Maluku 7:1-13) Tyelifwa no otyo, inkha tukoyesa omukuatate umwe Siovaa ahakoyesile, okuti opo katukahi ‘nokukoyesa ovitumino vya Huku’? Iya ngotyo katukahi nokupopia okuti ovitumino kaviaviukile? Tyina tukoyesa nonya omukuatate, katukahi nokufuisapo otyitumino tyohole. — Ova Loma 13:8-10.
Okutanga Ombimbiliya
(Tiaku 3:1-18) Vakuatate vange, ovanyingi pu onwe ñgeno ankho kavakala ovalongesi, mokonda mutyii okuti matutambula ekoyeso lialema unene. 2 Mokonda onthue atuho ovikando ovinyingi tulinga oviponyo. Inkha pena omunthu uhalingi otyiponyo pokupopia, omunthu oo hamukuankhali-ko tupu utyivila okuhongolela olutu lwae aluho. 3 Inkha tupaka ovitomo komilungu viononkhambe opo mbututavele, tupu tuhongolela olutu luambo aluho. 4 Tupu talei onowato: Namphila ononene iya mbutahua no nomphepo ononene, mbupetwa nokamuti okatutu okuenda no oku omunthu ahanda. 5 Tyelifwa notyo, elaka okapuka okatutu kolutu, mahi kelimphanda novipuka ovinene. Tala okuti, okamutemo okatutu katuuka pala okuyakesa ohika onene! 6 Elaka nalio otupia. Elaka onthele imwe yolutu luetu yeyula ovivi, mokonda lipondola okuhanya omuenyo auho womuthu iya alimuetela ehanyauno ngo liomo Gehena. 7 Ovinyama aviho viomohika noviila novinyama viokulikoka pohi, novinyama viomelunga vipondola okulongeswa novanthu, iya ovanthu vehole okuvilongesa. 8 Mahi petupu omunthu upondola okulongesa elaka. Elaka kalituminwa tupu linyona, lieyula oulio wiipaa. 9 Nelaka tunkhimaneka Siovaa, Tate, tupu nelaka tuhingana ovanthu vatungwa “otyifuika tya Huku.” 10 Momulungu wike mutunda ononkhano onongwa iya amutundu ehingano. Vakuatate vange, katyaviukile ovipuka okueenda monkhalelo ngoyo. 11 Okuti pondyivi-ndyivi papondola okutunda omaande apepa na ana alula? 12 Vakuatate vange, okuti omukuyu upondola okuima onouva, ine omuti wono uva wiima omakuyu? Nii pondyivi-ndyivi yomaande omongwa kapapondola okutunda omaande apepa. 13 Olie una ounongo nenoñgonoko pokati kenyi? Novituwa viae alekese ovilinga vilingwa nepoleyo litunda kounongo. 14 Mahi inkha momutima wenyi muna onkhi, nokuliyele, kamupondola okulipandela ounongo wenyi. Inkha mulinga ngotyo mukahi nokukemba. 15 Ounongo oo kautundu keulu; owo pohi, wovinyama, novilulu. 16 Mokonda apa pena onkhi nokuliyele, tupu mapakala onondyaya novipuka aviho ovivi. 17 Mahi ounongo wo keulu tete wasukuka, nokuna ombembwa, nokuapola pokati, wafuapo pala okutavela, weyula okankhenda novinyango oviwa, uhena okapungulula, uhena omaandambeyo. 18 Tupu, otyinyango tyouviuki tyikunwa pomphangu pena ombembwa pala vana vaovola ombembwa.
14-20 YA OUTUBRO
OLUMONO LUKAHI MONDAKA YA HUKU | 1 PETULU 1-2
“Kalei Ovasukuki”
(1 Petulu 1:14, 15) Onwe pahe muvana va Huku vokutavela kwe. Ngotyo, yekei-po ovipuka vielikuata nomahando enyi apenga ankho muna puetyi muhanoñgonokele Huku. 15 Mahi ngo Musukuki Una wemuihana, no onwe kalei ovasukuki movituwa vienyi aviho.
Omutala Womulavi 2017. 02 pefo 10 § 5
Otyilikutila Tyeyovo — “Otyiwa Tyafuapo” Tyatunda ku Tate
Oñgeni tupondola okulekesa okuti tuhole enyina lya Siovaa? Opo pokati kovituwa vietu. Siovaa uhanda tukale tyasukuka. (Tanga 1 Petulu 1:15, 16.) Otyo tyilekesa okuti tuna okumufenda nokumutavela nomutima auho. Namphila tumoneswa ononkhumbi, tulinga ononkhono mbokutyinda omuenyo welikuata kumwe nomalongeso a Siovaa. Tyina tutyinda omuenyo welikuata novitumino vya Siovaa, tuetela omunkhima enyina Liae. (Mat. 5:14-16) Tulekesa okuti ovitumino viae viaviuka iya Satanasi onkhembi. Onthue tuvakuankhali, tulinga oviponyo. Mahi tyina tuamalingi oviponyo, tulivela nokuyekapo okulinga ovipuka vipenyesisa enyina lya Siovaa. — Sal. 79:9.
(1 Petulu 1:16) Tyetyi tyahonekwa okuti: “Muna okukala ovasukuki, mokonda ame ndyimusukuki.”
Oñgeni Motualako Okukala Mohole ya Huku? pefo 77 § 6
Oñgeni Matuholovona Ovitalukiso Vietu?
Siovaa utupopila okuti: “Muna okukala ovasukuki, mokonda ame ndyimusukuki.” (1 Petulu 1:14-16; 2 Petulu 3:11) Siovaa utavela vala efendelo lietu inkha liasukuka. (Deuteronômio 15:21) Efendelo lietu kamalikala tyasukuka inkha tulinga ovipuka Siovaa eyele, ngetyi oundalelapo, noungangala iya novipuka vielikuata noumbanda. (Ova Loma 6:12-14; 8:13) Tupu, tupondola okunumanesa Siovaa inkha tuholovona ovitalukiso vielikuata novipuka ovio. Otyo tyipondola okusilisa efendelo lietu alihetavelwa na Siovaa ine okupaka motyiponga oupanga wetu nae.
Ovola Olumono Lwa Huku
(1 Petulu 1:10-12) “Ovauli vana vokuapopile konthele yokankhenda okanene ka Huku kana onwe muapewa, vaovolele nombili okunoñgonoka nokuovolola nawa konthele yeyovo olio. 11 Huku kononkhono mbae, wevepopila okuti Kilisitu makamona ononkhumbi iya konyima ankhimanekwa. Moluotyo, avatualako okuovololola opo vanoñgonoka oityi matyikamoneka na Kilisitu iya onalupi otyo matyikamoneka. 12 Huku waholololele kovauli okuti ankho kavekahi nokuliundapela ovo muene, mahi vaundapela onwe. Iya ovauli avahoneka konthele yetyi muapopilwa iya onwe mueiva ovipuka ovio ku vana vemupopila onondaka onongwa nekuateso liononkhono mba Huku mbutunda keulu. Ovipuka ovio, ovio onoandyu mbuhanda unene okunoñgonoka nawa.”
Omutala Womulavi 01/11/2008 pefo 12 § 6
Ononthele Mbavilapo mbo Mukanda wa Tiaku no wa 1 Petulu
1:10-12. Onoandyu mbahandele okutala nawa nokunoñgonoka otyili tyaya kohi tya Huku, tyahonekwa novauli kohale, konthele yewaneno lyo Vakilisitau ovalembulwa. Mahi, ovipuka ovio vieya okuyandyuluka vala nawa, etyi Siovaa ahimbika okuundapesa ewaneno olio. (Efe. 3:10) Katupondola okulandula ongeleka yo noandyu, ‘atuovola ovipuka viaya kohi vya Huku?’ — 1 Kol. 2:10.
(1 Petulu 2:25) Mokonda onwe ankho mukahi ngonongi mbavomba, mahi pahe muakondoka komunthita nonkhalamutwe yonohande mbenyi.
Perspicaz Vol. 3 pefo 658 § 3
Onkhalamutwe
Onkhalamutwe Yavilapo. 1 Petulu 2:25 mokutala ipopia onondaka mbuvasiwa mu Isaías 53:6 ipopia okuti ankho vekahi “ngonongi mbavomba.” Petulu wati: “Mahi pahe muakondoka komunthita nonkhalamutwe yonohande mbenyi.” Ngotyo onondaka Onkhalamutwe Yavilapo mbulekesa Siovaa, mokonda ovanthu vana Petulu ahonekela ankho kavahondolokele ku Kilisitu Sesusi. Mahi pokati kae vakondolelwe ku Siovaa Huku, Omunthita Omunene wovanthu vae. (Sal. 23:1; 80:1; Jer. 23:3; Eze. 34:12) Siovaa tupu onkhalamutwe una utala nawa ovipuka. (Sal. 17:3) Okutala ovipuka (gr.: episkopé) tyipondola okulikuata kumwe nekoyeso. Ngo potyita tyotete P.K., o Selusalei kayanoñgonokele omuvo, ondyuo ya Huku ‘maikoyesua [gr.: episkopés]’. (Luka 19:44) Onthiki yae yokutala nawa ankho ipondola okuetela ovipuka oviwa vana vafenda Siovaa. — 1 Pet. 2:12.
Okutanga Ombimbiliya
(1 Petulu 1:1-16) Ame Petulu omu apositolu wa Sesusi Kilisitu, nahonekela onongendi mbeliyandyana mo Pondu, no mo Galasia, no mo Kapadosia, no mo Asia, no mo Bitinia, onwe vokuaholovonwa na Huku, 2 Tate keulu, ngetyi muene ankho apanga. Ngwe wemuavela ononkhono mbae opo mukale ovasukuki. Walinga ngotyo opo mutavele kwe, iya amukala ovasukuki mokonda yohonde ya Sesusi Kilisitu: Huku atualeko okumuavela vali unene okankhenda kae okanene nombembwa. 3 Huku, Tate ya Tatekulu yetu Sesusi Kilisitu ahilivikwe, mokonda mokankhenda kae okanene wetuavela omphitilo yokutyitwa vali pala ekevelo liapama, mokonda ya Sesusi Kilisitu watutilisua po vokuankhia, 4 na tukale nepingo lihavolo, lihapondola okuhanyaunwa ine okunyimwa-ko. Epingo olio onwe muelipakelwa nawa keulu, 5 vokukahi nokuyungwa nawa nononkhono mba Huku, mokonda yekolelo meyovo maliholololwa momuvo wonthyulilo. 6 Moluotyo, onwe muna ehambu enene, namphila tyesukisa mumone ononkhumbi momuvo uhehi mokonda yovitateka ovinyingi, 7 opo ekolelo lienyi lialolwa limukalese nomunkhima, amuhilivikwa, nokulingilwa onthilo momuvo wehololoko lya Sesusi Kilisitu. Ekolelo olio liakolela vali tyipona oolu ipondola okuhanyuka, namphila yakangulwa notupia. 8 Namphila muhenemumone, onwe mumuhole. Namphila muhemueete pahetyino, muna ekolelo mwe iya muahambukwa unene, nehambu limwe enene lina omunkhima, 9 tyetyi onwe mutyii okuti mokonda yekolelo lienyi mamukapewa eyovo liomienyo vienyi. 10 Ovauli vana vokuapopile konthele yokankhenda okanene ka Huku kana onwe muapewa, vaovolele nombili okunoñgonoka nokuovolola nawa konthele yeyovo olio. 11 Huku kononkhono mbae, wevepopila okuti Kilisitu makamona ononkhumbi iya konyima ankhimanekwa. Moluotyo, avatualako okuovololola opo vanoñgonoka oityi matyikamoneka na Kilisitu iya onalupi otyo matyikamoneka. 12 Huku waholololele kovauli okuti ankho kavekahi nokuliundapela ovo muene, mahi vaundapela onwe. Iya ovauli avahoneka konthele yetyi muapopilwa iya onwe mueiva ovipuka ovio ku vana vemupopila onondaka onongwa nekuateso liononkhono mba Huku mbutunda keulu. Ovipuka ovio, ovio onoandyu mbuhanda unene okunoñgonoka nawa. 13 Moluotyo, pongiyei omitima vienyi na mulinge ovilinga; lingei ovipuka aviho nonondunge; kalei nekevelelo mokankhenda okanene ka Huku mamukalingilwa pehololoko lya Sesusi Kilisitu. 14 Onwe pahe muvana va Huku vokutavela kwe. Ngotyo, yekei-po ovipuka vielikuata nomahando enyi apenga ankho muna puetyi muhanoñgonokele Huku. 15 Mahi ngo Musukuki Una wemuihana, no onwe kalei ovasukuki movituwa vienyi aviho. 16 Tyetyi tyahonekwa okuti: “Muna okukala ovasukuki, mokonda ame ndyimusukuki.”
21-27 YA OUTUBRO
OLUMONO LUKAHI MONDAKA YA HUKU | 1 PETULU 3-5
“Onthyulilo Yovipuka Aviho Yehika Popepi”
(1 Petulu 4:7) Mahi onthyulilo yovipuka aviho yehika popepi. Moluotyo, kalei nonondunge, kalei tyalunguka mokutualako nomalikuambelo.
Omutala Womulavi 01/11/2013 pefo 7 § 1
“Kalei Tyalunguka Mokutualako Nomalikuambelo”
OMULUME umwe ankho uundapa kounthiki wati: “Omuvo upuilisa vali unene okukala tyipahi, okombimba.” Tupu, ovanthu ovakuavo vaundapa otyinthiki atyiho vapondola okutavela okuti etyi tyapopia omulume oo otyili. Tupondola okueleka omuvo oo, nononthiki mbuno tukahi, mokonda onthyulilo youye wa Satanasi ikahi unene popepi. Ononthiki mbuno mbelifua nomuvo wokombimba iya Ovakilisitau vesukisa okulinga ononkhono opo vakale tyipahi. (Loma 13:12) Hatyiwako okulala momuvo uno wokombimba! Tyesukisa okukala “nonondunge” nokutualako “tyalunguka mokutualako nomalikuambelo.” — 1 Pet. 4:7.
(1 Petulu 4:8) Kovipuka aviho, kalei nohole onene na vakuenyi, mokonda wokuna ohole apeho uhanda okuevela vakuavo.
A Sentinela 15/04/1999 pefo 22 § 3
Oñgeni Moimbuka, Nokutetulula Otyitateka Moupanga Una na Huku?
Paka nawa momutwe wove elondolo eli lya apositolu Petulu liati: “Onthyulilo yovipuka aviho yehika popepi. Kalei nonondunge, kalei tyalunguka mokutualako nomalikuambelo. Kovipuka aviho, kalei nohole onene na vakuenyi, mokonda wokuna ohole apeho uhanda okuevela vakuavo.” (1 Petulu 4:7,8) Oviponyo vietu no vya vakuetu, vipondola okunyingila momalusoke etu no momitima vietu avikala ovitateka, ine emanya litupundukisa. Satanasi wii nawa eliva olio. Eliva liae limwe okuyapula ovanthu opo afinde. Mokonda yotyo, tuesukisa okutetulula liwa-liwa ovitateka vietu novakuatate nohole, atuhaavela “Eliapu omphitilo naike.” — Ova Efesu 4:25-27.
(1 Petulu 4:9) Litambulei nawa kese umwe na mukuavo tyihañgoñgo.
Omutala Womulavi 2018. 03 pomafo 15-16 §§ 2-3
Otyituwa Tyokutambula Nawa Ovaenda Tyakolela Unene!
2 Otyipuka tyimwe apositolu Petulu aavelele ondundo ovakuatate vae okulinga, ‘okulitambula nawa kese umwe na mukuavo.’(1 Pet. 4:9) Mo Geleku, ondaka “okutambula nawa ovaenda” ihangununa “okukala nokankhenda novanthu uhei.” Mahi Petulu ankho ukahi nokuavela ondundo ovakuatate no nomphange, opo vakale notyituwa tyokulitambula nawa “kese umwe na mukuavo” namphila ankho velii-ale iya ankho valingila-le kumwe ovipuka. Oñgeni ankho otyituwa tyokutambula nawa ovaenda matyivekuatesako?
3 Otyo ankho tyipondola okuvekuatesako okukala omapanga. Iya ove? Okuti uhinangela oñgeni welitehelele etyi omukuatate umwe ekukonga meumbo liae? Tupu, etyi ove wakongele umwe meumbo liove, otyo tyapamekele oupanga wenyi. Onkhalelo ongwa yokunoñgonoka nawa ovakuatate vetu no nomphange, okuvetambula nawa. Ovakilisitau pomuvo wa Petulu ankho vesukisa okupameka oupanga wavo mokonda ovitateka ankho vikahi nokuliyawisa. Mononthiki mbuno “mbahulilila,” no onthue tuesukisa okulinga ngotyo. — 2 Tim. 3:1.
Ovola Olumono Lwa Huku
(1 Petulu 3:19, 20) Iya monkhalelo oyo aende akaivisa onoandyu mokaleya, 20 mbuna mbehetavelele ku Huku puetyi Huku ankho akevelela noumphua-lundo pononthiki mba Noe, etyi owato ankho ukahi nokutungwa, muna muahupilile vala ovanthu etyinana valambelele momaande avahupu.
A Sentinela 15/06/2013 pefo 23
Omapulo Ovatangi
Ombimbiliya ipopia okuti Sesusi “akaivisa onoandyu mokaleya.” (1 Pet. 3:19) Oityi otyo tyihangununa?
▪ Ngetyi tyapopia apositolu Petulu, onoandyu ombo, o “mbuna mbehetavelele ku Huku puetyi Huku ankho akevelela noumphua-lundo pononthiki mba Noe.” (1 Pet. 3:20) Tyayandyuluka nawa okuti onoandyu Petulu apopia ombo mbuna mbeliwaneka koumphuki wa Satanasi. Etyi Sunda ati “Huku wembupaka menthiki opo mbukevele ekoyeso lionthiki onene” ankho ukahi nokupopia ‘onoandyu mbahatuaileko pomphangu yambo yo konthyimbi, mahi ambusipo omphangu yambo yaviuka.’ — Sunda 6.
Omonkhalelo patyi onoandyu pomuvo wa Noe mbakalele onomphuki? Etyi Ombila Onene iheneye onoandyu ombo onomphuki ambulipilulula ambukala nomalutu ovanthu, otyipuka ankho tyiheli mehando lya Huku pala onoandyu. (Gên. 6:2,4) Tyihe-otyo vala onoandyu ombo ankho mbulinga oundalelapo novahikuena va pano pohi. Huku katungile onoandyu nomahando oo. (Gên. 5:2) Onoandyu ombo onomphuki mambukahanyua-ko momuvo Huku anaka. Nkhele pehepano ngetyi tyapopia Sunda, onoandyu ombo Huku “wembupaka menthiki,” mokaleya.
Onalupi iya oñgeni Sesusi aivisa “onoandyu mokaleya”? Petulu wahoneka okuti otyo tyamoneka etyi Sesusi “apindulwa-po nomuenyo wo keulu.” (1 Pet. 3:18,19) Tala okuti Petulu wati Sesusi “akaivisa.” Etyi Petulu apopia ondaka oyo walekesa okuti otyipuka otyo tyamoneka etyi ehenehoneke omukanda wae wotete. Mokutala konyima yetyi atutiliswa, Sesusi apopi ekoyeso onoandyu ombo onomphuki mavakatambula. Etyi mbaiviswa katyembuavelele ekevelelo nalike. Ankho onondaka mbekoyeso. (Jonas 1:1,2) Konyima yetyi alekesa ekolelo liae noukuatyili wae alo aipawa atutiliswa, Sesusi walekesa okuti Eliapu kalipondola okumutumina. Ngotyo Sesusi ankho wafuapo opo alinge ekoyeso olio. — Suau 14:30; 16:8-11.
Komutwe wandyila Sesusi makakuta Satanasi no noandyu onomphuki embuyumbu metoto liokuaya kohi. (Luka 8:30,31; Ehol. 20:1-3) Alo oko, onoandyu ombo onomphuki mambutualako menthiki. Iya ehanyauno lyo noandyu ombo liaviuka. — Ehol. 20:7-10.
(1 Petulu 4:6) Tyotyili, etyi otyo onondaka onongwa tupu mbaivisililwe ko vokuankhia, opo namphila vakoyeswa muetyi vatuwa kondye mokutala kuovanthu, mahi mokutala kwa Huku, vapondola okukala-ko tyihongolelwa nononkhono mbae.
Omutala Womulavi 01/11/2008 pefo 12 § 7
Ononthele Mbavilapo mbo Mukanda wa Tiaku no wa 1 Petulu
4:6 — Ovalie ankho “vokuankhia” ankho ‘vaiviswa onondaka onongwa’? Ovovana ankho ‘vankhia moviponyo no mononkhali mbavo,’ ine vana ankho vehena oupanga na Huku etyi veheneive onondaka onongwa. (Efe. 2:1) Etyi vetavela onondaka onongwa, avahimbika ‘okukala nomuenyo’ ine oupanga na Huku.
Okutanga Ombimbiliya
(1 Petulu 3:8-22) Okuhulilila-ko, onwe amuho kalei nonkhalelo ike yokusoka, nokankhenda, nohole novakuatate, nokusuka na vakuenyi, nomutima weliola. 9 Muhakondolelei nawike otyivi notyivi ine okulewa nokuleva. Mahi, vekondolelei ononkhaneno onongwa, mokonda onkhalelo ei oyo muaihanenwa, opo mukapiñgane ononkhaneno onongwa. 10 Mokonda “una uhole omuenyo iya uhanda okumona ononthiki onongwa, una okuyunga elaka liae kovivi nomilungu viae kokupopia ounkhembi. 11 Ayekepo okulinga ovivi, alinge etyi tyaviuka; aovole ombembwa iya atualako okulinga ononkhono mbokukala nayo. 12 Mokonda omaiho a Siovaa atala ovaviuki, iya omatwi ae atehelela omalikuambelo avo, mahi Siovaa uyele vana valinga ovipuka ovivi.” 13 Tyotyili, olie memulingi omapita inkha mukala nombili yokulinga oviwa? 14 Tyetyi namphila mumona ononkhumbi mokonda youviuki, mamukala nehambu. Mahi muhatilei owoma etyi ngwe vatila owoma, muhakalei notyiho. 15 Mahi nkhimanekei Kilisitu Tatekulu momitima vienyi, apeho kalei tyafuapo pala okukumbulula kese munthu umupula mokonda yekevelelo lienyi, mahi tyilingei nehiliyo nonthilo onene. 16 Tualeiko nomutima wasukuka tyetyi muvalanduli va Kilisitu, opo movipuka aviho mupopiwa omapita, vana vemupopia omapita na vakunde, mokonda yovituwa vienyi oviwa. 17 Tyetyi hahe vali mumone ononkhumbi mokonda yokulinga oviwa, inkha Huku uhanda okumbuyeka, tyipona okumona ononkhumbi mokonda yokulinga ovivi. 18 Mokonda Kilisitu wankhila ononkhali like vala alo-loo, omunthu umwe omuviuki wankhila vana vehevaviuki, opo onwe emuhongolele ku Huku. Ngwe wankhia mohitu mahi apindulwa-po nomuenyo wo keulu. 19 Iya monkhalelo oyo aende akaivisa onoandyu mokaleya, 20 mbuna mbehetavelele ku Huku puetyi Huku ankho akevelela noumphua-lundo pononthiki mba Noe, etyi owato ankho ukahi nokutungwa, muna muahupilile vala ovanthu etyinana valambelele momaande avahupu. 21 Ombatisimu yokuelifwa notyo, tupu pehepano imuyovola (kaimusukula esilo kolutu, mahi imukuatesako okuita omutima wasukuka ku Huku), mokonda yetutilo lya Sesusi Kilisitu. 22 Ngwe ukahi kokulio kwa Huku, mokonda waya no keulu, iya onoandyu, nomautumini vitavela kwe.
28 YA OUTUBRO ALO 3 YA NOVEMBRO
OLUMONO LUKAHI MONDAKA YA HUKU | 2 PETULU 1-3
“Hinangela Apeho Okuya Kuonthiki ya Siovaa”
(2 Petulu 3:9,10) Siovaa kekahi nokuseta konthele yomulao wae, ngetyi ovanthu vamwe vasoka okuti useta, mahi ngwe wapua elundo no onwe mokonda kahande nawike eye okuhanyua-ko, mahi uhanda aveho velivele. 10 Mahi onthiki ya Siovaa maiya ngotyimphulu, iya omaulu maakalamba nomutetanena omunene, mahi ovipuka komaulu no pohi mavikatokota unene avisenguluka, iya ohi novilinga viayo mavikaholololwa.
A Sentinela 15/12/2006 pefo 27 § 11
Siovaa ‘Makalinga Ouviuki Liwa-Liwa’
11 Oñgeni tuna okunoñgonoka onondaka mba Sesusi mbati Siovaa makalinga ouviuki “liwa-liwa”? Ondaka ya Huku ilekesa okuti, “namphila [Siovaa] apwa-elundo,” mahi makalinga ouviuki tyina omuvo watyo wamehikipo. (Luka 18:7,8; 2 Petulu 3:9,10) Pononthiki mba Noe Ombila Onene yahanyene-po onondingavivi tyihasete. Tupu pononthiki mba Lo, etyi keulu kuatunda otupia, onondingavivi mbahanyenueko. Sesusi wati: “Ongotyo matyikakala monthiki Omona womulume mamoneka.” (Luka 17:27-30) Tupu apa katutu, onondingavivi “mavauhululwa nehanyauno.” (1 Ova Tesalonika 5:2,3) Tyotyili tupondola okukala nonthumbi yokuti Siovaa mahanyeko umwe ouye uno wa Satanasi monthiki anaka, apahalambe nii onthiki ike vala.
(2 Petulu 3:11,12) Mokonda ovipuka ovio aviho mavikasengululwa monkhalelo oyo, muna okutala nawa ovituwa vienyi netyi muna okulinga. Muna okukala ovasukuki nokulinga ovipuka vilekesa okuti muvakuatyili ku Huku, 12 putyina mukevelela nokuhinangela apeho okuya kuonthiki ya Siovaa, muna omaulu maakahanyua-ko notupia iya ovipuka mavikasenguluka nomutokotwe omunene!”
A Sentinela 15/12/2006 pefo 19 § 18
“Onthiki Onene ya Siovaa ikahi Popepi”
18 Katyituhuvisa etyi apositolu Petulu apopia okuti hinangelei apeho “okuya kuonthiki ya Siovaa”! Oñgeni tupondola okutyilinga? Onkhalelo imwe ‘omokukala ovasukuki nokulinga ovipuka vilekesa okuti tuvakuatyili ku Huku.’ (2 Petulu 3:11,12) Okuundapa unene movilinga vya Siovaa tyitukuatesako okukevelela nehambu enene “onthiki ya Siovaa.” Ondaka yo Geleku ‘okuhinangela apeho’ ihangununa okuti “tyalunda.” Onthue katupondola okukuluminya okuya kuonthiki ya Siovaa. Mahi tyina tukahi nokukevelela onthiki oyo, inkha tuundapa unene movilinga vya Siovaa onthiki oyo maiya liwa-liwa tyihasete. — 1 Kolindu 15:58.
Ovola Olumono Lwa Huku
(2 Petulu 1:19) Otyo tuakalela vali nonthumbi yokuti ovipuka aviho Huku apopia uvifuisapo. Tehelelei nawa ovipuka ovio. Onondaka ombo mbukale momitima vienyi ngatyina okandiyelo katema pomphangu panthikovela. Tualeiko okulinga ngotyo (alo kutya iya onthungululu yo kombimba aimoneka).
Omutala Womulavi 01/11/2008 pefo 13 § 3
Ononthele Mbavilapo mbo Mukanda wa Tiaku no wa 2 Petulu
1:19 — Olie “onthungululu yo kombimba,” onalupi yatunda iya oñgeni tutyii? “Onthungululu yo kombimba” o Sesusi Kilisitu Ohamba yavialekwa Mouhamba wa Huku. (Ehol. 22:16) Sesusi watunda etyi eya komutwe wovanthu aveho menima 1914 ngo Hamba Mesiya. Tutyii mokonda yemonekelo lietyi Sesusi apilululwa, lialekesa enkhimano nounene wae Mouhamba. Iya otyo tyatoneka ondaka yaulwa ya Huku. Okutehelela nawa ondaka oyo maimimikila omitima vietu, atunoñgonoka nawa okuti Onthungululu yo kombimba yatundale.
(2 Petulu 2:4) Tyotyili, Huku kelityilikile okuhitisa onoandyu mbokualingile onkhali, mahi wembuyumba mokaleya katiwa Tartalu, embukutila menthiki enene nomalienge opo mbukevele okukoyeswa.
Omutala Womulavi 01/11/2008 pefo 13 § 4
Ononthele Mbavilapo mbo Mukanda wa Tiaku no wa 2 Petulu
2:4 — Oityi o “Tartalu” iya onalupi onoandyu mbokualingile onkhali mbayumbua-mo? O Tartalu onkhalelo yelifwa nokaleya muna muyumbwa vala onoandyu, kamupakwa ovanthu. Enthiki liomutima, okuhanoñgonoka ehando lihambukiswa lya Huku. Vana vekahi mo Tartalu vetupu ekevelelo. Huku wayumba onoandyu mbokuhetavela mo Tartalu po nonthiki mba Noe. Mambutualako okukala monkhalelo oyo yapenyenyekwa alo mbunyimua-ko.
Okutanga Ombimbiliya
(2 Petulu 1:1-15) Ame Simau Petulu, omupika wa Sesusi Kilisitu, apositolu yae, nahonekela vana vokuna ekolelo liakolela unene ngo lietu, menyina liouviuki wa Huku yetu no Liomuyovoli wetu Sesusi Kilisitu okuti: 2 Yawisiluei kokankhenda okanene ka Huku nombembwa, mokonda yenoñgonoko liaviuka konthele ya Huku na Sesusi Tatekulu yetu. 3 Mokonda yepondolo enene lya Huku, tuatambula ovipuka aviho viesukisa opo tutyinde omuenyo wokuundapela Huku nombili. Tuatambula ovipuka ovio mokonda Huku tumwii nawa. Huku wetuihana mokonda Omunene iya o Huku wokankhenda. 4 Mokonda yovipuka ovio wetuavela omilao viakolela ominene unene, opo mokonda yavio onwe mukale nonkhalelo ngo ya Huku, mokuahupa mouye wokuasila waetua nomahando apenga. 5 Mokonda yotyo, lingei ononkhono opo kekolelo lienyi muyawise-ko ovituwa oviwa, kovituwa vienyi oviwa amuyawisa-ko enoñgonoko, 6 kenoñgonoko lienyi amuyawisa-ko okulikondola omutima, kokulikondola omutima amuyawisa-ko ekoleleyo, kekoleleyo lienyi amuyawisa-ko okuundapela Huku nombili, 7 kokuundapela kuenyi Huku nombili, amuyawisa-ko ohole novakuatate, kohole yenyi novakuatate amuyawisa-ko ohole novanthu aveho. 8 Mokonda inkha ovipuka ovio vikala mu onwe avitualako okuliyawisa, mavimutyilika okukala nondende ine okuhaave ovinyango konthele yenoñgonoko liaviuka konthele ya Tatekulu yetu, Sesusi Kilisitu. 9 Mokonda kese munthu uhena ovipuka ovio omumphoki, uhika omaiho ae kotyimimi, iya alimbwa-ko okuti wasukukisua ononkhali mbae mbo kohale. 10 Moluotyo, vakuatate lingei ononkhono mbokukala nekolelo amutualako okukala pokati ka vana Huku aihana tupu aholovona, mokonda inkha mutualako okulinga ovipuka ovio, kamamuponyo nalumwe. 11 Tyotyili, okulinga ngotyo mamukatambula ononkhano onongwa ononyingi, mbokutavelwa okunyingila Mouhamba uhapu wa Tatekulu yetu Omuyovoli Sesusi Kilisitu. 12 Moluotyo, ame nasoka okumuhinangelesa apeho ovipuka ovio, namphila muvii-ale iya muapama nawa motyili tyikahi mu onwe. 13 Mahi nasoka okuti putyina nkhele ndyikahi molutu olu, lukahi ngekaka, otyiwa ndyimulunde nomahinangeleso, 14 mokonda ndyityii okuti apa katutu ekaka liange malihanyua-po, ngetyi tupu Tatekulu yetu Sesusi Kilisitu etyindekesa nawa. 15 Ame mandyilingi apeho ononkhono opo tyina ame namaende, onwe muene mutyivile okuhinangela ovipuka ovio.