Omikanda Viokulilongesa Omukanda Wovilinga Omuenyo Wetu Woukilisitau
4-10 YA NOVEMBRO
OLUMONO LUKAHI MONDAKA YA HUKU | 1 SUAU 1-5
“Muhakalei Nohole Nouye Nii Novipuka Vikahi Mouye”
(1 Suau 2:15, 16) Muhakalei nohole nouye nii novipuka vikahi mouye. Inkha omunthu umwe uhole ouye, opo kehole Tate; 16 mokonda ovipuka aviho vikahi mouye — ehando liolutu, nehando liomaiho, nokulekesa kovanthu etyi una-tyo — kavituku ku Tate, mahi vituka mouye.
A Sentinela 01/01/2005 pefo 10 § 13
Tulandulei Ongeleka Tuasilwa na Sesusi
13 Ovanthu vamwe vasoka okuti, ha-tyiho tyivasiwa mouye tyapenga. Namphila otyo otyili, mahi ovipuka vivasiwa mouye vipondola okutuyapula kokufenda Siovaa. Petupu otyipuka natyike ouye utuavela tyitukuatesako okufuena ku Huku. Moluotyo inkha tukala nohole novipuka vyo mouye, namphila viahapengele, matupake omuenyo wetu motyiponga. (1 Timotiu 6:9, 10) Tyihe-otyo vala ovipuka ovinyingi vilekeswa mouye ovivi iya vihongiliya. Inkha tutala onosinema novipuka ovikuavo motelevisau vilekesa ovanthu veliipaa, vesuka nomalumono, no vokulinga ouhayo wotyihola, tupondola okuvitala ngatyina viaviuka avihimbika okutulola. Inkha tulinga oupanga na vana vesuka vala nonkhalelo yavo yomuenyo, nokuovola onomphitilo mbokulinga onondando, no onthue tupondola okuhimbika okupaka ovipuka ovio pomphangu yotete mo momuenyo wetu. — Mateusi 6:24; 1 Ova Kolindu 15:33.
(1 Suau 2:17) Tupu, ouye ukahi nokulamba kumwe nehando liao, mahi una ulinga ehando lya Huku makala-ko apeho.
Omutala Womulavi 01/08/2013 pefo 27 § 18
Muesukisa Okukala Ovanthu Patyi?
18 Otyipuka otyikuavo tyipondola okutukuatesako okuanya ehando liouye, okuhinangela onondaka mba Suau mbokuati: “Tupu, ouye ukahi nokulamba kumwe nehando liao, mahi una ulinga ehando lya Huku makala-ko apeho.” (1 Suau 2:17) Ouye wa Satanasi umoneka ngoti maukalako apeho. Mahi, nthiki imwe maukapwa. Okuhinangela okuti ovipuka aviho mouye uno apa katutu mavikapuako, matyitukuatesako okuhayondyua Neliapu.
Ovola Olumono Lwa Huku
(1 Suau 2:7, 8) Nonthyolwe, ame hikahi nokumuhonekela otyitumino otyipe, mahi ndyimuhonekela otyikulu tyina onwe muna-tyo tunde konthyimbi. Otyitumino otyo otyikulu, ondaka ina onwe mueiva. 8 Tupu, ame ndyimuhonekela otyitumino otyipe, otyitumino tyo tyotyili kwe no ku onwe, mokonda enthiki likahi nokulamba iya otyimimi tyo tyotyili tyikahi-ale nokuliaima.
Omutala Womulavi 01/09/2013 pefo 10 § 14
Omalondolo a Siovaa Otyotyili
14 Movihonekwa Vyo Vakilisitau mo Geleku muna omahinangeleso omanyingi pala onthue, opo tukale nohole na vakuetu. Sesusi wapopile okuti otyitumino otyinene kovikuavo, tyavali “okukala nohole na munthele yove ngetyi ulihole ove muene.” (Mat. 22:39) Tiaku ondenge ya Sesusi, waihana ohole okuti “ovitumino viohamba.” (Tia. 2:8) Apositolu Suau wahonekele okuti: “Nonthyolwe, ame hikahi nokumuhonekela otyitumino otyipe, mahi ndyimuhonekela otyikulu tyina onwe muna-tyo tunde konthyimbi.” (1 Suau 2:7, 8) Oityi Suau ahandele okupopia etyi ati “otyitumino otyikulu”? Ankho ukahi nokupopia otyitumino tyohole. Otyitumino otyo “otyikulu” mokonda Sesusi ankho wetyiavale omanima omanyingi konyima, “tunde ponthyimbi.” Mahi, otyitumino otyo tupu “otyipe” mokonda ovalongwa ankho vena okulekesa ohole yotyotyili mononkhalelo ononkhuavo. Hono, tupandula unene mokonda tukahi nokupewa omalondolo etukuatesako okuhakala nelungavi, otyituwa tyilekeswa novanthu ovanyingi vo mouye. Mahi, tulekesa ohole yotyotyili.
(1 Suau 5:16, 17) Inkha omunthu umwe umona omukuatate wae ulinga onkhali ihatuala kononkhia, una okumulingilako omalikuambelo iya Huku memuavela omuenyo. Ava vekahi nokupopiwa ovokualinga onkhali ihatuala kononkhia. Mahi kuna onkhali ituala kononkhia. Konthele yonkhali oyo, ame hipopila omunthu okuti elikuambele opo akuateseko una walinga onkhali ngo oyo. 17 Atyiho tyihaviukile onkhali, mahi kuna onkhali ihatuala kononkhia.
Perspicaz Vol. 3 pefo 243 § 3
Okuevela
Tyaviuka okulikuambelela-ko vakuetu okuita opo vaevelwe na Huku, alo umwe nokuitilako ewaneno aliho. Moisesi nae walingile ngotyo konthele yelongo lyo Isilayeli etyi apopia ononkhali mbavo aiti opo Huku eveevele iya Siovaa emutehelela. (Núm. 14:19, 20) Tupu Salomau etyi apakula ondyuo ya Huku, welikuambelele opo Siovaa aevele oviponyo viovanthu vae tyina vamalingi onkhali iya avayekepo onkhalelo ombi yomuenyo. (1 Reis 8:30, 33-40, 46-52) Esdra nae walingile ngotyo etyi apopia ononkhali mbova Sundeu. Elikuambelo liae liatuka komutima liaetele ouwa iya ovanthu avaevelwa na Siovaa. (Esd. 9:13–10:4, 10-19, 44) Tiaku waavela ondundo vana valinga onkhali ku Huku opo vaovole ovakulu vewaneno na vevelingile omalikuambelo iya ‘inkha valingile ononkhali, mavembuevelwa.’ (Tia. 5:14-16) Moluotyo “onkhali ituala kononkhia,” okulinga onkhali kononkhono mba Huku, nokulingila tyawina onkhali iya ononkhali ombo kambuevelwa. Omukilisitau kapondola okuitilako vana valinga ononkhali ombo. — 1 Suau 5:16; Mat. 12:31; Heb. 10:26, 27; tala ONKHALI; ONONKHONO MBA HUKU.
Okutanga Ombimbiliya
(1 Suau 1:1–2:6) Onthue tumuhonekela konthele ya una, watuka konthyimbi, waetele ondaka yeeta omuenyo, una onthue tueiva, una tuatala nomaiho etu, una tuamona, atumukuate nomavoko etu, 2 (yoo, omuenyo waholololua iya onthue tueumona, iya tukahi nokuaava oumbangi konthele yao, nokumupopila-o. Omuenyo oo utunda ku Tate, iya waholololua ku onthue), 3 una tuamona iya atumuivi, una tupu tukahi nokumupopila, opo no onwe muwanekwe kumwe no onthue. Iya onthue tukahi kumwe na Tate no Mona wae Sesusi Kilisitu. 4 Iya tukahi nokuhoneka ovipuka ovio opo ehambu lietu likale tyafuapo. 5 Ombu onondaka tueiva kwe iya atumupopila-mbo mbati: Huku otyitei, iya mwe mutupu enthiki na like. 6 Inkha tupopia okuti: “Onthue tuawanekwa kumwe nae,” mahi otyo tutualako okueendela menthiki, tukahi nokukemba iya katukahi nokuendela motyili. 7 Mahi inkha tukahi nokuendela motyitei ngetyi ngwe ekahi motyitei, opo tuawanekwa kumwe kese umwe na mukuavo, iya ohonde ya Sesusi Omona wae itusukukisa monkhali aiho. 8 Inkha tupopia okuti: “Tutupu onkhali,” tukahi nokulikemba onthue muene iya mu onthue mutupu otyili. 9 Inkha tupopia ononkhali mbetu, ngwe omukuatyili iya omuviuki metuevela ononkhali mbetu iya etusukukisa kovipuka aviho vihaviukile. 10 Inkha tupopia okuti: “Onthue katulingi onkhali,” tumulinga onkhembi iya ondaka yae kaikahi mu onthue.
2 Vana vange, ame ndyimuhonekela ovipuka evi na muhalinge onkhali. Mahi, inkha umwe ulinga onkhali, onthue tuna omukuatesiko ukahi kumwe na He, Sesusi Kilisitu, omuviuki. 2 Iya ngwe otyilikutila tyononkhali mbetu tyituwaneka vali na Huku, ha tyononkhali mbetu vala, mahi tupu nononkhali mbovanthu aveho mouye. 3 Iya monkhalelo oyo, onthue tunoñgonoka okuti tumwii, inkha tutualako okutavela ovitumino viae. 4 Una upopia okuti: “Ame ndyimwii,” mahi ketavela ovitumino viae, onkhembi iya momunthu oo mutupu otyili. 5 Mahi tyina omunthu etavela ondaka ya Kilisitu, otyo matyilekesa nawa okuti tyotyili uhole Huku. Monkhalelo oyo, onthue tunoñgonoka okuti tukahi kumwe nae. 6 Omunthu upopia okuti utualako kumwe nae, omunthu oo una yokutualako okueenda ngetyi ngwe aendele.
11-17 YA NOVEMBRO
OLUMONO LUKAHI MONDAKA YA HUKU | 2 SUAU 1–SUNDA
“Lingei Atyiho Muvila Opo Mutualeko Motyili”
(Sunda 3) Nonthyolwe, namphila ame nahandele okumuhonekela konthele yehando lya Huku liokutuyovola, mahi namona okuti nesukisa okumuhonekela opo ndyimuavele ondundo na mulinge atyiho muvila opo mukale nononkhono mbokuluila ekolelo liapewa ovasukuki otyikando tyike vala alo-loo.
A Sentinela 15/09/2004 pefo 12 §§ 8-9
Tualeiko Okupamekwa mu Tatekulu no Mononkhono Mbae
8 Onthue twii nawa omaliva a Satanasi, mokonda Ombimbiliya itupopila omaliva ae. (2 Ova Kolindu 2:11) Etyi ekahi nokulola omuumbili Jo, Eliapu liamanene-po omalumono ae, aliipaa ovana vae, liaetele oundyale mombunga, nononkhumbi, nomahongiliyo omapanga omatutu. Jo asoyo iya asoko okuti hamwe Huku wemuyekapo. (Jó 10:1, 2) Namphila hono Satanasi ahalingi ovipuka ovio otyo tuviete nawa, mahi ovakuatate ovanyingi vekahi nokulambela movitateka ovio iya Eliapu lipondola okuveuundapesa opo lilinge etyi lihanda.
9 Momuvo uno, ovipuka vinyona oupanga wetu na Siovaa vitualako okuliyawisa. Tuvasiwa mouye umwe ovanthu vehole vali omalumono tyipona oupanga wavo na Huku. Mo internet mulekesa ovanthu valinga ouhayo wotyihola ngatyina otyo tyieta ombembwa, mahi ngwe tyieta omaluihamo. Ovanthu ovanyingi ‘vehole evi vivehambukiswa tyipona Huku’. (2 Timotiu 3:1-5) Onkhalelo oyo yokusoka ipondola okuhongiliya oupanga wetu na Huku inkha ‘katulingi atyiho tuvila opo tukale nononkhono mbokuluila ekolelo.’ — Sunda 3.
Ovola Olumono Lwa Huku
(Sunda 4) Ndyina ehunga liokulinga ngotyo, mokonda pokati kenyi peliyombeleka ovanthu vamwe, vapopiwa-le Novihonekwa tunde kohale okuti mavakapita mekoyeso olio; ovanthu ovo vapilulula okankhenda okanene ka Huku yetu opo vakale nomphitilo yokukala novituwa vikundisa, iya komuhona wetu Tatekulu Sesusi Kilisitu, vamoneka okuti ononkhembi.
(Sunda 12) Ovanthu ovo ononkhanda mbaholama kohi yomaande movipito vienyi mulinga nohole putyina valia no onwe ovipito ovio, ovanthita vokulilisa ovo muene tyihena owoma; omakaka ehena omaande atahua-tahua nomphepo; omiti vihena ovinyango konthyulilo yokuenye, viankhia tuvali iya avitukulwa-po nomii viatyo;
Perspicaz Vol. 1 pefo 62 § 1
Ovipito Viohole
Ombimbiliya kaipopi ovipito viohole, tupu kaipopi inkha ankho vilingwa tuñgapi. (Sunda 12) Ovipito viohole kaviatuminwe na Sesusi nii nono apositolu mbae. Otyo tyilekesa okuti kavipondola okukala onkhuluminya iya kavituala-ko. Vamwe vapopia okuti ankho omuvo Ovakilisitau vokuamona vateleka iya avaihana Ovakilisitau ovape vahepa. Onosona, novahepe, no vokuamona ankho valila kumwe na vana vahepa mahi nohole.
Perspicaz Vol. 1 pefo 456 § 6
Onkhanda
Ondaka onkhuavo yo Geleku, spi·lás mokutala ipopia ononkhanda mbaholama kohi yomaande. Sunda wapopia ondaka oyo opo apopie ovanthu veliyombeleka mewaneno nomalusoke oumphuki ine okunyona. Ngetyi ononkhanda mbaholama kohi yomaande otyitateka ko nombapolo, tupu ovanthu vana ankho veliyombeleka mewaneno ankho otyitateka otyinene kovakuatate mewaneno. Sunda wapopia konthele yovalume ovo okuti: “Ovanthu ovo ononkhanda mbaholama kohi yomaande movipito vienyi mulinga nohole.” — Sunda 12.
(Sunda 14, 15) Enoke omulume wa pandu-vali watukile mombunga ya Andau, waulile konthele yavo etyi ati: “Tala! Siovaa weya no noandyu ononyingi-nyingi ononthyukuki, 15 opo akoyese ovanthu aveho, nokulekesa ovanthu aveho onondingavivi okuti vavelwa onombei mokonda yovipuka aviho ovivi valinga monkhalelo ombi, novipuka ovivi onondingavivi vokulinga ononkhali vapopia konthele yae.”
Omutala Womulavi 01. 2017 pefo 12 § 1
“Ankho Uhambukiswa Nawa Huku”
Olipi eulo lya Enoke? Eulo liatyo liati: “Siovaa weya no noandyu ononyingi-nyingi ononthyukuki, opo akoyese ovanthu aveho, nokulekesa ovanthu aveho onondingavivi okuti vavelwa onombei mokonda yovipuka aviho ovivi valinga monkhalelo ombi, novipuka ovivi onondingavivi vokulinga ononkhali vapopia konthele yae.” (Sunda 14, 15) Otyipuka tyotete ove upondola okunoñgonoka, okuti Enoke wapopia otyipuka otyo ngatyina tyamonekele-ale, ngatyina Huku afuisapo-ale eulo olio. Omaulo Ombimbiliya alandulako, nao ongotyo aenda. Otyipuka tyakolela otyetyi: Omuuli ankho ukahi nokupopia otyipuka tyimwe ayumba onthumbi, iya etyipopi ngatyina tyamonekale! — Isaías 46:10.
Omutala Womulavi 01. 2017 pefo 12 § 3
“Ankho Uhambukiswa Nawa Huku”
Ekolelo lya Enoke lituavela ondundo yokutala ouye ngetyi Huku eutala. Onondaka mbekoyeso Enoke apopile nomutima wakola, no hono nkhele mbakolela unene ngo pomuvo embupopile; Siovaa wafuisapo eulu lya Enoke etyi aeta Ombila Onene ahanyeko onondingavivi pononthiki mba Noe. Ombila Onene otyilekeso tyehanyauno enene maliya apa katutu. (Mat. 24:38, 39; 2 Pet. 2:4-6) Hono, ngo pomuvo pana, Huku makakatula onoandyu mbae opo mbuete ekoyeso mokuhanyaunako onondingavivi. Ngotyo kese umwe pu onthue wesukisa okuhalimbwa elondolo lya Enoke nokulipopila vakuavo. Ombunga yetu nomapanga etu vapondola okuyapuka ku onthue. Pamwe onthue tupondola okulitehelela okuti tukahi atuike. Mahi Siovaa nalumwe asilepo Enoke iya na hono nalumwe masipo ovaumbili vae vekolelo!
Okutanga Ombimbiliya
(2 Suau 1-13) Ame mukulu wewaneno nekuhonekela. Nahonekela ove omukai waholovonua na Huku, novana vove. Ame ndyikuhole unene, mahi hame vala, tupu na vana vanoñgonoka otyili aveho vekuhole, 2 mokonda yotyili tyitualako mu onthue iya matyitualako no onthue apeho. 3 Okankhenda okanene ka Huku, nonkhenda itunda ku Huku Tate, no ku Sesusi Kilisitu Omona wa Tate, notyili noluembia mavikakala no onthue. 4 Ame nahambukwa unene, mokonda neiva okuti ovana vove vamwe vekahi nokuendela motyili, ngetyi tuatambula otyitumino ku Tate. 5 Ngotyo, pahe ame ndyikuita ove omukai waholovonua okuti kalei nohole kumwe na vakuenyi. (Hekuhonekelele otyitumino otyipe, mahi otyikulu, otyitumino etyi tuna-tyo tunde ponthyimbi.) 6 Iya ohole ilekesa okuti onthue, tuna okutualako okueenda ngetyi ovitumino viae vituma. Ngetyi onwe mueiva tunde ponthyimbi, otyitumino tyae tyati, muna okutualako okuendela mohole. 7 Mokonda mouye muatumbuka ovayondyi ovanyingi, vana vehetavela okuti Sesusi Kilisitu weile pohi akala omunthu. Ovanthu ovo, ovo ovayondyi vokuanya Kilisitu. 8 Liyungei nawa opo muhapumbwe ovipuka onthue tuaundapa, mahi opo mukatambule ondyambi yafuapo. 9 Kese munthu ulamba muetyi Kilisitu alongesa ahatualako mondongeso yae, utupu Huku. Una utualako mondongeso ya Kilisitu oe una Tate no Mona. 10 Una uya ku onwe ahaeta ondongeso oyo, muhemutambulei momaumbo enyi iya nii muhemukukunyei. 11 Mokonda una ukukunya omunthu oo, ukahi nokulipaka kumwe nae movilinga viae ovivi. 12 Namphila ndyina ovipuka ovinyingi opo ndyimuhonekele, hihande okutyilinga vali notinda nopapelo, mahi nahanda okuya oko atutomphola otyo tulitala, opo ehambu lienyi likale vali enene. 13 Ovana vomukulu wove waholovonua vatuma okukukukunya-po.
18-24 YA NOVEMBRO
OLUMONO LUKAHI MONDAKA YA HUKU | EHOLOLOLO 1-3
“Ame Ndyii Evi Ulinga”
(Eholololo 1:20) Otyipuka tyaholekwa tya Huku konthele yononthungululu epandu-vali wamona peke liange liokulio, novikandiyelo epandu-vali ovilaale vyo olu, otyetyi: Ononthungululu epandu-vali, onoandyu epandu-vali mbomawaneno, iya ovikandiyelo epandu-vali omawaneno epandu-vali.
Omutala Womulavi 01/10/2012 pefo 19 § 8
Ovituwa Patyi Ove Una?
8 Tupondola okulityilika otyituwa otyo inkha tuhinangela okuti Sesusi una “ononthungululu epandu-vali peke liae liokulio.” “Ononthungululu” mbulekesa ovakulu vewaneno ovalembulwa, iya tupu mupondola okukutikinyua ovakulu aveho vomawaneno. Sesusi upondola okulinga kese tyimwe ahanda ‘nononthungululu’ mbukahi peke liae. (Ehol. 1:16, 20) Mokonda Sesusi Omutwe weuaneno lyo Vakilisitau, wii atyiho tyikahi nokupita pokati kovakulu vewaneno. “Otyipala tyae tyaliaima” iya weete atyiho. Ngotyo, inkha omukulu umwe weuaneno wesukisa okuviyulwa, Sesusi memuviyula momuvo waviuka, nomonkhalelo yaviuka. (Ehol. 1:14) Tyina nkhele ehenetyilinge, tuna okuhumba ovakulu vewaneno, vekahi “kokulio” kwa Sesusi. Paulu wahoneka okuti: “Tavelei ku vana vekahi komutwe pokati kenyi, vetavelei mokonda vemuyunga ngatyina mavakapulwa, opo vetyilinge nehambu ha nokukema, mokonda otyo tyipondola okumunyona.” — Heb. 13:17.
(Eholololo 2:1, 2) Omutumwa wewaneno lyo Efesu, muhonekela okuti: Evi, ovio ovipuka viapopia una wakuata ononthungululu epandu-vali peke, iya weenda pokati kovikandiyelo vyo olu epandu-vali: 2 ‘Ame ndyii evi ulinga, nononkhono ulinga movilinga viove, nokukoleleya kuove, ndyityii okuti ove kuyeke ovanthu valinga ovivi iya walola vana veliti ono apositolu, mahi ha no apositolu-ko, iya waimbuka okuti ononkhembi.
Omutala Womulavi 01/04/2012 pefo 31 § 11
Siovaa Utupaka Nawa Pala Eyovo
11 Memonekelo likahi momukanda Eholololo okapitulu 2 no 3, omunkhimanekwa Sesusi Kilisitu watala etyi tyikahi nokuenda momawaneno epandu-vali o Asia Menor. Emonekelo lilekesa okuti Kilisitu katalele vala omawaneno oo aeho, mahi watala oñgeni kese like liatuwa. Wapopia ovipuka ankho vilingua-mo novanthu, tupu waavela onondonga mambukuatesako kese ewaneno. Otyo tyilekesa tyi? Omawaneno epandu-vali alekesa Ovakilisitau ovalembulwa konyima yo 1914 iya onondonga aavela omawaneno epandu-vali, hono o pala omawaneno aeho ovanthu va Huku pano pohi. Ngotyo, tupondola okupopia nonthumbi okuti Siovaa menyina Liomona wae ukahi nokuhongolela ovanthu vae. Oñgeni matupolo ouwa kehongolelo olio?
A Sentinela 15/01/2001 pomafo 20-21 § 20
Landula Eongano lya Siovaa
20 Okulandula eongano lya Siovaa likahi nokukula tyilekesa okunoñgonoka otyilinga tya Sesusi Kilisitu, waholovonwa na Huku opo akale “omutwe wewaneno.” (Ova Efesu 5:22, 23) Tupu omukanda wa Isaías 55:4, utupopila okuti: “Tala! Nemuava opo akale ombangi yovanthu vovilongo, omutumini nonkhalamutwe yovanthu vovilongo.” Sesusi utyivila okukala onkhalamutwe. Tupu wii nawa onongi mbae netyi mbulinga. Etyi atala omawaneno epandu-vali mo Asia Menor, ngwe wapopia ovikando vitano okuti: “Ame ndyii evi ulinga.” (Eholololo 2:2, 19; 3:1, 8, 15) Sesusi tupu wii etyi tuesukisa ngetyi Tate yae Siovaa etyii. Etyi ehenelongese Elikuambelo lya Tatekulu, Sesusi wapopile okuti: “Tate yenyi wii etyi muhanda alo umwe tyina muhenemuite.” — Mateusi 6:8-13.
Ovola Olumono Lwa Huku
(Eholololo 1:7) Tala! Ngwe ukahi nokuya nomakaka iya omaiho aeho maemumono, okukutikinya-mo vana vemutomene; iya ovanthu vomihoko aviho mavekeliveta mononthulo otyo valila mokonda yae. Yoo, Amem.
Ouhamba wa Huku Ukahi Nokutumina! pefo 226 § 10
Ouhamba wa Huku Unyimako Onondyale Mbao
10 Okuyapula onongi novinkhombo. Aveho veyele Ouhamba wa Huku mavakamona otyipuka tyimwe matyiyawisa vali kowoma wavo. Sesusi wati: “Iya ovanthu mavakamona Omona womulume uya kombanda yomakaka nepondolo enene nomunkhima.” (Maluku 13:26) Otyipuka otyo tyihuvisa, matyilekesa okuti Sesusi weya pala okukoyesa ovanthu. Monthele onkhuavo yeulo olio lipopia konthele yononthiki mbahulililako, Sesusi wapopile vali ovipuka ovinyingi konthele yekoyeso makalinga pomuvo opo. Otyo tutyivasa monthengele-popia yonongi, novinkhombo. (Tanga Mateusi 25:31-33, 46.) Vana vakuatesako noukuatyili Ouhamba wa Huku, mavakakoyeswa, avatiwa “onongi,” iya ‘mavakakatula omitwe viavo,’ mokonda vanoñgonoka okuti ‘eyovo liavo likahi popepi.’ (Luka 21:28) Mahi, vana veyele Ouhamba, mavakakoyeswa, avatiwa “ovinkhombo,” iya “mavakalila unene” mokonda vanoñgonoka okuti “ononkhia mbahapu” mbuvekevelela. — Mat. 24:30; Ehol. 1:7
(Eholololo 2:7) Una wokuna omakutwi atehelele etyi Huku kononkhono mbae apopila omawaneno: Una ufinda, mandyikemuyeka alie komuti womuenyo, ukahi momphangu yombembwa ya Huku.’
Omutala Womulavi 01/01/2009 pefo 30 § 5
Ononthele Mbavilapo
Mbomukanda Eholololo — Onthele I
2:7 — Oityi “Omphangu yombembwa ya Huku”? Mokonda onondaka ombo mbapopilwa Ovakilisitau ovalembulwa, omphangu yombembwa apa, omphangu yombembwa ya Huku keulu. Ovalembulwa vekolelo mavakapewa ondyambi yokulia “komuti womuenyo,” tyilekesa okuti mavakatambula omuenyo wahankhi. — 1 Kol. 15:53.
Okutanga Ombimbiliya
(Eholololo 1:1-11) Eholololo lya Sesusi Kilisitu, apewa na Huku opo alekese kovapika vae ovipuka vina okumoneka apa katutu. Sesusi Kilisitu atumu oandyu yae komuumbili wae Suau opo imulekese nomanyingilikilo ovipuka vina okumoneka komutwe. 2 Iya Suau aave oumbangi wondaka Huku aava, noumbangi Sesusi Kilisitu aava, yoo, wovipuka aviho amona. 3 Una ehambu, oyo una utangela peulu, na vana vatehelela onondaka mbeulo eli, iya avaendela movipuka viahonekwa-mo, mokonda omuvo wanakua ukahi popepi. 4 Ame Suau ndyihonekela omawaneno epandu-vali ekahi motyilongo tyo Asia okuti: Kalei nokankhenda okanene nombembwa vitunda “ku Una ukahi-ko, wali-ko iya ukahi nokuya,” no kononkhono epandu-vali mbukahi komutwe wotyipundi tya Huku tyoutumini, 5 no ku Sesusi Kilisitu “Ombangi Omukuatyili,” “watetekela okupindulwa-po po vokuankhia,” “Omutumini wonohamba mbo pohi.” Una utuhole iya wetuyovola kononkhali mbetu nohonde yae muene — 6 iya etukalesa onohamba, novanakwa va Huku yae, Tate yae — yoo, apewe omunkhima nepondolo apeho. Amem. 7 Tala! Ngwe ukahi nokuya nomakaka iya omaiho aeho maemumono, okukutikinya-mo vana vemutomene; iya ovanthu vomihoko aviho mavekeliveta mononthulo otyo valila mokonda yae. Yoo, Amem. 8 “Ame, ame Nthyimbi, ame Nthyulilo,” otyo tyapopia Siovaa Huku, “Una ukahi-ko, wali-ko iya ukahi nokuya, Wepondolo Aliho.” 9 Ame Suau, omukuatate wenyi umona ononkhumbi kumwe no onwe, una mamukakala nae mouhamba, iya ukoleleya no onwe kumwe na Sesusi, ankho ndyikahi pokalongo kakala pokati komeva katiwa Patamu, mokonda yokuapopia konthele ya Huku nokuaava oumbangi konthele ya Sesusi. 10 Kononkhono mba Huku andyitualwa monthiki ya Tatekulu, iya andyiivi ondaka onene konyima yange ikahi ngonkhuino, 11 aiti: “Etyi weete tyihoneka mombuingwa iya oitumu komawaneno aa epandu-vali: Mo Efesu, no mo Similina, no mo Pelegamu, no mo Tiatila, no mo Salede, no mo Filadelefia no mo Laodiseia.”
25 YA NOVEMBRO ALO 1 YA DEZEMBRO
OLUMONO LUKAHI MONDAKA YA HUKU | EHOLOLOLO 4-6
“Okuhateka Kuononkhambe Ononkhuana”
(Eholololo 6:2) Iya andyimono onkhambe ongonga iya una wavelama-ko una onkhondyi. Huku emupe ekolowa, aende opo akafinde nokumanuhula okufinda onondyale mbae.
Omutala Womulavi 03. 2017 pefo 4 § 3
Ovalie Vavelama Konokhambe Ononkhuana?
Olie wavelama konkhambe ongonga? Ekumbululo tulivasa Mombimbiliya momukanda Eholololo. Una wavelama-ko wiihanwa okuti “Ondaka ya Huku.” (Eholololo 19:11-13) Enyina olio liokuati, Ondaka, liapewa Sesusi Kilisitu, mokonda oe omutumwa-ndaka wa Huku. (Suau 1:1, 14) Tupu, wiihanwa okuti, “Ohamba yonohamba, Tatekulu yovo tatekulu,” iya tupu wiihanwa okuti, “Omukuatyili, Upopia Otyili.” (Eholololo 19:16) Tyimoneka nawa okuti Sesusi una epondolo liokukala ohamba yovilwa iya ngwe kaundapesa omapita epondolo liae. Otyo tyipondola okukatula omapulo amwe.
Omutala Womulavi 03. 2017 pefo 4 § 5
Ovalie Vavelama Konokhambe Ononkhuana?
Onalupi ahimbika okuhateka? Tala okuti Kilisitu wahimbika okuhateka etyi apewa ekolowa. (Eholololo 6:2) Onalupi Kilisitu avialekwa opo akale Ohamba? Kavialekelwe etyi atutiliswa aende no keulu. Ombimbiliya ilekesa omuvo Kilisitu akevela. (Ova Hebeleu 10:12, 13) Kilisitu wapopilile ovalongwa vae enyingilikilo malivekuatesako okuimbuka onthyulilo yomuvo akevelela, no ñgeni mahimbika okutumina keulu. Kilisitu watile, tyina amahimbika okutumina, ovivi mouye maviliyawisa vali unene. Tupu wapopia okuti, ovilwa, nondyala, nomauvela, maviliyawisa. (Mateusi 24:3, 7; Luka 21:10, 11) Konyima Yovita Viotete Viouye Auho viahimbika menima 1914, atyimoneka umwe nawa okuti mo 1914 omuvo wovitateka Ombimbiliya iihana okuti ‘ononthiki mbahulilila.’ — 2 Timotiu 3:1-5.
(Eholololo 6:4-6) Akuya onkhambe onkhuavo, ina otyivala tyotupia iya una ankho wavelama-ko watumwa okupola ombembwa pohi opo ovanthu veliipae poyavo iya ankho wapeua omutunga umwe umunene. 5 Etyi aikula ombutau ya tatu, andyiivi oandyu ya tatu yati: “Endyu!” Iya andyimono onkhambe onthikovei, iya una wavelama-ko ankho una otyipeyalo peke liae. 6 Andyiivi otyipuka tyikahi ngatyina ondaka pokati konoandyu ononkhuana yati: “Okilu yosevata mailande ondenaliu ike iya onokilu ononthatu mbosevata mambulande ondenaliu ike; iya omulela, novinyu uhevinyone.”
Omutala Womulavi 03. 2017 pefo 5 § 2
Ovalie Vavelama Konokhambe Ononkhuana?
Otyo tyilekesa ovita. Tala okuti ngwe kapolo ombembwa yotyilongo tyike vala, mahi ombembwa yo mouye auho. Menima 1914, omo muatetekela ovita viouye auho. Akulandula ovita vya vali viouye auho iya ovita ovio aviipaa ovanthu ovanyingi vali tyipona vyo tete. Vamwe vapopia okuti ombalulo yovanthu vankhila movilwa tunde menima 1914 valamba po nomiliau 100! Iya otyo atyietela ononkhumbi ovanthu ovanyingi.
Omutala Womulavi 03. 2017 pefo 5 §§ 4-5
Ovalie Vavelama Konokhambe Ononkhuana?
“Iya andyimono onkhambe onthikovei, iya una wavelama-ko ankho una otyipeyalo peke liae. Andyiivi otyipuka tyikahi ngatyina ondaka pokati konoandyu ononkhuana yati: ‘Okilu yosevata mailande ondenaliu ike iya onokilu ononthatu mbosevata mambulande ondenaliu ike; iya omulela, novinyu uhevinyone.’” — Eholololo 6:5, 6.
Otyo tyilekesa ondyala. Tuetyimona nawa okuti makukala ondyala imwe onene alo umwe oneka ike yotiliku mailande ondenaliu ike, ngwe ondenaliu ike kotyita tyo tete omunthu ankho wiifetua vala tyina amaundapa onthiki yatyo aiho! (Mateusi 20:2) Ombongo yatyo oyo, ankho ilanda ononeka ononthatu mbo sevata, ngwe o sevata okañgima kamwe okatutu vali kotiliku. Oñgeni omunthu metyivili okuavela okulia ombunga yae aiho? Ovanthu vekahi nokupakelua-mo opo vahapesele unene okulia, mahi kohale ankho omulela novinyu ovikulia vya kese nthiki.
(Eholololo 6:8) Iya andyimono onkhambe ihena otyivala, una wavelama-ko utiwa Ononkhia. Iya Elangalo limukuai monyima popepi yae. Ankho vapewa epondolo opo valeke ovanthu konthele ya kuana yohi nomutunga omulaale, nokuveleka nondyala, noviponga viokuipaa, nokuveleka novinyama viohika.
Omutala Womulavi 03. 2017 pefo 5 §§ 8-10
Ovalie Vavelama Konokhambe Ononkhuana?
Una wavelama konkhambe oyo otyilekeso tyononkhia, nomauvela aipaa. Konyima yenima 1914, Epuma espanhola, liaipaa ovanthu ovanyingi-nyingi. Tyafwa ovanthu onomiliau 500 vali nouvela oo, vahupile-po kavehi!
Mahi ouvela oo ankho onthyimbi vala. Ovanongo vamwe vapopia okuti ovanthu ovityita novityita vankhile mokonda yenkhuenyenye okuhimbikila menima 1901 alo menima 2000. Hono ovanthu ovanyingi-nyingi vekahi nokunkhia mokonda yo SIDA, nomukolo, no malalia, namphila ovanongo vekahi nokuovola ovihemba opo vamaneko omauvela oo.
Ovanthu vekahi nokunkhia mokonda yovita, nondyala, ine omauvela. Ondyembo itualako nokukuata ovanthu opo vahakale vali nekevelelo.
Ovola Olumono Lwa Huku
(Eholololo 4:4) Kononthele mbotyipundi tyoutumini ankho kuna ovipundi 24 vioutumini iya kovipundi ovio kuna ovakulu 24 vepumphi, vavala ovikutu ovingonga, iya komitwe viavo vavala omakolowa oolu.
(Eholololo 4:6) Komutwe wotyipundi tyoutumini ankho kuna otyipuka tyimwe tyikahi ngelunga liovitulu, likahi ngokilisitale. Pokati pena otyipundi tyoutumini, iya okuliseta notyipundi otyo, kuna onoandyu ononkhuana mbeyula omaiho komutwe no konyima.
Revelação Seu Grandioso Clímax pomafo 76-77 § 8
Omunkhima Wotyipundi tya Siovaa Keulu
8 Suau ankho utyii okuti kohale ankho kuanakelwe ovanakwa opo vaundape mekaka liefendelo. Moluotyo, etyi ahoneka mokutala tyemuhuvisile unene, wati: “Kononthele mbotyipundi tyoutumini ankho kuna ovipundi 24 vioutumini iya kovipundi ovio kuna ovakulu 24 vepumphi, vavala ovikutu ovingonga, iya komitwe viavo vavala omakolowa oolu.” (Eholololo 4:4) Kononthele mbotyipundi kutupu ovanakwa, mahi kuna ovakulu 24, vavialekwa avakala onohamba. Ovakulu ovo ovalie? Ovalembulwa vomewaneno Liovakilisitau, vatutiliswa-ale vekahi nokukala ponomphangu mbavo, Siovaa ankho evelaa. Oñgeni tutyii?
Revelação Seu Grandioso Clímax pefo 80 § 19
Omunkhima Wotyipundi tya Siovaa Keulu
19 Oityi onoandyu ononkhuana mbulekesa? Emonekelo liapopia omuuli Ezequiel, litukuatesako okuvasa ekumbululo. Ezequiel wamona Siovaa wavialekua metuku-tuku liokeulu iya ankho ukahi nokulandulwa no noandyu mbelifwa no noandyu mbapopiwa na Suau. (Ezequiel 1:5-11, 22-28) Konyima amono vali etuku-tuku iya ankho likahi nokulandulwa no noandyu. Motyikando etyi, aihana onoandyu ombu okuti ono Kelubim. (Ezequiel 10:9-15) Onoandyu ononkhuana Suau amona mbulekesa ono Kelubim ononyingi mba Huku, mbuna otyilinga tyakolela Meongano lya Huku keulu. Ku Suau ankho katyihuvisa okutala ono kelubim mbuli ponthele ya Siovaa, mokonda kohale mekaka liefendelo kombanda yotyipato Tyotyikasa Tyomphango ankho kuna ono kelubim onombali, ankho mbulekesa otyipundi tya Siovaa. Pokati kono kelubim ombo, opo ondaka ya Siovaa yapopila ovitumino elongo lyo Isilayeli. — Êxodo 25:22; Salmo 80:1.
(Eholololo 5:5) Mahi umwe povakulu amphopila okuti: “Uhalile vali. Tala! Onkhulika yomuhoko wa Sundaa, omwii wa Daviti wafinda, moluotyo upondola okuikula onombutau nombuingwa yatyo.”
‘Venha Ser Meu Seguidor’ pefo 36 §§ 5-6
“Tala! Onkhulika Yomuhoko wa Sundaa”
5 Onkhulika ovikando ovinyingi yeelekwa nokukola omutima. Wakalele-ale komutwe wonkhulika? Inkha wakalele-ale komutwe, mokutala ankho pena apa yahondyelwa. No ngotyo tyitilisa unene owoma. Tyina utala momaiho onkhulika onene yapama, otyo ikutala, tyipuiya unene okusoka okuenda nkholo. Ombimbiliya ipopia okuti “Onkhulika otyinyama tyihaende nkholo omunthu nawike”. (Provérbios 30:30) Na Kilisitu ongotyo apama omutima.
6 Matutale ononkhalelo ononthatu Sesusi alekesa okuti wakola omutima ngonkhulika: Mokuayakulila otyili, nokukuatesako ouviuki, nokukoleleya movitateka. Tupu matutale okuti atuho tupondola okuhetekela Sesusi okukala nomutima wakola; tyilinge ankho tuna owoma ine tutupu.
Okutanga Ombimbiliya
(Eholololo 4:1-11) Konyima yotyo, andyimono epito liaikuka keulu, iya ondaka yo tete neiva ipopia na ame ankho ikahi ngonkhuino; aipopi okuti: “Londa kuno, na ndyikulekese ovipuka vina okumoneka.” 2 Konyima, liwa-liwa andyikala mepondolo liononkhono mba Huku, puetyi ankho ndyikahi nokutala, andyimono otyipundi tyimwe tyoutumini ankho tyikahi keulu iya kotyipundi otyo ankho kuna omunthu upumphi-ko. 3 Iya Una ankho upumphi-ko una otyivala tyemanya liosasipe no lyo saludiu iya okuliseta notyipundi otyo ankho kuna omuvia-wonkhongolo ukahi ngemanya liosimelada. 4 Kononthele mbotyipundi tyoutumini ankho kuna ovipundi 24 vioutumini iya kovipundi ovio kuna ovakulu 24 vepumphi, vavala ovikutu ovingonga, iya komitwe viavo vavala omakolowa oolu. 5 Kotyipundi tyoutumini ankho kutundilila omiliakulo nonondaka nomitetanena; ankho kuna ovikandiyelo epandu-vali viatema kononthele mbotyipundi otyo tyoutumini, iya ovikandiyelo ovio vilekesa ononkhono epandu-vali mba Huku. 6 Komutwe wotyipundi tyoutumini ankho kuna otyipuka tyimwe tyikahi ngelunga liovitulu, likahi ngokilisitale. Pokati pena otyipundi tyoutumini, iya okuliseta notyipundi otyo, kuna onoandyu ononkhuana mbeyula omaiho komutwe no konyima. 7 Oandyu yo tete ankho ikahi ngonkhulika, oandyu ya vali ikahi ngondume-tane, oandyu ya tatu ina otyipala ngo tyomunthu iya oandyu yakuana ankho ikahi ngonkhombe inthanana. 8 Onoandyu ombo ononkhuana kese imwe ankho ina omavava epandu; ankho mbeyula omaiho komavava ambo alo mombuelo. Iya tyinthiki na tyitenya ankho mbutualako okupopia okuti: “Omusukuki, omusukuki, omusukuki o Siovaa Huku Wepondolo Aliho, una wali-ko, ukahi-ko iya ukahi nokuya.” 9 Apeho tyina onoandyu ombo mbunkhimaneka nokuhivilika nokupandula Una upumphi kotyipundi tyoutumini, Una wokukahi-ko apeho-apeho, 10 ovakulu 24 velipetamena ku Una upumphi kotyipundi tyoutumini avafende Una ukahi-ko apeho-apeho, iya avayumbu omakolowa avo ponthele yotyipundi tyoutumini, otyo vati: 11 “Siovaa Huku yetu, ove watokala okupewa omunkhima, nehumbilo, nepondolo, mokonda ove watunga ovipuka aviho, iya viatungwa nokukahi-ko mokonda yehando liove.”