ELONGESO 2

Tomphola Vala Nawa

2 Ova Kolindu 2:17

ETYI UNA OKULINGA: Tomphola umwe vala, tyimoneke okuti etyi mopopi tyesukisa, tupu usuka novanthu.

Likwambela olilongesa nawa. Likwambela wahalinge otyiho, suka vala neetyi molongesa. Monthele yove tala-mo evi viesukisa vali okupopiwa, ovipake momutwe. Wahalandule vala momukanda, ovipuka vipopia monondaka mbove, wahapopie ngatyina utanga.

Ine mokatanga Ombimbiliya aa omukanda omukwavo, tanga onoñgonoka nawa etyi watanga, opo etyi motange tyiivale nawa. Ine onondaka motange mbapopiwa na umwe, mbutangela omu ankho ekahilile, mahi tupu ohalambesa, tyahalinge vala navi.
Etyi upopia tyitunde komutima. Soka oityi ava veli nokukutehelela vesukisila okwiiva etyi mopopi. Soka kuvo. Pahe omu motalamena, na tyina uyulaika, no kotyipala tyove, matyimoneka okuti etyi upopia tyitunda komutima, ya ovanthu uvehole.

Okupopia vala ngeetyi upopia, katyilekesa okuti ngootyo pahe upopia vala ohapopi vali nonondunge. Soka kweetyi uli nokulongesa, opopi onondaka mbapepuka okumbunoñgonoka.
Tala kovanthu. Ine apa ukala okutala ovanthu katyivekala omapita, pokupopia vetala. Pokulinga elongomona, uti otale mwou otale mwou, tyipona okuvetala vala aveho.