Tuhetekelei Jeova Huku Wokuava Epameko

1. Etyi Andau na Eva valinga onkhali, oñgeni Jeova aava epameko nekevelelo kovanthu?

JEOVA o Huku wokuava epameko. Ukahi nokutyilinga tunde apa ovanthu vakala ovakuankhali. Konyima yetyi Andau na Eva vatyitukilapo Huku, Jeova walaele otyipuka tyimwe ankho matyipameka ovanthu mavatyitwa komutwe wandyila. Eulo olio livasiwa mu Gênesis 3:15 iya lipopia okuti Satanasi Eliapu malihanyua-ko kumwe novipuka ovivi likahi nokulinga.—1 João 3:8; Apocalipse 12:9.

JEOVA WAPAMEKELE OVAUMBILI VAE KOHALE

2. Oñgeni Jeova apamekele Noe?

² Soka oñgeni Jeova apamekele omuumbili wae Noe. Ovanthu pomuvo opo ankho onongangala, valinga omaundalelapo, mahi ankho o Noe vala nombunga yae vafenda Jeova. Noe ankho upondola okusoya. (Gênesis 6:4, 5, 11; Judas 6) Mahi Jeova waavelele Noe epameko ankho esukisa opo atualeko okumufenda iya nokulinga ovipuka oviwa. (Gênesis 6:9) Jeova wapopilile Noe okuti mahanyeko ovanthu onondingavivi iya emupopila kumwe nombunga yae etyi ankho vena okulinga opo vahupe. (Gênesis 6:13-18) Ku Noe, Jeova ankho o Huku wokuava epameko.

3. Oñgeni Jeova apamekele Josue? (Tala olutalatu pefo pahimbikila onthele.)

³ Konyima, Jeova apameka omuumbili wae Josue, mokonda ankho una otyilinga tyakolela unene. Josue ankho oe mahongolela ovanthu va Huku opo vanyingile Motyilongo Valaelwe iya nokufinda onondyale mbavo ankho mbukala motyilongo otyo. Jeova ankho utyii okuti Josue upondola okukala nowoma, ngotyo Jeova apopila Moisesi okuti: “Avela otyilinga Josue iya omupameka, mokonda oe mahongolela ovanthu ava iya oe mevetuala kotyilongo ove mokamona.” (Deuteronômio 3:28) Konyima Jeova apameka Josue etyi ati: “Hameko nekutuma? Kala tyapama iya kola omutima. Uhakale nowoma, mokonda Jeova, Huku yove, ukahi nove kese oku wenda nako.” (Josué 1:1, 9) Kuove, oñgeni Josue akalele etyi eiva onondaka ombo?

4, 5. (a) Oñgeni Jeova apamekele ovanthu vae kohale? (b) Oñgeni Jeova apamekele Omona wae?

⁴ Jeova tupu wapamekele ovanthu vae tyina ankho otyikundyi. Mongeleka, Jeova ankho utyii okuti ova Judeu mavesukisa epameko etyi ankho veli koukonde mo Mbambilonia, iya eveavela epameko pokati keulo limwe liati: “Uhakale nowoma, mokonda ame ndyikahi nove. Uhakale notyiho, mokonda ame ndyi Huku yove. Mandyikupameka, mandyikuvatela. Tyotyili mandyikukuate nawa nokulio kuange kuouviuki.” (Isaías 41:10) Konyima, Jeova apameka Ovakristau votete iya nonthue utupameka monkhalelo oyo.—Tanga 2 Coríntios 1:3, 4.

⁵ Tupu, Jeova wapamekele Omona wae. Etyi Jesus ambatisalwa, eivi ondaka imwe yatunda keulu yati: “Ou Omona wange onthyolwe, una ame napanda unene.” (Mateus 3:17) Tyotyili, onondaka ombo mbapamekele Jesus mokueenda kuovilinga viae pano pohi!

JESUS WAPAMEKELE VAKUAVO

6. Oñgeni onthengele-popia ya Jesus konthele yo notalendu itupameka?

⁶ Jesus wahetekelele Tate yae etyi ankho apameka vakuavo opo vakale ovakuatyili. Wapameka ovanthu etyi apopia onthengele-popia yo notalendu, omu omuhona apopila ovapika vae okuti: “Walinga nawa mupika omukuatyili! Mokonda waundapa noukuatyili movipuka ovitutu, mandyikuavela ovilinga ovinyingi. Nyingila mehambu liomuhona wove.” (Mateus 25:21, 23) Onondaka ombo mbalundile ovalongwa vae okutualako okuumbila Jeova noukuatyili!

7. Oñgeni Jesus apamekele ono apostolu mbae, haunene Petulu?

⁷ Namphila ono apostolu apeho ankho vatañguna konthele yolie omunene ku vakuavo, mahi no ngotyo Jesus apeho ankho wapua-elundo navo. Weveavelele ondundo opo veliole omutima nokulingilako vakuavo ovipuka, avahakevelela vakuavo vevelingileko ovipuka. (Lucas 22:24-26) Movikando ovinyingi, Petulu walingile oviponyo iya otyo atyikalesa omapita Jesus. (Mateus 16:21-23; 26:31-35, 75) Mahi Jesus nalumwe aanyene Petulu. Wapamekele Petulu iya alo umwe emuavela otyilinga tyokupameka vakuavo.—João 21:16.

OVANTHU KOHALE ANKHO VELIPAMEKA

8. Oñgeni Ezekia apamekele ononkhalamutwe mbomafualali, novanthu vomo Judaa?

⁸ Alo umwe etyi ankho Jesus eheneye pano pohi, ovaumbili va Jeova ankho vetyii okuti vena okupameka vakuavo. Soka ku Ezekia. Etyi omafualali o Asilia ankho vahanda okuluisa epunda-umbo lyo Jelusalei, Ezekia waongiya ononkhalamutwe mbomafualali, novanthu vomepunda-umbo opo evemapeke iya ovanthu “avapamena monondaka mba Ezekia.”—Tanga 2 Crônicas 32:6-8.

9. Oityi tupondola okulilongesila ku Job konthele yokuava epameko?

⁹ Tupu, tupondola okulilongesila konthele yokuava epameko ku Job. Namphila ankho esukisa okupamekwa, walongesile vakuavo oñgeni ankho vena okuava epameko. Job wapopilile ovalume veile okumupameka okuti inkha oe ñgeno ankho uvepameka, ñgeno wapopile ovipuka vivekalesa nawa, ahapopi ovipuka ankho vipondola okuveihama komutima. (Jó 16:1-5) Konyima, Job wapamekelwe na Eliuu, na Jeova.—Jó 33:24, 25; 36:1, 11; 42:7, 10.

10, 11. (a) Omokonda yatyi omona wa Jefete ankho esukisa okupamekwa? (b) Ovalie hono tupondola okupameka?

¹⁰ Omona wa Jefete nae ankho wesukisa okupamekwa. Tate yae Jefete, ankho wafuapo opo akalwe nova Amom. Alingi omulao ku Jeova okuti inkha umukuatesako okufinda ovilwa, omunthu wotete matundu meumbo okuya okumuliepesa tyina amakondoka, ankho memuave opo akaundapele Jeova mekaka liefendelo. Ova Isilayeli avafindi iya omunthu wotete weya okumuliepesa, omona wae womuhikuena ankho enae vala aike. Otyo Jefete tyemuihamene unene. Mahi no ngotyo, afuisapo omulao wae iya atumu omona wae akaundape mekaka liefendelo omuenyo wae auho.—Juízes 11:30-35.

¹¹ Namphila ku Jefete otyo ankho katyapepukile, mahi tyaihamene vali unene komona wae. No ngotyo, ankho wafuapo opo afuisepo omulao wa tate yae. (Juízes 11:36, 37) Otyo ankho tyilekesa okuti nalumwe manepwa ine okukala novana. Ngotyo, ombuto yombunga ankho kamaitualako. Omona wa Jefete ankho wesukisa okupamekwa. Ombimbiliya yati: “Atyikala otyituwa ko Isilayeli: Omanima aeho ovahikuena vo Isilayeli ankho vakatalelapo omona wa Jefete opo vemupandule mokueenda kuononthiki ononkhuana.” (Juízes 11:39, 40) Omona wa Jefete utuhinangelesa ovakuatate vetu no nomphange vatokola okuhanepe opo vaundape vali unene movilinga via Jeova. Okuti tupondola okuvepandula, nokuvepameka mokonda yovilinga viavo?—1 Coríntios 7:32-35.

ONO APOSTOLU MBAPAMEKELE OVAKUATATE VAVO

12, 13. Oñgeni Petulu ‘apamekele ovakuatate vae’?

¹² Motyinthiki tyahulililako etyi Jesus ehenenkhie, wapopila Petulu okuti: “Simau, Simau, tehelela! Satanasi wapopia okuti mamukasiswa ngo tiliku. Mahi, ame ndyikahi nokukuitilako unene momalikuambelo, opo ekolelo liove lihatepuluke; iya ove tyina wamakondoka, pameka ovakuatate vove.”—Lucas 22:31, 32.

¹³ Petulu wali umwe pononkhalamutwe Mbovakristau votete. (Gálatas 2:9) Ovipuka alingile mo Pendekoste iya no momanima alandulako, viapamekele unene ovakuatate vae. Konyima yokuaundapa omanima omanyingi, ahonekela ovakuatate vae okuti: “Ame nemuhonekela onondaka mbehehi opo ndyimupameke, nokumukalesa nonthumbi yokuti aka okankhenda ka Huku tuhatokalele. Tualeiko okupamena mokankhenda oko.” (1 Pedro 5:12) Omikanda Petulu ahonekele viapamekele ovakuatate vae. Iya tupu vitualako okutupameka tyina tukahi nokukevelela omaulo a Jeova afuiswepo!—2 Pedro 3:13.

14, 15. Oñgeni omikanda apostolu João ahoneka vitupameka?

¹⁴ Apostolu João tupu nae ankho o umwe pononkhalamutwe Mbovakristau votete. Wahonekele o Evandyeliu ikahi nawa konthele yovilinga via Jesus. Omukanda oo wapamekele Ovakristau mokueenda kuomanima omanyingi iya alo hono utupameka. Mongeleka, omo Evandyeliu ya João vala tutanga okuti Jesus wapopia okuti ohole otyituwa tyiimbukisa Ovakristau votyotyili.—Tanga João 13:34, 35.

¹⁵ Tupu, omikanda vitatu João ahonekele muna onondaka mbakolela unene. Tyina tulitehelela okuti tuasoya mokonda yoviponyo vietu, tyitupameka okutanga okuti otyilikutila tya Jesus “tyitusukula kononkhali mbetu ambuho.” (1 João 1:7) Tupu, inkha tutualako okulivela onombei mokonda yononkhali tualingile, okutanga okuti “Huku omunene vali tyipona omitima vietu,” tyitupameka unene. (1 João 3:20) João oe vala wahoneka okuti “Huku oluembia.” (1 João 4:8, 16) Omukanda wa vali no wa tatu ahoneka, João wapandulile Ovakristau ankho vatualako “okuendela motyili.”—2 João 4; 3 João 3, 4.

16, 17. Oñgeni apostolu Paulu apamekele Ovakristau votete?

¹⁶ Apostolu Paulu wali ongeleka ongwa yomunthu waava epameko kovakuatate vae. Konyima yo nonkhia mba Jesus, otyinyingi tyo no apostolu vesalele mo Jelusalei, omu ankho mukala ononkhalamutwe mbovanthu va Huku. (Atos 8:14; 15:2) Ovakristau mo Judeia ankho vaivisa konthele ya Kristu kovanthu ankho veii-ale Huku. Mahi ospilitu sandu yatumine Paulu opo akaivise mo Gresia, no ko Roma, no kovanthu ovakuavo ankho vafenda ono huku mbomatutu.—Gálatas 2:7-9; 1 Timóteo 2:7.

¹⁷ Paulu waile kovilongo hono viiwe okuti Turkia no Gresia iya no Italia. Waivisile kovanthu vehe va Judeu ankho vakala movilongo ovio iya aonganeka omawaneno. Ovipuka ankho kaviapepukile ko Vakristau ovape. Mokonda ankho vamoneswa ononkhumbi, ankho vesukisa okupamekwa. (1 Tessalonicenses 2:14) Hamwe o menima 50 Paulu ahonekele omukanda opo apameke ewaneno epe mo Tesalonika. Wati: “Apeho tupandula ku Huku, tyina tumutumbula momalikuambelo etu, mokonda tuhinangela apeho ovilinga vienyi mulinga noukuatyili, nononkhono mulinga mbulundwa noluembia iya nekoleleyo lienyi.” (1 Tessalonicenses 1:2, 3) Tupu weveitile opo velipameke pokati, iya ahoneka okuti: “Tualeiko okuliungumanesa nokulipameka pokati.”—1 Tessalonicenses 5:11.

ONONKHALAMUTWE MBOVANTHU VA JEOVA MBUAVA EPAMEKO

18. Oñgeni ononkhalamutwe motyita tyotete mbapamekele Filipe?

¹⁸ Kotyita tyotete, Jeova waundapesile ononkhalamutwe mbovanthu vae, opo apameke Ovakristau aveho, okukutikinyamo vana ankho vena otyilinga tyokuhongolela omawaneno. Etyi Filipe aivisile kova Samaliya konthele ya Kristu, ononkhalamutwe mbemukuatesileko. Mbatumine Petulu na João, navo ankho valinga onthele yo nononkhalamutwe, vakaitileko Ovakristau ovape opo vatambule ospilitu sandu. (Atos 8:5, 14-17) Filipe no Vakristau ovape vapamene unene okunoñgonoka okuti ankho vekahi nokukuatesuako no nonkhalamutwe!

19. Oñgeni Ovakristau votete velitehelela etyi vatanga omukanda watunda kononkhalamutwe?

¹⁹ Konyima, ononkhalamutwe ankho mbesukisa okulinga etokolo liakolela unene. Okuti vana ankho vehe va Judeu navo ankho vesukisa okupita ekuendye, ngetyi ankho tyipopia Ovitumino Viapelwe Moisesi? (Atos 15:1, 2) Etyi velikuambela okuita ospilitu sandu, iya avatomphola konthele yetyi Ovihonekwa vipopia, avaimbuka okuti okuenda ekuendye ankho katyesukisile vali. Avahoneka omukanda wapopia etokolo valinga iya avatumu ovakuatate opo veutuale komawaneno. Etyi ovakuatate komawaneno vatanga omukanda oo, “avahambukwa unene nepameko olio.”—Atos 15:27-32.

20. (a) Oñgeni Ononkhalamutwe mbo Nombangi mba Jeova mbutupameka? (b) Epulo patyi matukumbulula monthele mailandulako?

²⁰ Hono, Ononkhalamutwe mbo Nombangi mba Jeova, mbuava epameko ku vana vaundapa mo no Mbetele, na vana veli movilinga viomuvo auho iya novakuatate aveho mouye auho. Ngo vakuatate vokotyita tyotete, nonthue tuhambukwa unene nepameko tupewa! Tupu, opo Ononkhalamutwe mbo Nombangi mba Jeova mbuavele ondundo vana vayekapo otyili okukondoka ku Jeova, mo 2015 valinga ombulusula yati Kondoka ku Jeova. Mahi okuti vana vahongolela ovanthu va Huku, ovo vala vena okuava epameko, ine atuho tupondola okutyilinga? Matukumbulula epulo olio monthele mailandulako.