Omikanda Viokulilongesa Omukanda Wovilinga Omuenyo Wetu Woukilisitau
7-13 YA SETEMBRO
OLUMONO LUKAHI MONDAKA YA HUKU | ÊXODO 23–24
“Uhalandule Ovanthu Ovanyingi”
(Êxodo 23:1) “Uhayandyenese omatutu. Uhakuateseko ondingavivi, okala ombangi ihanda okunyona mukuavo.
Omutala Womulavi 15/08/2018 pefo 5-6 §§ 7-8
Okuti otyili umwe?
7 Okuti utyihole tyokutuma onomesase komapanga ove? Tyina wiiva otyipuka otyipe motelevisau ine omalaliu, ine omahipululo omakuavo, okuti utyipopila liwa-liwa omapanga ove? Tyina nkhele uhenetume omesase, lipula okuti: ‘Ndyina onthumbi yokuti ehipululo eli oliotyotyili? Okuti ndyii nawa ovipuka aviho viaendapo?’ Ankho utupu onthumbi, noñgonoka okuti hamwe ukahi nokuyandyanesa omatutu. Ngotyo, inkha kutyii nawa okuti etyi weiva otyili umwe, uheitume ku vakuenyi, inyimamo!
8 Pena ehunga ekuavo lilekesa omokonda yatyi otyiponga okutuma onomesase tyihasoko. Movilongo vimwe, ovilinga vietu viailikwa. Movilongo ovio onondyale mbetu vapondola okuyandyanesa omatutu opo ovakuatate vakale nowoma, tupu opo veheliyumbe onthumbi pokati kavo. Tala etyi tyamonekele kohale ko Uniau Sovietika. Opulisa ankho itiwa KGB, yayandyanesile omatutu okupopia okuti vamwe povakuatate vetu ankho veiwe nawa, vayekapo okufenda Siovaa. Ovakuatate vamwe vetavelele komatutu oo iya avayekepo okufenda Siovaa. Konyima, ovanyingi puvo vakondokele, mahi ovakuavo avahakondoka vali. Vayekele omatutu oo anyone ekolelo liavo. (1 Tim. 1:19) Oñgeni tupondola okulityilika oviponga ngovio? Uhetavele okuyandyanesa omahipululo asoyesa vakuenyi ine eheiwe nawa inkha otyili umwe. Uhetavele vala kese ndaka ipopiwa. Mahi, kala nonthumbi yokuti wii ovipuka aviho viaendapo.
(Êxodo 23:2) Uhalandule ovanthu ovanyingi pala okulinga ovivi. Tyina wamakala ombangi, uhapopie etyi tyihetyo opo ukuateseko ovanthu ovanyingi.
Perspicaz Vol. 1 pefo 175 § 5
Alau
Tala okuti, ovikando vitatu Alau alingile evi viapenga, haeko wevihindile, mahi tyafua wayekele vakuavo vemuhongiliye, alingi evi viapenga. Otyikando tyo tete Alau apengesa, ankho upondola okueendela monondongwa mbati: “Uhalandule ovanthu ovanyingi pala okulinga ovivi.” (Êxo. 23:2) Konyima, enyina liae alimoneka mo Vihonekwa monkhalelo imuhilivika, iya nomona wa Huku etyi ankho ali pano pohi ankho utavela okuti Alau omunakwa, omulembulwa. — Sal. 115:10, 12; 118:3; 133:1, 2; 135:19; Mat. 5:17-19; 8:4.
(Êxodo 23:3) Uhalinge okapungulula momphela yomuhepi.
Perspicaz Vol. 1 pefo 479 § 5
Oumphoki
Okuhaendesa omphela monkhalelo yaviuka, ankho tyielekwa noumphoki. Movitumino tuvasamo omalondolo apopia konthele yokulipumwa-po, noviawa ine okapungulula, mokonda ovipuka ovio vipondola okulingisisa omukoyesi, akala ngomumphoki, alingi okapungulula tyina akoyesa. ‘Okulipumwa-po tyikalesa ovamphoki ovanongo.’ (Êxo. 23:8) “Okulipumwa-po, tyipata omaiho ovanongo.” (Deu. 16:19) Omukoyesi ngakala-kala umwe omuviuki utyivila okupunga nawa ovipuka, mahi upondola okuhongiliyua novipuka ovanthu makoyesa vapondola okumuavela. Tyotyili Ondaka ya Huku ipopia okuti, haviawa vala ovio vieta oumphoki, mahi tupu nonkhalelo elitehelela, yati: “Muhalingei okapungulula omuhepi nii wokuamona. Muesukisa okukoyesa nouviuki omukuatate wenyi.” (Lev. 19:15) Ngotyo, mokonda yokuiwe unene, omukoyesi kapondola okuhula komunthu wamona, mokonda vala una-tyo. — Êxo. 23:2, 3.
Ovola Olumono Lwa Huku
(Êxodo 23:9) “Muhatekulei onya onthunda-vilongo. Mokonda etyi tyitiwa onthunda-vilongo onwe mutyii, tyetyi nonwe muali ononthunda-vilongo kotyilongo tyo Isitu.
Omutala Womulavi 15/10/2016 pefo 9 § 4
“Muhalimbueiko Okutambula Ovaenda”
4 Siovaa kaavelele vala ova Isilayeli otyitumino tyokukala nonthilo no nongendi, mahi tupu ankho uhanda vahinangele oñgeni ankho velitehelela puetyi ankho onongendi. (Tanga Êxodo 23:9.) Puetyi ova Isilayeli vehenekale ovapika mo Isitu, ova Isitu ankho kavevehande mokonda velikalela. (Gên. 43:32; 46:34; Êxo. 1:11-14) Omuenyo wova Isilayeli mo Isitu ankho kawapepukile. Siovaa ankho uhanda vetyihinangele iya avakala nokankhenda no nongendi vakala pokati kavo. — Lev. 19:33, 34.
(Êxodo 23:20, 21) “Pahe ame ndyikahi nokutuma oandyu komutwe wove, opo ikuyunge mondyila nokukutuala momphangu napongiya. 21 Liyunga ove muene, mokonda yae, nokutavela ondaka yae. Uhalinge omphata nae, tyetyi kamaevela ononkhali mbenyi. Mokonda enyina liange likahi mwe.
Perspicaz Vol. 2 pefo 828 § 10
Mingeli
1. Oandyu ike vala onthyukuki, tyihe Gabiliyeli, enyina yalio yapopiwa Mombimbiliya iya oyo vala ihanwa okuti “alakandyu”. (Sunda 9) Enyina olio livasiwa otyikando tyo tete momukanda wa Daniel okapitulu 10, omu Mingeli apopiwa okuti, “o imwe po noandyuo yankhimana vali”; Oandyuo oyo yeya okukuatesako oandyu imwe po noandyu mbokuahankhimanene, “ankho yamonesua emone nomutumini wo Pérsia.” Mingeli ‘waihanua okuti omutumini wovanthu va Daniele,’ ‘omutumini omunene, utai opo akuateseko ovana vovanthu va Daniele.’ (Dan. 10:13, 20, 21; 12:1) Otyo tyilekesa okuti, Mingeli oandyu yahongololele ova Isilayeli moluhandya. (Êxo. 23:20, 21, 23; 32:34; 33:2) Otyo otyili, mokonda ‘Mingeli alakandyu, velipatana Neliapu okupopia konthele yolutu lwa Moisesi’. — Sunda 9.
Okutanga Ombimbiliya
(Êxodo 23:1-19) “Uhayandyanese omatutu. Uhakuateseko ondingavivi, okala ombangi ihanda okunyona mukuavo. 2 Uhalandule ovanthu ovanyingi pala okulinga ovivi. Tyina wamakala ombangi, uhapopie etyi tyihetyo opo ukuateseko ovanthu ovanyingi. 3 Uhalinge okapungulula momphela yomuhepi. 4 “Inkha uvasa otyipako tyondyale yove tyavomba, tyilinge ongombe tyilinge otyimbulu tyae mutwaila-tyo. 5 Inkha umona otyimbulu tyomunthu umwe ukuyele tyatoka nonosaku, wahaye otyisipo. Kuatesako muhekulu, mokutyipola onosaku. 6 “Wahanyone ouviuki momphela yomuhepi mukala nae. 7 “Wehelipake mounkhembi okutendeleya mukuenyi, wahaipae una wehena etyi alinga nii omuviuki, mokonda una wamalingi otyivi himemuti omuviuki. 8 “Wehetavele okulipumwa-po, mokonda otyo tyipata omaiho ovanongo, atyinyono onondaka mbovaviuki. 9 “Muhatekulei onya onthunda-vilongo. Mokonda etyi tyitiwa onthunda-vilongo onwe mutyii, tyetyi nonwe muali ononthunda-vilongo kotyilongo tyo Isitu. 10 “Kuna ombuto yove, oteye ovikuna viatyo momanima epandu. 11 Mahi menima lya pandu-vali wehelilime; liyeka lipululukwe-po. Okulinga ngotyo ovahepe mavali omandyilimenena atyo, etyi vamasi-mo atyiliwa-mo novinyama vyo mohika. Otyo una okulinga ngotyo, mepia liove liomivinyu no liomindyambi. 12 “Linga ovilinga viove mononthiki epandu, mahi monthiki yepandu-vali una okuomba, opo ongombe yove notyimbulu tyove vipululukuepo, nomona womupika wove, na una uhemutyitwa-tyilongo, vafimepo. 13 “Lingei atyiho nemutolela. Muahatumbulei enyina liovika-huku; momulungu wenyi mueheivale enyina liavio. 14 “Omanima atyo aeho muna okundingila ovipito vitatu. 15 Muna okulinga Otyipito Tyonombolo Mbahapakelwe Onkhiso. Mononthiki epandu-vali mamuli onombolo mbahapakelwe onkhiso ngetyi nemutuma momuvo wanakwa mohanyi ya Ambimbe, mokonda omohanyi oyo muatunda ko Isitu. Nawike upondola okuya ku ame mankhanya. 16 Tupu lingei Otyipito Tyokunyanga ovinyango viokuapia tete, vina muatuika mepia; amulingi Otyipito Tyokuwana Okunyanga ovinyango vyo pomuvo watyo, tyina mupola momapia ovipuka muaundapele konthyulilo yenima. 17 Ovikando vitatu menima, kese omulume pokati kenyi, una okumoneka kolupala lwa Siovaa Tatekulu. 18 “Tyina waava, wahahonyeke ohonde yotyilikutila tyange notyipuka tyina onkhiso. Ovilenga viaawa povipito viovilikutila viange kavipondola okupakwa nawa avilala. 19 “Una okutwala kondyuo ya Siovaa Huku yove ovinyango viokukahi vali nawa viapia tete motyilongo. “Wahateleke otyiketa tyotyinkhombo nkhele tyinyama.
14-20 YA SETEMBRO
OLUMONO LUKAHI MONDAKA YA HUKU | ÊXODO 25-26
“Otyipuka Patyi Ankho Tyesukisa Vali Mekaka Liefendelo?”
(Êxodo 25:9) Onwe muna okulinga ekaka liefendelo, novityuma viatyo aviho, alikala umwe ngeli mandyimulekesa.
Perspicaz Vol. 1 pefo 180 § 7
Otyikasa Tyomphango
Onkhalelo Otyikasa Ankho Tyina Okutungwa. Otyipuka tyo tete Siovaa alekesile Moisesi etyi emutolela opo atunge Ekaka Liefendelo, onkhalelo otyikasa matyilingwa mokonda ankho otyipuka tyesukisa, iya tyakolela vali mekaka no monthanda yova Isilayeli. Moulale otyikasa ankho tyina ono kovadu 2,5 mounthanda ankho tyina okovadu 1,5 iya mokuaya no peulu, ankho tyina okovadu 1,5 (c. 111 x 67 x 67 cm). Ankho tyina okulingwa nomavai omuti umwe utiwa acácia, iya atyivolongwa nawa no olu mokati no kondye. Omuoyo wo olu ankho ukahi ngonela yo alemate yeliseta notyikasa. Onthele ya vali Yotyikasa, otyipato tyatyo tyalingwa no olu. Omavai aeho ankho avolongwa no olu, okupolelela moule no mounthanda. Kombanda yotyipato, ankho kuatungilwa ono kelumbii onombali mbo olu mbanthilwa no malitelo. Ankho tyati ei ili oku, ei ili oku ambuho ankho mbelipilukila, mbanyongama iya omavava ambo ankho atandavela kombanda Yotyikasa. (Êxo. 25:10, 11, 17-22; 37:6-9) Tupu otyipato otyo ankho tyiiwe okuti “otyipundi tyokankhenda” ine “otyipato tyokuevela.” — Êxo. 25:17; Heb. 9:5; Tala okatoi kati: TAMPA PROPICIATÓRIA.
(Êxodo 25:21) Otyipato tyatyo otyipake Kotyikasa, Motyikasa opake-mo omamanya Oumbangi mandyikuavela.
Perspicaz Vol. 1 pefo 181 § 1
Otyikasa Tyomphango
Motyikasa omo ankho mupakwa ovitumino vya Huku ine ombangi, ankho viahonekwa komavai evali, ine Ovitumino 10. (Êxo. 25:16) “Omulindi walingwa no olu ankho una omanaa, nomphangoti ya Alau yapapulile,” navio viapakelwe Motyikasa. Mahi konyima avipolwa-mo etyi Salomau ehenetunge Ondyuo ya Huku. (Heb. 9:4; Êxo. 16:32-34; Núm. 17:10; 1 Reis 8:9; 2 Crô. 5:10) Puetyi Moisesi ehenenkhie, waavelele ovanakwa ova Levi “omukanda wovitumino,” tupu evepopila okuti ankho kavapondola okuupaka mokati, mahi ankho una okupakwa ‘ponthele yotyikasa tyomphango ya Siovaa, Huku yavo, . . . [ngatyina] ombangi pokati kavo [nayo]’. — Deu. 31:24-26.
(Êxodo 25:22) Iya omo, omo mandyiya okumoneka kuove nokupopia nove kombanda yotyituviko, pokati ko no kelumbii onombali mbukahi kombanda yotyikasa Tyoumbangi. Iya andyikupopila atyiho mandyikutumu pala ova Isilayeli.
Perspicaz Vol. 1 pefo 181 § 1
Otyikasa Tyomphango
Otyilekeso tyokuti Huku una-vo. Tunde kohale otyikasa ankho tyilekesa okuti Huku oko ekahi. Siovaa wapopile okuti: “Omo, omo mandyiya okumoneka kuove, andyipopi nove kombanda yotyipato, pokati kono kelumbii onombali mbukahi kombanda yotyikasa tyoumbangi.” “Mandyimonekela mekaka kombanda yotyipato.” (Exo. 25:22; Lev. 16:2) Samuele wahoneka okuti, Siovaa “upumphi kombanda yono kelumbii.” (1 Sam. 4:4); Moluotyo, ono kelumbii ankho “otyilekeso tyetuku-tuku” lya Siovaa. (1 Crô. 28:18) Ngotyo, “apeho tyina ankho Moisesi anyingila mekaka liefendelo opo apopie na [Siovaa], ankho wiiva ondaka ipopia nae iivalela kombanda Yotyikasa Tyoumbangi, pokati kono kelumbii. Iya Huku ankho upopia nae.” (Núm. 7:89) Konyima, Sosuwe Nomunene-nakwa Fineya tupu vapopile na Siovaa komutwe Wotyikasa. (Jos. 7:6-10; Juíz. 20:27, 28) Mahi, omunene-nakwa oe vala ankho unyingila Momphangu Onthyukuki Unene like menima opo atale Otyikasa, hapala okupopia na Siovaa mahi o pala alinge otyilikutila Monthiki yokupata ononkhali. — Lev. 16:2, 3, 13, 15, 17; Heb. 9:7.
Ovola Olumono Lwa Huku
(Êxodo 25:20) Ono kelumbii mbuna okukala nomavava evali ayeluka, ambuhiki otyipato. Mbuna okulipilukila, ovipala viambo avitale kotyipato.
Perspicaz Vol. 3 pefo 361 § 11
Kelumbii
Omalutalatu ono kelumbii tupu ankho avasiwa mekaka liefendelo liatungilwe mehoko. Kononthele mbo tyipato tyo Tyikasa, ankho kuna ono kelumbii onombali mbalingwa no olu. Ankho mbelipilukila, iya tupu ankho mbelinyongamena kotyipato ngatyina mbulikuambela. Kese kelumbii ina omavava evali ayeluka, ambuhiki otyipato ngatyina mbutyiyakulila. (Êxo. 25:10-21; 37:7-9) Tupu mokati, motyinyanga tyokuayapula omphangu Onthyukuki, Nomphangu Onthyukuki Unene, ankho kuatungilwa omalutalatu ono kelumbii. — Êxo. 26:1, 31; 36:8, 35.
Perspicaz Vol. 3 pefo 158 § 4
Onombolo Mbokulekesa
Onombolo 12 ankho mbupakwa komesa momphangu Onthyukuki yekaka liefendelo ine mondyuo ya Huku iya kese Tyasapalo ankho pena okupingiyuapo ononkhuavo. (Êxo. 35:13; 39:36; 1 Reis 7:48; 2 Crô. 13:11; Nee. 10:32, 33) Onondaka mbo Hebeleu mbupopia onombolo mbokulekesa, mbutiwa “onombolo mbotyipala.” Ondaka “otyipala” pamwe ilekesa okuti otyipuka tyimwe “oko tyikahi” (2 Reis 13:23), ngotyo, onombolo mbokulekesa apeho ankho mbukala komutwe wotyipala tya Siovaa ngotyawa tyalingilwa Siovaa. (Êxo. 25:30, okatoi) Tupu onombolo mbokulekesa mbuihanwa okuti, “onombolo mbaonganekwa nawa” (2 Crô. 2:4), “onombolo mbotyiawa” (Malu. 2:26), tupu “onombolo mbokulekesa” (Heb. 9:2).
Okutanga Ombimbiliya
(Êxodo 25:23-40) “Tupu molingi omesa yomutonthola, ina ono kovadu onombali moule, no kovadu ike mounthanda, no kovadu ike notyihupe motyitai. 24 Omesa una okuisolonga no olu yatyo muene, oipake omuoyo wo olu weliseta nayo. 25 Molingi omuoyo womesa ulifwe mounthanda wokuvoko, okuliseta nomuoyo watyo ohiviswa-ko no olu. 26 Omesa ipaka omayulu ekuana o olu, oepake mononthele ononkhuana mbomesa pana pakuatelela ovikalo viayo. 27 Omayulu atyo ena okukalela mphangu ike nomuoyo, ngamo munyingilila omitengi viokutyinda omesa. 28 Molingi omitengi viomavai omutonthola, oviwaveka o olu, omitengi ovio ngavio utyinda-tyinda navio omesa. 29 “Tupu molingi omalonga, namalufo, nomilindi, novilindo, ovityuma motila-tila navio oviawa viokunuwa. Aviho una okuvilinga no olu yatyo muene. 30 Apeho-apeho una okupaka onombolo mbokulekesa, komesa yange. 31 “Molingi okandiyelo konomphalavinga ko olu yatyo muene. O olu molingi nayo okandiyelo konomphalavinga, ina okutyopwa nohamala. Omphapelo yatyo, nomuenge watyo, nonomphalavinga mbatyo, namalufo, nonongolo, nononthemo, mbuna okulingwa tyeliima kumwe. 32 Momuenge watyo mamutundu onomphalavinga epandu: ononthatu mbuhula nthele imwe, ononthatu mbuhula konthele onkhuavo. 33 Konomphalavinga mbatyo ambuho, nthele imwe makukala omalufo etatu ekahi ngononthemo mbomunkhiti, mbayapaulwa nonongolo nononthemo; konthele onkhuavo, nako akukala omalufo etatu ekahi ngononthemo mbomunkhiti, mbayapaulwa nonongolo nononthemo. Onomphalavinga ambuho mbaima komuenge wokandiyelo konomphalavinga, ongotyo mambukala. 34 Komuenge wokandiyelo konomphalavinga makukala omalufo ekuana ekahi ngononthemo mbomunkhiti, mbayapaulwa nonongolo nononthemo. 35 Mombuelo yonomphalavinga mbo tete mbaima komuenge, mamukala ongolo ike, mombuelo yonomphalavinga mba vali, amukala ongolo ike, mombuelo yonomphalavinga mbahulililako mamukala vali ongolo ike; onomphalavinga epandu mbaima komuenge, ongotyo mambukala. 36 Onongolo mbatyo, nonomphalavinga, nokandiyelo katyo akeho kena okuliima, kalingwe no olu yatyo muene, yokuatyopwa nohamala. 37 Olingi ovikandiyelo epandu-vali vyo konomphalavinga mbako; tyina ovikandiyelo vyo konomphalavinga viamateme, mavimimikila komutwe wako. 38 Viokunyima omutemo, novityiyo vietwe viokandiyelo konomphalavinga, vina okulingwa no olu yatyo muene. 39 Okandiyelo konomphalavinga, novityuma ovio aviho, vina okulingwa notalendu ike yo olu yatyo muene. 40 Ovipuka ovio vilinga umwe nawa avikala ngevi nekulekesa komphunda.
21-27 YA SETEMBRO
OLUMONO LUKAHI MONDAKA YA HUKU | ÊXODO 27-28
“Oityi Tulilongesila Komuvalo Wovanakwa?”
(Êxodo 28:30) Paka motyikutu tyokukoyesa tyomonthulo o Ulii, no Tumii, ovipuka ovio vina okukala pomutima wa Alau tyina anyingila omu Siovaa eli. Ngotyo Alau matyinda-tyinda ovipuka ovio aviho pomutima wae, avikala viokukoyesa ova Isilayeli apeho tyina enda ku Siovaa.
Perspicaz Vol. 3 pefo 758 § 8
O Ulii, no Tumii
Ovanongo ovanyingi vapopia konthele Yombimbiliya vetala okuti o Ulii, no Tumii, ovilekeso vielao. Mombimbiliya yo Ingelesi yapitiyua na James Moffatt mu Êxodo 28:30 viatiwa, “omalao akola.” Vamwe vasoka okuti, ankho oumanya utatu, kamwe kahonekwa okuti, “yoo,” okakuavo kahonekwa okuti “au,” nkhele okakuavo kakahonekelwe natyike. Ankho upolwa-po tyina vamavasi ekumbululo lietyi vapula, mahi vapolapo vala kana kahahonekelwe tyina vahavasile ekumbululo. Ovakuavo vasoka okuti, ankho oumanya uvali oulasi, nthele imwe ankho oungonga iya konthele onkhuavo ounthikovei. Tyina wamayumbwa iya auho uvali aumoneka otyivala otyingonga, otyo tyihangununa okuti “yoo,” mahi tyina wamayumbwa auho aumoneka otyivala otyinthikovei, otyo tyihangununa okuti “au,” tupu tyina keke kamoneka otyivala otyinthikovei iya ko kakuavo akumoneka otyivala otyingonga, otyo tyihangununa okuti kavavasile ekumbululo. Nthiki imwe etyi Saulu apulile pokati komunakwa inkha upondola okutualako okuluisa ova Filisteu, ahakumbululwa. Mokonda ankho usoka okuti umwe povanthu vae walinga onkhali, aiti ku Huku okuti: “Ove Huku yo Isilayeli, kumbulula pokati ko Tumii!” Saulu na Jonatan avayapulwa pu vana ankho vena-vo. Konyima yotyo, avayumbu owela opo vatale puvo vevali olie walinga onkhali. Mehipululo eli, ondaka “kumbulula pokati ko Tumii,” tyafuile opo ankho pena okuyumbwa owela, namphila ngoti ovipuka ovio viehelikalelele unene. — 1 Sam. 14:36-42.
(Êxodo 28:36) “Linga omulami wo olu yatyo muene oulingi ngetyi tyilingwa otyilimbo, ohoneka-ko okuti: ‘Ousukuki o wa Siovaa.’
Perspicaz vol. 3 pefo 703 § 7
Ombamba
Omunene-nakwa wo Isilayeli. Mo Isilayeli, omunene-nakwa ankho uvala omulami una okavela ko olu ankho kalekesa “enyingilikilo likola lielipakulo,” “ngetyi tyilingwa otyilimbo,” ankho kahonekwa okuti, “Ousukuki o wa Siovaa.” (Êxo. 28:36-38; 39:30) Mokonda omunene-nakwa oe vala ankho uli komutwe mefendelo liotyotyili pala ova Isilayeli, ankho una okulekesa okuti ovilinga viae vikola, iya onondaka mbokuahonekwa momulami ankho mbuhinangelesa ova Isilayeli aveho okuti, tyina vekahi nokulinga ovilinga vya Siovaa vena okukala ovasukuki. Tupu otyo ankho otyilekeso tyo Munene-nakwa wavilapo vali Sesusi Kilisitu wapakulwa na Siovaa opo alinge ovilinga ovio visukukisa enyina lya Huku. — Heb. 7:26.
(Êxodo 28:42, 43) Velingila ovikalasau viomulinya opo vafike omapenge avo. Vina okufika okuhimbikila potyivia aviti ponongolo. 43 Alau novana vae mavavala-vala omuvalo oo tyina vanyingila mekaka liefendelo, no putyina venda komutala wovilikutila momphangu ikola, opo vahalinge onkhali avankhi. Otyo otyitumino ena okutavela, nae novatekula vae mavekeya.
Omutala Womulavi 1/08/2008 pefo 20 § 17
Oñgeni Matulekesa Onthilo Mefendelo
17 Ombimbiliya ilekesa okuti tuesukisa okukala nonthilo onene tyina tukafenda Siovaa. Eclesiastes 5:1 yati: “Yunga onomphai mbove, apeho tyina wenda kondyuo ya Huku yotyotyili.” Moisesi na Sosuwe vatuminwe okupolako ononkhaku mbavo, etyi ankho vekahi pomphangu ikola. (Êxo. 3:5; Jos. 5:15) Ankho vena okulinga ngotyo, opo valekese okuti vena onthilo na Huku. Ovanakwa ova Isilayeli, ankho vena okuvala otyikalasau otyisupi kohi “opo vahalekese omapenge.” (Êxo. 28:42, 43) Otyo, ankho tyivekuatesako okuhavale omapita, tyina vakaundapa komutala wovilikutila. Aveho mombunga yovanakwa, ankho vena okulandula nawa otyitumino tyokukala nonthilo na Huku.
Ovola Olumono Lwa Huku
(Êxodo 28:15-21) “Ove una okutuma omunongo wokupaka omandoe-ndoe, atunge otyinyanga tyo ponthulo tyokukoyesa. Otyinyanga otyo, tyina okulingwa ngo tyomunakwa, no olu, nomulinya omungole, nomulinya womainya ongi wotyivala tyonkhula, nomulinya omunkhuhu, nomulinya ukahi nawa wapohwa. 16 Nga tyaputikwa matyikala nomavindi ekuana, elifwe potyikanda moulale, nomounthanda. 17 Otyinyanga otyo tyipaka omamanya elienda omitete vikuana. Omamanya omutete wo tete elinga nolumbi, notopasio, nosimelanda. 18 Omutete wa vali ulinga nomamanya o tulukesa, nosafila, no sasipe. 19 Omutete wa tatu ulinga nomamanya o lesem, no angata, no ametisita. 20 Wa kuana una okuulinga nomamanya okilisolitu, no onikisi, no sande. Omamanya oo aeho ena okupakwa poupato wo olu. 21 Omamanya oo, elifwe pomanyina ovana va Isilayeli 12. Omamanya aeho ena okuhonekwa ngetyi tyilingwa otyilimbo, emanya like enyina like liomuhoko, omihoko 12.
A Sentinela 1/08/2012 §§ 1-3
Okuti Ankho Utyii-ale?
Omamanya akolela apakelwe potyinyanga tyo ponthulo tyomunene-nakwa wo Isilayeli apolelwe-pi?
Etyi Ova Isilayeli vatunda mo Isitu avanyingila mehoko, Huku wevetumine okulinga otyinyanga tyo ponthulo. (Êxodo 28:15-21) Otyinyanga otyo, ankho tyina omamanya olumbi, notopasio, nosimelanda, no tulukesa, nosafila, no sasipe, no lesem, no angata, no ametisita, nokilisolitu, no onikisi, no sande. Okuti ova Isilayeli ankho mavetyivili umwe okuvasa omamanya oo akolela?
Kohale ovanthu ankho vesuka unene nomamanya oo akolela, iya ankho veelandesa. Mongeleka ova Isitu vokohale, omamanya oo ankho veepola ko kovilongo hono viiwe okuti o Irã, no Afeganistão alo umwe hamwe no ko Índia. Ko Isitu oko ankho kuheyua omamanya omanyingi elikalaila akolela. Onohamba mbo Isitu, ombo ankho mbutumina onohika mbuheyua omamanya akolela mbuli motyilongo tyavo. Sobe wapopile nawa okuti, ovanthu pononthiki mbae ankho vaheya pohi okutunga onondyuo opo vaovole omalumono. Tyihe-mamanya omakuavo ankho aheyua, tupu Sobe watumbulapo o safila, no topasiu. — Jó 28:1-11, 19.
Omukanda wa Êxodo upopia okuti etyi ova Isilayeli vatunda mo Isitu ‘vapundile ovipuka viakolela viova Isitu.’ (Êxodo 12:35, 36) Ngotyo, tyafuile omamanya akolela apakelwe potyinyanga tyo ponthulo tyomunene-nakwe apolelwe ko Isitu.
(Êxodo 28:38) Omulami ukale momphomo ya Alau, tyina omunthu umwe alinga otyipuka tyapenga kovipuka vikola, vina ova Isilayeli vaava vikale ovipuka vikola, Alau ngae utetulula omphela. Omulami oo, apeho una okukala momphomo ya Alau opo ova Isilayeli vetavelwe na Siovaa.
Perspicaz Vol. 3 pefo 529 § 1
Ousukuki
Ovinyama Novikuna. Ovipako viamatetekela okutyitwa, ngongombe, nongi, novinkhombo, Siovaa ankho uvitala okuti viasukuka, iya ankho kavipondola okuyovolwa. Ankho vina okulingwa ovilikutila, iya onthele imwe ankho ipewa ovanakwa. (Núm.18:17-19) Ovikuna viamatetekela okuteyua kumwe novilikutila ovikuavo noviawa ankho vilingwa pala efendelo liotyotyili ankho viasukuka. (Êxo. 28:38) Ovipuka aviho ankho viasukukiswa pala Siovaa ankho vikola, iya ankho kavipondola okutalwa ngatyina viahasilivila, ine okuviundapesa pala okulinga navio ovipuka ovikuavo. Ongeleka imwe o yotyitumino tyokuava onthele ya tyekwi. Inkha omunthu umwe uholeka onthele imwe yo tiliku ateya opo alinge otyiawa, iya konyima oe ine umwe mombunga yae apolo-ko opo ateleke, opo omunthu oo walinga onkhali mokonda waliatela kotyitumino tya Huku konthele yovipuka vikola. Ovitumino vipopia okuti omunthu oo una okukondola etyi apolako, ayawisako vali, tupu ankho una okuava ongi onthwei o po ilingwe otyilikutila. Okulinga ngotyo ovanthu ankho vakala nonthilo onene novipuka viapakulilwa Siovaa. — Lev. 5:14-16.
Okutanga Ombimbiliya
(Êxodo 27:1-21) “Tunga omutala wovilikutila nomavai omutonthola. Omutala oo una okukala nomavindi ekuana, moulale una ono kovadu ononthano, mounthanda ononthano, motyitai ukale nononthatu. 2 Utungila onombinga ononkhuana pomavindi, onombinga mbuna okulikuata nomutala watyo, omutala watyo usolonga notyitasu. 3 Linga ovityiyo viokupola-ko etwe, olingi onopaa, novilindo, nonombalo, noviyukilo viotupia, ovityuma aviho viomutala wovilikutila vilinga notyitasu. 4 Nthila otyivela tyotyitasu otyityikaisa novikuavo tyikale momutala wovilikutila — atyikala ngowanda wotyitasu — otyipake omayulu ekuana otyitasu pomavindi. 5 Tyipaka mokati komutala wovilikutila, atyehehiki mombuelo yomutala, mahi atyiti vala pokati. 6 Lingila omutala wovilikutila omitengi viomavai omutonthola, ovisolonga notyitasu. 7 Omitengi mavitomo momayulu omutala avikala kononthele opo vetyivile okuutyinda. 8 Linga omutala wovilikutila una ombundi mokati, walingwa nomavai, ulinga ngetyi Ngwe ekulekesa komphunda. 9 “Ekaka liefendelo likale nepata. Lilingila epata malipilukila kokumbili kuekumbi, konthele yatyo oko, otungila-ko otyinyanga tyomulinya ukahi nawa wapohwa, tyina ono kovadu 100 moulale. 10 Malikala nonomphandyi 20 novipundi 20 viotyitasu vina onombundi. Onohako mbonomphandyi mbukale mbopalata, nouvela watyo wokuhonyeka ukale wopalata. 11 Kokulio kuekumbi molingila-ko otyinyanga tyina ono kovadu 100 moulale, nonomphandyi 20, novipundi viambo 20 viotyitasu vina onombundi, nonohako mbatyo mbopalata, nouvela wambo wokuhonyeka wopalata. 12 Koutakelo kuna okukala ovinyanga viatokekwa vituuka ono kovadu 50 mounthanda wepata, nonomphandyi 10 novipundi 10 vina onombundi. 13 Epata mounthanda likale no no kovadu 50, koutundilo. 14 Nthele imwe, kombundi makukala ovinyanga viono kovadu 15, mavikala konomphandyi ononthatu mbakuatela movipundi vitatu vionombundi. 15 Konthele onkhuavo makukala ovinyanga viono kovadu 15, vili konomphandyi ononthatu mbakuatela movipundi vitatu vionombundi. 16 “Kombundi yo mepata kuna okukala otyinyanga tyina ono kovadu 20 moulale, tyatungwa nomulinya omungole, nomulinya womainya ongi wotyivala tyonkhula, nomulinya omunkhuhu, nomulinya ukahi nawa wapohwa, tyina okukala konomphandyi ononkhuana mbaika movipundi vikuana. 17 Onomphandyi ambuho mbeliseta nepata mbuna okukala nouvela wokuhonyeka wopalata, nonohako mbopalata, mahi ovipundi viatyo omu mbukuatela o viotyitasu. 18 Epata lina okukala nono kovadu 100 moulale, nono kovadu 50 mounthanda, nono kovadu ononthano motyitai, ovinyanga viatyo vina okutungwa nomulinya ukahi nawa wapohwa, vina ono kovadu ononthano moulale. Ovipundi mukuatela onomphandyi vikale viotyitasu. 19 Ovityuma aviho novipuka mamuundapa navio mekaka liefendelo, nonomphehe ambuho mbokukwata ekaka, nonomphehe mbo mepata mbuna okukala mbotyitasu. 20 “Una okutuma ova Isilayeli vaete omulela womundyambi watyo muene, upakwe movikandiyelo, vikale apeho tyatema opo viminikile. 21 Mekaka liefendelo kondye yotyinyanga tyili potyikasa Tyoumbangi, Alau novana vae ovo vena okuyakesila Siovaa ovikandiyelo. Vina okutema okuhimbikila kongulohi atee komuhuka. Otyo otyitumino vomuhoko wova Isilayeli vena okulandula okuhimbikila hono okuenda no komutwe.
28 YA SETEMBRO ALO 4 YA OUTUBRO
OLUMONO LUKAHI MONDAKA YA HUKU | ÊXODO 29-30
“Otyiawa Pala Siovaa”
(Êxodo 30:11, 12) Siovaa apopila vali Moisesi okuti: 12 “Apeho tyina wamavalula ovana vova Isilayeli ovehoneka, vena okulingila Siovaa otyilikutila tyeyovo liomuenyo wavo pomuvo wokuhonekwa. Vena okulinga ngotyo opo vahamone ovihuna tyina vamahonekwa.
Perspicaz vol. 3 pefo 396 § 10
Okuvalula
Ko Sinai. Otyikando tyo tete Siovaa apopia opo velihonekese o puetyi ankho veli ko Sinai, mohanyi ya vali yenima lya vali etyi vatunda mo Isitu. Opo vakuateseko Moisesi motyilinga otyo, mu kese eanda muakoyelwe omunthu wike opo akale komutwe wotyilinga otyo, tyokuvalula kese eanda liae. Kavalalulile vala ovakuendye vomanima alamba po 20 opo vakale omafualali, mahi tupu Ovitumino ankho vipopia okuti kese munthu wavalulwa una okufeta elilimu like nomeya (Ondolale 1.10) pala ovilinga vilingwa mekaka liefendelo. (Êxo. 30:11-16; Núm. 1:1-16, 18, 19) Ovanthu vokuavalulilwe vena 603. 550. Ova Levita kavavalulilwe mokonda kamavapewa epingo. Ova Levita ankho kavafete elilimu pala ekaka liefendelo, iya tupu ankho kavapondola okuenda movilinga vioufualali. — Núm. 1:44-47; 2:32, 33; 18:20, 24.
(Êxodo 30:13-15) Ovanthu vahonekwa vena okuava omeya sikulu ngetyi tyata momulemo wosikulu ili momphangu ikola, tyituuka onosela 20. Omeya sikulu otyiawa matyipewa Siovaa. 14 Aveho mavahonekwa okuhimbikila momanima 20 okueenda no komutwe, mavaavela Siovaa otyiawa otyo. 15 Omumoni ahaave tyilamba po meya sikulu, omuhepi ahaave tyihehi tyahavasi-po, oviawa mulingila Siovaa viokuyovola omienyo vienyi.
Perspicaz vol. 1 pág. 551 § 3
Oviawa
Oviawa vimwe ankho viapopiwa umwe Movitumino. Puetyi Moisesi avalula ova Isilayeli, kese mukuendye una omanima 20 ine alamba-po ankho una okufeta elilimu mokonda muakutikinya omuenyo wae, “omeya sikulu [mokutala ondolale 1.10] ngetyi tyata momulemo wosikulu ili momphangu ikola.” Ankho “otyiawa pala Siovaa” opo ayovole omienyo viavo “opo mbukuateseko ovilinga vilingwa mekaka liefendelo.” (Êxo. 30:11-16) Ngetyi tyapopia omuhipululi omu Sundeu utiwa Josefu (Ovilwa Viova Sundeu , VII, 218 [vi, 6]), okutuka opo ‘elilimu olio likola’ ankho lifetwa like menima . — 2 Crô. 24:6-10; Mat. 17:24; Tala IMPOSTO.
(Êxodo 30:16) Ove tambula onombongo mbopalata kova Isilayeli mbotyiawa tyokupata ononkhali, ombeeta mbukuateseko ovilinga viomekaka liefendelo opo otyo tyihinangelese Siovaa kova Isilayeli, amuyovola omienyo vienyi.”
A Sentinela 1/11/2011 pefo 12 §§ 1-2
Okuti Ankho Utyii-ale?
Opi ankho patunda onombongo mbukuatesako okulinga ovilinga viondyuo ya Siovaa ko Selusalei?
Ovilinga ovinyingi ankho vilingwa mondyuo ya Huku, onombongo mbatyo ankho mbupolwa momalilimu, haunene ana apopiwa movitumino. Mahi ankho kuna vali omalilimu omakuavo. Mongeleka, etyi ekaka liefendelo liatungwa, Siovaa wapopilile Moisesi opo akongolole osikulu ike nomeya yopalata kova Isilayeli “ngotyawa pala Siovaa.” — Êxodo 30:12-16.
Tyafuile, kese mu Sundeu ankho wetyiliya okuava ombongo oyo mondyuo ya Huku kese nima. Olio, olio elilimu Sesusi atumine Petulu afete nombongo yatundile momulungu wombisi. — Mateusi 17:24-27.
Ovola Olumono Lwa Huku
(Êxodo 29:10) “Konyima oeta onthane pekaka liefendelo, iya Alau novana vae avapake omavoko komutwe wayo.
Perspicaz Vol. 2 Pefo 762 § 9
Okuvoko
Okuyambeka omavoko. Tyihe-vipuka vala tulinga nomavoko, tupu ankho omavoko ayambeka omunthu ine ovipuka opo vilinge ovipuka vielikalaila. Otyipuka otyo haunene ankho tyilekesa okuti, omunthu wanakwa ine wapewa otyilinga, ine pahe otyipuka tyimwe tyiiwe. Puetyi Alau novana vae vevali vaholovonwa opo vakale ovanakwa, nae novana vae vevali vayambekele omavoko kongombe, no konongi onombali mambulingwa otyilikutila opo valekese okuti, ovinyama vina ankho vikahi nokulingwa otyilikutila pala-vo, na vakale ovanakwa va Siovaa Huku. (Êxo. 29:10, 15, 19; Lev. 8:14, 18, 22) Puetyi Huku apopila Moisesi opo anake Sosuwe na akale pomphangu yae, Moisesi wayambekele omavoko ae Sosuwe iya ngwe akala ‘nenoñgonoko enyingi,’ mokonda yotyo etyivili okuhongolela nawa ova Isilayeli. (Deu. 34:9) Omunthu ankho uyambekwa vala omavoko tyina amaholovonwa opo apewe otyipuka tyimwe otyiwa. (Gên. 48:14; Malu. 10:16) Sesusi Kilisitu, nae wayambekele omavoko ae kovanthu ahakuklile. (Mat. 8:3; Malu. 6:5; Luka 13:13) Vamwe etyi vati pokupewa ononkhono mba Huku, vayambekelwe omavoko nono apositolu. — Ovil. 8:14-20; 19:6.
(Êxodo 30:31-33) “Ove popila ova Isilayeli okuti: ‘Omulela oo omulela wange ukola wokulembula ovanthu aveho mavatuku mu ove. 32 Omulela oo kaupondola okuwavekwa molutu luomunthu nawike. Omulela wokualingwa novipuka ovio kamupondola okulinga nao otyipuka natyike. Oo maukala omulela ukola. Una okukala otyipuka tyikola ku onwe. 33 Una wamalingi omulela ngoo euwaveka komunthu ahatuminwe, aipawe.’”
Perspicaz Vol. 3 pefo 753 § 8
Omulembulwa, Okulembula
Movitumino Siovaa aavelele Moisesi, wapopile umwe nawa oñgeni ankho ena okulinga omulela wokulembula. Ankho una okulingwa novipuka ovinyingi viakoyua nawa: O mirra, no kanela, no kalamu, no kasia, no asete. (Êxo. 30:22-25) Omunthu uvasiwa ulinga omulela oo pala otyilinga otyikuavo ahatuminwe, ankho una okuipawa. (Êxo. 30:31-33) Tyina omunthu amatilwa omulela ukola, otyo ankho tyilekesa okuti otyilinga apewa, tyina esilivilo enene, iya ankho tyikola.
Okutanga Ombimbiliya
(Êxodo 29:31-46) “Ipaa ongi yokulembula, oitelekela pomphangu imwe ikola. 32 Alau novana vae mavalila kombundi yekaka liefendelo ohitu yongi, nombolo yo mosesu. 33 Vena okulia ovipuka viaetwa viotyilikutila tyokuevelwa ononkhali putyina valembulwa opo vakale ovanakwa avasukukiswa. Omunthu wahatuminwe kapondola okulia-ko, mokonda ovipuka ovio vikola. 34 Inkha pahupa ohitu, povilikutila viokulembula no ponombolo, onthiki mailandulako vipaka otupia, kavipondola okuliwa mokonda ovio ovipuka vikola. 35 “Alau novana vae velinga atyiho nekutuma. Mokala ononthiki epandu-vali nokuvelinga ovanakwa. 36 Ononthiki ambuho moeta onthane oilingi otyilikutila tyokuevelwa ononkhali, osukukisa omutala wovilikutila kononkhali; lembula omutala wovilikutila ausukuka. 37 Mokala ononthiki epandu-vali nokusukukisa omutala wovilikutila mononkhali; usukukisa aukala omutala wovilikutila wasukuka unene. Komutala wovilikutila kukuate vala omunthu wasukuka. 38 “Evi una okuaava nthiki na nthiki ovievi: Onongi onombali mbuna enima like apeho-apeho. 39 Ondyona imwe yaava komuhuka, ondyona onkhuavo oyaave tyina ekumbi liamanyingila kokangulohi. 40 Ondyona yo tete yaava nomapati evali ohinde yanyetuka, oihonyeka nolitulu ike yomulela womundyambi watyo muene, olingi otyaawa tyokunwa, olitulu ike yovinyu. 41 Ondyona ya vali oiipaa tyina ekumbi liamanyingila kokangulohi, olingi notyaawa tyovilia notyaawa tyokunwa ngetyi walinga komuhuka. Molingi otyaawa tyomuniko omuwa otyaawa tya Siovaa tyokuyokwa. 42 Otyo matyikala otyaawa tyokuyokwa tyilingilwa Siovaa nthiki na nthiki novanthu vomivo viatyo aviho, tyilingilwa pombundi yekaka liefendelo, apa ame mandyililekesila ku onwe tyina ndyipopia no ove. 43 “Pombundi opo, opo mandyikelilekesila kova Isilayeli, omphangu oyo aisukukiswa nomunkhima wange. 44 Mandyisukukisa ekaka liefendelo, nomutala wovilikutila, andyisukukisa Alau novana vae, vakale ovanakwa vange. 45 Ame mandyikala nova Isilayeli, andyilingi Huku yavo. 46 Muene mavanoñgonoka nawa-nawa okuti, ame, ame Siovaa Huku yavo nevepola kotyilongo tyo Isitu ndyikahi pokati kavo. Ame, ame Siovaa Huku yavo.