Omapulo Alingwa Novatangi

Mokonda Jeova ankho wailika okufenda ovilolo, omokonda yatyi ahahitisile Arau moluetyi alinga onthane yo olu?

Etyi Arau alinga onthane yo olu, ngetyi tyahonekwa mu Êxodo kapitulu 32, oe wataulukile otyitumino tya Huku konthele yokufenda ovilolo. (Êxodo 20:3-5) Mokonda yotyo, “Jeova anumana unene na [Arau] alo ahandele okumuipaa, mahi momuvo oo, [Moisesi] alingi tupu elikuambelo okuitilako Arau.” (Deuteronômio 9:19, 20) Okuti elikuambelo liomulume omuviuki Moisesi liakalele “nononkhono ononene” konthele ya Arau? (Tiago 5:16) Yoo. Mokonda yelikuambelo liatyo olio, nomahunga evali, mokutala Jeova wakumbululile elikuambelo lia Moisesi, iya ahahitisa Arau.

Ehunga limwe, omokonda Arau ankho omukuatyili. Etyi Moisesi atumwa opo amoneke kolupala lwa Farao nokueta ova Isilayeli ko Egitu, Jeova waholovonene Arau ahindikile Moisesi opo ekemupopileko. (Êxodo 4:10-16) Ovalume ovo vevali, vetavelele okumoneka kolupala luohamba yoko Egitu ovikando ovinyingi, avaneñgenesa omutima watena wa Farao. Ngotyo, puetyi ankho nkhele Arau ekahi mo Egitu, wakalele nekolelo liapama movilinga via Jeova.—Êxodo 4:21.

Tupu, tala etyi tyahindilile Arau okulinga onthane yo olu. Moisesi ankho ukahi Komphunda yo Sinai ononthiki 40. Etyi “ovanthu vatala okuti Moisesi ankho ukahi nokuseta okutunda komphunda,” ovo vahongiliya Arau opo evelingileko otyihuku. Arau etavela iya alingi onthane yo olu. (Êxodo 32:1-6) Mahi, etyi Arau alinga konyima tyalekesile okuti tyotyili oe kapandele efendelo liotyilolo otyo. Okutala oe wetavelele vala mokonda wakuluminyua. Mongeleka, etyi Moisesi apopia konthele yotyitateka tyokufenda ovilolo, ovana aveho va Levi, okukutikinyamo Arau—vakalele konthele ya Jeova. Mahi, ovanthu 3.000 ankho vekahi komutwe yotyituwa otyo tyokufenda ovilolo vaipawa.—Êxodo 32:25-29.

Konyima, Moisesi atolela ovanthu okuti: “Onwe mualinga onkhali onene.” (Êxodo 32:30) Mahi, Arau haeko vala ankho una onkhali mokonda yokulinga otyivi. Tyilinge Arau novanthu aveho vapolele esilivilo kokankhenda okanene ka Jeova.

Konyima yotyitateka otyo tyonthane yo olu, Jeova watuma Arau avialekwe opo akale omunene-nakwa. Huku watolela Moisesi okuti: “Una okuvaleka Arau ovikutu vikola, iya omulembula nokumusukukisa, ngotyo oe una okuundapa pala ame ngomunakwa.” (Êxodo 40:12, 13) Tyotyili, Jeova ankho waevela Arau mokonda yonkhali yae. Momutima, Arau ankho waamena nekolelo efendelo liotyotyili, ankho kafende ovilolo.