OUYE UNO KAUKAHI NAWA

4 | Soka Koviwa Matukamona

OITYI TYESUKISILA?

Ovitateka viouye uno vipondola okusoyesa ovanthu. Iya ovanyingi vasoka umwe okuti ovitateka mokutala kamavipu-ale. Oityi valinga?

Vamwe kavetavela okuti komutwe wandyila ovipuka mavikaviuka.
Vamwe veliyumba vala mokunwa unene mokonda vasoka okuti otyo matyivekuatesako okulimbwa ovitateka viavo.
Ovakuavo vasoka okuti okunkhia hahe vali tyipona okukala nomuenyo. Velipula okuti: “Oityi tuahankhila vala?”

Etyi Wesukisa Okunoñgonoka

Ovitateka vimwe ove unavio pamwe vikala vala omuvo wehehi iya vipondola okupiluluka monkhalelo ankho wahakevelela.
Namphila ovitateka viove nkhele vitualako, pena ovipuka ove upondola okulinga vikukuatesako okulambela movitateka ovio.
Ombimbiliya ipopia okuti komutwe wandyila, ovipuka ovivi mavikanyimuako.

Oityi Upondola Okulinga?

Ombimbiliya yati: “Muhakalei notyiho nonthiki yamuhuka, mokonda onthiki yamuhuka maikala notyiho tyayo. Tyiti umwe onthiki ei ina ovitateka viayo, ei ina viayo.” — Mateusi 6:34.

Wahakale notyiho nonthiki yamuhuka. Otyitateka unatyo hono, otyo usoke, wahasoke kotyitateka mokala natyo muhuka.

Okusoka kovitateka nkhele viehenemoneke-ale tyipondola vala okukusoyesa oyekepo okusoka kovipuka oviwa matukapewa komutwe wandyila.

ETYI UNA OKULINGA—Ovipuka Vimwe Vikuatesako

SOKA KOVIPUKA VIKAHI NAWA

Ombimbiliya yati: “Omunthu wokueihamenwa, kwe ononthiki ambuho onombi vala, mahi wokuna ehambu, apeho una otyipito.” (Provérbios 15:15) Ine ukalela vala okusoka kovitateka unavio, upondola okupumbwa ononkhalelo mbokuvitetulula. Mahi okusoka kovipuka oviwa, matyikukuatesako otyivili okuvitetulula.

Wahatehelele unene ovipuka vipopiwa molaliu nomo televisau.
Ononthiki ambuho, soka kovipuka vivali aa vitatu ove upondola okupandula.
Honeka ovipuka uhanda okulinga mokueenda kuonthiki. Opo umone ouwa utundililako, tala otyipi matyisukisa omuvo omunyingi.

TYINA UKUATESWAKO TAVELA

Ombimbiliya yati: “Una wahahande okukala pu vakuavo . . . ketavela ovipuka aviho oviwa.” (Provérbios 18:1) Ankho utokela metoto, awike kutyivili okulipola-mo, mahi motundu-mo vala ine ukuateswako na vakuenyi.

Ita ku vamwe mombunga yove aa omapanga ove vekukuateseko.
Tupu, soka oñgeni ove upondola okuvekuatesako. Okulingilako vakuenyi ovipuka oviwa, matyikukuatesako okutala ovitateka viove monkhalelo yapola pokati.
Ine usoka okuti omuenyo wove utupu-ale oku wapilukila iya atee pamwe uhanda okuliipaa, otyiwa wende kosipitali. Pamwe tyitusokesa ngotyo, okualinga komutwe. Vamwe tyihole okuvekuatesako, okuenda kosipitali vakahakulwe.a

a Omukanda ou, o Pahukei! kaupopi ovihemba patyi omunthu ena okuhakulwa navio.

Ombimbiliya Ipopia Okuti Komutwe Wandyila Matukamona Oviwa

Omuhoneki wo salmu welikuambelele ku Huku okuti: “Ondaka yove otyimimi tyonomphai mbange.” (Salmo 119:105) Tala oñgeni Ombimbiliya ikahi ngotyimimi.

Tyina kuanthikovela, otyimimi tyitukuatesako okutala oku tuendana-ko. Tupu Nombimbiliya ina ounongo utukuatesako tyina tuhanda okulinga otyipuka tyimwe.

Otyimimi tyitukuatesako okumona oku tuenda nako. Nombimbiliya itukuatesako okutala etyi matyikamoneka komutwe wandyila.

Ombimbiliya omukanda umwe ukola, kautupopila vala apa patuka ovanthu mahi tupu utupopila etyi matyikamoneka komutwe wandyila. Otyo tyitukuatesako okukumbulula omapulo aa:

Oñgeni?

Oñgeni ononkhumbi mbahimbika: Ombimbiliya yati: “Mokonda yomunthu wike vala, onkhali yanyingila mouye iya onkhali yaeta ononkhia, ngotyo ononkhia ambuliyandyana movanthu aveho, mokonda aveho valinga onkhali.” — Ova Loma 5:12.

Omokonda yatyi?

Omokonda yatyi ovanthu vehetyivilila okumanako ovitateka: Ombimbiliya yati: “Ovanthu kavetyivili okuhongolela onomphai mbavo.” (Jeremias 10:23) Tyina tutala umwe nawa oñgeni ouye ukahi, tutyimona okuti etyi ombimbiliya yapopia otyili.

Oityi?

Oityi Huku makalinga opo amaneko ovitateka evi: Ombimbiliya yati: “Makasekuna ononkhuka momaiho avo, ononkhia kamambukakala-ko vali, nii okuliyava, nii okulila nii omaluihamo kavikakala-ko vali.” — Eholololo 21:4.