ELONGESO 19
Hikiya Ondongeso Komutima
Omihe 3:1
ETYI UNA OKULINGA: Kwatesako ovateheleli okuhambukilwa etyi vanoñgonoka, avalingi etyi valongeswa.
OÑGENI MOTYILINGI:
Kwatesako ovateheleli velitale. Linga omapulo mwene omunthu elisoke etyi ekahi.
Velunda vahambukilwe etyi vevila-ko. Vekwatesako vasoke omokonda yatyi vesukisila okulinga etyi tyaviuka. Vekwatesako opo tyitie tyina valinga etyi tyaviuka, tyili komutima wawo otyetyi — okuhole Siovaa, okuhole ovanthu, nokuhole Ombimbiliya. Tyina uti pahe pokumana, ovanthu vahakunde mokonda yetyii wapopia, mahi vamone ononkhono mbokulinga etyi tyaviuka.
Ovanthu vasoke ku Siovaa. Popia oñgeni etyi Ombimbiliya ilongesa, nonondunge mbayo, novitumino viayo, vilekesa etyi Siovaa ekahi, notyipuka etuhole. Kwatesako ovateheleli apeho vasoke ku Siovaa, avalingi etyi tyimuhambukiswa.