Tualako Okusokolola Kovipuka Via Huku

1, 2. Otyipuka patyi ovanthu vena tyelikalela novinyama?

OWONGO womunthu welikalela. Mongeleka, ovanthu vena ounongo wokulilongesa elaka. Iya elaka litukuatesako okutanga, nokuhoneka, nokupopia, nokunoñgonoka etyi tutehelela. Tupu lituavela ounongo wokulikuambela nokuhivilika Jeova noviimbo. Ovipuka ovio aviho vitukalesa tyelikalela novinyama. Ovanongo kavanoñgonoka nawa oñgeni owongo wetu utyivila okulinga ovipuka ovio.

² Ounongo wetu wokuundapesa elaka, otyiawa tuapewa na Jeova. (Salmo 139:14; Revelação 4:11) Jeova tupu wetuavela otyiawa otyikuavo tyitupunga kovinyama. Ovanthu vatungwa “otyifuika tya Huku.” Tuna epondolo liokuholovona etyi tuhanda okulinga. Tupondola okuholovona okuundapesa elaka pala okuumbila nokuhivilika Jeova.—Gênesis 1:27.

3. Oityi Jeova etuavela tyitukalesa ovanongo?

³ Jeova utulekesa oñgeni tuna okumuumbila nokumuhivilika mokuetuavela Ombimbiliya. Ombimbiliya aiho ine onthele imwe yahonekwale momalaka alamba po 2.800. Tyina tusokolola kuetyi Ombimbiliya ipopia, tuhimbika okusoka ngetyi Huku asoka. (Salmo 40:5; 92:5; 139:17) Iya omalusoke a Jeova maetukalesa ovanongo aetutuala komuenyo wahapu.—Tanga 2 Timóteo 3:14-17.

4. Okusokolola tyilekesa tyi, iya omapulo patyi matulilongesa?

⁴ Okusokolola tyilekesa okusoka unene kotyipuka tyimwe. (Salmo 77:12; Provérbios 24:1, 2) Tupolako ouwa omunene tyina tusokolola kuetyi tulilongesila ku Jeova na Jesus. (João 17:3) Monthele ei matukumbulula omapulo aa: Oñgeni tupondola okutanga monkhalelo imwe itukuatesako okusokolola? Okutyi tupondola okusokolola? Oityi tyipondola okutukuatesako okusokolola apeho nokutyihambukilwa?

KALA NONTHUMBI YOKUTI UKAHI NOKUPOLA OUWA KELILONGESO LIOVE

5, 6. Oityi tyipondola okukukuatesako okuhinangela nokunoñgonoka etyi ukahi nokutanga?

⁵ Okuti waimbukale ovipuka wesukisa okulinga mahi otyo wahasoko kuvio, ngokufima, nokuenda ine okutaha omusikaleta? Mahi, upondola okuovola omuvo wokutanga, ohasoko kuetyi ukahi nokutanga. Hamwe uhimbika okusoka otyipuka otyikuavo namphila ukahi nokutanga. Oityi upondola okulinga opo ulityilike okulinga ngotyo? Tyakolela ulipulukwe vala netyi ukahi nokutanga nokusoka kuetyi tyihangununa. Ngotyo, tyina wamehiki konthyulilo yo palagrafu ine tyina wamamane okasapi momukanda, talamapo katutu iya osokolola kuetyi ukahi nokutanga. Soka kuetyi welilongesa nokukala nonthumbi yokuti ukahi nokutyinoñgonoka.

⁶ Ovanongo vaimbuka okuti tyapepuka okuhinangela otyipuka tyina utangela peulu. Omutungi wetu utyii, otyo apopilile Josue atange omukanda Wovitumino “nondaka yavova,” tyihangununa okutangela momutima. (Tanga Josué 1:8.) Okutangela Ombimbiliya peulu matyikukuatesako okuhatalukwa novipuka ovikuavo nokuhinangela etyi ukahi nokutanga.

7. Omuvo patyi waviuka wokusokolola Kombimbiliya? (Tala olutalatu pefo pahimbikila onthele.)

⁷ Tyesukisa okulinga ononkhono opo usokolole nokutala vala kuetyi ukahi nokutanga. Ngotyo, hatyiwa okusokolola putyina waponua natyina uli pomphangu paviela pena ovipuka ovinyingi vipondola okututalula. David omuhoneki wono salmu ankho tyina amapahukapo kounthiki usokolola. (Salmo 63:6) Namphila ankho Jesus hamukuankhali, mahi ankho uholovona omphangu yahaviele opo asokolole nokulikuambela.—Lucas 6:12.

OVIPUKA OVIWA VIOKUSOKOLOLA

8. (a) Okutyi tupondola okusokolola? (b) Oñgeni Jeova elitehelela tyina tupopila vakuetu konthele yae?

⁸ Onthue katusokolola vala kovipuka tutanga Mombimbiliya, mahi kuna ovipuka ovikuavo tupondola okusokolola. Mongeleka, tyina utala ovipuka vihuvisa Jeova atunga, talama olipulu okuti, ‘Otyipuka etyi tyindongesa tyi konthele ya Jeova?’ Okusoka ngotyo matyikulundu okupandula Jeova melikuambelo. Inkha ukahi navakuenyi, movepopila etyi ukahi nokusoka. (Salmos 104:24; Atos 14:17) Jeova utehelela nawa iya uhambukwa tyina tusokolola, nokulikuambela, nokupopila vakuetu konthele yae. Ombimbiliya itupopila okuti: “Omukanda wehinangeleso wahonekwa kolupala lwae, pala vana vokuna onthilo na Jeova na vana vasoka kenyina liae.”—Malaquias 3:16.

9. (a) Oityi Timoteo apopilwa na Paulu opo asokolole? (b) Oityi tupondola okusokolola tyina tulipongiya opo tuende movilinga viokuivisa?

⁹ Apostolu Paulu wapopila Timoteo opo asokolole oñgeni ovipuka apopia, novituwa viae, netyi alongesa vikalesa vakuavo. (Tanga 1 Timóteo 4:12-16.) Tupu nove upondola okusokolola kovipuka ovio. Mongeleka, wesukisa okuovola omuvo wokusoka kuetyi mokalongesa omulongwa Wombimbiliya. Soka komulongwa iya ovola omapulo no nongeleka mambumukuatesako okukula motyili. Tyina ulipongiya opo ukalongese ovalongwa vove Vombimbiliya monkhalelo ngoyo, ekolelo liove lipama iya mokala omulongesi ukahi nawa Wombimbiliya. Tupu mopoloko ouwa pokusokolola tyina weheneende movilinga viokuivisa. (Tanga Esdras 7:10.) Hamwe upondola okutanga okapitulu kamwe komukanda wa Atos opo kekukuateseko okukala nombili movilinga viokuivisa. Tupu upondola okusokolola kono versikulu mokatanga, nomikanda mokaava. (2 Timóteo 1:6) Soka kovanthu vomo telitoliu netyi upondola okupopia mavesuku natyo. Tyina ulipongiya ngotyo, motyivili okuundapesa nawa Ombimbiliya tyina waava oumbangi kuvakuenyi.—1 Coríntios 2:4.

10. Ovipi ovipuka ovikuavo oviwa tupondola okusokolola?

¹⁰ Oityi vali tupondola okusokolola? Inkha wahoneka ovipuka vimwe mokueenda kuomalongomona ewaneno no movionge, ovola omuvo wokulilongesa etyi wahoneka. Tyina ulinga ngotyo lipula okuti, ‘Oityi nelilongesila Kondaka ya Huku no keongano liae?’ Tupu upondola okusokolola konondonga mba kese hanyi mbo Mutala Womulavi no Despertai! Ine omikanda tuatambula motyonge tyokualamba. Tyina wamatange ongeleka mo Anuário, talamapo katutu, osoko kuyo, oyeke ihike komutima wove. Tyina utanga omikanda vietu, upondola okunthinda onondaka mbumwe ine okuhoneka komuoyo wefo. Otyo matyikukuatesako tyina ukatalelapo omunthu ine ukanthita ine okulinga elongomona. Tyakolela vali, tyina usokolola kuetyi watanga, uyeka tyihike komutima wove nokupandula Jeova mokonda yovipuka oviwa ukahi nokulilongesa.

SOKOLOLA KONDAKA YA HUKU ONONTHIKI AMBUHO

11. Oupi omukanda wakolela vali tuna okusokolola, iya oñgeni matyitukuatesako? (Tala pokatoi.)

¹¹ Tyotyili, Ombimbiliya omukanda wakolela vali tuna okusokolola. Mahi inkha nthiki imwe tuilikwa okukala Nombimbiliya?a (Tala onondaka pokatoi.) Petupu omunthu upondola okukutyilika okusokolola kovipuka wapaka momutwe, ngo testu ine oviimbo Viouhamba. (Atos 16:25) Ospilitu ya Huku maikukuatesako okuhinangela ovipuka welilongesa, iya ovipuka ovio mavikukuatesako okutualako nekolelo.—João 14:26.

12. Oipi onkhalelo imwe upondola okulinga opo utange ononthiki ambuho Ombimbiliya?

¹² Oipi onkhalelo imwe upondola okulinga opo utange ononthiki ambuho Ombimbiliya? Hamwe ononthiki mbumwe mbo simanu utanga nokusokolola kovi kapitulu viosimanu viaholovonwa Mosikola Yovilinga via Huku. Ononthiki ononkhuavo upondola okutanga o Evandyeliu ya Mateus, no ya Marcos, no ya Lucas, no ya João nokusokolola kuetyi Jesus apopia netyi alinga. (Romanos 10:17; Hebreus 12:2; 1 Pedro 2:21) Tupu tuna omikanda vipopia ovipuka Jesus alinga monkhalelo vielilandulila. Omikanda ovio vipondola okukukuatesako opo upole ouwa kuetyi utanga mono Evandyeliu.—João 14:6.

OMOKONDA YATYI OKUSOKOLOLA TYAKOLELA?

13, 14. Omokonda yatyi tyakolela kuonthue okutualako okusokolola ku Jeova no ku Jesus, iya oityi matyitulundu okulinga ngotyo?

¹³ Okusokolola ku Jeova noku Jesus tyikuatesako omunthu okukala Omukristau wapama motyili nokutualako nekolelo liapama. (Hebreus 5:14; 6:1) Omunthu wahasoko ku Huku katutu-katutu oupanga wae na Jeova utenda alo umwe upondola okutyitukilapo Huku. (Hebreus 2:1; 3:12) Jesus walondola okuti inkha katutehelela ine katutavela Ondaka ya Huku “nomutima omuwa nokuaviuka,” kamaikala momutima wetu. Mahi, tupondola liwa-liwa okukala “nomasukalalo notyiho tyomalumono, nomahando omuenyo.”—Lucas 8:14, 15.

¹⁴ Tyina tutualako okusokolola Kombimbiliya tunoñgonoka nawa Jeova. Otyo matyitulundu okuhetekela nawa ovituwa viae. (2 Coríntios 3:18) Onthue tupondola okutualako okulilongesa vali konthele ya Tate yetu keulu nokumuhetekela apeho. Olio elao limwe enene!—Eclesiastes 3:11.

15, 16. (a) Oñgeni upolako ouwa tyina usokolola ku Jeova no ku Jesus? (b) Omokonda yatyi pamwe tyipuiya okusokolola, mahi omokonda yatyi tuna yokutyilinga?

¹⁵ Okusokolola ku Jeova no ku Jesus matyikukuatesako okukala nombili notyili. Ombili yove maipameka ovakuatate vove novanthu uvasa movilinga viokuivisa. Tupu tyina usokolola kuetyi Jeova ekulingila puetyi aava otyilikutila tyeyovo tya Jesus, motualako okupanda oupanga wove na Huku. (Romanos 3:24; Tiago 4:8) Mark, omukuatate umwe woko África do Sul wakala mokaleya omanima etatu mokonda yekolelo liae, wati: “Okusokolola tyipondola okuelekwa nokulinga ovipuka vimwe oviwa. Putyina usokolola kovipuka via Huku, tupu monoñgonoka ovipuka konthele ya Huku yetu, Jeova. Ovikando vimwe tyina ndyilitehelela okuti nasoya ine nasukalala novipuka vimwe, ndyitanga Ombimbiliya nokusokolola Kovihonekwa. Ndyilitehela okuti ikahi nokumphameka.”

¹⁶ Mokonda mouye uno mueyula ovipuka vitalula, tyipondola okupuiya okuvasa omuvo wokusokolola Kombimbiliya. Patrick, omukuatate umwe woko África, wati: “Omutwe wange ukahi ngotyikasa muna omikanda ominyingi, tyilinge evi vikahi nawa nevi vihekahi nawa, viesukisa okupungululwa ononthiki ambuho. Apeho tyina ndyiovola momutwe wange ndyivasamo ‘omalusoke ahaviukile’ iya andyilikuambela ku Jeova konthele oyo, konyima andyisokolola kovipuka vikahi nawa. Namphila pamwe ndyityilinga mokamuvo kehehi iya konyima ame andyisoko kovipuka via Huku, ndyilitehelela okuti na fuena ku Jeova. Otyo tyinkhuatesako okunoñgonoka nawa otyili.” (Salmo 94:19, okatoi) Tyotyili, tyitukuatesako mononkhalelo ononyingi tyina tutanga nokusokolola Kombimbiliya ononthiki ambuho.—Atos 17:11.

OÑGENI UPONDOLA OKUVASA OMUVO?

17. Oñgeni movasi omuvo wokusokolola?

¹⁷ Vamwe vapindukapo komuhuka avatange, nokusokolola, nokulikuambela. Ovakuavo valinga ngotyo komutenya poola yokulia. Hamwe ove una vali omuvo wokutanga Ombimbiliya kounthiki tyina wehenelangalepo. Vamwe vetyihole tyokutanga Ombimbiliya komuhuka avatange vali tyina vehenelangalepo. (Josué 1:8) Otyipuka tyakolela vali “okuundapesa nawa omuvo wove,” ohatalukwa novipuka viehesukisile, ngotyo motyivili okusokolola Kondaka ya Huku ononthiki ambuho.—Efésios 5:15, 16.

18. Oityi Ombimbiliya ilaa kuvana vasokolola Kondaka ya Huku ononthiki ambuho, na vana vaendela muetyi velilongesa?

¹⁸ Ombimbiliya yalaa okuti Jeova mayambe aveho vasokolola Kondaka yae nokulinga ononkhono mbokuendela muetyi velilongesa. (Tanga Salmo 1:1-3.) Jesus wati: “Vena ehambu ovovana vatehelela ondaka ya Huku nokuendelamo!” (Lucas 11:28) Mahi tyakolela vali, okusokolola kondaka ya Jeova ononthiki ambuho, matyitukuatesako okulinga ovipuka vimuhivilika. Tyina tuamalingi ngotyo, Jeova metuyambe atukala nehambu pehepano iya atukamona omuenyo wahapu mouye omupe.”—Tiago 1:25; Revelação 1:3.