Etyi Una Okulinga Umbatisalwe

1-2. Omokonda yatyi wehesukisila okusoya ine ulitehela nkhele kwatele-mo mokumbatisalwa? (Tala olutalatu lwo kondye.)

INE wesuka umwe nokumbatisalwa, otyo wasoka tyikahi nawa. Mahi okuti tyina ulitehela ñgana, wata-mo umwe mokumbatisalwa? Ine ove tyina ulitehela ñgaa wata-mo umwe mokumbatisalwa, novakulu vewaneno vetavela, naina wehelikondaule vali, tyina wamona omphitilo yatyo, mbatisalwa umwe. Yumba-ko onthumbi, movilinga vya Siovaa movasi-mo oviwa ovinyingi.

² Mahi pahe, ine utolelwa utiwa, nkhele wakamba una ovipuka vimwe una okuyeka-po na uhike kokumbatisalwa, hamwe tupu mwene noove otyo ulitehela ngootyo, wahasoye. Noove upondola umwe okukula ohiki kokulinga otyipuka otyo tyesukisa unene, tyilinge nkhele umona tyilinge wakulupa-le.

“OITYI TYINTHYILIKA?”

3. Oityi omu Etiopia apulile Filipe, ya otyo tyeeta epulo patyi? (Ovilinga 8:36, 38)

³ Tanga Ovilinga 8:36, 38. Omulume umwe ankho uundapela onkhai-hamba yo ko Etiopia, wapulile Filipe ati: “Oityi tyinthyilika okumbatisalwa?” Omulume oo wo ko Etiopia ankho wahanda umwe okumbatisalwa, mahi pahe okuti ankho wata-mo umwe mokulinga otyipuka ngootyo tyesukisa unene?

4. Oityi omu Etiopia alingile tyalekesa umwe nawa okuti ankho wahanda okunoñgonoka vali ovipuka ovikwavo?

⁴ Omulume oo omu Etiopia, ‘waile ko Selusalei wakafendele.’ (Ovil. 8:27) Mokutala ankho pahe wetavela umwe etyi tyilongesa ova Sundeu, ankho welipaka umwe melongeso liova Sundeu. Tyemukwatesileko anoñgonoka Siovaa, Ovihonekwa vikola vyo Hembeleu. Mahi no ngootyo, omulume oo ankho nkhele wahanda okunoñgonoka vali ovipuka ovikwavo. Etyi Filipe avasa omulume oo mondyila, ankho wemuvasa uli nokulinga-tyi? Wemuvasa uli nokutanga ombwingwa yahonekwa nomuuli Isaiya. (Ovil. 8:28) Mombwingwa oyo ankho muna otyili tyaya kohi ty’Ombimbiliya. Omu Etiopia oo katile vala etyi nanoñgonoka-le ovipuka viapepuka vy’Ombimbiliya tyatuuka, mahi ankho wahanda okutwalako okunoñgonoka vali ovipuka ovikwavo.

5. Etyi omu Etiopia anoñgonoka etyi ena okulinga, alingi ñgeni?

⁵ Omulume oo wali omuundapi omunene watyo wonkhai-hamba Kandase yo mo Etiopia, ankho oe “uyunga omalumono onkhai-hamba.” (Ovil. 8:27) Tyimoneka umwe nawa okuti omulume oo ankho una ovilinga ovinyingi. Mahi no ngootyo aovola umwe omuvo akafende Siovaa. Ankho katile vala etyi nanoñgonoka-le otyili tyatuuka, mahi ngwe ankho ulinga umwe etyi anoñgonoka. Otyo atyimupe umwe okweenda otyikambo tyimwe otyile okutunda ko Etiopia okwenda mondywo ya Huku mo Selusalei akafende Siovaa. Otyipuka otyo ankho katyapepukile, tyipondola welipolele umwe viae. Mahi omulume oo ankho kesukile-ale neetyi mamanena-po, etyi ankho esuka natyo okufenda vala Siovaa.

6-7. Oityi tyakwatesileko omu Etiopia okuhole kwae Siovaa akutwalako okuliyawisa?

⁶ Filipe walongesile omu Etiopia ovipuka vimwe ovinene ankho ehei, tyimwe emulongesile, otyili tyokuti Sesusi oe o Mesiya. (Ovil. 8:34, 35) Omu Etiopia oo ahambukwa unene etyi anoñgonoka etyi Sesusi emulingila. Oityi alingile etyi anoñgonoka otyipuka otyo? Omulume oo ankho wiiwe-ale okuti o welongeso liova Sundeu, ya ankho upondola umwe vala mwene okukala ngootyo ekahi-ale. Mahi pahe, okuhole kwae Siovaa, Nomona wae, ankho tyeliyawisa. Otyo atyimupe umwe okukoya okulinga otyipuka tyimwe otyinene, okumbatisalwa alinge omulanduli wa Sesusi Kilisitu. Filipe etyi emutala umwe wata-mo mokumbatisalwa, emumbatisala.

⁷ Noove motiwa vala wata-mo umwe mokumbatisalwa, tyina ulinga ngeetyi tyalingile omu Etiopia. Ine otyo ulinga, noove mopopi umwe nomutima auho ngeetyi tyapopile omulume una oti: “Oityi tyinthyilika okumbatisalwa?” Pahe matutale oñgeni noove molingi etyi tyalingile omu Etiopia. Ngwe watwaileko okunoñgonoka otyili, alingi etyi anoñgonoka, okuhole kwae Huku akutwalako okuliyawisa.

TWALAKO OKUNOÑGONOKA OTYILI

8. Oityi Suau 17:3 yapopia una okulinga?

⁸ Tanga Suau 17:3. Okuti onondaka ombo mba Sesusi ombo mbekukwatesako oti hahe ndyililongese Ombimbiliya? Ovanyingi pwoonthwe ombo umwe mbetukwatesako. Mahi okuti onondaka ombo tupu mbuli nokututi tuna okutwalako nokunoñgonoka otyili? Yoo. Onthwe kamatutalama-le ‘kokunoñgonoka . . . Huku wike wotyotyili.’ (Ecl. 3:11) Onthwe apeho vala kamatutalama-le kokunoñgonoka otyili. Ngwe ine tunoñgonoka vali nawa otyili, matukala vali omapanga a Siovaa. — Sal. 73:28.

9. Oityi tuna okulinga tyina twamanoñgonoka ovipuka vyo tete viotyili?

⁹ Otyili, pokunoñgonoka Siovaa tuhimbikila umwe kovipuka viapepuka vili m’Ombimbiliya. Momukanda omu apositolu Paulu ahonekelele ova Hembeleu ovipuka viatyo ovio viapepuka weviti, “ovipuka vyo tete.” Mahi ankho keya nokuti ovipuka ovio vyo tete kaviesukisile-ale, ngwe wevieeleka nomahini anyama olukembe alukongoka umwe nawa. (Heb. 5:12; 6:1) Tupu wapele ondundo ovalanduli aveho va Kilisitu vehehikile vala kovipuka ovio vyo tete viotyili Tyondaka ya Huku, mahi vatwaleko okunoñgonoka ovipuka viaya kohi. Okuti noove usuka umwe natyo tyokunoñgonoka otyili tyaya kohi ty’Ombimbiliya? Okuti noove wafwapo umwe, wahanda utwaleko okukula, utwaleko okunoñgonoka vali nawa Siovaa, nonomphango mbae?

10. Oityi vamwe tyivepwiyila okulilongesa Ombimbiliya?

¹⁰ Ovanthu ovanyingi vasoka okuti tyipwiya unene okulilongesa Ombimbiliya. Okuti noove otyo usoka otyo? Kosikola tyekupepukilile okutanga nokunoñgonoka vali ovipuka ovikwavo? Okuti utyihole tyokulongehiwa, ya tyina utala wanoñgonoka ovipuka ovinyingi? Ine tyina ulitala ñgaa ngoti kutyivili-ale, tyokukwata omikanda tyikupwilisa unene? Ine otyo usoka otyo, have vala. Mahi Siovaa mekukwatesako. Ngwe oe Omulongesi ukahi vali nawa, ulongesa umwe nawa.

11. Oityi Siovaa alinga tyalekesa umwe okuti “Omulongesi Omunene”?

¹¹ Mwene Siovaa weliti, “Omulongesi wove Omunene.” (Isa. 30:20, 21) Ngwe Omulongesi umwe wapwa elundo, una okankhenda, unoñgonoka nawa ava alongesa. Utala oviwa vili mwaava alongesa. (Sal. 130:3) Ngwe kametwiiti-ale tulinge etyi twehevili. Hinangela okuti Siovaa oe watunga owongo wove, otyipuka tyimwe otyiwa etwaavela. (Sal. 139:14) Onthwe mwene tutyitwa-le natyo tyokwahanda okunoñgonoka ovipuka. Omutungi wetu wahanda apeho tunoñgonoke ovipuka, atutyihambukilwa tyokunoñgonoka ovipuka. Naina, otyiwa umwe ‘tusuke’ nokunoñgonoka otyili ty’Ombimbiliya pehepano. (1 Pet. 2:2) Panga umwe evi uvila okulinga, linga omphango yokutanga Ombimbiliya, nokulilongesa-yo apeho. (Jos. 1:8) Siovaa mekuyambe, otyihambukilwa tyokutanga Ombimbiliya, nokumunoñgonoka vali.

12. Oityi tyesukisila unene okulilongesa etyi Sesusi alingaile?

¹² Apeho ovola omuvo wokusoka ku Sesusi, no kovilinga alingaile. Ine twahanda umwe okulingila nawa-nawa Siovaa, tuna okuhetekela etyi tyalingile Sesusi, haunene umwe pomivo viokwepwiya. (1 Pet. 2:21) Sesusi wapopilile umwe ovalongwa vae okuti mavakala novitateka, eheveholeka. (Luka 14:27, 28) Mahi ankho wayumba onthumbi movalanduli vae votyotyili, utyii okuti navo mavetyivili umwe okukakatela mu Huku ngeetyi ngwe alinga. (Suau 16:33) Lilongesa umwe nawa unoñgonoke ovipuka Sesusi alingaile, noove pahe opange evi una okulinga umuhetekele ononthiki mbatyo ambuho.

13. Oityi una okwiita apeho ku Siovaa, ya omokonda yatyi?

¹³ Okukala nenoñgonoko otyiwa umwe, mahi hatyo-ko vala tyesukisa. Enoñgonoko ewa vala tyina lili nokukukwatesako unoñgonoke vali nawa Siovaa, nokumuhumba vali, nokumuyumba vali onthumbi. (1 Kol. 8:1-3) Tyina utwalako okunoñgonoka vali Siovaa, otyo tupu umwiita ekukwateseko umuyumbe vali onthumbi. (Luka 17:5) Omalikwambelo atyo ngo oo, Huku weekumbulula umwe. Onthumbi yotyotyili yatuka umwe kokwanoñgonoka nawa Huku yetu, oyo maikukwatesako okulu motyili. — Tia. 2:26.

APEHO LINGA ETYI WANOÑGONOKA

14. Oityi omu apositolu Petulu apopia tyalekesa umwe okuti tyesukisa unene okulinga etyi twanoñgonoka? (Tala olutalatu.)

¹⁴ Omu apositolu Petulu wapopile etyi tyapopia Ombimbiliya tyalingile oo Noe etukwateseko okunoñgonoka okuti, tyesukisa unene ovalanduli va Kilisitu apeho valinge etyi vanoñgonoka. Siovaa watolelele Noe okuti maeta-ko ombila onene ahanye-ko ovanthu onondingavivi. Mahi oo Noe no vomeumbo liae, okunoñgonoka vala okuti makuya ombila onene ankho yatyo-ko matyiveyovola. Petulu apa ankho uli nokupopia pweetyi Ombila Onene yeheneye, “etyi owato ankho ukahi nokutungwa.” (1 Pet. 3:20) Tyotyili, oo Noe no vomeumbo liae, valingile umwe etyi vanoñgonoka pokwatolelwa na Huku, mokwatungile owato. (Heb. 11:7) Petulu aeleka otyo tyalingile Noe, nombatisimu, ati: “Ombatisimu yokuelifwa notyo, tupu pehepano imuyovola.” (1 Pet. 3:21) Naina, ononkhono uli nokulinga uhike kokumbatisalwa, tupondola okumbweeleka novilinga oo Noe no veumbo liae valingile omanima nomanima pokutunga owato. Ovilinga patyi wesukisa okulinga mavikukwatesako uhike kokumbatisalwa?

15. Oityi una okulinga tyimoneke okuti tyotyili welivela umwe?

¹⁵ Otyipuka tyo tete tuna okulinga, okulivela umwe nomutima auho, ovivi tulinga atuviyeke-po. (Ovil. 2:37, 38) Okulivela umwe nomutima auho, tyikwatesako omunthu apiluluka umwe. Okuti noove wayeka-po-ale ovipuka vimwe Siovaa eyele: omwenyo wasila, nokusipa, nokutukana, hamwe okupopia onondaka mbuleva, novipuka ovikwavo vali ovivi? (1 Kol. 6:9, 10; 2 Kol. 7:1; Efe. 4:29) Ine nkhele ovipuka ovio kuneviyeke-po, tutumba umwe uviyeke-po. Popia no wokukulongesa Ombimbiliya ekukwateseko, okuti hatyo, popia novakulu vewaneno. Ine nkhele umona ukala meumbo noo tate yove, popia navo vekukwateseko uyeke-po ovipuka vimwe ovivi vili nokukutyika wehehike kokumbatisalwa.

16. Oityi tuna okulinga apeho matyipameka oupanga wetu na Huku?

¹⁶ Otyipuka otyikwavo tyesukisa unene, okulinga apeho ovipuka vitukwatesako tukale noupanga omuwa na Huku. Povipuka ovio, tyimwe okwenda komaliongiyo, nokukumbulula momaliongiyo. (Heb. 10:24, 25) Tyina wamahimbika okulinga ovilinga ovalanduli va Kilisitu vapewa, ovilinga viokwivisa, vilinga apeho. Tyina uundapa vali unene movilinga ovio viyovola ovanthu, noove movihambukilwa vali. (2 Tim. 4:5) Ine nkhele umona ukala noo tate yove, lipula okuti: ‘Okuti apeho ndyihinangeleswa noo tate okuti tuna okwenda keliongiyo no movilinga viokwivisa, ine mwene ndyilihinda andyike?’ Ine mwene ulihinda awike, otyo tyilekesa okuti uyumba onthumbi mu Siovaa Huku, umuhole, umupandula. Ovio ovipuka upondola okupa Siovaa, vilekesa okuti ‘umukuatyili’ kwe. (2 Pet. 3:11; Heb. 13:15) Ngwe Huku yetu uhambukilwa unene ovipuka aviho twaava umwe nomutima auho tyahakuluminywa. (Tala etyi tyapopia 2 Ova Kolindu 9:7) Onthwe tyituhambukiswa unene okulinga atyiho tuvila movilinga vya Siovaa.

OKUHOLE KWOVE SIOVAA APEHO KULIYAWISE

17-18. Oityi matyikukwatesako ohiki kokumbatisalwa, ya omokonda yatyi? (Provérbios 3:3-6)

¹⁷ Tyina uli nokulikwatehila uhike kokumbatisalwa, mokala umwe novitateka. Vamwe vapondola okukulinga omukwele tyina vatala ovipuka pahe uli nokulongeswa, vamwe vapondola okukuyala, nokukumonesa umwe emone. (2 Tim. 3:12) Pokututumba apa uyeke-po ovipuka vimwe viehekahi nawa, pamwe ukati umwe ñgaa wetyiyekele-po mahi okondoka-mo vali. Pamwe noove tyipondola okukunkhisa vala elundo, nokukutokotesa vala omutwe mokonda ovipuka wapangele ngoti kuya-le nokuvivila. Pahe oityi matyikukwatesako utyivile okukoleleya? Otyipuka matyikukwatesako, okukala omunthu uhole Siovaa.

¹⁸ Okuhole Siovaa, otyo otyipuka otyiwa una-tyo, tyesukisa vali unene. (Tanga Provérbios 3:3-6.) Ine ove tyili-tyili uhole umwe Siovaa, matyikupe ononkhono otyivili okututumba tyina una ovitateka. Ombimbiliya yetyipopia-popia ehimbwe tyokuti Siovaa una olwembia olunene novanthu vae vemufenda. Otyo tyilekesa okuti ngwe ulikwata-po umwe novanthu vae, nii vala katutu keveyeke-po. (Sal. 100:5) Ove watungwa otyifwika tya Huku. (Gên. 1:26) Pahe oñgeni noove molekesa okuti tyili uhole umwe Huku?

19. Oityi una okulinga apeho upandule ovipuka aviho Siovaa ekulingila? (Ova Galata 2:20)

¹⁹ Otyipuka tyo tete una okulinga, okukala omunthu wokupandula. (1 Tes. 5:18) Ononthiki ambuho lipula okuti: ‘Oityi Siovaa hono alinga tyalekesa okuti unthyole?’ Tyina pahe wametyimono etyi Siovaa ekulingila, omupandula melikwambelo, mahi otyitumbula umwe otyipuka tyatyo ekulingila. Omu apositolu Paulu wetyinoñgonokele okuti Siovaa umulingila tupu ovipuka oviwa omokonda umuhole. Noove wesukisa okuhinangela okuti, Siovaa ukulingila tupu ovipuka oviwa omokonda ukuhole. (Tanga Ova Galata 2:20.) Lipula okuti: ‘Okuti naame nahanda-vo ndyilinge evi mavilekesa okuti ndyimuhole ngeetyi ngwe enthyole? Okuhole Siovaa, otyo matyikukwatesako ohemuyeke-po tyina uhongiliywa ulinge evi viahaviukile, tupu otyivili okukoleleya tyina una ovitateka. Okuhole Siovaa matyikupe umwe okukakatela movipuka wapanga okulinga ononthiki ambuho, ovipuka vipameka oupanga wenyi na Huku, nokulinga ovipuka mavilekesa umwe okuti uhole Tate yove.

20. Oityi una okulinga ulipakule ku Siovaa, ya omokonda yatyi tyesukisila unene?

²⁰ Mokonda ove uhole umwe Siovaa, tyina pamakala, mohande pahe ulinge elikwambelo limwe enene, elikwambelo liokulipakula ku Huku. Ngwe pahe opo tyina wamelipakula ku Siovaa, mokala nelao limwe enene. Upondola okukala omunthu wa Huku apeho. Tyina ove ulipakula ku Siovaa, umupopila okuti, momulingila umwe apeho tyilinge momivo vikahi nawa, tyilinge momivo viokwalema. Okulipakula ku Siovaa tyilingwa vala like, katyipalaikwa vali. Otyili, tyina omunthu uli umwe nokusoka pahe oti ndyilipakule, otyo otyipuka tyimwe otyinene. Mahi wahalimbweko okuti, povipuka aviho mosoko, neevi molingi tyina nkhele una omwenyo, otyipuka otyiwa vali, okulipakula ku Siovaa. (Sal. 50:14) Satanasi mesuku umwe nokukusoyesa wahahumbe vali Tate yove, mahande umwe umuyeke-po, mahi ove likwatehile, ehekuvile! (Jó 27:5) Ine uhumba umwe tyotyotyili Tate yove wo keulu Siovaa, matyikukwatesako olingi apeho etyi wemutolelele pokwelipakula, tupu mamukala noupanga omunene nae.

21. Oityi tutila okumbatisalwa hakuti ngootyo kwapwa, mahi onthyimbi vala?

²¹ Tyina wamelipakula ku Siovaa, pahe popila ovakulu vewaneno lienyi okuti wahanda okumbatisalwa. Mahi apeho hinangela okuti, nga wambatisalwa hakuti ngootyo kwapwa, nkhele uli vala nokuhimbika. Otyo ngootyo uli vala nokuhimbika okulingila Siovaa, ngwe okulingila Siovaa tyitupu apa tyihulila. Naina, linga evi mavikukwatesako uhumbe vali unene Tate yove pehepano. Panga umwe ovipuka mavikukwatesako, okuhole kwove Siovaa akuliyawisa ononthiki mbatyo ambuho. Okutyilinga otyo, matyikutwala umwe kokumbatisalwa. Onthiki mombatisalwa maikuhambukiswa unene. Mahi ngootyo nkhele uli vala nokuhimbika. Okuhole kwove Siovaa Nomona wae, kuliyawise apeho-apeho.