Omuenyo Wange Ankho Uvila-po Okukala Omapita

OMUENYO WANGE KOHALE:

Nekulila mepundaumbo lio Los Angeles, mo Califórnia, ko Estados Unidos da América. Nekulila pokati kovanthu vena ovituwa ovivi, ovifuanga vipuena epangwe, nokuiipa ovanthu. Pokulikuai kuetu tuna epandu, iya ame ndyikwai kotyiveli.

Tunde poututu, me ankho ututuala kokapela. Etyi nekula-ko vali, andyihimbika okutyinda omienyo vivali. Mo Vityalumingu ankho ndyikaimba notyikundyi tyo vokuimba mokapela. Mahi, mokati kosimanu ankho ndyenda novakuendye vakuetu okukapuena epangwe, nokulinga omaundalelapo.

Ankho ndyimukalavi unene, nokuhasete okunumana. Ankho kese otyipuka namakuate peke, ndyiveta natyo ovanthu. Etyi ankho ndyilongeswa kokapela, katyankhuatesile-ko. Ankho ndyiti: “Okukondolela ovanthu etyi valinga otya Tatekulu, iya ame ndyityiti tyae!” Konthyulilo yomanima 1960 puetyi ankho ndyili mosikola onene, andyihongiliyua notyikundyi tyopulitika, ankho tyiwa, Panteras Negras, vatyitukila-po ovatumini, opo vaavele ovanthu etyi vatokala. Andyilipake motyikundyi tyovalilongesi tyiluila etyi ovanthu vahanda. Ovikando ovinyingi ankho tukeliyava kovatumini, atuende posikola atuhasete-po.

Mahi, ame tyina ndyitala ngoti ankho otyipuka otyo katyinkhululukisa-le, mokonda ankho nahanda vala okulwa. Andyihimbika, okulipaka moungangala. Nthiki imwe, ame nomapanga ange, tuatalele osinema imwe ilekesa onya ovapika vatunda ko Afrika ankho valingwa no vo mo Estados Unidos. Atunumana unene mokonda yonya oyo, atuvete ovakuendye aveho ovindele ankho tutala navo osinema. Etyi tuatunda opo, atukaovola ovomunthele yetu ankho ovindele, opo tuvevete.

Etyi nekula-ko vali, ame nomukulu wange, nonondenge mbange, atulingi ovipuka ovinyingi ovivi. Atukala novitateka novatumini. Umwe po nondenge mbange, ankho weenda novifuanga ovinene, na ame andyilipake kumwe navo. Omuenyo wange ankho uvila-po vala okukala omapita.

OÑGENI OMBIMBILIYA YAPILULULA OMUENYO WANGE:

Umwe pomapanga ange, ovo he ankho Onombangi mba Jeova. Avankhongo opo ndyende navo keliongiyo, andyitavela. Onthiki yo tete, andyimono okuti Onombangi mba Jeova velikalela unene. Aveho ankho vena ono Mbimbiliya, otyo vembutanga. Alo umwe ovana ovatutu ankho valinga omalongomona meliongiyo! Andyihuvu etyi nanoñgonoka okuti enyina lia Huku o Jeova, nokuiva ovanthu velitumbula. (Salmo 83:18) Mewaneno, ankho muna ovanthu vomihoko vielikalaila, mahi pokati kavo petupu okapungulula.

Po tete, ankho hihande okulilongesa Ombimbiliya no Nombangi, mahi okuenda komaliongiyo ankho ndyityihole. Onthiki imwe kongulohi tyina ndyenda keliongiyo lio Nombangi, omapanga ange aende kondyuo imwe ankho kuhikiswa. Kondyuo oko, avavete omukuendye umwe alo vemuipaa, mokonda ankho kahandela okuvepa otyikapote tyae otyiwa. Onthiki yalandulako, avahimbika okulipanda mokonda yokuaipaa omunthu. Etyi vatualwa mombonge, ankho vasoka okuti etyi valinga hatyivi-ko unene. Ovanyingi puvo avapakwa mokaleya, atyitiwa omo mavankhila. Andyipandula unene mokonda ame ankho hipo. Andyitokola okupilulula omuenyo wange, iya andyihimbika okulilongesa Ombimbiliya.

Namphila ankho ndyina okapungulula, mahi pokati ko Nombangi namuene ovipuka ovinyingi vianthyuvisile. Mongeleka, etyi Ombangi imwe otyindele atunda-po, ovana vae evesila ombunga yovanthikovei. Tupu, ombunga imwe ovindele, avatekula omona umwe omunthikovei ankho uhena apa akala. Andyikala nonthumbi yokuti Onombangi mba Jeova, vakuama onondaka mba Jesus mbuli mu João 13:35 yati: “Moluotyo, ovanthu aveho mavaimbuka okuti muvalongwa vange, inkha mukala nohole pokati kenyi.” Ankho ndyityii okuti navasa ombunga yotyotyili.

Etyi nelilongesa Ombimbiliya, andyihimbika okuimbuka okuti nesukisa okupilulula onkhalelo yange yokusoka. Ankho ndyina okupilulula omalusoke ange opo ndyikale omuna-mbembwa, nokuimbuka okuti, ei onkhalelo ongwa yomuenyo. (Romanos 12:2) Katutu-katutu, andyikulu motyili. Nambatisalwa mu Kupupu yo 1974, andyikala Ombangi ya Jeova.

Mahi, alo umwe etyi nambatisalwa, ankho nkhele ndyina okulinga ononkhono opo ndyiyekepo oukalavi. Mongeleka, onthiki imwe puetyi ankho tuli movilinga viokuivisa umbo na umbo, otyimphulu atyivake olaliu yetuku-tuku liange. Andyityitaata, etyi netyifuena popepi, olaliu atyiitokesila pohi, atyikahateka. Etyi netyipopila vakuetu, omukulu umwe weuaneno amphulu okuti: “Stephen, inkha wetyikuatele, ñgeno walinga ñgeni?” Andyisoko unene epulo olio, iya alimphe ondundo yokulinga ononkhono mbokukala omuna-mbembwa.

Mu Kulindi yo 1974, andyihimbika ovilinga viomuvo auho, okuundapa onoola 100 movilinga viokulongesa vakuetu Ombimbiliya. Konyima, andyikala nelao liokuundapa mombala yo Nombangi mba Jeova ouye auho, mo Brooklyn, Nova York. Mo 1978, andyikondoka ko Los Angeles opo ndyikatekule me ankho uvela. Etyi palamba omanima evali, andyinepe omukai ndyihole, utiwa Aarhonda. Ankhuatesako unene okutekula me, alo anyima. Konyima, ame na Aarhonda, atukongwa Kosikola Yombimbiliya yo Gileade. Iya atutumwa ko Panamá, atutualako novilinga vioumisionaliu.

Tunde etyi nambatisalwa, namonekelelwe novitateka vimwe ankho vinthyongiliya okulwa. Nelilongesa okuenda nkholo vana vandeva, ine okuovola onkhalelo onkhuavo yokutetulula ovitateka. Omukai wange, novanthu ovakuavo, vamphandula tyina namalingi ngotyo. Pamwe ndyilitala ñgaa, andyihuvu! Tyotyili, hapilulukile kononkhono mbange muene. Omapiluluko nalinga, alekesa nawa okuti Ombimbiliya ina ononkhono.—Hebreus 4:12.

OUWA PATYI NAPOLA-KO:

Ame Ombimbiliya yankhuatesako okuimbuka esilivilo liomuenyo, nokukala omuna-mbembwa. Pahe hivete vali ovanthu, mahi ndyivekuatesako okukala omapanga a Jeova. Alo umwe nelilongesa Ombimbiliya nomunthu ankho tuliyele nae kosikola! Etyi ambatisalwa, atukala omuvo umwe mondyuo ike. Tunde opo, tumapanga omanene. Alo hono, ame nomukai wange, tuelilongesa Ombimbiliya novanthu valamba po 80, avakala Onombangi mba Jeova.

Ndyipandula unene Jeova, wampha omuenyo omuwa, nehambu pokati kovakuatate votyotyili.