Okuyekelela Ovipuka — Oñgeni Ombimbiliya Ipondola Okutukwatesako?
“Okuhakuliminya vakwetu etyi onthwe tusoka tyeta ombembwa.” — Otyo tyapopiwa mo 1995 no UNESCO.
Okuhayekelela ovipuka tyipondola okweta onondyaya pokati kovanthu. Otyipuka otyo tyitwala ovanthu kokuliyala avehiki umwe kokulwa.
Ovanthu ovanyingi tyina veiva ondaka okuyekelela, vasoka ovipuka vielikalaila. Vamwe vasoka okuti omunthu una uyekelela ovipuka, oyouna utavela atyiho ovanthu vapopia, neetyi valinga. Tupu vamwe vasoka umwe ngeetyi Ombimbiliya ipopia, vasoka okuti omunthu una uyekelela ovipuka, oyouna una onthilo novipuka ovakwavo vakoya okulinga namphila hamwe ovipuka ovio ehevitavela.
Okuti Ombimbiliya ipondola okukwatesako ovanthu hono avakala vokuyekelela ovipuka?
Etyi Ombimbiliya ipopia tyayemba kokuyekelela-ko ovipuka
Ombimbiliya ipopia okuti pamwe otyiwa okuyekelela ovipuka. Yati: “Ovanthu aveho vanoñgonoke okuti muapola pokati.” (Ova Filipu 4:5) Ombimbiliya itupopila okuti tuna okutekula nawa vakwetu nokukala nonkhenda navo. Ovanthu vana vaendela mweetyi Ombimbiliya ipopia vapondola okuhetavela etyi vakwavo valinga, mahi kavevetyilika okulinga etyi vahanda okulinga.
Ombimbiliya ipopia ovipuka Huku ahanda ovanthu valinge. Ngwe ipopia okuti: “[Huku] wekupopila ulinge etyi tyaviuka.” (Miquéias 6:8) Itupopila etyi Huku ahanda tulinge opo tukale nomwenyo omuwa. — Isaías 48:17, 18.
Huku ketupele otyilinga tyokukoyesa vakwetu. Ombimbiliya yati: “Kuna vala Omuavi wike Wovitumino, Omukoyesi. . . ove, ovelie opo ukoyese mukuenyi?” (Tiaku 4:12) Huku uyeka omunthu akoye etyi malingi, mahi ovipuka vituka-ko oviae mwene. — Deuteronômio 30:19.
Oityi Ombimbiliya ipopia tyayemba kokulinga onthilo vakwetu
Ombimbiliya itupopila okuti: “Humbei ovanthu vatyo aveho.” (1 Petulu 2:17) Ovanthu vana vaendela mweetyi Ombimbiliya ipopia valinga onthilo ovanthu vatyo aveho, tyihatalela kweevi ovanthu vakoya okulinga. (Luka 6:31) Otyo katyilekesa okuti ovanthu vana vokutavela etyi Ombimbiliya ipopia, vetavela vala atyiho ovanthu valinga neetyi vapopia. Mahi ngwe kavevepopi omapita, vevelinga onthilo, vana vahetekela Sesusi.
Tala vala tyimwe Sesusi alingile, nthiki umwe wavasile omukai uli mongeleya imwe Sesusi ehetavela. Omukai oo tupu ankho ukala nomulume vehelinepele nae — otyipuka tyimwe Sesusi ankho ahayekelela. Mahi nongootyo apopi nonthilo nomukai oo. — Suau 4:9, 17-24.
Nga Sesusi, ovakilisitau navo vafwapo umwe pala okukumbulula vana vahanda umwe okutehelela etyi vetavela, mahi vetyilinga umwe “nonthilo onene.” (1 Petulu 3:15) Ombimbiliya ipopia okuti ovakilisitau kavapondola okukuluminya vakwavo etyi vetavela. Ipopia okuti ovalanduli va Kilisitu ‘kevesukisile okulwa, mahi wesukisa okukala nomapole novanthu aveho,” atee umwe navana vehetavela etyi ngwe vetavela. — 2 Timotiu 2:24.
Oityi Ombimbiliya ipopia tyayemba kokuliyala
Ombimbiliya ipopia okuti “kalei nombembwa novanthu aveho.” (Ova Hebeleu 12:14) Una wovola ombembwa ulityilika okuyala vakwavo. Namphila ngwe ahalingi etyi tyapenga opo ahambukiswe vakwavo, mahi ulinga umwe ononkhono opo akale nombembwa na vakwavo. (Mateusi 5:9) Tupu Ombimbiliya ipopia okuti tuna okuhumba onondyale mbetu, okutekula nawa vana vetulinga onya. — Mateusi 5:44.
Otyili, Ombimbiliya ipopia okuti Huku “kahande,” ine “uyele,” ovanthu vana valinga omapita vakwavo. (Provérbios 6:16-19) Mahi apa Ombimbiliya ikahi nokupopia okuyala omunthu tyokuhanda umwe okumulinga omapita. Ombimbiliya ilekesa imwe nawa okuti Huku wafwapo pala okwevela ovanthu vana velivela avayekepo okulinga etyi tyimunumanesa, avaendela vala movitumino viae. — Isaías 55:7.
Ono vesikulu mb’Ombimbiliya popia etyi tyayemba kokulinga onthilo ovanthu nokuhevekuluminya valinge etyi tusoka
Titu 3:2: ‘Lekekesei kovanthu aveho okuti mwapola pokati.’
Omunthu wokwapola pokati okumbulula nawa ovipuka vakwavo vapopia namphila ehetavela, evelinga onthilo mokonda wahanda pokati kavo pakale ombembwa.
Mateusi 7:12: “Ovipuka aviho muhanda ovanthu vemulinge, tupu no onwe ovio muna okuvelinga.”
Onthwe tutyihole unene tyina vakwetu vetulinga onthilo na tyina vetunoñgonoka umwe nawa, mokonda yokutyii okuti omunthu na munthu una etyi etavela. Opo unoñgonoke vali nawa oñgeni upondola okweendela mweetyi Sesusi apopia, tanga onthele yokwati: “O que é a Regra de Ouro?”
Josué 24:15: “hono Koyei olie mamuumbila.”
Okulinga onthilo evi vakwetu vakoya okulinga, tyeeta ombembwa.
Ovilinga 10:34: “Huku utupu okapungulula.”
Huku kalingi okapungulula omunthu mokonda yotyivala tyae, naapa atyitilwa.
Habacuque 1:12, 13: “[Huku] kayekelela oumphuki.”
Ku Huku okuyekelela-ko ovipuka pena apa tyooyela. Ngwe kayeke ovanthu valinge vala ovipuka ovivi pala apeho. Opo utyinoñgoneke vali nawa tala ovindiu yati: Omokonda Yatyi Huku Ayekelelako Ononkhumbi?
Ova Loma 12:19: “Yekei Huku alekese onyengo yae; tyetyi tyahonekwa okuti: “‘Tyokukondolela ovanthu otyange.” Otyo tyapopia Siovaa.”a
Siovaa kapele omunthu nawike tyokukondolela vakwavo. Ngwe mwene apa katutu maetako ouviuki. Opo utyinoñgoneke vali nawa tanga onthele yati: “Será que um dia teremos justiça no mundo?”
a Siovaa enyina lya Huku. (Salmo 83:18) Tanga onthele yati: “Siovaa Olie?”