Otyiho No Nombongo

Omulume utiwa o Paul, una omukai novana vevali, wati: “Etyi ovipuka viahimbika okulonda motyilongo tyetu, nokulia akulondo, tupu akuhamoneka. Ankho tukala momutete onoola ononyingi, alo okulia kupwa-mo, otyo tuhenehike komutwe. Pomuvo opo, ovanthu vahokele unene, vamwe ankho vasosolokela momatapalo. Ovipuka viesukisa, ankho vilanda onombongo ononyingi unene. Okuhulilila-ko, onombongo mbo motyilongo ambahasilivila vali. Onombongo ankho ndyipaka kombango, nombu ankho ndyitambula, novipuka ovikuavo ankho napamena, avipeseka.”

Paul ankho utyii okuti opo ombunga yae ihupe, una okulinga ovipuka “nonondunge.” (Provérbios 3:21) Wati: “Ankho ovilinga viange okupaka olusi monondyuo, mahi andyitavela vala ovilinga aviho ndyivasa namphila ankho ndyifetwa katutu. Pamwe ankho ndyifetwa ovikulia ine ovipuka ovikuavo viesukisa meumbo. Inkha nafetwa onombala ononkhuana mbondyapau, ndyituala onombali keumbo, onombali andyilandesa. Konyima, andyilande ovipiyona 40. Etyi viekula, andyivilandesa, andyilande vali ovipiyona 300. Konyima, andyikumana ovifufwa 50 nonosaku mbohinde yepungu. Ohinde oyo, aikuatesako ehimbwe ombunga yange, no nombunga onokhuavo.”

Tupu, Paul ankho utyii okuti etyi tyakolela vali, okuyumba onthumbi mu Huku. Tyina tulinga etyi Huku etutuma, utukuatesako. Konthele yokuovola etyi tuesukisa, Jesus wati: “Yekeipo okukala notyiho, mokonda . . . Tate yenyi utyii okuti muesukisa ovipuka ovio.”—Lucas 12:29-31.

Mahi, Satanasi, ondyale onene ya Huku, uhongiliya ovanthu ovanyingi, okusukalala unene nonkhalelo yavo. Ovanthu vasukalala unene novipuka vesukisa, nevi vahanda, nokulinga ononkhono mbokumona ovipuka vehesukisa. Vamwe velipa onongele, ‘avakala ovapika va una valevala.’—Provérbios 22:7.

Ovanthu vamwe valinga omatokolo ahaviukile. Paul wati: “Ovomunthele yange ovanyingi, vasile-po onombunga mbavo, nomapanga, avakaovola ‘omuenyo omuwa’ kovilongo ovikuavo. Vamwe vailukile tyihena omikanda viitwa vana vailuka, iya avahavasi ovilinga. Ankho vakalela vala okuholama opulisa, nokulala momatapalo. Kavayekele Huku evekuateseko. Mahi, ame nombunga yange, tuatokolele okuluisa ovitateka ovio atuho kumwe, nombatelo ya Huku.”

OKULANDULA ELONDOLO LIA JESUS

Tupu Paul wati: “Jesus wati: ‘Muhakalei notyiho nonthiki ya muhuka, mokonda kese nthiki ina omasukalalo ayo. Kese nthiki ina ovivi viayo.’ Ngotyo, ononthiki ambuho ankho ndyilikuambela okuti: Huku ‘tuavele okulia kuonthiki yo hono’ opo tuhupe. Iya, Huku etukuatesako umwe, ngetyi Jesus alaele. Onthue ankho tulia vala etyi tuamona. Onthiki imwe andyiende pomutete wokulanda okulia, otyo nehei oityi tyilandeswa. Etyi nehika komutwe, naina ankho o yogurt (otyipuka tyikahi ngotyikapu). Ame o yogurt hihande. Mahi, mokonda ankho okulia, ngayo umwe tulia. Ndyipandula unene Huku mokonda momuvo oo auho, ombunga yange kayalele nondyala.”a

“Nkhele tuna onombongo. Mahi, muaviho tualambela, tuaimbuka okuti tyakolela vali pala okulwisa otyiho, okuyumba onthumbi mu Huku. Jeovab apeho metukuatesako inkha tulinga ononkhono mbokulinga etyi ahanda. Tuetyimona okuti o Salmo 34:8 ipopia otyili etyi yati: ‘Hetekelei amutale okuti Jeova omuwa. Omunthu uyumba onthumbi mwe omuna-mbembwa.’ Moluotyo, tutupu owoma wokulua novitateka vionombongo inkha tyiyapo vali.”

“Pahe tutyii nawa okuti etyi ovanthu vesukisa opo vahupe, okulia, havilinga ine onombongo. Tukevelela nehambu omuvo Huku makafuisapo omulao wae, wati: ‘Makukakala ovilia ovinyingi kombanda yohi.’ Tyina omuvo oo uheneye, ‘inkha tuna etyi tulia netyi tuvala, matuhambukwa novipuka ovio.’ Onondaka ombu mbo Mbimbiliya mbutupameka: ‘Muhakalei nohole nonombongo, mahi hambukiluei ovipuka muna pahe. Mokonda oe wati: “Himekuyeke nalumwe, himekusi-po nalumwe.” Moluotyo, tupondola okukola omutima, atupopi okuti: “Jeova oe omuvateli wange, himakala nowoma.”’”c

Opo omunthu ‘akale noupanga omuwa na Huku’ nga Paul nombunga yae, tyesukisa okukala nekolelo liotyotyili. (Gênesis 6:9) Tyilinge tutupu onombongo hono, ine tukakala ngotyo komutwe, tulilongesilei kekolelo lia Paul, nonondunge mbae.

Iya inkha ovitateka viombunga vituetela otyiho?