Okupolako Etyi Tyieta Ovitateka

Ove usoka okuti nthiki imwe ovanthu mavamaneko ovitateka vitupola ehambu, nepamo, iya vipaka motyiponga onkhalelo yetu yomuenyo komutwe wandyila? Opo tyitavele tyesukisa okumanako otyipuka tyityieta, hamaluihamo atyo vala.

Tala etyi tyaendela na Tom. Wavelele unene konyima ankhi. Omokonda yatyi tyamoneka-po? Ondotolo yatambulile Tom, etyi ehenenkhie yati: “Etyi omaluihamo ahimbika, petupu ou waovola okunoñgonoka omokonda yatyi akalela nao.” Tyafuile ovanthu vokuatetekela okumuhakula vemuavelele vala ovihemba opo ahaihamenwe vali, nokulitehelela nawa.

Okuti hamwe ovanthu vekahi nokulinga ngotyo ovitateka vyo mouye uno? Mongeleka, opo ovatumini vamaneko oungangala vahinda ovitumino, tupu vapaka momatapalo ono kamela, nokuyawisa komakakunye. Ovipuka ovio vipondola okukuatesako, mahi kavimaneko etyi tyieta ovitateka. Mokonda ovanthu valinga tupu ovipuka omokonda yetyi tyili momutima, no momahando nomalusoke avo.

Daniel ukala kotyilongo tyimwe tyo América do Sul tyina ovitateka vionombongo wati: “Onthue ankho tuna omuenyo wapepuka. Ankho tutupu owoma no nongangala. Mahi pahe tutupu vali ombembwa mepunda-umbo nalike. Ovitateka vionombongo vialekesa etyi ovanthu ovanyingi vena momutima, elungavi, nokuhena onthilo nomuenyo, novipuka vya vakuavo.”

Elias waile nkholo mokonda yovilwa mo Oriente Médio konyima elilongesa Ombimbiliya. Wati: “Ovanthu ovanyingi vo motyilongo tyange ankho vapewa ondundo novatumini, nononkhalamutwe mbonongeleya, okulipaka movilwa, opo vakale ovanthu vankhimana. Mahi onondyale mbavo ankho tupu otyo vatumwa okulinga. Otyo tyankhuatesako okunoñgonoka okuti okuyumba onthumbi movatumini, tyiihamesa vala omutwe.”

Etyi Ombimbiliya ipopia otyili, etyi yati:

• “Eyembelo liomutima womunthu, eevi tunde pouna.” — Gênesis 8:21.

• “Omutima omukengeleli unene upona kese tyipuka, nokuhena ekevelelo. Olie upondola okuunoñgonoka?” — Jeremias 17:9.

• “Momutima mutunda omalusoke omavi, nokuipaa, . . . nouhayo wotyihola, nokuvaka, noumbangi womatutu.” — Mateusi 15:19.

Ovanthu kavetyivili okuvasa oityi vapondola okulinga opo vamaneko ovitateka, vivasiwa momitima no momalusoke ovanthu. Tyotyili ovivi vikahi nokuliyawisa unene. Ovitateka vili mouye vityilekesa nawa. (2 Timotiu 3:1-5) Ovipuka ovinyingi vipopiwa, novipuka ovinyingi vikahi nokulingwa kavikahi nokukuatesako okumanako ovitateka. Opo omokonda yatyi ohi ihakala omphangu ongwa? Okuti onthue katutyivili? Okuti tukahi nokulinga tyimwe?

OKUTI TUKAHI NOKULINGA TYIMWE?

Namphila pamoneka ehuviso limwe iya atutyivili okumanako ovivi momitima viovanthu, no ngotyo mouye kamukala ombembwa pala ovanthu aveho. Omokonda yatyi? Mokonda onthue atuho, tuvakuankhali.

Ombimbiliya yati: “Ovanthu vetupu epondolo liokuhongolela onomphai mbavo.” (Jeremias 10:23) Otyo tyilekesa okuti ovanthu kavatungilwe opo velitumine. Ngetyi tuhatungilwe opo tukale momaande, ine o meulu, tupu onthue katuatungilwe opo tutumine vakuetu!

Mongeleka, okuti ovanthu vetyihole tyina vakuavo vevepopila oñgeni vena okukala, netyi vena okulinga, netyi vahapondola okulinga? Okuti vasoka okuti otyiwa tyina umwe evepopila tyimwe ngetyi okupolapo eimo no ñgeni vena okulongesa ovana vavo? Ovio ovipuka vimwe vala viyapula ovanthu. Tyipondola okupuiya okutavela. Mahi Ombimbiliya ipopia okuti: Onthue tutupu ounongo iya nii epondolo liokutumina ovanthu vakuetu. Ngotyo, opi tupondola okuvasa ekuateso?

Ekumbululo liayandyuluka olieli: Omutungi wetu upondola okutukuatesako, mokonda oe wetutunga! Tyelikalela netyi ovanyingi vasoka, Siovaa ketulimbilwe. Tyotyili, onondonga onongwa tuvasa mo Mbimbiliya mbulekesa okuti Siovaa utuhole unene. Tyina tunoñgonoka nawa omukanda oo, tyitukuatesako okulinoñgonoka onthue muene. Tupu tunoñgonoka omokonda yatyi kumonekela oviponga ovinyingi mouye. Tupu tunoñgonoka nawa etyi tyapopia omunongo umwe woko Alemanha wahoneka okuti: “Ovanthu iya novatumini kavelilongesila kovipuka vimoneka mouye iya kavalingile natyike mokueenda kuomuvo.”

OMALONDOLO OMBIMBILIYA ETUYAKULILA!

Otyikando tyimwe, Sesusi wapopile okuti “ounongo wiimbukua okuti waviuka movilinga viao”, ine etyi tyitundilila kounongo. (Luka 7:35) Ongeleka imwe yaviuka konthele yotyo tuivasa mu Isaías 2:22, yati: “Yekeipo okuyumba onthumbi movanthu pala ouwa wenyi.” Elondolo olio litukuatesako okuhayumbu onthumbi movipuka vihe viotyotyili. Kenneth, ukala mepunda-umbo limwe mulingwa ovivi ko América do Norte, wati: “Kese omutumini ulinga omulao kovanthu wokuti maviukisa ovipuka. Mahi ketyivili okutyilinga. Iya tyina ndyitala oñgeni vehevili okufuisapo etyi vapopia, tyinkhalesa vali nonthumbi yokuti etyi Ombimbiliya ipopia otyili.”

Daniel, wapopiwa konthyimbi, wati: “Kese nthiki ilamba ame ndyikala vali nonthumbi yokuti ovatumini kavetyivili okutumina nawa . .  Okukala nonombongo kombango iya nokulinga ovitanda ovikuavo, katyilekesa okuti komutwe wandyila mokala nomueyo omuwa. Ame ndyihole okumona ovanthu vanumana unene mokonda yotyo.”

Ombimbiliya kaituyakulila vala kovipuka viomatutu. Mahi tupu ituavela ekevelelo likahi nawa, ngaa matutale.