Ouhamba wa Huku “Maukaeta Ombembwa”

Apaka katutu Ouhamba wa Huku tukevelela, una wapakua-ko na Huku, maukaeta ombembwa newaneko kombanda yohi aiho. O Salmo 72:7 yati: “Kononthiki mbae, omuviuki makakala nehambu, nombembwa onyingi, alo kuahakala vali ohanyi.” Mahi onalupi Ouhamba mauhimbika okutumina ohi? Oñgeni otyo matyilingwa? Oityi ove wesukisa okulinga opo ukapole ouwa kouhamba oo?

ONALUPI OUHAMBA WA HUKU MAUYA?

Ombimbiliya yapopia ovipuka vilekesa okuti ouhamba wa Huku ukahi popepi. Ovipuka ovio aviho “enyingilikilo,” muakutikinya ovilwa, nondyala, nomauvela novinimawe na vana vehetavela ovitumino. — Mateusi 24:3, 7, 12; Luka 21:11; Eholololo 6:2-8.

Eulo ekuavo liapopia okuti: “Kononthiki mbahulilila makukakala omivo vialema unene, viepuiya okukala. Mokonda ovanthu mavakakala ovanthu velihole ovo muene, vehole onombongo, . . . vokuhetavela kovohe, vokuhapandula, vehevakuatyili, vehena oluembia novanthu, vehetavela okulipakela-mo, vokutendeleya, ovakalavi, vehena ohole notyiwa, ovapakuli, vokuna onkhango, vokulipakako, vokuhole evi vivehambukiswa tyipona Huku.” (2 Timotiu 3:1-4) Ovanthu vena ovituwa ovio ankho vavasiwa vala ponomphangu mbumwe. Mahi, pahe vavasiwa ponomphangu mbatyo ambuho.

Omulao oo wahimbika okufuisuapo mo 1914. Omunongo umwe novahoneki vamwe, vahoneka okuti: Ouye wahimbika okupiluluka menima olio okuenda no komutwe. Mongeleka, omunongo umwe woko Dinamarca utiwa Peter Munch wahoneka okuti: “Okuhimbikila menima lyo 1914 omo vanthu vahimbika okulinga omatokolo akolela.”

Monondaka ononkhuavo, ononkhumbi ombo ankho mbumoneka ngoti mbutupu onthyulilo. Ankho mbulekesa okuti Ouhamba ukahi popepi opo utumine ohi. Moluotyo, Sesusi wapopia okuti enyingilikilo liokuti Ouhamba ukahi popepi ankho muakutikinya ovipuka evi viakolela viati: “Iya onondaka ombu onongwa Mbouhamba wa Huku, mambukaiviswa kombanda yohi aiho, okuava oumbangi kovanthu vomalongo aeho iya konyima onthyulilo aiya.” — Mateusi 24:14.

Onondaka ombu onongwa Mbouhamba osapi yakolela Onombangi mba Siovaa vaivisa. Osapi yakolela Yomutala womulavi wati: Omutala Womulavi Wivisa Ouhamba wa Siovaa. Upopia ovipuka vihuvi popia ovipuka vihuvisa Ouhamba wa Huku maukalingila ovanthu aveho kombanda yohi.

OÑGENI OUHAMBA WA HUKU MAUHIMBIKA OKUTUMINA?

Opo tukumbulule epulo olio, tutalei ovipuka vikuana viakolela:

1. Ouhamba kamaukaundapesa outumini nawike iya tupu kamaukahongolelwa novalume.

2. Ovatumini wo mouye kamavakaundapesa outumini wavo mokonda outumini wavo maukakala tyehena esilivilo opo vafinde ouhamba wa Huku. — Salmo 2:2-9.

3. Ouhamba wa Huku maukahanyako omautumini aeho ekahi nokutuminwa novalume. (Daniel 2:44; Eholololo 19:17-21) Ovilwa ovio viihanwa okuti o Armagedom. — Eholololo 16:14, 16.

4. Aveho vana vatokola okutualako okukala ovakuatyili mouhamba wa Huku mavakahupa ko Armagedom iya avakakala mouye omupe muna ombembwa. Mavalingi onthele ya vana vaihanwa okuti “otyikundyi tyovanthu ovanyingi-nyingi pano pohi” mokutala mavakala otyikundyi tyovanthu ovanyingi. — Eholololo 7:9, 10, 13, 14.

OITYI OVE WESUKISA OKULINGA OPO UKAPOLE OUWA KOUHAMBA OO?

Otyipuka tyotete tuesukisa okulinga opo tukakale na vana mavakatuminwa Nouhamba wa Huku, okukala nenoñgonoko konthele ya Huku. Sesusi waitile ku Huku okuti: “Opo vakamone omuenyo uhapu, vena okunoñgonoka ove Huku wike wotyotyili, nokunoñgonoka una ove watuma, Sesusi Kilisitu.” — Suau 17:3.

Tyina ovanthu vahimbika okunoñgonoka Siovaa Huku ngo munthu, mavapoloko ouwa omunene. Tutalei ovipuka vivali viati: Tete, mavakala nekolelo liapama mu Huku. Iya ekolelo litei kokunoñgonoka okuti Ouhamba wa Huku owotyotyili iya uli popepi opo uhimbike okutumina. (Hebeleu 11:1) Otyipuka tyavali, ohole vena na Huku, nohole vena na vakuavo itualako okuliyawisa. Ohole vena na Huku ivekuatesako okutavela nomutima auho. Iya ohole vena na vakuavo ivelunda okuendela monondaka mba Sesusi mbati: “Ngetyi muhanda ovanthu vemulinge, tupu no onwe otyo muvelinga.” — Luka 6:31.

Omutungi wetu ukahi nga he una oluembia utuhandela otyiwa. Una uhanda tukale “nomuenyo ukahi nawa” una Ombimbiliya ipopia okuti omuenyo uhapu. (1 Timotiu 6:19) Mahi, hono ovanthu vetupu “omuenyo oo uhapu.” Hono kovanthu ovanyingi omuenyo kawapepukile valinga ononkhono opo vakale vali nomuenyo ukahi nawa. Opo ukale nolusoke lukahi nawa konthele yokukala “nomuenyo uhapu” tala ovipuka vimwe vihuvisa Ouhamba wa Huku maukalingila ovanthu.