OKUTI OHI MAIHUPU?
OMPHEPO
OMPHEPO hapala vala okufima, ina vali ovilinga ovikwavo. Tyimwe ilinga, okutuyakulila konohanya mbekumbi mbupondola okutulinga omapita. Ine kakwali omphepo, ñgeno kouye kuna vala outalala omunene.
Oityi Tyili Nokunyona Omphepo?
Omphepo okusila, atyiho tyina omwenyo tyipondola umwe okunkhia. Omu mutyipopila veongano Liekongoko Mouye auho, kavehi ovanthu vafima omphepo ikahi nawa, yahavelesa.
Tyomphepo okwasila tyili nokweeta omauvela ouvela wo momapunga, nouvela okuhitakana, nomauvela omakwavo vali. Omanima aeho mouye munkhia ovanthu vekehika po 7.000.000 kombanda yomphepo yasila.
Ohi Yatungwa Umwe Pala Ikale Nomphepo Yasukuka
Mwene ohi yatungwa umwe nawa, ityivila okusukula omphepo ituuka movipuka aviho vifima. Mahi ilisukula vali liwa tyina ovanthu vahalingi ovipuka viisilisa unene. Nkhele tala ovipuka vimwe visukula omphepo.
Ovanthu ovanyingi vetyii okuti, omiti vinana omphepo yokwatokota ipondola okutulinga omapita. Mahi otyipuka ovanthu ovanyingi vehei nawa otyokuti, omaiva omanyingi eli konthele kelunga muna omiti, nao ena otyilinga otyinene. Omiti vikala momaiva atyo omo, vinana omphepo ipondola okutulinga omapita onyingi vali tyipona ei omiti omikwavo vieheli momeva vinana.
Momeva muna otyifo tyimwe tyitiwa kelp ovanongo vokwatanga vamona omanima ano, tyiti tyina tyamanane omphepo yokwatokota, tyiitahela monthata ngamo ikakota. Ovifo viatyo ovio, komafo atyo kuna oumbola, mokati koumbola oo mweyula omphepo iviyalaleka viende kokule. Tyina tyamehiki umwe pahe mokati kelunga, ousaku oo aututana, otyifo otyo atyikanyingila kohi, ngako tyikakala umwe omanima nomanima.
Omphepo mwene ityivila okulipola evi viisilisa. Otyo tyamoneka umwe vali nawa Momukihi Wokolona pweetyi ovanthu vatiwa vahaende-ende. Mo 2020 etyi omatuku-tuku, novipuka ovikwavo vali viomutole viatalama kokweenda, omphepo kayasetele-ale aisukuka. Vokutala ine omphepo ikahi nawa mouye auho vati, mo 2020 etyi ovanthu vatiwa vahaende-ende, movilongo ovinyingi omphepo yasukukile umwe nawa aitavela okufima.
Oityi Ovanthu Vekahi Nokulinga?
Okweenda nomisikaleta katyisilisa omphepo
Ovatumini veli nokutolela ovanthu vahalinge onomakina mbusilisa omphepo. Ovanongo vokwatanga, veli nokututumba vetyivile okulinga ovipuka viahasilisa unene omphepo. Vamwe tupu vati otyiwa ovanthu okweenda konomphai, nokweendela komisikaleta, avahaende nomatuku-tuku, nokutala etyi vena okulinga momaumbo avo vahanyane nolusi.
Movilongo vimwe ovatumini veli nokupopila ovanthu etyi vena okunthiakana pokuteleka opo vahasilise omphepo, mahi vamwe vetupu apa vakwatelela vanthiakana umwe vala evi visilisa omphepo
Mahi omu veongano Liekongoko Mouye Auho, no vo Banco Mundial vapopila, otyo hatyo vala matyisukula omphepo.
Mo 2020 vatile, mouye ovanthu ovanyingi evi vanthiakana pokuteleka visilisa omphepo. Ovanyingi vetupu-ale vali apa vakwatalela, vena umwe vala viokusilisa omphepo.
Oityi Tutila Maihupu?— Oityi Ombimbiliya Ipopia?
“Etyi, otyo tyapopia Huku yotyotyili, Siovaa, Omutungi weulu, . . . Una wokwatandaveka ohi, neetyi tyili-ko, una waavela ovanthu omphepo yokufima.” — Isaiya 42:5.
O Huku watunga omphepo tufima, novipuka viisukula. Ngwe wati umwe oe una ononkhono ononene, oe tupu uhole ovanthu. Otyo tutila umwe Huku una etyi malingi apole-ko evi visilisa omphepo. Tala onthele yati: “Huku Wati Ohi Maihupu.”