Sosiya Ankho Uhole Ovitumino Vya Huku

Sosiya wakala ohamba yo Sundaa etyi ena omanima 8. Pononthiki opo, ovanthu ankho velipaka momangwa nokufenda ovilolo. Etyi Sosiya ena omanima 16, anoñgonoka oñgeni mwene Siovaa ahanda okufendwa. Etyi ena omanima 20, ahimbika okuhanyauna ovilolo nomitala viovilikutila motyilongo atyiho. Etyi ena omanima 26, aviukisa ondywo ya Siovaa.

Pokuli nokuviukisa ondywo ya Huku, omunene-nakwa utiwa o Hilikiya, avasi-mo omukanda mwahonekwa Ovitumino vya Siovaa, tyafwile omukanda una wahonekelwe na Mwisesi. Safaa omuhoneki wohamba atwala omukanda oo ku Sosiya, atangela Ovitumino ovio peulu. Etyi Sosiya eiva etyi tyatangwa, anumana unene mokonda ovanthu ankho kavekahi nokutavela Siovaa momanima omanyingi. Ohamba Sosiya aipopila Hilikiya okuti: ‘Siovaa wanumana unene noonthwe. Enda kapopie nae. Siovaa metupopila etyi tuna okulinga.’ Siovaa atumu omuuli Hulunda evepopile etyi malingi ati: ‘Ovanthu vomo Sundaa vandyeka-po. Mandyivemonesa ononkhumbi, mahi Ohamba Sosiya himemulingi ngootyo mokonda weliola omutima.’

Etyi Ohamba Sosiya eiva onondaka ombo, aende kondywo ya Huku aihana ovanthu aveho vo Sundaa. Evetangela Ovitumino vya Siovaa. Sosiya novanthu aveho avati, matutavela Siovaa nomutima auho.

Ova Sundaa vakalele omanima omanyingi tyahalingi vali otyipito tyo Pasikwa. Mahi etyi Sosiya atanga Movitumino okuti otyipito tyo Pasikwa tyina okulingwa omanima aeho, apopila ovanthu okuti: ‘Tulingilei Siovaa otyipito tyo Pasikwa.’ Sosiya aeta ovinyama ovinyingi mondywo ya Huku novanthu opo vaimbe. Etyi vamana okulinga otyipito tyo Pasikwa, pahe avalingi otyipito otyikwavo tyitiwa Otyipito Tyonombolo Mbahapakelwe Onkhiso, tyalingwa mononthiki epandu-vali. Ova Sundaa vahulile okulinga Opasikwa pononthiki mba Samuwele, avahimbika okwilinga vali monthiki oyo. Sosiya tyili-tyili ankho uhole Ovitumino vya Huku. Okuti ove utyihole tyokulilongesa konthele ya Siovaa?