Sesusi Waavela Okulia Ovanthu Ovanyingi

Etyi o Pasikwa yenima 32 Pomuvo wa Kilisitu ihenehike-po, ovatumwa vakaivisile. Avakondoka tyaponwa unene. Sesusi evetwala ko Mbetesaita opo vakapululukwe-po. Avalondo mowato ngako venda nako. Etyi vehika, Sesusi amono ovanthu ovanyingi koluhimba. Ovanthu ovo ankho vekahi nokulandula Sesusi. Namphila Sesusi ankho ahanda okukala vala novatumwa vae, mahi eveyakula nawa. Wahakulile ovavei, evelongesa. Ehimama onthiki aiho nokuvelongesa etyi tyayemba Kouhamba wa Huku. Mokonda ankho kukahi nokunthikovela, ovatumwa avemupopila okuti: ‘Ovanthu valiwa unene nondyala. Vepopila vaye vakataindye etyi mavali.’

Sesusi ati: ‘Kavapondola okwenda. Veavelei etyi mavali.’ Ovatumwa avapulu avati: ‘Ove wahanda tukevelandele onombolo?’ Filipi, umwe povatumwa, ati: ‘Ngotwavela ñgoo onombongo ononyingi, kamambutuuka-le tukalandele ovanthu ava onombolo, ovanthu ava ovanyingi-nyingi.’

Sesusi apulu okuti: ‘Okulia muna kulifwe-pi?’ Andelee ati: ‘Tuna vala onombolo ononthano nonombisi onombali. Ovanthu ava kamavatuuka.’ Sesusi ati: ‘Etei onombolo nombisi.’ Apopila ovanthu vapumphame ovikundyi-ovikundyi, vimwe 50 ovikwavo 100. Sesusi akwate onombolo nombisi atale peulu, elikwambela. Pahe aavela okulia ovatumwa, ovatumwa avekwavela ovanthu. Ovalume 5.000, novakai novana aveho avali avekuta. Opo okulia kwahapeseke ovatumwa avakongolola ovimbembu viahupa-po. Aveyulisa onosesu 12. Otyipuka otyo tyihuvisa unene, hatyo?

Ovanthu avahuvu unene avahande Sesusi akale ohamba. Mahi Sesusi ankho utyii okuti omuvo Siovaa aholovona opo akale ohamba kaunehike-po. Atumu ovanthu aveho vaye, apopila ovatumwa vayauke Elunga lyo Ngalileya. Ovatumwa avavelama mowato, Sesusi aende aike komphunda. Omokonda yatyi? Mokonda ankho wahanda okukala aike opo elikwambele ku Tate yae. Namphila ankho ena ovilinga ovinyingi, mahi waovolele omuvo opo elikwambele ku Huku.